عيد الام: سعاده للست وتنضيف لجيوب الراجل

يوم عيد الام يأتي.... تنظر علي وجوه الابهات تلاقي الزعل والتعاسه ,وتلاقي يا حرام النفسيه اتكلكعت ويقولك  طب ليه مافيش عيد اب  واشمعنا احنا .....وليه محدش بيجبلي هدايا  والوساويس تشتغل  ويقلب يوم نكد.  

 الست من حصرة الراجل اليوم ده... اول مايجي اولادها يقولوا "كل سنه وانتي طيبه" تلاقيها بقا تغمز وتبرء للعيال وتشوطهم بأي حاجه علشان خاطر بابا ميزعلش.  لغاية لما تجيب العيال علي جنب وتقولهم يا حلويين "زي ما بتقولوا لماما لازم تقولوا لبابا " بابا دا الخير والبركة " 

المهم نيجي للمفيد يتلموا الاولاد حولين بابا  وكل واحد يطلب منه فلوس علشان هدية عيد الام بجانب المصروف طبعا ومن خجله امامهم يضطر هو يشتري هديه علشان ميتقلش عليه منفسن من عيد الام. 

يا حرام الراجل دا علي طول مظلوم ......وهو ابن يتشري لامه وجدته " مع الفارق انه كان ساعتها بيشتري وهو سعيد لانه بيدبس ابوه"...... اما لما كبر اصبح "خاطب"  يشتري لخطيبته وحماته وامه " يا نهار مكعبل" .... دا انا لو راجل كان زماني طفشت" 

  لما يتجوز  يشتري "لامه ومراته وحماته"  وتظهر المرحلة القاضيه "الخلفه" .... فنضيف علي اللي فوق "مدرسين العيال".... طب وهو مال اهله ما ليهم رجاله تجبلهم ..... العيال تخطب فيشتري "لامه ومراته وحماته وخطيبة ابنه وحماة خطيبة ابنه".
ولا يوم الاحتفال في احتفال صباحي " حفلة عيد المدرسه"  هات يا بابا فلوس علشان هنشتري حاجات حلوه علشان اصحابي والمدرسين.... وبالليل تيجي الست وتبدأ بالحوار الاتي:
الزوجه: ها يا حبيبي هنورح لطنط الاول ولاا لماما 
الزوج: الل انتي عاوزاه
الزوجه :  طب هنجيب الحاجات الحلوه من دلوقتي ولا حاجه حاجه
الزوج : بصي يا حبيبتي خدي اخر فلوس معايا واتصرفي .. وارجوكي متطلبيش مني حاجة تانيه لاحسن انا استويت
الزوجة: شعرت باحراج واتكسفت قوي ولكن اخذت الفلوس بردو 

عزيزي الرجل ارحل اليوم ده واعمل عبيط .... الست بتستهبل
  واخيرا انتهي اليوم باحتفال الاسر بعيد الام ورجع الراجل علي عكس  ما توقعنا سعيد مبسوط لانه رسم ابتسامه علي وجه اولادة وزوجته وامه وحماته وحماة ولاده وحماة بناته .... والحاجة الوحيدة اللي زعلانه هي جيوب الراجل

اطبخ ايه

كلمه اطبخ ايه ... كلمه بعد فترة تصيب الست بحاله من الغثيان والقرف . 
" اطبخ ايه النهاردة " والتفكير في ايه اللي عندك وايه اللي ينفع ولو وجدتي الحل تبتدي تفكري مين من اللي عندك هيعترض علي اللي هتطبخيه.

الست تبدأ من وجبة العشا تفكر في غدا بكره . تفتح الفريزر وتبص فيه وتقلب في الحاجه  , انها توصل لحل سريع " ابداً" ، تصحي الصبح تعمل الفطار وبردوه تفكر هتعمل ايه علي الغدا " اصلها بعد فترة من عيشتها في البيت، اصبحت لا تجروء ان تسأل من يعيشون معها .... لان ردهم دائما مستفز "ولااااا اييي إفاده" .....
اللي يرد  " اي حاجة" واللي يقولك "انا عاوز اكل من بره". فتلاقي نفسك الحيرة هتكلك وتخلص عليكي. نرجع بقي للكلمه الشهيرة. 

