برامج.... مقالب

برامج المقالب ...  اشتهرت في الآونة الأخيرة وخصوصا في رمضان تنفيذ بعض البرامج ... المقالب  ... تتبنه تنفيذها كبرى مجموعات الاعلام في مصر والشرق الأوسط ......

 مؤسسات اعلاميه كبيرة ... واعمال ضخمة ...إنتاج عالي ومبهر  مع مشاركة كبار النجوم لتنفيذها... وطبعا  تباهي ومراهنات علي من سيقدم البرنامج  .... وضيوف البرنامج ... ومن  اسمه سيأتي بإعلانات اكبر ....  وتبدأ البروموهات لتزيد من التشويق وجر إعلانات اكثر.... وفلوس اكثر ....  ويبدأ البرنامج وتنشغل الناس  وتبدأ الحكاوي.... رامز عمل ايه في ضيوفه ومرمطهم ازاي ... شكلهم عارفين .. لا مش عارفين  ... ولا هاني رمزي  والمنافسه الشديدة بينه وبين اخوانه في تقديم تلك البرامج .... 

فخطر في بالي الافيه المشهور للفنان الكبير "عادل امام " في مسرحية الواد سيد الشغال .... لما قال  .. ناس عندهم لحمه عازمه ناس عندهم لحمة ... علشان يكلوا لحمة !!!!!!!!!!!!

مجموعة قنوات اعلاميه ضخمة  لديها ملايين من الأموال ....يجيبوا فنانين وكبار الشخصيات  يحتكموا أيضا علي ملايين من الأموال "انا مبنقش ... انا بقر فقط"  وذلك من اجل اعطائهم  ملايين اخرة من الأموال ... على حد اعتقادي....

واحنا متجمعين امام شاشة التلفزيون منا من يعتقد انها حلقات حقيقة  وليست مفبركة ومنا من يقول  هذا تمثيل .... ولكن الأكيد ان اغلبهم لم ينكر ابدا انهم يتقاضوا ثمن  ظهورهم بالحلقات ...

وكل نجم حسب  ثقله بالسوق وسعره ... في الفنانين الغلابة اللي  ممكن تحشي بيهم حلقات  وفي النجم اللي ثمنه يتفك بعشره من الغلبانين .....   

يوجد نوعيه أخرى من برامج المقالب  تنفذ في الناس العاديه .... يبهدلوهم ويمرمطوهم ... وفي الاخر  يقولوا لهم ... معلش دا مقلب .... مش مهم بقى الراجل اللي اتشتم واتهزء من مراته  بأبشع الالفاظ ... وخرجوا "اقذر ما فيهم"  ويمكن كمان يكون اضرب او اتحدف بالجزمه .... ولكن المهم والاغلب ان الناس دي لا تأخذ مقابل لبهدلتهم .... ولو اخدوا هتبقى ملاليم  لا تذكر ولا تقارن ولا يمكن ان تمسح من اذهان الناس ولا اذهان اهاليهم كم البهدلة اللي الراجل شافها علي يد الست بنت الأصل اللي متجوزها ...او الراجل ذو الاخلاق الرفيعه ... وكل دا علشان مقلب ....

ولكن هل يعقل ان بعد كل هذه  الأموال التي تدفع  لتلك الفنانين فقط لتعويضهم عن كم الايذاء النفسي والبدني "يااا حرام" .... ففجأة نهاجم بالفواصل الاعلانيه ... واهمها .. التي يطالبونا نحن الغلابه ... اللي متنيلين قاعدين علي الكنبه وهيجلنا ساكته قلبيه وصعبان علينا  الفنان "يا حرااااام " البهدله اللي شافها  ... اننا نتنيل نتبرع " ولو بجنيه" "احيه...." اشي جنيه لمعهد القلب ولا للأورام  وللسرطان وكمان العشوئيات .... فقلبنا ينفرط من العياط  علي اننا نفسنا نتبرع ليهم كلهم ... ولكن مش لاحقين ... المرتب مش مكفي .... ايه ولا ايه ... 

 يخلص الفاصل الإعلاني ... ونرجع علي ان مقدم البرنامج يترجى الفنان وبيبوس أيده انه يسامحه ... ومعلش ومتزعلش  ... طب ورحمة امك لا تقول انك مسامحني .... وأخيرا يقولها الفنان .. " انا مسامحك" .... والدمعة تمتزج بالضحكة وتخلص الحلقة....!!!!



وحوي ... يا وحوي

رمضان جانا .... تراويح.....ياميش وبلح ... قمر الدين ... خشاف ... عرق سوس.... سفره طويلة عريضة ....   كل الأصناف .... تلفزيون ... مسلسلات وكمان مسلسلات...  برامج الاكل وآه من برامج الاكل ... اشي فراخ بالقراصيا ... وقطايف بالمشمشيه ... وافتكاسات من اللي قلبك يحبها.... والست تجرب والراجل يذوق..... ولكن بعد خبره عريضة في أمور رمضان.......... فإليكي بعض النصائح....

