حياتك ممكن تكون مشجرة او مخططة !!!!

حياتك  مجموعة من اللوان مختلفة .... كذلك مواقفك التي تتاخذها هي ايضا عبارة عن الوان  .....منها السادة والمشجر وساعات المخطط ....

عليك دائما  اختيار اللون المناسب في الوقت المناسب ... لان اختيارك للون يترتب عليه ردود افعالك  منها الحاد في اللون او الهادي ويمكن يكون صافي... او  ناري ... ايضا بناءا على اختيارك ...فعليك ان  تحتمل رد فعل غامق او مشجر وملوش ملامح او باهت.... كلها اللوان !!!!

الحياه  تصبح جميله ومريحة  عندما  تصبح اللوان  ملائمه سواء التي من اختيارك او ما تحتمله من اختيار الاخرين 

يمكن لك ان تجدد في تركيب الالوان ... حتى لا يتوقعك احد .... التجديد مطلوب ولكن بحذر .. الجراءة مع  سكينه ..... الشراسه مع الطيبه 

واذا صادف ان في وقت يمر عليك ووجدت ان  المشجر مكتسح .....لازم تقطع بلون سادة لان مشجر على مشجر يعني انك في مرحلة خطر .... (فلح قوي بصراحة)

لابد ان يأتي عليك وقت تلجئ فيه للمخطط ..... يعني اضرب ولاقي .... حب ولكن متتدلقش.... غيير ولكن بحساب .... جادل ولكن لما تكون متأكد انك على حق ....

 الوانك  من اختيارك عليك ان تتحمل مسؤلية اختيارك ....ولكن الالوان التى تفرض عليك حاول يأما تتأقلم عليها او تسعى لتغيرها... او جايز تحبها وتصبح هي الجديد بالنسبه لك 

مع تقدمك في العمر ....اختياراتك في الالوان تتغير حسب احتيجاتك او رغباتك ... في منا يصبح اكثر جراءه .... واكثر نضج ... الوانه تصبح  ظاهره اكثر ... واخرين تغلب عليهم السكينه والهدوء ... فيصبح اللوانه تميل للهدوء ... 

لذى دائما  دقق في اختيراتك ... تروى .... فألوانك هي انعكاس لحياتك 
ودي وجهة نظر !!!

مفهوم Working Hard

منذ الصغر واحنا بنتربى على اننا لازم نشتغل ونبذل اقصى مجهود ونسمع حبة شعارات منها ....اكيد لما نتعب هانوصل .... اعمل اللي عليك  ونفض للحوليك .... المهم انك ت work hard 

ونبدأ في طريق الكفاح والعمل "ومن جد وجد ومن زرع حصد" !!!! ....من شهادة الى شهادة .... من شغلانه الى شغلانه وانت حاطط اودام عينك انك لازم تبذل مجهود علشان تبقى مميز مش مجرد شخص عادي .... ولكن !!!

حد فكر مع كل working hard ايه اللي بنعمله ... بيحصلنا ايه لك ....  وبنعاني ازاي علشان نوصل ...  لمجرد انك  تحقق النجاح والتمييز ... 

مثلا !!!!على المستوى الصحي  تبدأ بالحاجات الخفافي ... الضغط والسكر والقولون العصبي والتوتر والقلق ....وننتهي   بشعرك يبيض وجلدك يكرمش وتسمع شوية تعليقات  "مالك شكلك تعبان كد ليه ... او من وراك ماله كبر كدا والهم راكبه "

او على المستوي العائلي والاصدقاء  تقريبا مابتشوفش حد  وعلى طول تعبان ومرهق الكلام خلصان .... ومش بعيد تكون فقدت ناس في حياتك بسبب Working Hard  وانت مش داري ... يبقى نفسك تشد فيشية دماغك ..... يعدي عليك خناق من نوعيه انت فين انا مش بشوفك ... او انتي اصبحتي مهمله ومقصره ... وتنتهي الحياه يأما بالانفصال الفعلي... او بالانفصال الروحي .... اهو كله انفصال!!!!!

