للمجاملات قواعد!!!!!!!!!!!!!

العريس والعروسة  دافعين دم قلبهم في فرح ومكلفين مش علشان المعازيم يقعدوا علي الترابيزات و ميكلفوش نفسهم حتي بابتسامه وصقفة...... مع الوضع في الاعتبار ان  العرسان فرحتهم بتيجي بالهيصة واللمه والضحكة الحلوه...

للمجاملات قواعد تتبع!!!!!!!!!!!!!

ولو قولنا ان  المجاملات تبدأ من ليلة الحنه .... ام العروسه تكلف وتعمل بوفيه اشي سخن وساقع ... علشان تشوف فرحة بنتها وهي لابسه ومتزوقه.. فرحانه مع اصحبها .... وتغني لها "امورتي الحلوه بقيت طعمه" والاصحاب والاحباب يرقصوا ويفرحوا ... ونشوف فرحة ام العريس وهي بطمن قلبها  ان ابنها  واخد الحته اللي هي .... ولكن الام تعزم وتكلف و الكل ويجي يقعد زيه زي الكرسي ... ومتسمعش غير نأوزا وتريقه... وشوية محادثات جانبيه علي وتيرة .... شوفوا دي لابسه ايه ... عامله شعرها ازاي .... ولا بصوا اصحبها عاملين ازاي.....
علي فكره هي  عزماكوا علشان تفرحوا معها وتجاملوا برقصة حلوه ضحكه عسل... شويه ادعيه ...مش علشان تزود عدد وتملوا كراسي.... وحتى لو صحتك مش مساعداكي وانتي قعدة علي الكرسي ممكن الصقفه الحلوه مع هزة الاكتاف وابتسامه خفيفة  .... انتي جايه تجاملي اوعي تنسي .... علشان تلاقي اللي يفرحلك ويجاملك يوم ما تحتاجي....

 

نيجي بقى لمجاملة "كتب الكتاب" .... اللي تعرف تظغرط متبخلش ... صوتك مش هيخلص ...ولو عنيكي رغرغت يبقي خير وبركه .. وهتحطي نفسك في مرتبة المعازيم المقربين اللي يجاملوا بقلب.... وياسلام لو دموع مع بوظان "للميك اب العين"   ... تبقى اكتبتلك... ويجيلك افراح وتتعزمي كثير ... علشان هيتعرف عنك انك انسانه بتعرفي تجاملي ... ولو انتي "سوبر" تعملي كله مع بعض ظغروطه مع دمعة في العين والقافلة تبقي غزاره في الدموع ... والراجل بردوا لازم يجامل ....التصفيق الحار ... مع لمعه خفيفة في العين مش شرط دموع ... متأفورهاش... سيب الدموع للاب هو هيجب

 

مجاملة الفرح ::: مختلفة شويه .... لان بطبيعة الحال الاعمار مختلفة والمجاملة تختلف على حسب السن أو طبيعة العمل والبرستيج .. ولكن هذا لا يمنع ابدا من المجاملة....  تيجي تكلم حد وتقول قوم كدا افرح وانبسط وفرح العرسان ... فيرد ويقول  "عيب انا بريستيجي يمنعني" .... و يعيش الدور بفكرة طبيعة العمل اللي تمنعه انه يجامل ... فيكتفي بقعدته علي الكرسي .... ولكن  ممكن تجامل حتى من مكانك ضحكة مع صقفة ... ممكن لما يجي المصوراتي يصورك تبين الفرحة شويه ... مش انك مجبور علي الفرح.... "ايه اللي جابك " .... علي فكرة كلوا بيبان في شريط الفيديو.....

اما بقى البنات الحلوين اللي عندهم مشاكل يأما مع العروسه او العريس او مشاكل شخصية او حتي نفسنه ....يا تحليها قبل الفرح ... يا متجيش أصلا... لأنك بتباني يا حلوه .... وكله بيطفح على الوش.... وهيتعلم عليكي.....

