عذرا ايها الشحات ... ارحمني من الدعوات

مقالي هذا ليس له علاقة بالعنصرية او الطبقية ... او التقليل مِن مَن  يحتاج الي المساعدة ... ولكن انتقاض الى الفئه التي تتعمد على الشحاته بطريقة البلطجة .....
اللي بتلاقيهم في نفس المكان كل يوم ... نفس الوقت يقولوا نفس الحوار ... ممكن كدا سنين ... واللي معتاد على ركوب  المتروا هايعرف انا قصدي ايه ... او اللي عند إشارة القصر العيني ... وفي غيرهم كثير... كل شارع له شحاتينه !!!! وهنا انا اقصد من يريد ان يأخذ مبالغ دون وجه حق ... على الأقل   ....  يبيع سلعة ... انشالله مناديل..... 
اكيد هم يحتاجوا الى عيشه كريمة ... انا لا اتدخل ... ولكن المقصد هنا بريء ... وشرعي... وهدفه انني لو مادفعتش ... ما يدعيش عليا... او ماتشتمش

ممكن سيادة الشحات ترحمني من الدعوات .... اصل مش ممكن  لو اديتك تدعي لي .... لو ما اخذتش ... أتشتم واتبهدل  ....... ورحمة كل عيانينك وامواتك اللي بتجيب في سيرتهم بلاش تدعي علينا... اصلها مش ناقصة قافلة يوم وغم ...
انا متأكدة اني لو حكيت من هنا للصبح ان ساعات ما بيكونش معايا فلوس وحضرتك بتطلب  ... طبعا مش ها تصدق ... شايفني راكبه عربيه ... ومعايا موبايل ... طبعا اكيد معايا فلوس ... طب والله... ساعات بنزل من بيتنا باللي ممكن اصبح بيه على "مصر"...
ايوه ترتيب اولويتنا ساعات بيبقى غلط مش زي ترتيب اولوياتك ... ولكن حضرتك لو بصيت لحصيلة اخر يومك ... ستندهش هتلاقي ان حضرتك تحصلت على اكثر من موظف الحكومه... بالبلدي يوميتك اكبر من يومية الوزير (الرسمي طبعا) ... انا مش بنق ... يا عم ربنا يسهل لعبيدة ... ولكن ما يبقاش موت وخراب ديار ... ماتدعيش عليا ... وتكشر وتبرطم ... اصلها مش ناقصة
اصل حضرتك مش فاهم اني مضطرة امشي اموري بحبة الجنيات اللي في جيبي ... من اول السايس ... او سواق التاكسي ... او يمكن بعد اذنك اجوع ... فاطلب سندويتش فول ... فلو فلوسي مش زيادة مش هاينفع اديلك ... لان محتاجة اللي يديني ...
وأخيرا قررت ان اخذ موقف مع السيد الشحات!! بعد ما برطم وقل باصله... رجعت ثاني مرة وطلعت اللي في نصيب... وقلت له .... المرة اللي فاتت ماكنش معايا فلوس ... كشرت وبرطمت ... وقلت لي بالحرف " لو انتي معاكيش" ... "يعني انا اللي ها يبقى  معايا" .... الراجل وشه بقى الوان ...  ونظرت له وقلت .... انا مسامحة ... بس بلاش البرطمة دي ... وارحمني ... اخذ الفلوس ... وانا مشيت ...
ولكن هل ينفع اني كل مره اشرح لسيادة الشحات انني انا وغيري من البشر ساعات قصدي دائما   "مزانيق" ... ربنا يفك علينا وعليك!!!
يااااا الله .... لاتسمع لدعوة شحات يدعى على عبدك بالممات.... فهو لا يدرك اننا مثله نحتاج !!!!


  

التربيه ليست بالساهل ابداً

نعم!!!! التربيه ليست بالساهل  .... لن تدرك ابدا انك ربيت او أخطأت في تربيتك.... الا عند تعرض اولادك الى  ظروف قاسية ... تجعل منهم اشخاص قادرين على تحمل المسؤليه ... قادرين على العطاء ..... لانهم اتزرع فيهم الأصول واسس التربيه السليمة.... 