نيجي بقى على مستوى العمل كل ما تكبر و ت work hard  كل ما تاخد اكثر!!!!  النفسنه بتزيد .... وعمرك بيقل  ... اللي عامل انه واقف جامبك اول واحد هايديك!!!! دا غير ان كل اللي مش بيشتغلوا Hard هاتلبس انت كل Hard بتاعهم ... 

ولو قلت مش انا .... هاتسمع من بعيد صوت ... ازاي دا انت... دا دورك ...دي دماغك ... وتلبس العمه بمزاجك  .... انت اللي بت Work Hard ......

طب وحقي سواء مادي او معنوي ... تسمع نفس الصوت من بعيد اوعى تيأس حقك موجود وعند ربنا ... واللي عند ربنا مابيضعش... ولازم تسعى ... اشتغل انت بس .. اجتهد زيادة .... 

 والحل!!!! تقعد مع نفسك وتبدأ تفكر .... لغاية امتى ... تلاقي نفسك محتاج تاخد موقف ... وتقول .... انا عاوز حقي ... من غير ... نقاش ... ولا جدال .... وندخل في فكرة ... اثبت انه حقك .... وتلاقي نفسك سبت اساس الفكرة ودخلت في نقاش اخر يرجعك لنقطة  الضغط والسكر والتوتر  ...  ومش بعيد تطلع على المستشفى .... وكل دا علشان بت Work hard 

ولكن !!! هو ينفع نوقف working hard ....  ينفع  توقف تربية اولادك على انهم ما يفرقش معاهم ...  يبطلوا يجتهدوا ... او يتميزوا .... ينفع  تتغاضى  او تصهين....  

الحقيقة انه لاء !!!  لان  لو عملنا كدا مش هايبقى في لذة انك وصلت .. انك انجزت  والموضوع هنا مش عمل فقط .... انما هو كل شئ .... بداية من وانت طالب وفرحتك  بنجاحك ... مرورا بعيلتك واولادك .... تخيل مثلا نفسك وانت بتشوف ابنك وهو بياخد شهادة تقدير او ميداليه ذهب .... او في لحظه نادرة تلاقي شريك حياتك بيشكرك على عمرك اللي قضيته معاه وانت بتحاول تسعدة .... وصولا لتحقيق اهدافك الشخصيه التي تتمناها ..... 

هنا فقط  لمعة عينك ودمعتها  وفرحتها   ....تنسيك وجع وألم  الايام والسنين .... 

تنسيك كل اللي اخدته!!!! في حياتك .... وفقط تفتكر لحظة انتصارك ...  

واخرها  تشكر الله على نعمه ... وانك  ممتن له على كل ما لديك .... لان مهما تعاني او تواجة من مصائب .... تجد من هو لديه اوجاع وآلام اكثر ... 

واخيرا ال بيWork hard هايفضل يWork  لغاية لما يفقد استمتاعه بما يفعل ... ويظل يبحث عن غيرة 

الحق بقى اخد دوا الضغط ... والمهدءات !!!!!

جامع القمامه ... تحياتي

في بداية الامر لازم  اتوجه بالشكر لك على انك مستحملنا ومستحمل سلوكياتنا ... طريقتنا في التعامل واشكالنا واحنا بنفتح لك الباب الصبح ( ياااا مغيث)

 ... صحيص دا شغلك ... انك تاخذ بواقينا ... وفضلاتنا  من كافة الاشكال والانواع .... ولكن حقك  وانت بتاخد ...  تاخد وانت راضي مش متضرر ....

 واجب علينا تقديم الاعتذار .. فجميعنا لا يهتم ان يعطيك القمامة مفروزه ...  كل حاجة على بعضها .. الازاز المكسور ... الطبيخ مليط.... وغيره ....

