هتستلم رسمي ولا حبيييييي

الملفات في الحكومه ليها هيبتها زيها زي الموظف بالظبط " لاا انا اسفه مقمها اعلي من الموظف"  ليها مكان تتحفظ فيه وساعات غرفة كامله والملف لازم يبقا سليم والمذكرة علي الشمال والمرفقات علي اليمين والكلام متحاذي. اهم مرحلة هي مرحله التسليم. يوجد مبدأ ان كلو بيخون كلو يعني انسي اديك ملف الا لو سلمتك واخذت صورة وشهدت امة لا اله الا الله عليك. مبدأ التخوين ... مبدأ ثابت واصيل في الحياة الحكوميه. 

دورة تسليم الملف:

المٌسَلم: ممكن اسلم ملف 

المستلم: واريني كدا " يقرأ  ويظل يقرأ  ثم يقرأ  والغريب جدا ان اللي بيستلم هو مش فاهم بس لازم يتفزلك "  فين المرفقات والامضي معوجه.

المٌسَلم: المرفقات اهه ومعلش خلي الامضاء عليك وفوتلي الملف 

المستلم : ماشي علشان خطرك تقولش عملي خدمة العمر

المٌسَلم: ربنا يخليك شكرا اخرج من المكتب وانا منهارة مش مصدقه نفسي 

بما ان اتعمل في اللي بيسلم كدا فيجي اليوم اللي يحصل العكس والنتقام المدمر

اللي كان المٌسَلم: اهلا ازيك معاك ايه

اللي كان مستلم: معايا ملف عاوز اسلمه

اللي كان المٌسَلم: طب اتفضل .. وريني كدا يااااة لا لا دا انت مخدتوش رأي ادارة الزنفولي

اللي كان مستلم: لازم يعني متحاول تمشيه كدا

اللي كان المٌسَلم: الملف مش هيمشي كد وهيرجع تاني مش ممكن "في بالله دا انا هطلع عينك" 

اللي كان مستلم: طب معلش لحسن كل المديرين ميشيوا ومش هلاقي حد يمضيلي الملف

اللي كان المٌسَلم: طب هشوف وبعد تمحيص وتفحيص طب انا هحاول امشيه

وانتهي الموضوع ان الملف اتسلم بعد عذاب  كبيييير لجميع الاطرف

في بقا ملفات ممكن تتسلم حبيي علشان انت عارف اللي بيسلم بس بقا تسمع والنبي خالي بالك والنبي انا مسلمك كدا ورحمة امواتك تخلي بالك وبعد كم من الحلفنات تزهق وتقوم تصور الملف وتمضي عليه  علشان وجع الدماغ

يعني علشان اسلم واستلم ملف لازم نقطع في بعض كدا 

نصيحه خلي بالك من ملفك ليجننك ليدخلك السجن

جرب كدا واسأل موظف

جرب كدا اسأل موظف علي حاجه انت عاوزها ... ادي دقني اهه لو فهمت هو بيقول ايه او عرفت تأخذ منه رد...... ستجد انك لم ولن تتحصل علي اي  اجابه مفيدة ومش بعيد تخرج عيان  بالشلل او بانهيار عصبي الله يكون في عونك يا مواطن .

الغريب  ان زمان الموظف ممكن يساعد صاحبه الموظف... لكن حاليا حتي الموظفين مع بعضهم بيذلوا بعض علي المعلومه  .... دا ممكن يطلع عين اللي خلفوك علشان يقول لك الملف فين  اوجمله مفيدة تفيدك ويمطوحوك.... وتسمع  احلي كلام .... الموضوع ده مش معايا...  اصل مع المدير العام .... تخدك الجلاله وتسأل المدير العام ..ميفرقش كثير  يقول هسأل فلان وتووه انت بقى.

ولا لو غلط ورحت تسلم ملف وتلاقي بقى الملف بيرجع علشان الاسم فوق والتوقيع تحت او مثلا في حرف ناقص " تخيلوا انا بقيت اعمل زييهم برجع ملفات علشان حرف " ايه دا انا اتعديت منهم يا رب اللهم اعفيني. الملف بقى يطلع وينزل ستين مرة ويلف بين المكاتب علشان الحرف لكن مش مهم بقى ميعاد الانتهاء او الوقت المحدد  المكتوب بالملف كل دا يغوووور والمهم اسم الوزير يكتب ثلاثي مظبوط ولو ثنائي يبقا يوم اسود من قرن الخروب.

