القرار بمزاجك

 بعد فتره عمل طويله ممكن الظروف  تخليك تقدم على قرار الراحه ..وانت وظروفك يا وقتي يا مرحلي يا دائم

خلال هذه المرحلة بتكتشف حاجات  غريبه  في منها الممتع  ومنها اللي كان محتاج وقفه مع النفس ..عملية تقييم لنفسك ومن حولك  

 ..انت بتكتشف ان اولادك كبروا والشنب خط في وشهم…عدى وقت وانت مسحول في الحياه… حوارات  بتسمعها لاول مره …المشكله انك كنت اكيد بيعدي  عليك الحوارات دي  قبل كده ولكن ما كنتش مركز … ويبقى شكلك اودامهم غريب وانت بتعقب .. وهما  مستغربين ردود الافعال 

ابدعاتك في المطبخ بتزيد … حلو حادق .. ملوخية خضرا..بسبوسه بالقشطة … حمام محشي..

التركيز مع الاسعار اصل الاول مافيش وقت .. 

وفجأة تلاقي نفسك بتبص في المراية… ايه دا العلامه دي ظهرت امتى … وشك ..ايدك ..شعرك..السنين جريت واكلت منك كثيير 

بتبتدي دور على الحاجات اللي كانت فيتاك .. … كان نفسك تعملها ..وحتى قاعدة الكنبه وانت دمغاك فاضيه فيها متعه

والحلو بقى انك بتبتدي تراجع تفاصيل لمواقف عديت عليك وتبتدي تراجع نفسك ..كان لازم تعترض .. غلطان انك عملت كدا .. فهمت دا غلط ..سكت ليه هنا …الرد كان لازم يكون حازم وواضح.. والاهم مراجعه غلطات النفس حتى لا يتم تكرارها

والاهم مراجعة الشخصيات … لكل مرحله عمريه شخصيات يمكن ان يكون دا وقتهم .. بتتعلم منهم … شخصيات لها تأثير……وأخرين تكتشف  بالوقت ان وقتهم  خلص لغاية هنا … 

وفي الحلوين بزياده ..بزيادة قوي .. يظهروا فجأة وكأن عينك  ماكنتش شيفاهم ..ومش شرط خالص يكونوا معرفة سنين .. ولكن ممكن يكون معرفة موقف .. ودول بقى اللي مهما بتعدي السنين بيفضلوا واقفين في ظهر بعض

استمتع بالتجربه ولكن متغوطش قوي … وراعي وانت بتختار في المرحلة القادمة .. الخيره ..والمجال الجديد اللي هايضيف..الناس اللي حوليك

انا متاكد انك تقدري

شاهدت اليوم فيلم سبق شاهدته اكثر من مره ولفت نظري اخر جمله بين البطل والبطله .. المشهد بختصار كانت بتجري جامب القطار علشان تنط فيه وهو سبقها وفاتح الباب

هي :: انا اقدر 

هو :: بيرفعها ويساعدها وبيقول انا متاكد انك تقدري

 والفكره هنا لفتت نظري آنه واثق انها تقدر ولكن  هذا لا يمنع انه ساعدها ورفعها  وضمها لطمأنتها 

الثقه في الشخص انه يقدر… لايجعل منه بطل خارق .. ممكن يغلط ومن حقه يغلط علشان يتعلم …. ومن الجانب الاخر ..لا يجعلنا نسلم انه على طول الخط مش محتاج حد … بالعكس هو علشان على طول محل ثقه هو  طول وقت قلقان من التقصير أو مايكنش على قد الثقه 

هو محتاج يشعر انه مش لوحده وانه مهما حصل هيلاقي ايد ترفعه وتحوط عليه

المثل القديم اللي بيقول غلطه الشاطر بالف .. صح لانه مؤثر ومواقفه وأفعاله مرصوده.. ولكن دا لايمنع ان يتقدر والتقدير الصح .. وفي فرق بين اننا نرفعه فانخليه يشعر انه فوق البشر… او نرفعه  لكي يشعر بتميزه

احنا هنا عندنا عادة كدا  من الموروثات والتقاليد لو مراتك حلوه اوعى تبين لا تتغر

لو جوزك طيب اوعي تقولي …ليتمادى فيها لانك لسه عاوزه اكثر… طماعه

لو مراتك جدعه اوعى لتركبك .. وتدلدل

وطبعا دا مش موجود في الحياه الاجتماعية فقط دا في كل نواحي الحياه

فلو موظف شاطر حسسه ان في اللي اشطر علشان مايهمدش

لو موظف عادي نططه لفوق ….علشان اللي معاه يغيروا .. فا يحولوا يثبتوا العكس…علشان هو عارف انه يقدر

حتى بين الاخوات اللي طيب قوي نيجي عليه اكثر لانه مش هايتكلم … وهايقدر.. اصله مش بيشتكي.. حد فكر انه ممكن ينفجر.. هو عارف انه محل ثقه… ولكن لو  لم ناخذ في اعتبرنا أنه محتاجنا… هايجي الوقت ويمشي ومش هايندم

فاااا لو في حياتك شخص قادر  وشاطر ومحل الثقه.. تذكر دايما انك لازم تعرفه انك عارف وانك موجود علشانه وقت ما يحتاج او حتى من غير احتياج