لو الست بتشتغل: تلاقي نفسكِ وانتي في الشغل علي نص اليوم كدا تسألي اصحابك "هااااا هتطبخوا ايه" جايز يلطش معاكي فكره جديدة تعمليها بدل الزهق والملل. تلاقي بقا الرد مبهم وكله ارتجالات....  وبعدين الرد منهم يعتمد علي اللي عندهم في الفريزر الخاص بهم فجايز جدا كل اللي قالوا عليه ميجبش معاكي. 
تخرجي من الشغل توصلي البيت ، اول حاجة تعمليها تفتحي الفريزر  واللي يطلع تعمليه، وجايز جدا متلاقيش حاجه فتبتدي تدوري علي الآكلات المفتكسه "كشري , بصاره , رنجه" 

لو الست مبتشتغلش: تلاقيها محتاسه اكثر لان من كثرة زهقها تحاول تفتكس في الاكل وتخترع اكثر فينعك منها .... بعد ما تكون طلع عينها في الطبخ."اشي الشيف محسن علي كتاب اسامه السيد علي قناة فتافيت ومش بعيد مواقع مختلفة اكل صيني علي يوناي وايطالي "حقل تجارب"

في النهايه الكلمه دي مستفزه  وتشكل حمل وعبئ علي الست خصوصا لما يكون في انفاس كثيرة في البيت وطلباتهم اكثر ولا يقدموا افكار تساعد (اكل فقط) بافكار تعينك علي تحمل الكلمه, كل اللي همهم ياكلوا ويكون الاكل جديد ومتنوع وطعمه لذيذ و"ياممييي"

نفسي في اختراع بقولك كل يوم هتطبخي ايه ويكون موائم للموجود في الفريزر والثلاجه مع الوضع في الاعتبار ان تكون اصناف منوعه وبفلوس قليله.

اكتشفي نفسك

هل الحب يتنهي  بعد مرور وقت من الزمن ام يدفن تحت مسمي علاقات كثيرة مثل العشرة والتعود والالفه . ولكن لو الحب اختفي لن تستقيم الحياة بينكم وستصبح الحياة يكسيها طبقه غليظه من الملل  والروتين ولن يصبح عندكم النيه للتجدد.

الحب هو  الشئ الوحيد الذي يحثك علي تغيير حياتك ويساعدك علي احتمال ما تبقي من غلاسه الحياة. 

  كيف يفَسر الحب من وجهة نظر الرَجل والمرأة. يوجد اختلاف كبييير لتفسير الاثنين للحب "مع الوضع في الاعتبار انه  كان  يوجد حب بين الاثنين ".

كيف تكتشفي انكِ لازلت تحبي:

• لما تدخلي تنامي بعده  ... وتدققي النظر فيه وتفتكري الذكريات الحلوه اللي عديت عليكي
• لما تدخلي عليه وتشعري انه طفلك وتقبليه وهو نائم  وهولا يشعر
• تحسي انك عاوزه تقولي "بحبك" والوقت مش مناسب
• وانتوا بتتكلموا .... تسرحي فيه وتدققي وتكتشفي  فيه حاجة جديدة
• وانتوا مع بعض تشعري برعشه  مع نبضات قلب سريعة  .. لمجرد انه قالك انك وحشاه
•  تغمضي عينك وانتي تقبليه
• تشعري  بقمة ضعفك وهو يضمك الي احضانه

الشعور بالحب نسبي ويختلف من شخص  الي اخر 

انا اعلم  جيدا انكِ تشعري انكِ  في القمه عندما تدركي انه لازال يحبك ويمكن ان يفعل المستحيل لمجرد ان تبقي معه.