اياكم الظن بأن التربيه السليمة هي فقط الحياه الرغد ... وان طلبات الأولاد أوامر تنفذ... لابد ان يدركوا انكم تواجهون مشاكل لتنفيذ تلك الطلبات مع تقديم كثير من التضحيات ... وذلك للحرص على ابقائهم على نفس المستوى او على الأقل توفير الاحتياجات الأساسية وبعض من الاحتياجات الترفيهية..... كتعويض لهم

 

التربية السليمة مع وجود الأولاد وتعرضهم الي بعض الظروف القاسية او الغير اعتيادية   مع التأكيد على عدم تلبية كل الاحتياجات والحرص على انهم يدركوا  ويفهموا جيدا تلك الظروف  ... فبذلك تبني فيهم شخصيه قويه يعتمد عليها ...  صبوره .....متعايشة... وتقدر على المواجهة ...

 

 التربية السليمة  مع ظروف قاسية وغير اعتيادية مع اقصاء الأولاد عن ادارك تلك الظروف وفهمها جيدا ... يخلق من اولادكم اشخاص لا يعتمد عليهم .... يحبون انفسهم ... لا يهتموا بمن حولهم  ... لانهم لم يدركوا قط ما تتعرضوا اليه من مواقف للوصول بهم الي هذا المستوى.... أي ان كان من وجهة نظركم او على قدر استطاعتكم

 

ولكن متى تدركوا انكم نجحتم في تربيتهم ...   عند وقوعك أو تعرضك لوعكة حقيقية ... فلو التف حولك ابنائك ونسوا وجهة نظرهم واختلافاتهم وتوجهاتهم وركزوا فقط  في واجبهم نحوك ... وضحوا في سبيلك بكل شيء...  لو استطاعوا تطويع ظروفهم ...  لو اصبحوا يد واحدة ...
فقد نجحت وربيت واتقنت التربية... اولادك يد واحدة ... يتحدوا الظروف الصعبة ... يردوا جزء من ما فعلت من اجلهم ..........!!!!!!!!!!!

ولكن!!!!!!!!! لو وقعت او مجرد قصرت ... وكل منهم في حياته .... لا يقدموا استثناءات... يريحوا بالهم بأقل الحلول سواء معنويا او ماديا.......
وانت تشاهد ما زرعت وتجني وتحصد حصاد تربيتك..... ولكن لن يجدي ولا يفيد ... ولادك حسابهم عند ربهم ... وانت أيضا حسابك عند ربك .........

وعند الفراق ... سيعلمون انهم اضاعوا وقتا كان من الممكن ان يتقربوا اكثر اليك وينالوا رضى ربهم ورضاك ....
وأيضا عند الفراق ستجد نفسك وحيدا تراجع افعالك وتقول لقد فعلت كل شيء من اجلهم ... ولكن لم اشاهد نتيجة !!!!! ... 

ولكن تأكد ان الدنيا سلف ودين ... وكله مردود الى يوم الدين!!!!!    

 

 

ولادك آواريب.... فتانين!!!!

 

ولادك "آواريب"   ... "بيخروا" بكل حاجة ... الواحد ما يتكلمش قصادهم خالص ....  فتانين ....