 

1. السوبر ماركت  يتحول الي ساحة حرب... تنزلي بالخوذة  والدرع لتلافي الاشتباكات التي تحدث وياريت تخدي معاكي جرز تركبيه في عربية السوبر ماركت .... لان المرور الداخلي يحتاج الي التنبيه... بدل ما بقك ينمل من كثرة استخدام كلمات الاستاذان  ......  اما الحل الاسهل انك تظبطي السوبر ماركت الصغير اللي جانبك.. لتظبيط  احتياجات اول اسبوع وبعدين تنزلي علي رواقه .... متخافيش .... الاوفرات مش هتخلص ...  التخطيف والصراعات مش هتفيدك...خافي علي نفسك لتتخرشمي او تخدي كوع  ... مش لازم تخدي كل العروض ... خدي اللي تستخدميه.... يعني عرض الكوبيات والاطباق ... سبيه .... لليستفيد بيه.....  ولا حتى عرض الزبادي ... ليه تطلعي شاريه من 20 الى 30 واحدة .... دي حتى تزنخ  .... الاوفرات مش هتخلص....  دول مبتكريين

2.عروض البلاستيك ... دوسي فيها ...شفاشق او علب....  رمضان بيحب العصائر .... وانتي بتطبخي كثير فأكيد هتحتاجي تخزني.... متسترخصيش في العلب .... يعني يبقى اهدار في الاكل ومرض للتخزين الغلط.....

3.الفراخ واللحمة .... لو عندك  فلوس زيادة ومستغنيه عنها  وهذا من المستحيلات   ... اشتري لحمه وفراخ بدري شويه .... لانهم بيغلوا قوي قبل رمضان.... نركز علي الحاجات المهمة .... يعني وليمة اول يوم يتعمل حسابها بدري حبيتين ... لو بط او ديك أو حمام والأساسيات من البروتين اللحم المفروم والفراخ البانيه لأنها سريعة  العمايل ... يفضل شرائه أسبوعين بدري ....  هتوفر معاكي

4.العزومات .... لو معزومه .... أتهنني وافرحي وعيشي اللحظة ولكن المشكلة  دائما تكمن في الراجل ...  علشان تقنعيه انه يوافق يسيب تكييفه وسريره ويلبس وينزل يسوق علشان يأكل ... هذه مأساة بالنسبة له... لازم تكون المغريات قويه ... مثلا  تتعهدي انك متعمليش العمله السودا دي  ثاني ..... ودا طبعا استحالع

ولو عازمه وفري علي نفسك مجهود ....اللي تقدري تجيبيه من بره "هاتيه" ... لا تتردي وبلاش جو ... "صنع اديه وحياة عنيه" ... مش وقته ... صحتك علي اخر رمضان هتكون راحت.... ولو نفسك قوي تذوقيهم عمايل ايدك .... اختاري أصناف سهلة ومجهودها قليل وبلاش تجربي في معازيمك الأصناف الجديدة .... الا لو بتحاولي تقطعي رجلهم من عندك

5.انا عارفة ان رمضان يحب التجديد في الاكل والافتكاسات .... بس مش قوي ... ولازم تختاري اليوم والأشخاص المناسبين اللي هتجربي فيهم.... علشان ميجيش علي دمغاك.... ركزي علي برنامجين فقط او قناه واحدة ... وخدي اللي يناسب بطن جوزك وعيالك ....

6.وجود الديب فريزر في البيت شيء هام في رمضان جدا ... لو معندكيش قسطي واحد ... هينفع في العيش والثوم بعد رمضان..

7.الصواني والنواشف  اسهل الحاجات ... اللي تتعمل وعليها طلب زي السمبوسه والجلاش ..... أي حاجة اعمليها صينيه وارزعيها في الفرن .... هيوفر معاكي في غسيل البوتاجاز .... دا بجانب السلاطات

8.العصائر ..... نصيحتي ليكي وخصوصا لبند العصائر ... اعمليها بدري يوم كل ما تتخمر كل ما طعمها يحلو... اعملي كذا نوع عصير ....  اما بخصوص قمر الدين  هو دا الحاجة الوحيدة اللي تشتري منها وممكن تخزني..... دا لو بتحببيه..... لان علي الأسبوع الثالث بيكون خلص ومهما تلفي عليه مش بتلاقيه....

9. الحلويات ... بما اني مش حريفة  حلو ... وماليش طقطان ... فا يأما تبرشطي علي حد يعمل لك .... او تنفعي المحلات ... علي رأي المثل ادي العيش لخبازه...  

10.نيجي للفول ودا مزاج عالي جدااا.... 30 يوم فول ..... حاجة لا تحتملها بطن .... بس العرف يقول انه بيلكم... ويقفل ويسد لغاية المغرب ... مع التحابيش الواجبة والضرورية  وهي الجبنه البيضة والجرجير ... ولازم تحبس بالزبادي وكوب الشاي المتين .....

الستات في الشهر رمضان  تراهن علي كفاءتها في المطبخ وادائها المتميز في الطبيخ ..... وكل يوم يتباهوا ان يحكوا لبعض..... عملوا ايه او هيعملوا ايه...

رمضان كريم ... علي السادة القراء مراعاة فروق الاختلافات..