الثلاث مستحيلات

اكتشفت ان كل ما يعدي الزمن ونكبر في ثلاث كلمات  بيقل او يكاد يندر استخدامهم مهما اجتهدنا في غرزهم داخل ابنائنا. 

" اسف - شكرا - بحبك" 

انا مش بطبعي تفكيري عنصري ودائما أٌتهم  ببعض الانحيازيه للرجال في كثير من الامور. ولكن يأسفني ان اقول ان تلك الكلمات علي وجه الخصوص "بيعملوا قافلة عند الراجل"... "تقلش الكلمات دي بتقرصهم " لازم يطلعلك اي مبرر حتي لا ينطق بتلك الكلمات المريعة الفظيعة. " ممكن يكون ليها علاقة بالرجوله والكرامه والهيبه " الكلام الكبير دا ، لازم نسأل حد خبير.

وكل ست  بتحاول لما تخلف "ولد" تعوده علي ان يردد الكلمات  خلفها حتي لو مش في مكانها ، المهم انه يتعلم يقولها ، ويا حرام الست تبقا فرحانه قوي ابنها بيعرف يقول شكرا وكمان بيقول بحبك يا مامي ولما بيغلط بيقول اسف ، وفجأة عند مرحلة محددة يبدأ الجيين الرجالي يلعب وينسي كل التعليم اللي فات ويفقد الذاكره ويبطل يقول الثلاث كلمات . 

ولو سألتيه ايه يا حبيبي المفروض لما اجبلك حاجة جديدة تقول شكرا وتبقي فرحان

يرد الولد طب ما انا فرحان مش باين ولا ايه بس انا كنت عاوز ....... وميقولش شكرا.

طب الابن مقدور عليه حسب المثل المشهور لو "ابنك تبلعلوا الظلط " انما جوزك حبيبك وراجلك تتصرفي معه ازاي . ازاي ممكن اسمع شكرا يا حبيبتي  من غير الكلمه المشهورة " ما دا واجبك والمفروض تعملي كدا" طب ما انا عارفة ولكن ميرسي او شكرا بتدينا حافز للاستمرار.

او مثلا انا اسف اني زعلتك، اهي دي من رابع المستحيلات لان اولا ما فيش راجل بيعترف انه غلطان  ولو حتي  شعرتي مجرد شعور انه غلطان يبتدي يتوه الموضوع  علي عينة " اصل انتي اللي بتفهميني غلط - انا مكنش قصدي كدا - هو ليه اخذتيها علي المحمل دا - والتتويها الكبيره "قومي اعملي شاي". وبردوه مش هتسمعيها.

نيجي بقا للزغلول الكبير " بحبك"  ممكن يقول بحبك لطوب الارض ويجي عندك ولسانه بيهنج بيجيله تشنج عصبي ، ليه بيحصلك كدا بالرغم من انها سهله جدا ومش لازم تقولها عمال علي بطال.

تمثل كلمة بحبك للمرأة  معني كبير تشبع رغبه بداخلها ليس بشرط ان يصاحب القول هديه ولا يكون القول مفتعل "هتفقسك".
قول وانت عينيك تلمع وتبتسم وصوتك هادئ وفي وقت مفاجئ لها وليس متوقع وشوف احلي اندهاشه. افرحي يا حلوه وزغرطي حبيبك قالك بحبك.
علي فكرة  اةعي تفتكر انك لو اعتدت علي قول الثلاث  كلمات المرعبات اننا لسمح الله سينقص من كرامتك او مثلا هنتمرع  بالعكس "ابسليوتلي "  انت لديك الكثير من الاداوات التي يمكن ان تفوقنا بها مش الكلمات دي اللي هتغيرنا او هتغيرك
وفي النهايه ايتها المرأة  لا تنتظري ان تسمعي ولكن احتسبي افعالك عند الله واكيد هو سيكافئك ، وانت ايها العزيز الغالي بلاش الثلاثة اختر الاسهل منها واتعلم تقولها واعتبرها نوع من الذكاه

  

قعدة بنات

ما اجمل قاعدة البنات ! رغي ونميمه ووصفات اكل جديده ، تحسين للعلاقات الزوجيه او عكننه ونكد وممكن تختم برقص وغناء. قاعدة البنات لا تعوض.

