برد النهاردة غير برد امبارح

في حاجة غريبة جداً البرد اليومين دول لما يزورك بتبقي زيارتة ثقيلة جدا بيجي ويتنح ومبيطلعش من جتتك الا بالطبل البلدي.... وبعدين الغريب انة اصبح مفاجئ يأتي بدون مقدمات (بالبلدي تبت) يعني تنام بالليل عادي ولو فقت بس في وسط الليل دقائق معدودة تلاقي البرد جه وبقولك "بخخ " ولو ماصحتش وكملت الليل نوم...... تصحا الصبح تبص في المرايا تلاقي واحد تاني خالص. 
الغريب انه يلازمك صيف شتا..... زماااان كان البرد يجي في الشتا..... اما دلوقتي بيهاجمك في كل الاوقات وبعدين يا حلاوة لو انت اتلطشت دور وقابلت واحد تاني لاطش  دور مختلف  خالص يندمجوا ويعملوا احلي شغل يبهدلوك "يا معلم".. (وجع في المفاصل وآلام في الجته ومناخير نازلة ورشح وصداع ونهجان وانسداد في التنفس ......) 
الغريب والملاحظ ان بعد شوية لازم دور البرد يقلب بجيوب انفيه (الجيوب الانفية للي مش عارف اعراضها عبارة عن صداع يحاصر العين بالحواجب وحرقان في المنخار  كأنك شامم شطة) ويسلام لو معها إلتهاب في اللوزتين هتبقي فل جدا... ولا تعرف تاكل ولا تشرب ولازم تعمل حسابك ان البيت كلة  هيأخذ دور البرد "اللعين" بالرغم من احتياطاتك الكثيرة والمناديل اللي تضعها علي انفك طول ما انت ماشي في البيت علي اعتبار انك مش هتعدي حد بس علي مين "هتعديهم هتعديهم"  وجايز بعد ما  تخف وهما يبتدوا الدور ترجع تخدوا تاني .

نيجي لفقرة العلاج الاول .... تحاول تجرب الاشياء البدائية البسيطة (مثل الليمون والبرتقال وما شبه ..... خلاص دا كان زمان ايام جدي وجدك استحالة يجيب مفعول) 
بعدين تبتدي تجرب ادوية البرد العادية (المعتاد عليها في الصيدليات) ما فيش فايدة وأخيرا فقرة (الانتيبيوتيك)  وفي كثير  من الاحيان لا يأتي بثمارة وتقعد كدة يا ولداة حوالي شهر بتحارب دور البرد هو اللي بينجح وبيهدلك.

حاجة اخيرة اوعي تفكر انك بشوية فلوس هتقضي علي البرد لاااااااا الكلام دا كان زمان لما كان العلاج البدائي بجيب مفعول اما دلوقتي تعمل حسابك في مبلغ لزوم الادوية ليك وللاسرة وللمناديل يا حلو !!!!!!!!