انا اعلم ان اغلب الستات يفتقدوا هذا الشعور ويدركوا جيدا ان الحب  اللي كان حب زمان اصبح الآن مغلف ومحفوظ ولا يستعمل

ولكني افهم  ان الحب يساوي الآمان ... كيف تشعري بالآمان وانتي  لا تشعري انك تحبي او تتحبي

لا تتنازلي عن ذلك الشعور حاربي للحصول عليه  بأي وسيله ... لانه ممتع

انا اعلم ان كثير مِن مَن سيقرأ سينتابه شعور ان هذا الكلام كلام خيالي  وانا اؤيد ذلك التفكير جدا ولكن انا في نظريه الحب بالذات.... بمشي مع  ان لكل قاعدة شواذها

لذلك يوجد حب ويوجد لهفه وشفغ في عين من نحب  

وسأظل اؤمن بذلك الي  ان يثبت العكس  

قرارات تتوزع في الادارات

اللي منلش الشرف واشتغل في الحكومه لن يعرف معني القرارات الداخليه . القرارات الداخليه  تعني موافقة السلطة المختصة علي اي شأن داخلي ،هام كان ام عبيط (بيااان هام).... يعني مثلا واحد اخذ اجازة يطلعلوا قرار .........واحد  قدم علي 70% من الوقت وعيين ايام  بذاتها وقرر بعد ذلك تغيرر حضوره فيطلعلوا قرار بتغيير الايام . طب انا مال اهلي واحد هيشتغل في فرع السويس يوم الأحد والثلاثاء بدل خميس واربعاء "ما اللي موجود يشيل شغله" . احنا مش لاقييين ورق نطبع عليه وهما يطبعوا 400 قرار كلها قرارات لا تهم غير صاحبها . دا ناقص لو حد دخل الحمام يطلعولوا قرار.

للدرجه دي مافيش حد بيفكر يقول لهم انه يوجد اكثر من حل  بدل الهطل ده .......... يعني مثلا صاحب القرار يتوزع عليه وعلي ادارته...او صاحب القرار هو اللي يروح يأخذ القرار.... وفي حل طبعا متطور اكثر , طبعا اكيد مش هيتعمل...وهو  ان القرار يتسحب اسكان ويوضع علي الشبكة الداخليه واللي محتاج القرار يطبعه.

الغريب ان حتي سلوك الموظف إتطبع بالهرتله الاداريه يعني الموظف لو قرر يأتي العمل الاحد بدل الخميس لن ينفذ الا لما يشوف القرار بعينه بيلف علي كل مكتب في الوزارة تقولش حضوره هيصلح حال البلد "ويقولك اصلي بآمن نفسي".... دا ناقص نحط نسخه في الحمام ان فلانه بنت فلان ولدت وهتاخد اجازة "نتع" يادي النيله يعني لو القرار متوزعش هي مش هتاخذ الاجازه ... ما هي لازم تأخذها .

مع الوضع في الاعتبار ان لو الموظف قدم علي اجازة بدون مرتب بيفك من المكان قبل حتي ميتأكد ان القرار هيطلع " كله بالمزاج ... الروتين الحكومي متغلغل في كل حته"

 طبعا بيتم توزيع كل هذا الكم من القرارات بواسطة موظف "خدمات معاونه" ولازم يكون شكله كدا" غلبان , ممصوص, تعبان , قرفان غير انه مستهيف جدا موضوع القرارات دي وكان الحوار كالاتي:

منظر داخلي للمشهد

دخل الموظف شايل روزمة قرارات من ركبته لغاية اخر تنتوفة من شعره , مقوص الأرجل زاحف من كثرة الورق... دخل انحط علي الكنبه وقال بصوت مكتوم "قرارات يا فندم"

فنظرت له بحاله من الازبهلال وقلت له " ايه ده"

فقال: قرارات يا فندم ممكن حضرتك تستلمي

فقلت: استلم ايه  خد الختم ده وعييش يا معلم. وبعدين صعب عليا وساعدته هو يختم وانا اقطع.

فقال: ربنا يخاليكي يافندم.

جلس يرتب في شئلة القرارات اللي معاه وقام ومشي علي اداره تانيه

وانتهي المشهد علي  قول حسب الله ونعم الوكيل

ويطلبوا مننا الترشيد المفرووض يروحوا ياخدوا دورات ترشيديه في مجلس الوزراء

الشك :: ياهيموتك يا هينقطك

الشك .... الغيرة..... الوسوسه .... الرغي..... صفات تمتاز به كثير من السيدات وتتفاوت النسب حسب رد فعل  الزوج وحسب مقدار عقل الزوجه.......
  " يا خويا بطل حركاتك دي ... ما انت اللي بتجيبوا لنفسك" ...... " و انتي خليكي عاقله ومتحبكهاش في حاجات ممكن تعديها".