عمرك فكرت جامع القمامه .. بيشوف ايه لما بتفتحله الصبح بدري الباب .... الله يكون في عونه ... بيجامة ، جلابيه ، اسدال ويمكن فانله بحملات واكيد حافي  .... مع وجه مكشر ... شعر منكوش ... متكدر علشان صاحي قبل ميعادك ... او شايف صوابع من ورا الباب بتزوق له كيس القمامة من غير شكرا .... وكمان لو سألك على فلوسه  بنفاصل في 5 جنيه ... بالرغم من انه لو اتأخر يوم هاتبقى هاتجنن ... لان الريحة قلبت الشقة والعماره ... 
اما لو ربنا هداك وافتكرت تطلع الكيس من بالليل .. راعي عدة اشياء بلاش فتاتفيت اكياس ... يعني استعمل الكيس الكبير وحط في الصغيرين .... اربط الكيس كويس ... ولو بواقيك فيها عضم وسمك وانت مش من انصار وضع الاكل للقطط يبقى  قمامتك خاليها في بيتك لحد الصبح ... ولو انت من انصار حقوق الحيوان حط الاكل عدل في طبق على جامب علشان القطط ما تبهدلش الكيس الكبير وتبقى زروطه ....

لو الناس تعرف قد ايه القمامه تساوي ملاين ويمكن باستخدمها وفرزها  تتحسن احوالنا  ... دا غير انها هاتريحنا من الكلاب والقطط الكثير اللي في الشوارع .... ومن نبيشة والهبيشه !!!! 

نيجي بقى للبشر اللي بيرموا على ناصية الشارع ... قرفتونا بجد ... علشان فلوس الزبال ... تقرفوا شارع بحالة ... المهم بيتك تنظيف من غير ريحة لكن ناصية عمارة بيتك مش مهم ... الشارع مش مهم ... النظافة مش بيتك بس .... ارحمونا ... 

ولادك هاتعلمهم ايه ... غير انك نظيف من جوه ... ومش مهم ناظافتك بره !!!

لو تعرف اننا ممكن نكون من اغنى البلاد  من بواقينا ... على فكرة الموضوع تطور دلوقتي جدا وممكن تفرز تفيد وتستفيد ... بضغطة زرار على جوجول ها تعرف الاماكن اللي ممكن تاخد منك بواقيك ... بدل ما تقرف نفسك وتقرف غيرك

لو تعرف ان جامعي القمامه استوعبوا التغيرات التي تحدث من حولهم  وطورا من ادائهم  فاصبحوا يستخدموا الجوانتيات ... الاحذيه البلاستيكيه ليتقوا شرنا 

ارحموا جامع القمامه من سلوكياتكم ... من غيره حياتنا هاتبقى ريحتها عفنه !!

فرصتك ممكن تكون متعتك ...

طول ما انت عايش في الدنيا   ابحث عن فرص تمنحك المتع المختلفة ... 

اعلم ان المتع التي يمكن ان تغتنمها من الدنيا قليله... واستمتاعك بها  يمكن ان يعوضك عن مشقة الحياة المستمرة  .. ولكن عليك اختيار المتع بدقة ... فمتع الحياه كثيرة والاستمتاع بها يختلف من شخص لاخر  ... واعرف ان مع استمتاعك باختيراتك من تلك المتع ... انك هاتضحي بغيرها ... لذى اختر بدقة ..

عليك ايضا ان تبحث عن فرص تجعلك تعيش احسن ... مرتاح البال ... لان الحياه في الاصل كلها تعب ومشقه واستنزاف للاعصاب .... لذى عليك ان تختار ما يمكن ان يريح بالك ويجعلك في حال افضل ....

لا تكل من البحث ... المتعه ممكن ان تكون مع شخص ... سفريه ... لمة اصحاب ... اكله حلوه ... كتاب ... وغيرها .... المهم انك تعرف ما تريدة وتجدة ... وتمسك به.... 

متعك قابلة للتغيير حسب ما تمر به من  تجارب حياتيه ... تقدمك في العمر يجعلك تنتقي بحذر ... وتكون اكثر حرص حتى لا تضيع فرصتك في الاستمتاع ... 

اعلم جيدا ان كل ما يضيع منك وهو غالي عليك.... لا يمكن ان يعوض ...

على من حولك تقبل اختياراتك ... ويعلموا ان ما كنت تقبله من زمن ... يمكن ان ترفضه حاليا ... متعك تغيرت ... احساسك بها اختلف ...  