على فكرة دول أطفال ... والأطفال الطبعيين  صعب السيطرة عليهم... أطفال بقى والأطفال احباب الله.... ولان لديهم كثير من الاستفسارات كحق شرعي .... ومايعرفوش اللف والدوران والتحوير اللي بنعمله على بعض لذلك من حقهم ان يتكلموا ويبوحوا طول ما هم مش فاهمين!!!!! ... "الادهة" اننا نربيهم على كدا من غير ما نشعر ... والجميل انهم لما يفهموا ...  بيعكوا لان درجة التحوير واللف والدوران لم تصل الي أقصاها ...
ما تقولش انك مسافر ... ما تقولش احنا فين ... ما تحكيش حاجة عننا لاحد .... المشكلة اننا لينا بعض الحق وذلك للخصوصية... لكنهم كأطفال لا يستطيعوا التخيل لماذا نحن نفعل هكذا ...
ولكن نحن لنا عذرنا واسبابنا التي لابد ان تحترم ...... جايز  الحسد او يمكن لمراعاة شعور من حولنا واحتمال اسباب اخرة!!!!!!!!!! لا يعرفها الا  صاحبها
ماتقوليش يا حبيبتي اننا نازلين ...  ... ليه يا ماما.... كدا ....
ماتقولش يا حبيبي اننا مسافرين .... ليه يا مامي ... كدا ... من غير ليه ....  مش كل حاجة تسأل عليها ....
لاء لازم يسأل ... من حقه يسأل ... ما احنا ما بنعملش حاجة غير لما بنسأل ونستفسر ... ممكن نحاول نجاوبهم على قد فكرهم ....
هو في كدا يا عالم .... هما ذنبهم ايه ان في ناس حشريه تحب الاستفسار عن حياة البشر عن طريق "الأطفال الأبرياء" ... ولان الأطفال بالفطرة  ... انقياء.... لسه و  لا يعرفوا يكدبوا ولا يحوروا .. فمن السهل جدا لم توقيعهم ....
ولذلك يلجئ الحشريين الفضوليين الى اولادك .... لو عايز يجيبك .....  يجيب ابنك "بشوكولاتايه".... الواد يخر بكل حاجة ..... والأطفال في الحالات دي ما يتوصوش ... ممكن يحكي تاريخ العيلة من اول ما وعي على الدنيا .... يا حبيبي ما يعرفش انه في النص ممكن يدمر علاقات ... ويوقع بين ناس ....  هو ذنبه ايه ان الكبار  يتقنوا  التأليف والتحوير للخروج من المأزق ....  ونحن نساعدهم على ذلك ... ولكن أيضا ما ذنب الكبار انهم في حقيقة الامر يتعاملوا مع كائنات بشريه .... غريبه ....
تلاقي طنط "الحلوه" ... هاتموت تعرف بابا عامل ايه مع ماما ... كلتوا ايه ... خرجتوا فين .... الراجل جاب ايه لبيتوا ... الست اشتريت ايه جديد ... ولو اشتريت ... تلاقي النق اشتغل ... جابتوا ازاي ... دي كانت بتشتكي انها ما حلتهاش .....
وانتي "مالك يا وليه " !!!! اوعي تتندهشي او تستغربي ...هم حولك في كل مكان... جيران ... أقارب .... أصدقاء ...
الناس اللي مناخيرها طويله وتعشق الاستفسارات .... عاملة زي الصبار .... متشعبه ... لا تكل ولا تمل الا لما توصل  لكافة المعلومات .... الناس الحشريه تعشق لم المعلومات ....  في منهم جبابرة يلموا المعلومة ويعرفوكي انهم عرفوا .... يا بجاحتكوا ... وفي يلموا المعلومات ويعرفوا امة لا اله الا الله .... !!!!!!!!
وبعدين نيجي  على الغلابة ... الأطفال .... ونقول عليهم آواريب وفتانين ... وهم  هايعرفوا منين انهم يتعاملوا مع  ناس غريبه حشريه ...
المشكلة فينا نحن الكبار الكبار ... بنقول ونحكي امام الأطفال .... أشياء غريبة ... ويقع المحزور ... ويتم استدراج الأطفال .... او تفاجئي ان ابنك او بنتك بتحكي معاكي وبتفضفض امام طنط اللي كنتي مقطعة في فروتها .... وشك احمر وتبقى عاوزه الأرض تنشك وتبلعك.....
انتي من حقك  تفضفضي ... والطفل من حقة يفهم لو سمع ...  وطنط من حقها تلم معلومات!!!!!!!!!!!

