رابطلي عينه ... ومقرط

طول عمرك متربي بالشكل ده ... عمرك ما تعرف اللي حوليك اتربوا ازاي الا لما تتعامل معهم .... تسمع كلامهم ... وتشوف طريقتهم ... وتتعود على مصطلاحتهم  ... والشيء المضحك  هو المصطلاحات والمفرادات ..... ياااا نهااار ... اختلافات رهيبة .... وعجيبة ... في كلام بنستعمله وفقا لاختلاف  اصولنا وتربيتنا ... وفي بعض التعامل  يعتمد على ما تربوا عليه  ....
ممكن المشكله تظهر  مع الزوجين خصوصا المتزوجين حديثا  ....  كل قعدة بينهم هي قعدة تعارف جديدة حتى يطبعوا على بعض ... وواحد  منهم يبهت على الثاني ...
ولكن الصراع يبدأ مع وجود الاولاد ... مين ينتصر ... ويجعل الولاد تابع له........ في استخدام نفس المرادفات 
 كل موقف في الحياة بينهم له مرادفات غير ...
النوم ( منعوس .. بفقر... بفيص....نعسانة.... شدي الستاير ) ...
الحمام وما ادراكي ما الحمام دا بقى حدث ولا حرج ( في الخفيف والثقيل ... في الياي .. والياكي ... وفي   big job & the small job ... الاوف....) وغيرها وكله حسب ما سمع وتعود....
 الغضب والزعل ( انا كشمت له ....... هباب الحلل ... سخامة  .....سخامة البرك .... اوف دغوف .... طربش .... طايبه... ) ...وغيرها من المرادفات التي من الممكن ان تستخدم تعبيرا عن الضيق والنرفزه.....  
حاجة حلوه ( قشطة ... حلويات ... موززه .....) وغيرها 
حاجة مجنونه ( طايره منه ... هبه استنجلينا .... شاطح ... عقول الناس في راحة)
اسفً على الحال ( يا غلبك .... يا مرك .... ناس ليها الحظ وناس ليها ترتر... يا حزنك ... يا وجع قلبي يا نا ي أما) 
الفلوس والصرف ( رابطلى عينه ... مقرط ... ماسك ... جلدة ... )
السرعة ( زرء... رهوان .. فركيكو)
هل نعرف الاصول الكلمات ... او ليه بنقول كدا ... ابدا ... هو تعود
نأتي  لفقرة اختلاف نطق الكلام ..... وهذا بالتأكيد   يسبب نفسنه بين الناس ... لان ممكن ناس تاخد موقف في التعامل بسبب نطق كلمه بطريقة مختلفة عنهم ... لانها من وجهة نظرهم دليل على المستوى .... بالرغم من انها ...  طريقة تعود !!!!
(كوفرته ... كافرته) ... (صوبع ....صابع).... (الوانات ... الوان).... (بناطيل ... بنطلونات) وغيرها من المرادفات ... ليس لها علاقة  بالتعليم على  قد ما هي مرتبطه بسماعك لها ... في ناس بتتعالج ... وبتحاول تغير ... وفي اخرين سابتين على مبادئهم!!!!!
ايه الصح وايه الغلط ... مش هي دي المشكله ... المشكله دائما تظهر عندما تريد ان تربي جيل جديد على استخدام مرادفات انت راضي عنها ... وتأتي النتيجة بعكس ما ترغب وهي مفرادات جديدة خالص .... .... صعب انك تفهمها اة تدركها... حتى يتم  تشكيل مفردات جيل جديد ... وجيل بعد جيل .... واللغه بتسوء ... واستعملنا لها بيبوظها اكثر  ....
 ليس فقط العيله هي من تؤثر ولكن  الاصحاب ... الافلام ... و"حاليا مسرح مصر" .... يساهموا في تشكيل تلك المفردات .... 
استر علينا يا رب 
اسيبكوا بقى لاحسن انا "فنيخت" 

السنداويتشات ... نفسيات

سندويتشات المدرسه .... كارثة حياتية  في حياة الاولاد والأمهات!!!!!
الترتيب والاعداد لها  يحتاج الى مجهود زهني  من الامهات وتهيئ نفسي للاولاد
لان حتى السندويتشات اصبحت تخلق حقد ونفسيات ....
زمان كنا بنرضي بقليلنا ... والاختيارات محدودة ... يا جبنة ... يا جبنه ... وولما الدنيا تزهزه يبقى بيض او فول ... وكانت اعتراضات الجيل محدودة ومنطقيه !!!!!
على سبيل المثال بلاش جبنه "لافش كيري " لان عقبال ما نوصل ليمعاد الاكل بتكون اختفت من فينوا .. ودا لانهم كانو بيفردوا مثلث واحد في ساندويتش نص متر .....
او بلاش البيض المسلوق لانه ... ريحته بتقلب " ايفييييي"  وكانت دي اقصى اعتراضتنا 