وكل مرحله ليها جملها وانتي صغيره لمة البنات تلاقيها عن اخر الحاجات اللي اشتريناها واحدث الاغاني وتسريحات الشعر، كلها قعدات تتصف  بالبرائه " عيال بقا" .

تكبري شويه تلاقي وانتي قاعده محور حديثك عن الولد دا متألط ، الواد دا مغرور وفاكر نفسه حاجه ، ودا جميل وكيوت وطيوبه كدا ، وفي اللي زي اخونا ودئما في القاعده دي تلاقي بنت  لا تشارك وتسمع فقط لان معندهاش التطلاعات دي وحاسه انها مش حلوه ومش هتعجب الولاد فتسمع وتحلم وتتمني في يوم ان تتكلم عن الولد اللي هيموت عليها وهي اللي رافضاه . وبعدين في الاخر تختم بأكله حلوه وفرجه علي فيلم "النهايه بتختلف من بنات لبنات"

نيجي بقا لمرحلة النضج والكبر لو ربنا كرمكِ بشله حلوه تصبح قعدة الستات  ملاذ لخروجك من حياه رتبه ممله  ويمكن تخرجي منها بمواقف تساعدك علي حياتك العاديه.

تبدأ القاعدة بصطباحه خفيفة كدا، كل واحدة عملت ايه في يومها وتلاقي واحده بتضحك وفي اللي  بيتتريق  واتخبطي في اللي بتنصح.  

ونيجي بقا للموضوع الرئيسي للقعدة وهو دا بيبقي صلب القعدة وبيأخذ اغلبيه الحوار " وطبعا دا بيختلف كل مرة" بيبان فيه شخصية كل واحدة مين تقدري تعتمدي عليها ومين تخدي كلامها وترميه في البحر ومين العنصر الملطف اللي يهون عليكي الكلام لو بيوجع.

المواضيع الرئيسيه دي تأخذ اشكال كثيرة ولكن اغلبها تناقش العلاقه بين الراجل والست ، من حيث الحب ، الخوف من الخيانه، غيرة الست علي الراجل ، نكد الست ، لا مبلاة الراجل ، خروجه  الدائم علي القهوه ، استهطاره ، هسهسة الستات.   وهلما جرة.  وكل واحد وحسب ما الموضوع مسها يأما ينكد عليها يأما تستفيد منه.

الحوارات بهذا الشكل تساعدك علي  ان تخرجي كثير ما بداخلك ، وتساعدك علي اقتناء افكار جديدة منها اللي هيفيدك ومنها اللي هينكد عليكي، ومن هنا تبدأ نقطة جديدة  متخديش كل اللي بيتقال انه كلام مسلم وتروحي تطبقي علي حياتك لان من الممكن ان لا يتماشي مع حياتك الشخصيه او الزوجيه " خدي اللي ينفعك وبلاش غشامه في التنفيذ"

القعدة دي بيصاحبها الساقع والسخن والاكل والتسالي وتختم القعدة بكلام الستات الاذيذ اللي كل ست  منا عرفاه وتتعالي الضحكات ويمكن ان تلمع عينك من كثرة الضحك.

وهكذا نختم قعدة السمر بمووود مرتفع ضحكات وابتسامات.

نصيحة لكل بنت وست لا تتهاوني في ان يصبح لكي قاعدة ستات " متقوليش كلام الست المصريه الاصيله " اصل البيت والعيال والراجل والطبيخ" كل دا هتعمليه ولكن انتي ليكي حق علي نفسك حتي تستطيعي ان تقاومي وتكملي وانتي سعيده وليست مجبره لانه واجب عليكي مش لانك تحبيه.

اعتبري قعدة الستات هي شوكولاته جالاكسي اللي تخليكي تعدي كل اللي بتشوفيه

 

الاغنيه والنفسيه

كل واحد فينا محفور في زهنه كثير من الاغاني مرتبطه بحالته النفسيه يبحث عنها عندما يحتاج اليها ، لو زعلان يبحث عن اكثر اغنيه تعيسه تجعله يبكي "للتفريغ" ولو فرحان يبحث عن احلي اغنيه يحبها ومش بعيد يغني ويرقص معها .  

لو دققت هتلاقي في كل مرحله مرة عليك ترتبط  باغاني محددة ولا يمكن تنساها مهما مر الزمان.

