النشيير وسَبت الغسيل

الغسيل والسَبت  والنشيير واخيرا التطبيق يشكلوا احد اهم العواقب التي تهاجم الست في حيتها (انا بكرة الغسيل) يمكن مرحلة وضع الغسيل في الغساله هي اهون مرحله  انا بشكر مخترع الغساله مش عارفة لو من غير غساله كنا هنواجه الهم ده ازاي.

اكم من ناس اعرفهم،  كثير من مشاكلهم اليوميه علي الغسيل. يإما قميص ضاع لونه يإما لسه متبقع والبقعه مراحتش يإما الشربات استكها هرهر ولا الملابس الداخليه والاصفرار ومحدش يقول مبتصفرش لان حتي مع الكلور بردوه بتصفر وبتمط .
مع الوضع في الاعتبار انك بتحاولي تستعملي اي منتجات جديدة. منتج لازالة البقع ومنتج للروائح الجميلة ومنتج لمنع الهرهره والاصفرار. وبردوه بيحصل مشاكل ويمكن تنزلي متنكده من البيت ومتخنقه بسبب الغسيل  تقوليش  الغسيل دا عدوك ولا ضرتك متصلط عليكي.

تنتهي اسهل مرحلة ويبدأ الغم..... الغساله خلصت ويلا هننشر "اخيييييييييي" تروحي تجري تلمي اللي علي الحبل, الاول ترميه علي السرير وتخدي الطبق وتجيبي الغسيل من الغساله وتنتعي  و"هوووووب "وتروحي علي البلاكونه لازم يوجهك حاجتين الحبل الاخير وقرفه وخصوصا لو حامل بطنك من كبرها وزنقتها في الصور هتفرقع وبردوه مافيش فايده لازم تنشري، والمشكله الثانيه نقص الموارد "اي المشابك"  وتقعدي  تلبسي الغسيل في بعضه وتحطي ثلاث حتت بمشبك واحد .... وتقعدي تفكري  انك لازم وانتي بتلميه تخلي بالك لان ممكن يقع. والنكته انه لازم في حاجات تقع في اللي تعرفي تجبيه، وفي اللي يحَصرك ويقع علي فرع الشجرة ويتعلق كأنه قاصد يزل فيكي "ما انتي كل مره تطلعي تنشري هتشوفيه وتتحصري وياسلام  لواللي وقع حاجة خاصه بجوزك او اولادك  يبقا يومك مش فايت , تفكري هتقولي ايه وتبرري عملتك السودا واهمالك ازاي.

نيجي  لنهاية المطاف: تروحي للغسيل اللي علي السرير في ثلاث انواع  من الستات  للتعامل مع هذا الموقف المعقد ..........في اللي يطبق ويشيل ويدفس في الدولاب علي طول ودا نوع طبعا جميل جدا بالرغم من ان الدولاب في حد ذاته اصبح كارثه بيئيه بس مش مشكله المهم ميبقاش في غسيل علي السرير، وفي نوع يطبق ويسيب علي السرير ويسحب حته بحته، واخر نوع يعدي علي الغسيل ولا كأنه شافه ويسحب منه بردوه وهو علي السرير.

تفتكرو الموضوع يخلص لحد كدا لااااااااااا..........تجري جرييي تروحي تملي الغساله بالغسيل اللي بعده علشان يدوب لما دا ينشف تحطي دااااا. الموضوع دا ملازمنا في حيتنا  ومتحوليش تهربي منه ابدا لانه هيهجمك اينما كنتي .

في  حاجات صغيرة مرتبطه بالغسيل ممكن تنكد علكي بردوه وهو مثلا المكوجي فتبقي بعد ما تكوني عديتي كل المراحل وتفتكري انك نجحتي يجيلك المكوجي يإما مضيع القميص يإما حرقه والظريف انه يجيلك وهو متنح كأن مافيش حاجه ما انتي غنيه بقا وهتجيبي غيره ....... يااااااااا لهوييييييييييي ميعرفش ان المشكله مش مشكلة فلوس دا مجهود وخناق ونكد

اللهم ابعد عنا نكد الغسيل وقرفه ... اللهم ابعد عنا غباء المكوجيه وقرفهم 

بدون عنوان

من يقول ان ما تمر به من احداث او ظروف في حياتك وانت صغير لا تؤثر عليك او علي قراراتك او حتي انفعالاتك  فهو خاطئ . انت من الممكن ان تستحمل  الكثير من المواقف الحياتيه المؤلمه لمجرد انك عايشت او شاهدت مثلها وانت صغير فتقرر ان تنتصر عليها او العكس تتمرد علي حياتك  لانك عشت ظروف ومواقف مماثله  سببت لك آلام . قراراك في التعامل يتوقف دائما علي مدي قدرتك علي التحمل وعلي من حولك من اشخاص تقابلهم يزيدوا من قوتك اومن ضعفك.