وكانت أنواع  الجبن حسب الحالة الاقتصادية للاسره وكمان حسب الوقت ....اول الشهر غير اخر الشهر ...  ويا هنانا وسعدنا لو باقي فراخ او لحمة على الغدا  والصبح تاخدهم معاك في الساندويتش ... والعنطزه ركباك  ...

ولكن الحال الان اتغيركثييير  ... اصبح الأمهات تتبارى بــــ(lunch box )وخصوصا الموضه بتاعة  الاكل الصحي ... طبعا انا فاهمة انه لازم الاكل يبقى مفيد وصحي علشان صحة الاولاد  ... الخضار قطع ... وفواكه شرائح ... مع لحم بارد ... او كفتة ... اشي محمر ومشمر ... كل دا والعيال تغيظ في بعضيها ... ولا الحلو كيك وكوكيز .... وفشار ... يا ظالمه ... 

ولكن لازم نضع في الاعتبار ان الامهات انواع ...
 في الام الصحية .. اللي مهنيه ولدها ومروقاهم ..كل حاجة بتلاقيها مع الولاد ... بروكلي .. كابوتشي... فواكه .. كل ما لذ وطاب .. ودي ولادها بيتنفسن عليهم للصبح وغالبا بيتاخد منهم الحاجات ...
نيجي للام الرايقة ... كلو بيتقضى عندها .. اي حاجة بتتطحت للعيال الى جانب فلوس ... لترييح الدماغ ....
واخيرا وليس اخرا .... الام الرتبه ... الممله ... التي تتبع الاسلوب القديم (انا)  وهو الجبن .. لانشون ... حلاوه ...  ولكن مع تغيير طفيف والارتقاء بمستوى الجبن وانوعها او ميكسات ..... يتم افتكاسه وياما تعجب او لا ....الجبنه بالانشون ... والعسل بالجبنه الكيري ....  ويا ما في الجراب يا حاوي !!!!
ولو ربنا قدر ممكن نقلي "بيض"  .... اصل مش ممكن هانطبخ في الفطار وفي الغدا .... والله دا حرام.....
المشكله ما بتنتهيش عند حيرتك في عمل الساندويتشات ... في توابع...... الا ولا زم يبقة في كيك وعصائر ... وحتى دا مبنسلمش منه... تلاقي الام عصره برتقال فريش ... وعامله كيكه صحيه بدبس الرومان وقشر البرتقان 
اما الام الممله ... هو الكيك الصغير الجاهز (ربنا يخلي راز) ... وعلبة عصير صغيرة ... الحمد لله انهم بيجوا  ... والعيال صابره وساكته ... 

ولو الموضوع بيخلص لحد هنا كانت ممكن يتحل ولكن الموضوع بيزداد سوءا عند الرجوع للبيت ... وذلك مع  اراء الولاد... وشكوتهم الدائمه من الساندويتشات ... ومافيش حاجة عاجبة ... اللي بيتعمله 5 نجوم بيشتكي واللي امه ممله(انا) بيشتكي!!

ويرجع العيل من دول اصل يا مامي "كوكي " كان معها ناجتس ... و"توتي" كان معاها كفتة.... .... وكوكي ترجع ... تشتكى ان امها الست "الفله" ما بعتتش معها  "لحمة باردة " ...
وتوتي ... ترجع قرفانه بوزها شبرين ان ازاي ماكنش في فراخ بانيه وبطاطس  محمرة .....
اما الام الرايقه اللي مظبطه نفسها وعيلها بالفلوس ... بردو ما بتسلمش لان الكانتين عايش على الام الرايقة ........  الكانتين يعلي وماما تدفع ... زمان الكانتين كان بيقتصر على الشيبسي والبوزو ... دلوقتي بيتعاقدوا مع احسن محلات البيتزا والبرجر الي جانب الوافل والكريب ....
ولا دول سالمين ولا دول متهنين
يا جماعة لازم نعترف ان  الساندويتشات تعتبر قدرات !!!!! 