الغم والغلب موجوديين في كل حاجة والاستثناءات موجودة ومحوطاك من كل الجهات.  الحكومه مليانه خيار وفاقوس علي كبير جدا اللي يجي علي مزاج كبير شئون العاملين اموره تمشي واللي ميحبوش مش بعيد تقعد سنين ولا تقبض ولا توقع لان الباشا غضبان عليك. 
لو ملكش اصدقاء داخل كل ادارة يبقى يومك مش معدي واستحاله تمشي اللي انت عاوزة الا بالطبل البلدي. 
يا عيني يا مواطن يا موظف  غلبان طول عمرك
 طافح الكوته بره وجوه

ذكريات الطفوله

ما اجمل ان يمر عليك ذكرايات الطفولة بحلوها ومرها - اه الطفوله ساعات بيبقا فيها مررر-  كل ما انظر الي التلفزيون واشاهد الاحداث المريرة التي نمر بها احن  اكثر الي ما مضي واتعجب الي ما اوصلنا الي هذا هل هو مقدر لنا ام نحن من اختار هذا الطريق. صعبت عليا مصر وصعب عليا اولادي ومن بعدهم احفادي واتعجب اكثر وادعوا الي الله ان بفرج عنا همنا ويزيح عنا بلائنا.
نرجع بقا للذكريات.
فاكريين يوم استلام الشهاده : يوم ما انا راجعه بالشهاده ونمري وحشه جدا .... ببقا عاوزة الارض تنشق وتبلعني  وبمشي  براحة جدا آل يعني ممكن موصلش البيت وسبحان الله اول ما ادخل البيت امي تعرف علي طول وتقول واريني الشهادة, وقد كان  اسمع بقا ما لز وما طاب  وبعد معناه يعدي اليوم ولكن الخطوه الثاني هو توقيع الشهاده , لان بنسمع  واصله اخري من التريقه والبهدله ويعدي الشهر ونحن في انتظار اللي بعده
فاكريين خروجات زمان : ما اجملها وا ابسطها  كانت بسيطة جدا الميرلاند  وكوكي بارك وجنينة الحيوانات ولكن كان يوجد خروجه زمان ترتبط بي شخصيا وهي المشي الكعابي  وتبدأ الرحله من العجوزة ونخرج الي شارع البطل احمد عبد العزيز نجيب ايس كريم من باسكن رونز "اللي كان فاتح في ومبي" وبعدين نكمل جامعة الدول العربيه  سور نادي الزمالك و سور نادي الترسانه ونرجع تاني للخلف و نشتري كنتاكي دينر بوكس 3 قطع ونرجع للبيت مشي فرحانين مبسوطين وفي قمة السعاده .... شوفوا قد ايه الخروجه بسيطه ولكن كان لها طعم وجميله فاكريين لمة زمان حول تمثيلية الساعه 7 : كان زمان كل بيت في مصر لازم يتلم ويتفرج علي التمثليه العربي مع كوباية الشاي وحسب بقا لو في الصيف يبقا بسكوت وكيك ولو في الشتاء يبقا برتقال سكري يتقطع اربع تربع ويتجرجش ويوسفي.
كل واحد زمان كان عنده صاحب افتراضي :(ولا انت كنت ضايعة لوحدي) ما علينا صحبتي الافتراضيه كانت اسمها ساميه " ليه ساميه معرفش" ساميه دي كانت بتعمل كل حاجة معايا كنت بتكلم وبلعب معها. ساميه صديقه وافيه اختفت بعد انتهاء مرحلة الطفوله. انتي فيين يا ساميه
                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                      






احلي ذكريات من الوقت اللي فات

موظف الحكومه ... الفاضي المشغول

احلي حاجه فيكي يا حكومة ...اغلب موظفيينك  " الفاضي المشغول"   لو ركزت في خصائص هذا الموظف  تجد انه يتصف بصفات ثابته لا تتغير ابد.

• قلما تجد ذلك الموظف علي مكتبه وان سألت عنه او حاولت تكلمه تجد الرد الشهير " بخلص ملف" ووشه مكشر وصوته مجعلص.... آل هخاف من الصوت.
• وان وجدت ذلك الموظف علي مكتبه " اخيرا" تطلب الطلب ...الرد كالاتي "لااااا دا انا مشغول خالص ومطلوب مني حاجات كثيرة .... طب سيبي وهاشوف ان كنت اقدر او لاء"
• ممكن يقف يرغي في الطرقات ويشرب شاي  بالساعات واول ما تيجي تطلبي منه طلب يقول لك " دا انا شغال من صباحية ربنا ..... ويدوووب بسترييح"   البعيد ايه مش بيحس 

 لو فكرت تدخل في حوار مع هذا  الموظف "الفاضي المشغول" ممكن تصاب بسكته دماغية او نوبة صرع  ...يرغي للصبح ومتفهمش حاجه في الاخر  لانه مقتنع ان كل اللي بيقوله صح  ومحدش ممكن يغير رأيه ..لانه مشغول  قصدي فاضي.