 

مجاملة العرسان بعد الجواز.... وغلاوة اغلى شيء عندكم تسألوا العرسان  محتاجين ايه او فلوس في ظرف  ... الافتكاسات في هدايا   تصيب العرسان بالصدمه .... مادام ناوين تكلفوا نفسكوا وتدفعوا اسألوهم ... لان العرسان ليهم زوق ولازم يحترم ... بيتهم بقى ولازم يفرحوا بيه.... ما فيش داعي للفازات الذهبي الكبيره او البراويز المترزه ... او طاقم البيت العسلي ... هما اكيد عملوا حسابهم.... ومعلش وانتوا رايحين تزوروا بلاش الحلواني اللي جانب البيت ... هو اكيد مش وحش بس اكيد بردوا مش زوقهم ... نجيب وزق يتفق عليه من  الجميع.... متبوظش الطبخة بشوية ملح.
مجاملة اول بيبي .... ابعد عن اللبس والجزم ... خليك في المضمون يا فلوس في ظرف يا حاجة انت متأكد انها ناقصة البيبي... اصل اول بيبي ... فرحته كبيره  والكل بيحب يهادي .... لو كلفت نفسك وسألت هتجنبهم تكرار "الباربتوز المألم واللكلوك اللي في الغالب مبيتلسش"
المجاملات لو مش من القلب بتبقى منظوره .... ارضى وانت بتجامل كله مردود
الدنيا سلف ودين



قعدة رجالة

نفسي البس طاقيه الأخفة و احضر قعدة رجالة ..... أكيد هتبقى اكثرمن ممتعه ولذيذه زيها زي قاعدة الستات...... فيها حكاوي ممتعه ويزيد علها مغامرات الرجاله المشوقه من اول مغامرات اول سجاره اول مره سواقة  ...  حتي الستات اللي عرفوها وبهدلوها  ولا مغامارات السفر والبيات في العربيات  ...  ذكريات الماضي وتمنيات المستقبل.... هاسمع أكيد كل الانتقاضات اللي شايفنها في الستات من وجهة نظر الرجالة بحريه ودون تخوف ...... يهزروا من غير  خوف.... من غير رقيب  ..... منهم اللي يريد ان ينتقم من الستات نتاج للتجارب المريره التي مر بها... فيكب غضبه براحته .... وفي من حابب استرجاع شقاوه الماضي دون نظرات ملامه او عتاب.... نظام استعراض وتباهي ... كام واحده دابت اول ما شافته وكام واحده ضحك عليها واكيد هيقتكر الواحدة اللي اثرت فيه قوي ولسه فاكرها لغاية وقته هذا .... وكمان في من سيحكي عن هوياته وطموحاته ويمكن عن احلامه اللي نفسه يحققها ... 

 اكيد يشعرون بالملل وحب التغيير زي الستات الفرق انهم ممكن يغيروا بطريقة او اخرى... ممكن يعكوا وربنا يستر.. ممكن يسافروا مع شوية هرتله...و لكن الستات علشان تغير نمط حياه او حتي تغير تسريحة شعر عاوزه أستاذان وعاوزه ترتب اومور العيال وتربط مع ماما ولغاية لما يحصل ممكن تكون فرصة التغيير فاتت  .....

 منهم اللي ملان من بيته ومراته منكده  عليه... واكيد منهم اللي زهقان وهيطق من شغلة ونفسه في التغيير.... وواحد تاني نفسه يقعد كل يوم في قعدة الرجالة ولكن للبيت احكام ...... واكيد المتعة أني هسمع عيوبنا من لسان رجاله " الموضوع هيبقى مختلف" ...... ويمكن في السكه اسمع مميزات ست ثانيه اقدر اقتبسه وأحاول أطبقها .... ولكن الاكيد أني هعرف كثير من الأسرار الممتعة والمشوّقة ......اسرار في العادي محدش هيقولها .....

على فكره الرجاله عندهم هموم زي الستات بالظبط ولكن علشان هما مبيحكوش كثير ومالهمش في الرغي زي الستات....... احنا يا ستات فاكرين ان الرجالة عايشين وضربنها صرمه..... 