وبصراحة هي مش مشكلة الولاد ولكن كمان مش كل الامهات تقدر تبقة الام الصحيه !!!!!
 شكرا لكل ام بتحاول .... ولكن التغيير ليس بالساهل ابدا !!!
عذرا ... فانا ام " ممله"

انتي فين يااااا رجولة

ليس بجميعكم  تتصفون بقوة القلب وجحوده  ... 

 ليس بجميعكم تتصفون بعدم الحنيه والمداديه

ليس بجميعكم تتصفوا باللعب بالقلوب ... يوجد منكم رجالا بالمعني ...

ولكن للأسف  كثر منكم يهينوا صفة الرجولة .... يدمروا حلم كل ست ... فتفقد هي الثقة في التعامل  لمجرد انها تعاملت مع رجل ليس برجل في تصرفاته ...
 نعم انه ظلم للرجال الذين لازالوا يتعاملوا بصفة بالرجولة!!!!

الرجوله بمعناها الحقيقي ... هو الاحتواء ... الإصرار على العناية والرعاية ... الطبطبه ... الامن والأمان... الاحساس انه موجود حولك في كل مكان وزمان  .... موجود بروحة  حتى لو ليس متواجد  بجسده ... عند المصائب والشدائد ... يظهر من تحت باطن الأرض ....

 

 هي دي الرجولة ... التي تحلم بها كل امرأة منذ صغرها ... الرجولة التي يحكى عنها في الاحلام .... ولكم للأسف !!!!!!!!!

 

تعلمت  البنت  ان الراجل هو أمنها وسندها .... حلم كل بنوته ... انها ستعيش في كنف راجل .. يحميها من قهر الزمن ... من قسوة من حولها ... تخيلت انها ممكن تلجئ له في كل المواقف لتجد عنده الحل ......

ولكن تصدم هي بأن ليس كل الحلول في يده ... وليس هو الأمان الوحيد ... في أشياء اخرة كثيرة لابد ان تتعلمها لتصبح هي سند نفسها ... لتصبح قويه ... تعتمد على نفسها لمواجهة كل ما يمكن ان يمر عليها من ظروف قهريه ....  

لابد ان  ... تعملي ... واياكي والضعف ... ولكن يمكن التظاهر بالضعف امامه وامام المجتمع  لاستخدامه كسلاح او احد الوسائل الشرعية للوصول الى الهدف ..

تعلمي التمثيل ليس للمراوغة ولكن للاستعانة به عند اللزوم  ... استثمري في شكلك وصفاتك على قدر استطاعتك....  هذا سلاح لا يمكن ان تفقديه!!!!!!!

فوقي اصحي !!!!! اعلمي جيدا بأن الرجل ليس بيده العصاة السحرية ...

 

من اول والدك وصولا الى شريك حياتك ...

 

ولو نظرنا الى حقيقة الأمور سنجد انه هو أيضا تم تربيته بشكل خاطئ ...

تم وضع أسس في حياته بأنه هو المسئول الأوحد عن سير الحياة بشكل منتظم وذلك  لتوفير الامن والأمان  لشريكة حياته وبنته وكل ست ممكن تعدي عليه ...

 بالرغم من يوجد حوله عوامل خارجية قد تعوق هذا الفكر...  أولها تربيته  ... شهواته المتقلبة التي يتحكم فيها اخرين  ... مدياته التي بالتأكيد  تؤثر عليه وعلى  حياته  ...

بالتالي فانت لا يمكن ان تكون  السند الأوحد لها ... ولكن يمكن ان نقول القاعدة التي يمكن  البناء عليها ...... لأنك عندما يصدر عند تلك الأفعال التي لا تصنف "رجوله"....  ستفقدك من رصيدك الكثير ... فانت بأفعالك يمكن ان تهين تلك الصفة!!!! 

 

ليس من الرجولة ان تظن انك يمكن ان تلعب بقلب امرأة مطلقة او ارمله  لاعتقادك الشخصي انها ضعيفة وفي احتياج ...

ليس من الرجوله ان تهين زوجتك اكثر واكثر فقط لانها قبلت العيش معك وانت متزوج بغيرها لمجرد انها ضعيفة وليس معها ما يؤمنها او يكفيها ... فهي تعتقد انك سندها ... ولكنك اصبحت ذلها واحد عوامل قهرها

ليس من الرجوله ان تفارق وتبعد دون ان تشاركها هي ومن يلتزمون منك نفسيا بسبب بعدك او على الأقل شرح بسيط لاسباب الفراق ...
 