يعني لو الزوج لعبي بطبعه والست لديها قابليه للشك  الحياه هتبقي بظرميط.

وبما ان الشك صفه تخرب البيوت ..... ايضا معروف ان الرجال عينهم زايغه  ودائما لن يرضوا عن الست اللي تحت نظرهم يبقا النتيجة ان الشك موجود موجود.   ولكن في شك مقبول وشك اوووفرررر.

كيف تكتشيفين انك زوجه شكاكه ."هل دق الشك بابك يا سنيه"

لو لاقيتي نفسك بتعملي اللي جاي ده:

1.  هتشتغلي كلومبو وتحاولي تفتشي في الموبايل علي اي دليل "طلع حويط وماسح الماسج"
2. هتدواري علي الشات اللي علي Whats UP او Facebook  الاحتمال الكبير.... انك مش هتلاقي نتيجة " اصله حويط  وهو كمان عنده اللي بيفطمه" .....علي فكرة التكنولوجيا ليها لعبها... ممكن يكون عامل اكونت تاني باسم مختلف او معه نمرة تليفون تانيه. "ابحث عن الشريحة"
3. هتشتري خط تليفون وتغيري صوتك او تخلي حد من صحابك يكلمه "جو افلام عربي رخيص"
4. هتشمي اللبس "الستات عبارة عن مناخير" ابحثي عن اي روائح مختلفة وليست متكررة.... اصلها لو متكرره هتبقي عادي .. التجديد في الروائح يعني ... كم اكبر من الستات....."دا انا سَووو"
5. راقبي تصرفاته من بعيد  وهو يتحدث في التليفون او وهو بيقرا الرسائل  "تعبيرات الوجه ياما بتكشف ضحكه كدا سهوكه كدا " انتي وحظك.
6. سماع نوع جديد من الموسيقا ليس معتاد عليها او تغيير المطرش.
7. ولو انتي اجتماعيه اكثر منه استغلي معارفك وحاوطيه "المعلومات هتقع في حجرك وانتي في مكانك".

كل دي عوامل تخليكي تعرفي انك ست شكاكه.

مش بالضروره تنجحي وتكتشفي انه لعبي لكن ان نجحتي وطلع عندك حق وطلع لعبي وعينه زايغه وبتاع ستات ... هنا القرار في ايدك انتي الوحيدة اللي تقرري هتستمري ام لاااا "بس نصيحة فكري كويس قبل القرار .... احسيبيها يعني"

ولكن لو اكتشفتي ان شكك في غير محله " هنا الكارثة" . الشك هيكون "اكل دماغك" واستحاله ترجعي سليمه .. كل حاجة بعد كدا هتشكي فيها وهتكوني فقدتيه للابد لان  هو هينتابه شعور  بالاهانه لانك شكتي دون مبرر. ويمكن شكك يعطيه مبرر ان يجرب يلعب علشان يصبح الشك في محله ,اوعي تفتكري ان الراجل عبيط مش فاهم اللي بتعمليه هو فاهم بس سايبك تلعبي وتتسلي... وهو كمان يلعب ويتسلي.

انتي يا حلوة ....لو العلاقة بينكم سويه بدل ما تشكي اشتغلي علي  نفسك اكثر  العبي عليه انتي كمان " متفهمنيش غلط.... زهنك ميروحش لبعيد" قصدي  اشعريه انك مشغوله.... ليكي اصحاب..... عندك خروجات.... اعملي دايت .....سافري مع اصحابك............ لو بتكلميه كثيير ... خفي المكالمات .....اشتري لبس جديد. ومتعمليش الحاجات وانتي بتمثلي .... اعمليها بجد هتفيدك ....هتحسن من ادائك مع نفسك ومع زوجك.

متنسيش ان الجواز في حد ذاته ممل. تغييرك المستمر في اسلوب حياتك هيروشه ويجننه.

خلي بالك من نفسك يا حلوه ... مافيش حاجة تستاهل