الرجاله تفكيرهم في الالتزامات الماديه وتفير الراحة والاساسيات الي اهل بيته ممكن تشيبه...... الرجالة دلوقتي من سن الثلاثينات شعرهم طأطأ ابيض ....كل ما يفكروا في الفلوس التي عليهم شهريا وسنويا.....بيهنجوا للحظات .... مطلوب منهم اقساط المدارس واكل وشرب ولبس ومرض وعربية المدام باظت يمكن تكون عاوزه تغيرها....  المهم انهم دماغهم شغالة وكل ما يتمنوه انهم في بعض الوقت ينفردوا بنفسهم في صندوق الفراغ دون طلبات او استفسارات أو حتي مشاحنات .... 

يمكن مشكلة الراجل اللي مراته قاعدة في البيت أضعاف اللي مراته بتشتغل .... اصلها مش فاضيه .... 

ولكن الراجل اللي مراته "مش فاضيه" تلاقيه يشتكي انها على طول تعبانه ومش مهمته به ولا بطلباته ... هو اخر اهتماماتها ....  ولكن في قعدة رجاله يقول له صاحبه اللي مراته "فاضيه" وقاعدة في البيت ... دا انت كدا في نعمه..... اوعى تخليها تسيب الشغل ... هتاكل دماغك لو سابت الشغل ... هتهتم بيك زيادة حتى تعوض ما فتها ويجي كله علي دماغك ....  الفاضيه بتعمل كل حاجة صباحي بعد ما تكون صاحيه متأخر من النوم .... يعني نايمه ومفوقه... خلصت أمور الولاد .... وهتستلمك ....اشي حكاوي الاصحاب والأحباب .....وتحكيلك كل اللي فاتك من مسلسلات العربي منذ الصغر... وانت بتبقى بتمنى انها تسكت ولو ٥ دقايق  حتى تنعم بحبة هدوء ولكن علي مين هي عايشه في الهدوء دا من الصبح.... ولو زهقانه قوي وعاوزه تخرج ..... تبقى ليلتك فل...... يا تخرجها وتهنج منها في الخروجه فتتخانقوا ..... يا متخرجوش وبردوا تتخنقوا.... نصيحه خليها تشتغل

يا والله الرجاله صعبوا عليا .... ولكن زي ما احنا كستات شاغلين دمغنا بالرجاله وتفكيرهم ...... هل تعتقدوا انهم نفسهم يعملوا كدا .... يلبسوا طاقية الأخفة ويسمعوا اللي بيتقال عليهم ..... 

نصيحة من ست بلااااااااااش !!!!!!! هتندم ندم السنين

اسبوع قبل الفرح!!!!!!!!!!

تجهيزات الجواز شيء وتجهيزات العروسة قبل الفرح شيء ثاني خالص .... تبقى العروسة وامها وابوها طالع عينهم دفع فلوس ولف علي المحلات اشي نجف علي ستائر ... مستلزمات المطبخ "اللي عمرها ما بتخلص ابدا" ... وادفع يا بابا... لازم نخش بقيمتنا ... وحتي العريس وامه وابوه ... اشي  عمال ودهنات ولف علي العفش وادفع يا "عريس" ..... لكن دا كوم وان العروسة تتحضر ليوم الفرح  كوم ثاني خالص ... 

بدايةً من انها بتلف علي حد تتفق معه ينظف ويشيل طبقات من الجلد تراكمت منذ فتره  .. حيث انها كانت مشغولة بتحضيرات الشقة ولوازم الجواز.... و يا ولداه  كانت نسيه نفسها  ... او بالبلدي أي ست  بتجهز للجواز بتسيب تجهيزات نفسها اخر حاجة علشان يوم الفرح تبقى موردة " ومش مهم الناس اللي عايشين معها شايفين ايه "اشكيف مخيف منكوش من كل الاتجاهات" .....