الملف معاه يقعد اسابيع ويرجع كله غلطات ومش مستوفي وتصبح كارثه لو راجعته في رأيه  ... تصبح  انت في نظره "مش فاهم  حاجة" وبتعاند وفي الاخر يرجع الملف ويكمل عنده كمان شهر ..... تسأل عن الملف.... يرد ويقولك " انا مشغول"

هذا الموظف الفاضي المشغول عبء علي  اعصبنا وعلي تحملنا وكمان عبئ علي البلد.

ويكون في علمكم ان "هيدي" "حته سوري" الموظف ليس فقط موظف صغير ولكن علي جميع المستويات.

يا رب اللهم ارحمني من الموظف الفاضي المشغول

وهذا اخر حوار بيني وبينه:

...: لو سمحت  ممكن تخلصلي الملف ده بس بسرعه لانه مستعجل

الموظف الفاضي المشغول:  يوووه انتي علي طول كد مستعجله انا ورايا حاجات كثيره جدا

....: معلش تعالي علي نفسك ( مع العلم انه بيفطر وقاعد علي الفيس بوك .. المزرعة السعيدة)

 الموظف الفاضي المشغول: طيب هحاول بس موعدكيش اصلي مشغول جدا ومطلوب مني حاجات كثيره

...: طيب ماشي بس سرعة ( اوفاجئ انه نزل ومشي لانه عنده مشواير وسبني ارن)

ايها الموظف الفاضي المشغول ارحل عن الحكومه ابوس ايدك  وسبنا في اللياحنا فيه
امضاء موظفه مش فاضيه وكمان مشغوله

لبس الحكومه

انا قررت النهارده اكتب عن حاجة مستفزاني جدا وهي " ازاي تلبسي نظيف وانتي في الحكومه " 
انا  مستغربه جدا  تلاقي الناس بتبص علي الجديد  كأنك اعجوبة الزمن الحاضر والماضي الناس مبتفوتش حتي كعب الجزمه  مع ان اللبس دا حاجه عاديه جدا ...ماانتي لازم تلبسي  اومال هتيجي بالبيجامه...  وتلاقي الواحده من دول  تجيبك من اول شعرك او طرحتك لغاية الجزمه. 
ممكن اعرف ايه المشكله اني البس نظيف او البس شيك دا لا يمنع بالعكس ابسليوتلي ....  بس المشكلة ان من حولك  يبدأوا بالعبارات الشهيره " ايوا يا عم ...النظافه بانت عليكي... ايه هبرتي لك هبره  ولا ايه" وانتو عارفين الهبره بتاعت الحكومه  تجلها كدا بعشره جنية فيبتدي النق علي ان جوزك هو اللي جايبلك  او ابوكي  فتلاقي   يأما  اتكسرتي يأما مرضتي . 
ولكن ارجع  واقول عادي لازم نلبس كويس مش لازم نلبس  بواقي اللبس علشان نتقي شر الاعين  ...... 
اللبس داخل  الحكومه مش لازم يكون ... لبس مهبل ....طرح طويله ومفعكشه... شعر منكوش ...جزم زحافي (مالو الكعب حتي لو مدبب) 
 ممكن نلبس كويس وليس بشرط ان يكون غالي (وحتي لو غالي ...ايه المشكله ) ما كل واحد  يصرف في اللي بيحبه. 

وللاسف  تلاقي الواحد من دول ميتكسفش وتلاقي الكلام بيترمى " ايه دا .. في حد دلوقتي بيشتري لبس ولا جزم  انتي ورثتي منتي  محدش بيحسبك ... هو انتي مش حاسه بظروف البلد"  ولا بقى مشاء الله ولا الله اكبر ( اصل الكلام دا مش في القاموس اللغوي بتاعهم)

المضحك بقى تلاقي الواحد من دول يجيب  جزمه وميجيش بيها علشان متدوبش والعربيه يركنها بعيد جدا "الواحد ممكن يخدلها تاكسي ... كل ده علشان محدش يعرف ماركتها"  وهما ثلاثة اطقم بالعدد مبيتغيروش علشان محدش يقول دا بيجيب لبس..