انت دائما تقوا او تضعف بمن حولك.. ولكن حاول دائما ان تصمد .. الله دائما بجانبنا لا ينسي من يتقرب له

حياتك مليئه بالمواقف المعاكسه او المشاكسه . من يقول لك لا تتوقف عندها انا اعارضه . انا اقول لك لابد ان تتوقف عندها  تأخذ منها ما يليق لتكملة المشوار وتلقي بالبقاي.

تغيير فيا الكثير عندما قابلت ناس بعينها . يوجد من غير في شخصيتي  وفيي من ساعدني علي تغيير سلوكي  ومن يريحيني ويطمأنني . هؤلاء الشخاص كنز لا يفني ابدأ .........تأخذ منه ويستمر في عطائك دون ان يطالبك بمقابل.

ويمر بحياتك شخص  دائما ما تشك انه يعاندك او ضد مصلحتك ولكن تمر الايام ويصبح هو حياتك ومصدر ثقتك ......لا تتعجل في حكمك علي الناس معتمدا علي ما مريت به من ظرووف او ما عنيت منه . التراب دائما يخفي جواهر.

كما يوجد الكثير من الناس تعتقد انهم اصدقاء ومع اول موقف يتضح انهم يبحثوا عم المصلحة ........تنتهي معرفتهم بانتهاء المصلحة. هؤلاء لا تنزعج من مقابلتهم لان لهم فائدة . وفائدتهم انهم يزيدونك خبرة في التعامل مع البشر.

استفيد من من حياتك علي قدر استطاعتك ,,,,,,,,,, استفيد من الاشخاص الذين بمرون عليك دون ان تفقد الكثير منهم " معرفة الناس كنوز"

خلص الكلاااااااااااااام

اجتماع المسئول ..لذه ما بعدها لذة

الاجتماع الحكومي صفاته وحده مبتتغيرش ومن اهم صفاته هو الرطرطه والرغرغه (محدش يسأل آيه الرغرغة) علشان انا معرفش. المهم ما اجمل ان تسمع  كثيرا عن ان تتكلم علشان محدش يمسك عليك حاجه مش بس كدا.... لا يادوب تخرج من الاجتماع وكل اللي انت قلته يبقا علي كل لسان ومتزود عليه كمان .... يعني لو حابب تعييب في حد ..... في اجتماع زي ده يكفي انك تجيب اسمه هتلاقي الف مين يزود علي كلامك ومش بعيد تطلع متجوز امه او سارق درجته الوظيفيه... اصل فعالين الخير كثيرين. نيجي للمهم في الاجتماعات دي هتلاقي الآتي  اللي متلمع واللي متغندر واللي عاوز يبان واللي بيحاول يعرض وجهة نظره ولكن لايجيد التعبير فتعك علي دماغه واللي بيحاول يرمي كلام علي مديره آملا ان يشعر المسؤل بكلامه ويعرف قد ايه هو مطحون ومتمرمط مع مديره .. واللي بيرصد وينقل  ويزود. وفي العاقل والموزون ولكن حقه مهضوم لانه في اغلب الوقت علي طول مطحون. وفي اللي مستنيلك علي وحدة علشان يطلع عينك بعد كده سواء بالتلئييح او بالتتنيح, واللي بيتفشخر بمعلوماته, وفي الناس بتوع اخر الصف في المدرسه قاعديين مستمعيين مش بعييد بييشيتوا ولا ليهم في الثور ولا في الطحين المهم انهم متواجدين ولكن في اغلب الوقت متخفيين.  " علشان محدش يسألهم فيطلعوا مش عارفيين"

نيجي بقا للمسؤال ... تاخد منه احلي كلام واحلي ضحك ونظرات .. الراحه والطمآنينه بتنط من عينه " عارفيين كدا  التنويم المغنطيسي . لازم تسمع انا دايما معاكم ومش ضدكم ....  انا جاي اريحكم " تقولوش ان في ايده كل الحلول واللي يدور يلاقي انه في الآخر ميقدرش يعمل حاجة علشان بصراحة كدا " ما فيش فلوس ........ ما فيش معدات ............ ما فيش لوائح  ..... ما فيش" بس في الاخر هيريحنا " ازاي معرفش .... أه  انا عرفت ليه جابوا عربية نقل موتي  علشان دي الحاجة الوحيدة اللي ممكن يريحنا فيها.