اشياء صغيره قد تستفزك !!!!

أحنا الستات في حاجات تستفزنا ...... حاجات صغيره صحيح ... ولكن تجيب الضغط .... والغريب انك لو اشتكيتي منها لأي راجل يقول عليكي "هبله" واحتمال تافهة.... انتي ونصيبك ...

لا احد يتخيل او يشعر كم  هي حركات  مستفزه ...  ويمكن ان تعفرتنا.... وبسببها ممكن صوتك يصبح "اوبرالي متضخم"

 تدخلي المطبخ لا ليكي ولا عليكي ... نيتك صافية ... تعملي شاي لجوزك او لنفسك ... تيجي تحطي السكر ... لازم توقعي سكر بره الكوباية .... وكل مرة تحاولي انك متوقعيش.... لكن استحالة .... في الصيف يلم نمل وفي الشتاء يلزء .. وفي كل الأحوال.... يا تلمي ...... يا  تمسحي....

مسحوق الغسيل .... لازم تلاقي جزء منه وقع بره درج الغسالة ... "في مشكلة في التنشين" التركيز يا ستات... او دورات في التنشين.....

لو مظبطة  مع  الحلوة اللي بتساعدك في تنظيف البيت ... وتخلف ميعدها .... تبقى كارثة... لأنك على غرار تلك التظبيطات بتكوني سايبه مواعين في الحوض وغسيل يتنشر واخر يتغسل ... وفجأة تلاقي نفسك لبستي في كل دا !!!!!... صاحبك اعزل

 قررتي تغيري شكلك ... تسبغي ... تقصي ... وفجأة تلاقي شعرك قلب برتقالي ....قصر قوي واصبح لا بيتلم ولا بيتسرح .... تواجهي مصيرك من اقرب الناس .... تعليقات سخيفة... على وتيرة ... ايه اللي انتي عملتيه ده ... ايه اللون الحلاوسكي دا ... انتي مش شايفة منظرك ... اصلها مش ناقصة نكد  ......

تبقي لسه واخدة قرارك انك تبدأي دايت ... وربنا يبتليكي بواحدة منفسنه او واحد غتيت ... يقولك مالك كرشتي كدا .. مش تخلي بالك من نفسك.... يشيل ويحط عليكوا ... هو انا ناقصة ... وترسي بها الحال ... على طبق كبير مليان خيرات ربنا ... وبناقص الدايت ...

تكوني لسه مخلصة المطبخ ....وسالته ايدك من المواعين ... غيرتي هدومك .....ونضفتي وباقيتي فلة .....وريحة ...والكريمه بتنط من ايدك ...... عاملة كوباية شاي ... ولسه ها تقعدي ... تلاقي اسمك من بعيد مصاحبة موسيقة تصويريه... بأي طلب والسلام ..... او تلاقي حد برشط على كوباية الشاي... يأما اخدها ... يأما بواقي وفتافيت بسكوت من الولاد .... وبكل بساطة ... اعملي لنفسك واحدة ثانية .... هو في كدا .... اه في ابشع من كدا .......

وحاجات كثير ... "شبشبك" اللي عمرك ما تلاقيه في مكانه .....  نعكشة الغطى على السرير ...  تصحي تلاقي نفسك مش متغطيه والغطى مسحوب كله .... خير اللهم اجعله خير ..... سقعانة ليه .....

ولكن عليك ان تدركي حقيقة.... ان الدنيا سلف ودين .... وبعد مرور سنين ....اللي عاملتيه في حياتك ... كله ها تشفية وتسمعيه.........

طبعا كل واحدة مننا لها ما يستفزها او يثير حافزتها .... ولكن... يوجد ثوابت حياتيه ...

 ارجو مِن مَن يعيشوا معنا ان يدركوا تلك السخافات "من وجهة نظرهم طبعا "  ويحاولوا ان يتجنبوها ... لأنها تربي رواسب نفسية ....