في اللي فاكر اول اغنيه English سمعها في حياته علي اعتبار دي اول الروشنه, في اللي فاكر محطة FM زمان علشان المذاكرة لانها كانت المحطة  الوحيده اللي بنسمع فيها اغاني وموسيقي علي طول  وفي المقابل  وقتها كانت محطة أم كلثوم للكلاسيكيات الجميله.

زكريتنا مع الاغاني لن تنسي ابدا  اول اغنيه وانا بحب ، واغنية الرقصة الاولي مع حبيبك ، اغنيه اول زعل ما بينكم ، اغاني المذاكره، اغاني هرتلة الاصحاب وكل واحد فينا عندة ما يكفي من الذكريات التي ترتبط باغنيه محددة في منها المؤلم وفي منها المفرح.

كمان الاغاني ممكن تكون سبب ان تجمع بين اثنين او تفرق بين اثنين لو جمعتكوا مافيش مشكله لكن المهم في الفرقه يعني لو حبيبك غير زوقه في الاغاني فجأة الشك هيراودك وتبتدي تفكري يبقي في اكيد حاجه جديدة حصلت "حب جديد مثلاً  ... وتبتدي بقا تنكدي عليه وعليكي علشان اغنيه" ما تجربي تسمعي الاغنيه جايز تحبيها.

ممكن اغنيه ترفع مودك وممكن اغنيه تكمل عليكي وتطرحك ارضا ولكلاٍ منا  زوقة, المهم الذكري الحلوي لن تموت ما زلت تسمع الاغنيه المرتبطه بها اما الذكري النكد انت وحظك . 

• فرحتك بأبنك الصغير وهو يغني اول اغنيه حفظها يعني مثلا  " ومن الشباك ارميلك حالي " تصبح ام الشباك ارميلك حالي. ممكن تلاقي "يا ماما يا أما يا أماتي احتراماتي سلامتي كوكولاتي". ذكريات اولادك لا يمكن ان تنسي.

• اول اغنيه اسمعها لأم كلثوم وانا 7 سنوات والنور مقطوع علي راديو ترانزيستور بحجارة  وابويا صمم يحفظهاني وهي كانت (عودت عيني علي رؤياك)  لن انساها وحفظتها عن ظهر قلب.

• كما اذكر جدتي زمان كانت تجيد الخياطه علي ماكينة  واتذكر ان يوم في الاسبوع اجلس بجانبها علي ضوء الماكينه وهي تسمع محطة ام كلثوم بداية من الساعه 5 والفضل يرجع لجدتي في حبي للاغاني القديم.

• كما قص لي احد الاصدقاء انهم استغلوا بعض الاغاني الذي يحبوها وصورها فيديو كليب علي طريقتهم بصوره كوميديه علي سطح عمارة واحد من اصحابه وهو يحكي لي فاكر كل اغنيه  وهو يضحك يتذكر اصحابه وقال لي " دي ايام لن تعوض"
•  حكت لي صديقتي ان اغاني اليسا تحيي مشاعر الحب بداخلها وكل ما تسمع اغانيها تلمع اعينها وتبحث عن اغانيها لتزيد من مشاعرها توهجا. او تبحث عن اغاني تساعدها علي اجتياز حزنها
•  الاغاني ياترفع نفسيتك فوق يا تنزل بيك تحت  
• من الممكن ان تجلس في قعدة اصحاب كلها ذكريات بسبب الاغنيات  منهم اللي هيفكرك بأغاني الثمانينات والتسعينات  والضحك بقا هيبقي للركب.
• وممكن في قعد رومانسيه تتهبلي وتسألي جوزك فاكر يا حبيبي اغنيتنا المفضلة اواغنية اول راقصه او اغاني شهر العسل " المهم انه مش هيبقي فاكر وتبتدي انتي تفكريه  وتصبح الجلسه جلسة ذكرايات جميله. (او انتي وحظك ممكن تقلب بنكد)

  حاول دائما ان تربط ذكرياتك الجميله باغنيه محددة  ... كل مره تسمع الاغنيه هتفتكر الذكري

اما الذكره السيئه ما تقلقش هتلاقي ميت اغنيه واغنيه تفكرك وتوجعك.