اتكلمنا قبل كدا على الدلع وان عام ٢٠٢٢ تناول الدلع بكل اشكاله… كل مغني استعرض الدلع من وجهة نظره … ولا ما قصر
واختتمنا العام باغنيه جميله من حميد وهشام عباس واكرم حسني … صراحه الاغنيه جميله ومبهجة ومفرحه وتحسسك بانك عاوز تقوم تفط تنط من مكانك
ولكن للحظه فكرت ان في دلع بطعم اكرم حسني ودلع بطعم الجاسمي وكل دلع له اللي يتقنه واللي يستحملوا
يعني لما هيفا تدلع في اللي يستحمل طعم دلعها وفي اللي هايستتقل دمها
وفي دلع بتاع نانسي عجرم او مريم فارس…ودا له معجبينه
لو رجعنا لدلع اكرم حسني …تلاقي البنت من النوع دا دلعها بميت راجل زي وقفتها … صاحب صاحبه…ولو في يوم فكرت تقلد هيفا ولا مريم تبقى عاوز تديها بالبوكس
كل زمان له بناته ايقونة الدلع … لازم نفتكر الشحروره صباح واختلافها عن الاسطوره هند رستم
وزي ما المثل بيقول كل فوله ولها كيال….
صراحه هو دا مطلوب ودا مطلوب علشان كدا لقينا عدويه لما غنى شيلى الواد من الارض … المدام كانت بتدلع بس بمعلمه
عاوزه تدلعي … ادلعي بس باللي يليق عليكي بلاش التماحيك "احياه ابوكي"
وعلى فكره الدلع والسهوكه مش للست بس …واكبر دليل حنية ورقة عبد الحليم مقابل دلع عدويه
في الراجل اللي تلاقيه ملزق وفي الراجل اللي حنيته تثبتك او تشكمك …ودا له طلبه ودا له طلبه
المهم بقى نعرف نركبهم على بعض علشان العلاقه ماتمسخش وتحس بمياعتها
نقي الدلع اللي تستحمله
نقي الدلع اللي تعرف تكمل معاه مش عند اول محطه تلاقي نفسك بتدور على دلع من نوع ثاني
واخيرا مش عيب انك تتعلم انواع من الدلع وتستخدمها في المرحله اللي لايقه عليها
اه اصل الدلع مراحل ..العشرينات غير الثلاثينات غير الأربعينات وكل ما تكبر كل ما خبراتك بالدلع بتختلف … وزوقك كمان بيختلف
اخيرا دلع تدلع ولكن عليك الاختيار الصح