بيصعبوا عليا قوي ... والله بيتعبوا .. المسؤل من دول  بيشيل شنط ملفات للعرض يسهر عليها كل يوم الي جانب انه بيخلص كم اقلام حمرا مشفهاش في حياته " وبذلك يكون تخلص من عقدة عدم استخدام القلم الاحمر" علي فكرة دي عقدتي الشخصيه.

المهم يخلص الاجتماع علي ولا شئ. يصبح الاجتماع عرض لمشاكل شخصيه  اللي عاوز يروح بدري واللي عاوزه ساعة رضاعه واللي عاوز اتوبيس تحت رجله واللي عاوز شغل جانب بيته والمسئول محتاس ثابت علي مبدء الهدوء ليكسب شعبيه اكثر ويرد رد باليغ " حاضر هحاول .. ان شاء الله" بما لا يخالف القوانيين " علي ميين"

واول ما يحاول يخلص الاجتماع تلاقي حبه كدا حلوين متلميين حوليه اللي عاوز ؟؟؟ واللي عاوز!!!    ........... معلش اصلي مسمعتش هما بيقوله ايه .

ويخرج من قاعة الاجتماعات يشكر الله علي انه انجز مهمته السياسيه.

 ويخرج الموظفيين جزء منهم عنده حالة يأس وجزء توقع انه اوصل رسالته

نصيحة للمسؤل قلل الاجتماعات ولو عاوز تجتمع  قوي ومزنوق في الاجتماع للوجاهه السياديه  حاول تقلب الاجتماع مش لازم  يبقا ساعات لانك بتهنج.

نصيحة للموظف ........... ارجوووووك بطل فزلكه مفئوسه قوي اليومين دول.

كوز ذرة .....وبطاطيه

ايه يا ست انتي....... انتي علي طول مفتريه كدا  فيها ايه لما تعملي انتي عيد الحب علي اديكي .....حاجة كدا صنع اديه وحيات عنييه.

الراجل دا كائن جميل  ويمكن السيطرة عليه بالاداء الصوتي والحركات الانسيابيه  " شغل فرشات يعني"  تعالي علي نفسك وحبيه .. استغلي اليوم  واطلعي بيه من المود النكد الرتب  التي اعتادتوا عليه .

اليكي بعض النصائح لكيفية الاحتفال باليوم  سأراعي ان الرجل  ردود فعله ليست علي قدر توقعاتك (وانتي كمان متحبكهاش قوي)

1. لو لسه متجوزه جديد  ...  خروجه حلوه باليل علي العشاء " انا عرفة انك علشان تنزليه هتكافحي كثير بس معلش استحملي لغاية لما تنجحي وتحققي هدفك لو قدرتي تظبطي المكان وهديه مفجأة يبقي "فل قوي" . في الحاله دي الرجل  رد فعله سيصبح متوازن ولا عالي المشاعر ولا واطي !!!!!! اشكري ربنا عليه  .. غيرك مبيلقيش.
2. لو انتي متجوزه بقالك فترة ولسه مفيش عيال : بلاش نكد بقا و تصميم ان الخروجه تبقا لوحدكوا ...وبلاها مفجأة ..... في سعتها  كدا انتي وهو كلموا كذا حد من اصحابكوا واخروجوا مع بعض ..... دي الخروجه اللي بالنسبه له مثاليه وبالنسبه لك غير اعتياديه لانك مبتخرجيش اصلاً . وفي اغلب الاحيان بتقلب بتريقه علي الستات... اللي موجوده " واحده شكاكه والثانيه نكديه والثالثه ربنا يعلم" المهم انها بس متقلبش منكم بنكد او طلاق " ايهما اقرب"
3. اخيرا لو متجوزه ومخلفه .. هنا الموضوع يختلف.. اعتبري نفسك بتعلمي اولادك في المستقبل كل واحد هيعامل الموزز بتاعه ازاي في المناسبات وفي نفس ذات الوقت بتفكري جوزك باللحظات الحلوه " خلاصه كدا حلقة تذكيريه تعليميه. بوكيه ورد وكرت عليه اسماء العيله كلها وكيكايه حلوه كدا وبالليل قبل الولاد ميناموا , احتفلوا مع بعض حلويين.