المهم  وصلنا الي أسبوع التحضيرات  .... اتفقت الحلوة أخيرا مع حد يظبطها اشي صنفره ... ماسكات لبن وترمس ... زبادي بالعسل "صباح التلزيق ... سكر وليمون... حنه بمية المورد .... كل يوم يا ولداه من صباحية ربنا حتي اخر الليل دعك وفرك... ولااا كعوب الرجلين ومعها الايدين.... يوم ورا يوم  والاسبوع يجري...

ولو دورت علي العريس في الفترة دي تلاقيه يخلص شغلة وشويه مهاترات مع العمال وبعديها يطلع لصحابه على القهوه مع حجرين شيشه.... ولو فكر يكلمها ولا حتى يحاول يقابلها... تبقى كارثة .... ما هي معذورة الست تحاول تبقى مختلفة علشان "تخرعك " يوم الفرح.......

الغريبة ان الراجل  مهما كان لن يستطيع ابداً تخيل ما تتحمله الست من اوجاع في الأسبوع ده علشان حضرته والمعازيم  وبالأخص طبعا  حضرته ....  ينعم بها وبجملها وبملمسها ....ما هو بردو مش طبيعي يجي يمسك ايدها يلاقيها مقشفة مثلا..... مش مهم بقى هي تعرضت لايه ولا حصل لها ايه علشان تطلع بالشكل المبهر المنمق  .... المهم انها تكون علي سنجة عشره.... اصل فكر العروسة وامها ان لازم اليوم ده اهل العريس بالعريس نفسه يشعروا انه في اختلاف ...  حبيب امه واخد الموززه .....

ونيجي  للعريس يعمل ايه علشان عروسته..... اخره ذقن وشنب وحلقة جديدة ... مع شوية  "برفنات" لزوم الريحة الحلوة ... والراجل النزيه يدب مشوار لسوبر ماركت كبير يجيب  معطرات "بق" علي شويه "حبشتكنات"...

 

تجهيزاته كلها تبدأ يوم الفرح الصبح وفي النص ساعتين ثلاثة راحة وبعدين يكمل قبل الفرح بساعة ..... ودمتم..... لااء تعبت نفسك !!!!!........... علي فكره لو تعبت نفسك شويه ممكن تلاقي أفكار جديدة ... تروق بيها نفسك والحلوة اللي هاتبقلها بعد ساعات !!!!!!!!!!

علشان كدا بعد الفرح يبقى هو بكامل صحته ومجهوده .... والست تبقى خلصانه .... ولكن علي مين يا حلويين!!!

وتأتي اللحظة الحاسمة .......هو وهي  بعد طول غياب.... حيث القاء المرتقب .... وقد كانت لحظة "فك بنس الشعر ..... حوالي من 60 الي 70 بنسه معوجة ... وبعد الفك  اصبح شعرها 3 متر فوق وحوالي زييهم عرض ..... وياااا حرام تحاول تهندم نفسها .... ويعدي عليها شريط ذكريات الأسبوع اللي فات... والمرمطه اللي عانتها علشان اللحظة دي ......

 احب اطمن سيادتكم  كل الحاجات دي زايله ولن يتبقى غير السيرة الحلوة 

 

بحكم شغلك

 

بحكم شغلك .....تتعرض الي كثير من الأسئلة المحرجة والمستفزة تضعك في مواقف بايخة.. وتضطرك الظروف للرد يإما افتكاسات وتحايلات أو قليل من الحقائق متحبشه بشوية هرتلات... المشكلة لو السؤال جايلك من شخص واثق فيك وحاطت عليك امل .. وانت بالنسبة له قدوه ... يجب عليك ان تراضيه وتعطيه الإجابة  اللي "تغنيه عن سؤال اللئيم"....

