ثلاث كلمات اصبحوا يتحكموا في حياتنا
سواء بالفرحه او بالغضب او حتي بانتشار معلومه سواء صح ام خطأ.
الحوار الاساسي دلوقتي بين اي اتنين
....هو انت ليه معملتليش لايك؟
نعم !!...هو انت هتلايك بس؟! ،
طالما البوست عجبك يبقى لازم تشير.
الكومنت له تأثير السحر .... ممكن
بكومنت تبقي فوق.... وبواحد تاني تبقي في الارض.
الشخص اللى بيكتب اي بوست حتى ولو
"نكته" .... لازم يبقى بيتمتع بمواصفات فريدة عشان الاقبال عليه يبقى
"جماهيري".... فمتخليش الناس تزهق منك!!!!! انا عارفة انه صعب عليك ولكن
راعي الغلابه اللى معاك..... الناس ليها طاقة علي الاحتمال والمثل بيقول
ايه؟ "ان كان تشييرك عسل ..... متشيروش كله" وكمان نوع في النشر اللي
بتتحفنا بيه.... لانه شئ اساسي ومطلوب ... الواحد منا له طاقة في الاستيعاب .....
مينفعش يبقى "كله ضرب ضرب ما فيش شتيمه"
انا بقولك كدا علشان انصحك لو فضلت
علي الطريقة دي في التشيير ، "اتباعك" هيقلوا...... ويمكن يتحولوا من
ناس نشيطة "بتشير" ..... لناس "بتلايك" فقط ويمكن تخسرهم
للابد..... عشان كده هنصحك كام نصيحة تساعدك في انك تتلقي اكبر عدد من
"اللايكات" او "الكومنتتات" او ربنا يكرمك وتبقي من اللي
يتلقوا الثلاثة مع بعض :
- اتقل علي زباينك .... وبلاش "التشيير" اللي عمال علي بطال.
- نوًع موضوعاتك : يعني لو انت من النوع اللي بيشير ديني فقط.....لازم في النص تدي حاجة اجتماعي او نكته "لكسر الموود
- راعى اللغه .... فلو اصحابك اغلبيتهم ملهمش في الانجليزي بلاش تقرفهم وتكتب عربي بالانجليزي "لانك انت كمان اكيد ملكش في الانجليزي" وبيبان عليك ....ولو حتي ليهم في الانجليزي نوع في استخدام اللغة مع شرح بسيط للايضاح.
- مش كل حاجة تشيرها لكل حد ....... "اختار مين .......يروحله ايه"
نيجي بقي للمتلقي ، دا مهم جدا لانه
لو يعرف انه "بلايكاته و كومنتاته" بيصلح نفسيات كثيره ... كان
وزع علي قد ما يقدر ....
ولكن ارجوك متضربش
"لايكاتك الثمينه " الا لما تكون قرأت او حتي اخذت فكرة لانك بتتفقس
وممكن تقع تحت إيده مرة يسألك متعرفش تجاوب... تبقي حوسه
واحب اقول لك ان ساعات
"اللايك" لوحدها مش كفايه ... لان بيبقي مستني منك كومنت
"يبل ريقه"
واحب الفت نظرك لشئ مهم
جدا ساعات اللي كاتب المعلومه بيبقي هيموت علي ان شخص بعينه يقرأها او
"يكومنت عليها" .... والمصيبه تقع لما أمة لا اله الا الله تعقب الا
الشخص اللى عليه العين ... تبقي الست من دول مستًفه صوره حلوه علي كلمتين
يشيبوا القلب ... كله يرد إلا حبيب القلب!!!!!!
لذلك نصيحه لك:
- والنبي يا شيخ لتكومنت " مش للكل " للمهمين بس ... اللي هيفرق معاهم
- بلاش الايك من غير ما تقرأ ... بعد فتره بيتعرف انك بتجامل فقط "احسنلك تسبها فاضيه"
- احب افكرك في حاجة اسمها "شير في الخير " متعملها تكسب ثواب في اللي كتبها
- واخيرا استجدع ولو مره واحدة وحاول تعمل الثلاثة
عزيزي المُشيًير ... إعرف انك بتلعب
كل الادوار.... اعمل لبوستك بجد وكفاح .... لان هيجي عليك يوم وتنزاح.....