انا بجد في الاول مكنش قصدي اكتبها كدا ولكن فلتت مني ومعرفتش  اغير طريقتي في السرد ولكن اخيرا وبجد.

لو انتي  من الناس التي تجيدي الاحتفال بالمناسبات اوعي تفوتي اللحظه علشان هو مبيعرفش او انك مستنيه حاجة معينه ... لااااااااا . ابدئي انتي لان استغلال المناسبات للاحتفال حاجة جميله وبتكسر حاجز قد يكون بيكبر نتيجة للظروف المحيطه فبذكائك المعتاد اكسري جزء من الحاجز واستمتعي بوقتك معه بأي طريقه تفضليها ان شاالله بكوز ذره وبطاطايه

علي فكره كل سنه وانت طيب .......... بحبك

حبيييب قلبيييييييييي

عيد الحب جاي يا حليله ... كل سنه تتخيل ما سيحدث في عيد الحب .. العصفاير تغرد  والكمنجات شغاله وعزومه حلوه علي العشاء وتتخيل وتتخيل ... حبيبي  يفاجئني بهديه جميله وبوكيه ورد..... فجأة ...اليوم يبدأ ...كلا من الطرفين صباحا شغل  وطول اليوم تتخيل الحبيبه انها فجأة هتتفاجئ بحاجه واووو .... بعدي الظهر ومافيش ولا كلمه ولا تليفون .. ترجع البيت  في بالها " شكلها كدا  الخروجه مش علي الغدا " تعمل غدا  سريع كد لانها متأكدا انها هتتعزم علي العشا " عيد الحب بقا .. تخلص المذكره مع الولاد وتحاول تنيمهم بدري .. وتستني وتستني ... وفجأه  هه الحبيب بيلبس .. الحبيبه في بالها " هو مش هيقول البس ولا ايه" .. دا خلص لبس وجاي عليااا .

يقول الحبيب : عاوزه  حاجه يا حبيبتي انا نازل . باي باي

ايه دا نسيي... مخدش باله... لا دا مقلب هو هيفتح الباب حالاً ويقول انا بهزر.. انتظرت كثير ولم يرجع ولم يفتح الباب.. 

فكرت الحبيبه هل تكلمه وتذكره أم مازال في أمل ....أو مفجأة كما تتمني ...وتعدي ساعات لا يأتي ولا يتحدث.

ماذا تفعل؟ .... اكلمه .. ابعتله رساله.... اقوله انا ... ابادر وابتدي انا ....وعلشان انا بحبه وبخاف عليه قررت الاتي!!!!

كلمته في التليفون وقلتله كل سنه وانت طيب 

قال: ايه دا ليه 

قلت : يا مثبت العقل انتي الاكبر والاعقل  اصل النهاردة "عيد احب"

قال: اه ه ه ه  وانتي طيبه يا حبيبتي

قلت : ان قلت ايه " اصل انا بتلكك"  طب هتعمل ايه دلوقتي

قال: ولا حاجة شويه كدا وهرجع

قلت : طيب قفلت التليفون

راحت عليها نومه وصحيت الصبح  مكنش لسه وصل البيت ونزلت الولاد المدرسه ولبست وراحت الشغل

رجع البيت وكلمها وقالها انتي رحتي فين .... ردت الحبيبه نزلت الشغل اقابلك بقا عيد الحب القادم

انسوا بقااااااااااا كل الكلام الي فات ....  اللي تقدروا  تعملوا  اعملوا بلاش تقفوا لبعض علي الواحدة ....اللي فيكوا هيعمل ويبادر اكيد انتوا الاثنين هتنبسطوا.... هو انتوا غاويين نكد علي بعض .. المناسبات دي اتعملت علشان لو زعلانين تتصلحوا وتحبوا او تخرجوا من الحياة الرتبه .....