اختياراتك لابد ان تكون مدروسه بدقة ...... لذى احرص على ان لا تصبح انانيياً في اختياراتك .... وراعي من حولك 

ولكن ايضا في بعض الاختيارات عليك تكون انانيا ... لان في فرص لا تعوض ... اغتنمها ... واستمتع .... لان في جميع الاحوال ... الكل يبحث عن مصلحته ( مصلحتك اولا) 

انك تقابل شخص بعد ما يمر عليك وقت وتشعر معاه براحة  تعتبر فرصه .... انك تجد شخص تحكي معهاه .... هي اكيد فرصه ... حد يعزمك على فنجان قهوة في مكان مميز ... المهم اوعى تضيع فرصتك 

مالى كدا بقيت !!!!

مالي كدا بقيت كئيبه ممله وعنيدة 
مالي كدا بقىالهم صاحبي ورفيقي  مهما احاول الفرار منه بيجري ورايا بالمشوار 
بقيت بتمنى البسمه والضحكة اللي من القلب مش الضحكة اللي برسمها علشان اعدي الصعب

اصبحت الحياة صعبة تسمع منها وتشوف ما لا يرضيك ولما  تعاندها علشان تاخد اللي انت عاوزه  تقف وتصدك او تضحك عليك وترميلك  اللي يعيشك ويمشيك 

تقع وترجع تقف  وترجع تقع .... تتقابل مره بابتسامه ومره دموعك تسبقك 

وتسمع اللي يقولك عادي كله هايعدي ... او تسمع شد حيلك المهم انك عايش ولسه بتقوم وتقف على حيلك ... او  ما تنشف كدا اواللي يكركبها عليك ويشيلك هموم الدنيا وانت اصلا مش ناقص 

 يوم ورا يوم ضحكتك شكلها بيتغير ... وابتسامتك بتصغر ... وبتبقى بتتمنى اليوم اللى عينك هاتلمع فيه لما تشوف حبيبب او نجاح كنت مستنيه بعد تعب ومجهود 

ولكن  لو الدنيا صعبه وكثير بافعلها بتضايقك ... لازم تقوم لان هو دا الحل واوعى تستسلم 

لو ضحكتك صغرت وقلت ... دور على اللي يرجعهالك ...او بص في وش عيالك او اجري عليه وارمي نفسك في حضنه ... 
اوعى تنمع دموعك سبها تنزل اصلها علاج في بعض الاوقات .. اطلب من امك وابوك دعاوتهم ليك 

مالي كدا بقيت !!!!

احرص على صيانة جمالك ... ليعطل منك في السكة

جمالك نعمة عليك صيانتها وحمايتها من كل العوامل سواء خارجية او داخليه   .... جمالك زيه زي عربيتك وتكييفك يحتاج صيانه دوريه ... 

جمالك ممكن يعطل منك ... ويقف وتحتاس به في وسط طريقك ... وبدل ما نعمل صيانة بسيطة ... نضطر نعمل نص عامرة أو عامرة كاملة ... 

الصيانة لازم تكون صيانة داخليه وخارجيه ...  اوعى تفتكر ان لو اهتمت بالخارجي  فقط يغني عن الداخلي ... ولكن اعلم ان في  اولويات !!!! 

اخلاقك محتاجة صيانة ... عاداتك لابد لها من مراجعه  ... اسمع  وراقب ثم عدل ما تستطيع ... ولكن واحذر هناك شعرة بين التعديل والصيانة او التغيير الشامل الذي يمكن ان يفقدك شخصيتك فتندم على ما فعلته ... تخيل انك حبيت تغير عربيتك وذهبت للحرفيين ... اشتريت  نص عربيه مرسيدس علشان تركبها على عربيه لانوس !!!!   

نأتي  لجسدك ...اهتم بكل ما فيه  ...  اعتبر ان جسدك هو عربيتك ..... يحتاج النظافة اليوميه العاديه ...... بداية من اللبس الحلو والاكل الصحي والشعر والوانه والكريم ... ايد ورجل .... روايح حلوة  ... ولكن ايضا يحتاج الصيانة الدوريه  ... نظرة  على الاجهزه ووظائفها ... هل تعمل بطاقتها ام تعاني ... تحتاج تشحييم .... تزييت ... حتى لا تفاجئ بمشكله صعب عليك  حلها .... 