 لما ابنك يسأل .....هو فعلا  اللي يرمي زباله في الشارع  يدفع غرامه .... طبعا انت في المواقف دي تعمل "اهبل".... ولكن براءة الأطفال ... يعاود السؤال .... هو اللي  يرمي زباله  .... يتعاقب.... وانت ولااا هنا .... يصيغ السؤال ثاني "مامي" ..  ليه الجيران اللي في العمارة والعمارات اللي حولينا يرموا الزباله في الشارع .... طب ليه انتي ما تبلغيش عنهم او تدفعيهم  فلوس كنوع من العقاب.... والابشع لما يشاهد بعينه  احد الجيران يرمي "زبالته" علي ناصية عمارتنا ... وينظر لي باستغراب كأنه يقول لي "اتصرفي " .....وحفاظا علي  - ماء الوجه  - كنت  أحاول ان اظهر امامه بإيجابيه شديدة .... ولكن للأسف ... كان رد الجار المحترم المتعلم  ان كل العمارات بتعمل كدا... يعني جت عليا.... فاصبح شكلي امام ابني "بااايخ" ... وكان ردوا بمنتهي البراءة .... خلاص قولي  لوزيرك... وعلشان منظري وهيبتي ... تحايلت علي الموقف وقلت احنا " البيئه " مبنلمش زبالة....  الزباله تخصص جهات اخره...  آل يعني انا كد اقنعته.....

فقال  خلاص كلمي أصحابك اللي مسؤلين عن لم الزبالة وقولي لهم ....مينفعش كدااا.... وبعدين قال بصوت عالي .... هي البلد دي مش هتتصلح ابدا.... تفتكروا كان قصدوا ايه....!!!  قلت في سري خلاص هيسكت....

ورجع نادى عليا .... " مامي" انا شفت برنامج في التلفزيون بيقول الن المصانع بترمي مخلفاتها في النيل وكمان الناس بتحمي الحمير والجواميس في النيل .... هو دا بردوا انتي تقدري توقفيه ولا مسؤولية اصحابك .... مسكت تليفوني وعملت نفسي بتكلم ..... وبعد ما قفلت زعقت وقلت له انت ازاي متعملش التدريبات اللي قلت لك عليها ... طب ما فيش تمارين النهاردة.... وهنا أخيرا توقف عن ملاحقتي....

وبعد يومين دخل علي والدة  ... فوجد انه يدخن السجائر... فقال له "بابي"  السجائر خطر ومضره بالصحة ... ازاي انت دكتور وبتشربها... سكت الاب ونظر امامه على شاشة التلفزيون ... وحفاظا علي الشكل العام ... حاولت اتدخل لأنقذ ما يمكن إنقاذه ..... "هو الراد ده متسلط علينا ولا ايه " ...ناديت علي ابني  وطلبت منه ان يأتي لي بشيء "عبيط" يحتاج ان يبحث عنه في الشقة لمدة ربع ساعة  لعلى ينسى ما كان يتحدث به مع والده....

انت ممكن تكبت العيال وتضغط علي نفسيتهم... لكن لو اتزنقت في قاعدة كلها ناس كبيرة وفاهمه قاصدين يحرجوك ويطلعوا عينك .....

تحاول تخرج من الحوار علي قد ما تحاول ... ولكن علي مين ....المشكلة ان دا يتكرر مع كل حد يقع عليه مسؤليه......

 لو ضابط شرطة تلاقي اللي قاعدين منتفين ريشه...انتوا مش قادرين علي الارهابين اللي في البلد ... علي أساس ان الضابط  اللي قاعد ...مقاييد الحكم كلها في ايدة....

ولو ضابط في الجيش تلاقي  الكل باصين ناحيته وبيقولوا " انتوا مش هترحمونا من اللي بيحصل  في سيناء ... يا عم روح مكانوا بدل الكلمتين دول ....

ولو القاعدة فيها دكتور ... تتقلب القاعدة الي مستشفى  .. الكل يفتكر كل الامراض اللي عديت عليه سواء في تخصصه او لااا .. المهم يرد ... ومهما يحاول يلفت النظر ان تخصصه مختلف ... انما علي مين... ولا كأنه بيتكلم..... اهو كشف ببلاش

واحلي ما في الموضوع لو قاعد معك صحفي او اعلامي... القاعدة تتقلب انك عاوز تعرف مين المذيع العميل ومين اللي مع النظام او ضدة .... وهاتك يا فتي من كل الأطراف....

بحكم شغلك ... ولا انت ولا هو عمرك هترتاح !!!!!!!