كل سنه وانتم طيبين وكل عيد حب  وانتم سعداء 

الي حبيب قلبي ... ادعوك الي يوم جميل كله حب وسعاده  

جوزك قرفان

لما جوزك يبقي قرفان وحواجبه قلبه 8 .............. في حل؟ ... 
لما جوزك يبقي قاعد حاطط رجل علي رجل وجهه مكعشر وباصص امامه ... تعدي مهما تعدي واستحاله يعبرك............ في حل؟.

في الاغلب لا يوجد حل ممكن تستعيني به لانه يعتمد علي نوعية الراجل وطريقة الست في استيعاب رجلها  ولكن ممكن ان نطرح بعض الطرق المختلفة علي سبيل النصيحه  " صحيح كل الصرق تقريبا بتفشل " ولكن  هنعمل ايه ما باليد حيله.

•  طريقة وديه بسيطة  لا تستخدم عامة من قبل الزوجات  -  وهي السؤال لمره واحده عن مزاج الراجل وان رد خير وبركه.... وان لم يرد تنسحب بهدوء .... وهي تسأليه ... مالك يا حبيبي في حاجه .. الرد كالعادة طبعا مفيش ( يصاحب الرد علامات الكرمشه علي الوجهه مع تكشيره.....  لايلتفت اليك وانت تسأليه).

• من الممكن ان تجربي  ان تتكلمي في اي موضوع أخر محاولهً منك ان تخرجيه من ما هو فيه - الحوار كالآتي:

الزوجه : ايه رئيك في المشنكاح  انا جربته جميل.... اجبلك

الزوج : سكوووووووووووووووووووت مع عدم الالتفات لها

الزوجه: طب انا جبت بولولم ومعرفتش اقفلة ممكن تساعدني

الزوج : سكوووووووووووووووووووووووووت اطول من اللي فات

الزوجة: انت مبتردش ليه

الزوج : معلش اصلي مش رايق وقرفان وانتي عماله ترغي في حاجات مش فايق لها دلوقتي. ( طبعا  واضح جدا ان الطريقة منفعتش.... ولو مش مصدق انظر الي  ما سبق)

• طريقة الزوجات المعمرات  .... اللي خالاص مبقاش يفرق معهم ذوي الخبره الحياتيه...........  والحوار كالآتي:

الزوج : مكشر .. اعملي  شاي

الزوجه : في صمت رهيب تقوم تعمل الشاي وتضعه بجانبه

الزوج: يشرب الشاي من غير ولا كلمه باصص في الموبايل  وفي اغلب الاوقات لا يشعر انك احضرتي الشاي.

الزوجه : الاوقات دي هي قمة السعاده تروح بسرعه  تخلص الحاجات اللي نقصاها  وتعمل كوب من الشاي وتختار مكان بعيد عن الزوج وموبايلها في اديها .. مع توصيه للولاد بكم من الغضب ورفع الصواباع  " اوعو حد يروح "لبابي" لانه متنرفذ.....

الطريقة دي بتجيب في احوال وتقلب بغم في احوال اخره وتعتمد علي مدي قرف جوزك لانه ممكن من كثرة قرفة يتلكك انك سيباه ولا سأله فيه " وتبقي وجعة مطينه بطين"

• نصل للطريقة الشهيرة التي تمتاز بها كافة الستات وهي طريقه  " الزنننن" والستات ميتوصوش بالزنننننننن

علي نغمه واحدة ومبتبطلش ... مالك ..هه... مالك بس قولي ... مقريف ليه .. طب قول مالك ... قول ... لاء انت راجع من بره مقريف ... طب قول جايز اساعدك .... وفجأة بعد طول سكوت  يرد بهدوء  وعلامت التزمجر علي وجه " مفيش حاجه انا كويس بس مش قادر اتكلم وتعبان"  ولم تأتي بثمارها

من الاخر استحالة الاعتماد علي طريقة واحده اللي نفع مع زوجة اولي سنه زواج ميجبش مع الزوجات المعمرات والعكس ..........

 نصيحه للرجاله.. قرفان طهقان زهقان .. الحل مش انك تقعد علي جنب غلبان اوعى تفكر ان  احنا مش طهقانين او قرفانيين ولكن احنا علي الحال  صابريين ودايماً علي زعلكوا خايفين