ليس من الرجوله ان تعتقد انك يمكن ان تسيطر عليها  فقط لمجرد انك راجل وتعتبر واصي عليها ... فالوصايا بالأفعال  وليس بالكلام ... ولأننا متفقين بانك لا تستطيع ان  تسيطر على كل   زمام الأمور .... لأنك بشر واكيد تتعرض لظروف تجعلك تفعل ما تفعل
ليس من الرجولة ان تساومها على اولدها في حالة انفصالكم ... 
ليس من الرجولة ان تمنح نفسك فرصة اخرة مع حبيبه اخره دون ان تعلم هي او ان تختار تكمل معك ام لا  ... حتى لو عايش مع "الاشكيف" ... من حقك تمشي وتفارق  ولكن قول للاشكيف انك ماشي

ارجو عدم اخذ كلامي بصفة العمومية ... اعلم ان في رجال كثر نرفع لهم القبعة وستات كثر استحالة العيش معهم ....
ولكن الراجل بالنسبة للست هو الستر .... هو امان .... الحماية .... لذلك  فقدان الست لحمايتها وتعرضها لصدمة انه ليس متواجد كراجل في حياتها ... يغيرها تماما و يفقدها الثقة به ... وفي هذا الحال تصبح  كائن سلبي هجومي ... وليس بالساهل ان تغير اعتقادها الا لو قابلت  رجل اخر "معجزه "... وللأسف  الرجال يختفوا وسط  اشباه الرجال...


 

  

 

 

الدوش؟؟؟؟؟

 

الدوش!!!!

ساره احمد

sarahbarhoma@hotmail.com

 

ما احلى الرجوع اليه   "الدوش" .... سواء في الشتا او الصيف !!!!! الدوش ايكونه.... لازم تحترم ... الدوش قيمة ...  تضيف الينا الكثير من المتعة ....

أيام زمان ... كان طموح الشخص انه يستحمى وخلاص ... يقلب نفسة في ثواني معدودة ... ولكن مع التطور .... اصبح الشخص يستعد للدوش استعداد قوي ...  الدوش شيء تحب ان تخده بمزاج عالي ...... اصل  مش ممكن قرف طول اليوم ... والحاجة اللي ها تعملها لواحدك - أو مش - انت ومزاجك  المفروض تتعمل باستجمام  ومزاج .... تصبح متكدر  وأنت بتعملها ......

 

زمان كان الدوش يا دوب بالعافية يغطي كتف وانت بتستحمى .... وكمان متمسمر في الحيطة ... فلو السباك مسمره غلط ولازقه في الحيطة بورب ... ها تستحمى وانت معوج ولا زم  تستحمل ...... 

مع التطور اصبح يمكن تحريكه ... دوش سماعة ... يا عيني ... تطور بقى .... ولكن التطور زمان كان في فكرة الحركة من عدمها ... ماكنوش بيفكروا في قٌطر الدوش .... اصل اللي  ها يستحموا مش حجم واحد في المليانين ...وفي الكنزين وفي اللي بكرش .... لازم نراعي الأحجام ..... ليه الواحد يستحمى بالقطاعي ... ربع تحت الميه والباقي بره ....

على فكرة قٌطر الدوش يفرق سواء في الصيف او الشتا .... يعني في الصيف تبقى راجع حران وملزق وقرفان .... طموحك ان تنهمر عليك المياه  "تغطيك" .... فتشعر بالانتعاش .... اما الشتا فالموضوع ابشع ... تبقى عاوز تنزل تحت االمياه السخنة لتشعر بالدفا .... لكن  تنزل بالتدريج وتخش حته حته ..... مره بكتفك ومره بكرشك ... ده اسمه عذاب .....

لذلك أخيرا وبحمد الله تم تطوير القطر واصبح شبه مصفه المكرونة ... تنزل وأنت مرتاح النفس ... مش قلقان ... ولا متوتر ....  التطور الأكثر ولكن عند فئه عظيمة تقدر الدوش والحمام  .... وهو  وجود كذا دوش " يمين شمال ... فوق "....  مش ملاحق الميه  جيه لك  منين ولا منين .... هطل حمى!!!!!!

اللهم أوعدنا يا رب .... ولكن عندما تقرر ان تطور الأداء ... لازم له جمعية محترمه ... اصل الدوش دا قيمة ماديه عالية ... ومتكلف ....

وزي ما يقولوا لأجل الورد ينسقى العليق ....