جمالك نعمه حافظ عليها ... حتى لا تندم في يوم على انك اهنتها ... عليك ان تكتشف اعلى نقط الجمال في شخصيتك وتدعمها ... وبالتالي ستعرف ادنها وعليك الاستثمار فيها 

جمالها لا يرى بالعين ولكنه يكتشف

قرأت مقوله اعجبتني كثيرا  وهي ان "جمال المرأة لا يرى ولكنه يكتشف" 

الجمال الذي يرى بالعين  هو جمال مؤقت لانه زائل ... يزول بعوامل الزمن ... او ينتهي احساسك به مجرد انك تعاملت مع الشخص واكتشفت شخصيته التي لا تتوافق معك ... فتجد ان بشاعة الشخصية طغت على جمال شكلها  ....  

 ... اما الجمال الذي يكتشف ... هو جمال محسوس دائم للابد ... يلمسك ويتوغل داخلك...  الجمال الذي لا ينتهي ... 

حلاوة الروح .... يدوم للابد ... الجمال الداخلي ... تجده يطفوا على الجسد.. يكسبه نعومة الاطفال ... تشعر انه جمال ملموس .... تستطيع ان تشعر به  عند لمسك له ... الضحكه صافيه ...  الوجة الرايق ... الحنيه والاهتمام واضحين 

وانا على يقين انك من الممكن ان تكتشف جمال الجسد  بمجرد انك اكتشفت جمال الروح .... 

فلن ترى عيوب الجسد من ثنيات فور انك غمرت بالحب والحنيه والاهتمام ... 

ابحث في المرأة عن ما يمكن ان تكتشفه بداخلها لتنعم بجمالها 

امهلها الفرصه لتظهر ما بداخلها دون خوف او قلق.... اجعلها تظهر جانبها الخفي ... ستجد ما لا تتوقعة 

انها المرأة ... تستطيع ان تجعلك في اعلى درجات الفرح ...  وفي لحظة وبأبسط الوسائل  تجعلك في ادنى درجات الشجن 

الفرصه في حياتنا ... قرار

حياتك مليئه بالفرص  منها الذي يستحق ان تسعى ورائه بجديه واصرار  و منها ما تتعلم منه دروس  حياتيه للتعامل وكيفية الاختيار 

الفرص يمكن ان تأتي لك او يمكن ان تمنحها انت  .... يمكن ان تعلمك ويمكن ان تعلم عليك.. تأخذ منك وتعطيك 

الفرص يمكن ان تسرق من الزمن من ندرتها ... او تهرب منها لقسوتها 

الفرص ممكن ان تعطى لاشخاص انت باقي عليهم لارضاء ضميرك امام نفسك بأنك استنفزت كل الطرق الممكنه  ... اوترفض ان تمنحها لانك تعلم ان الخساره منها ستصبح اكبر من المكسب 

يمكن ان تمنح لنفسك فرصه لمراجعة افعالك واقوالك التي اعتدت عليها ولكن اصبحت لا تلائم حياتك او من تتعامل معاهم ... وهذا النوع من الفرص لابد ان يأخذ بكل جديه واهتمام لانه يعتبر تصحيح مسار 

ان تعطي فرصه لشخص لا يعني انك نسيت ما مضى ولكن ستأخذ وقتك في ان تستوعب افعاله من جديد بترقب وشك 

الفرصه لا تعني النسيان ... الفرصه تعني التدقيق في الافعال والحرص الزئد في التعامل... 

احذر من الفرص التي تتاح لك من قبل من يتعاملون معك فهم لهم طاقة لاستيعابك واستيعاب افعالك 

ولكن عليك ان تعي ان الفرصه الحقيقيه  لابد ان يصاحبها جزء من التسامح مع النفس ومع الغير ....وان نويت ان تعطي الفرصه ... اعطيها  بنية الاصلاح وليس بنية الترصد للاخطاء ... الفرق بينهم شعره 

ومن ينال تلك الفرصه التي من وجهة نظره انها  لا تعوض وتستحق ان تضحي من اجلها او تتنازل لاجل اغتنامها  ....اعلم انها الاخيره ... الاخيره عند الجميع ...  الاخيره  وبعدها  حيث لا ينفع الندم 

واياك ان تقبل بالفرص التي لا تدرك قيمتها ... اياك ان تعطي فرص لمن لا يدرك اهميتها

الفرصه قرار يحتاج قوة واصرار