ايها الموظف تحرر من قيود عقدة اللبس الحكومي "لازم يكون مبهدل لتلافي العين"  وفكر انك ممكن تلبس نظيف ومش ضروري انه يكون غالي ولكن يكون في زوق 

حكومه.... اول يوم

وانا سايبه الحكومة ورايحة اشتغل في شغل خاص كان احساسي غريب مضطرب ولكن في شيء من المتعه والتشويق والرغبة في التغيير خصوصا لو كنت تعمل بالعمل الحكومي لفترة ليست بقصيره  تحاول فيها ان تكافح  الروتين والملل (شوكولاته جالاكسي هي اللي كانت مصبرانا) وتحاول بكل طاقتك  ان لا تصبح موظف حكومه وانت تعمل في الحكومة. وفعلا خرجت الي الدنيا ولكن فجأة اتكربس الحال واضطرتني الظروف الي الرجوع للعمل بالوظيفة الحكوميه .... نيجي بقا لاحساسك وانت راجع  تشتغل في الحكومه  من تاني وسايب العمل الخاص يانهااااااار .... شتان ......... احساس كدا كله قرف وضيق وخنقه  (هما مينفعش يخصخصوا الحكومه)  ما علينا  نرجع للاحساس  بما اني رقيقة ومرهفة المشاعر زي  مانتم عارفين طابعا !!!!!  فكانت صدمة اول يوم لا توصف  ..... كان عندي امل ان اجد  كثير من الروتين الحكومي يتغير ولكن للاسف التدهور وصل ان حتي البوسطة اصبحت بتتسلم علي دفتر  بعد ما كنا بنحفظها علي الكومبيوتر .. "بقيت بتتسلم علي سركي" وقال ايه  القيادات طلبت كدا. في مكاتب وفي كراسي وفي وحدة ادراج "الحمد لله" ولكن مافيش موظفين ,مافيش انترنت , مافيش ميل , ما فيش فيس بوك , مافيش تكنولوجيا في التعامل - دا ولا عصر الجاهلية  - ولكن عارفين لاقيت ايه... الحمد لله  موسيقي في الاسانسير "  مش عارفه كنا عاملنا ايه من غيرها . اه ونسيت اقولكوا لاقيت تراب السنين وبي بي قطط يا حلويين .. والمواظفيين متعايشين .. ينهار طين. 

  نيجي للمواعيد الحكومية  في الحضور والانصراف  "معجزة"  الموظف الصبح يجي والراجل بيقفل ماكينة التوقيع كأنه هيقفل علي صباعه وبعدين الموظف ميلحقش الماكينه  فيمضي في ورقه  والراجل يشد الورقه منك ويقولك انت تأخرت اعمل اذن تأخير... اما مواعيد المرواح قبل الميعاد بعشر دقائق الموظفين بيجروا علي تحت تقلش  بيوزعوا امبوبة بوتاجاز ( انتوا لو ركزتوا في مصلحتكوا شويه هتجدوا انكم لو ماضتوا متأخر شويه  هيبقا شكلكوا احلى .. كدا كأنكم كنتم  بتشتغلوا وهمكم علي الشغل.

في فقرة قويه جدا لو الدنيا اتهدت والموظفيين بيكلوا لازم تلاقي الرد  كالاتي " ايه هي الدنيا هتطير .. هفطر واجيلك"

او حد غلط  واتكلم وعاوز معلومة بالتليفون تبقا امه داعيه عليه  وبيبقا بيتعلق بقشايه وتلاقيه بيشحت في التليفون لانه اتصل قبل كدا ومخدش معلومة واحدة ترضيه اوتصبره فتلاقيه بيقولك .

المواطن : الو مكتب فلان الفلان

الموظف :  اه اتفضل

المواطن: والنبي ربنا يكرمك متحولنيش لمكتب تاني لاحسن انا بقالي شهر مش عارف اسأل  علي اللي انا عاوزه

لو الموظف  صعب علية المواطن يديلوا نص المعلومه ويحيره في النص التاني

ولو الموظف قلبه مييت : بعد ما يوعده ويشعره انه مهتم يقولوا بكل برود .. لا والله الموضوع مش عندي

المواطن : شلل رعاش وساكته

الي كل موظف حكومه رجل او امرأة اتقوا الله في اخواتكم المواطنين دول غلابه كفايه عاليهم اللي هما فيه

اراكم في حلاقات قادمة في يومياتي في الحكومه