رمضان كريم ...... شهر مبارك كله خيرات ولكن!!!!!!!!!!
الشعب يعرف ان رمضان بكره يجيلوا هيستريه الشراء تقولش لو مجبش كل الحاجات اللي في السوق مش هيلاقي ياكل ولا يشرب لاااااااااااا انتوا فاهمين غلط المحلات فاتحه ومش هتقفل وبالعكس هتلاقي بزيادة بس ارحموا نفسكوا ... ولكن مش هي دي مشاكل رمضان .
المشكله الاولي هي ازاي الست تقدر تبدع كل يوم فكره جديده للأكل كلها افتكاسات (مره تخيب ومره تصيب ) خصوصا ان التلفزيون كله شغال علي برامج الاكل والابداعات فيه "اشي حمام محشي قراصيه وفته بالمهلبيه ...اكل سوري ولبناني وفلسطيني.. اكل بكل اللغات .... والراجل يا حاراااام يأكل وهو مستسلم للتجارب علي معدته ... واه ه ه لو اعترض علي الاكله يبقي نهاره مش فايت تكشر عن انيابها وتقول
" يعني انا طول النهار واقفه علي رجلي وانا صايمه علشان اعملك الاكله دي ومش عاجب والراجل في سره " حد قالك تفتكسي"
المشكله الثانيه وهي اول يوم الفطار فين عند ام الست ولا ام الراجل وتبدأ المناوشات .... الاول تخش الست بالدحلبه والمياصه ولكن علي مين اللي عاوزه الراجل هو اللي بيمشي" دا في حالة ان الراجل سيد قراره" ودا في الغالب هو اللي بيكون . وبتفضل المناوشات سنين لغايه لما يوضع نظام عائلي يمشي عليه العائله دون نقاش. اول يوم عند فلان وثاني يوم عند علان وهالوما جره.... حتي لو حصل اي عكوسات لفلان استحاله نغير ونروح لعلاان ... لان دا نظام ماشي علي الكل.
المشكله الثالثة وهي العوزومات سواء عازم او معزووم ............. لو عازم بيبقي خراب من كل الاتجاهات فلوووس ومجهود وظروطه واكل محروووق او حادق او مملح (لازم حاجة تبوظ). اما لو معزوم دي بتبقا احساس لايوصف للست وابشع احساس للراجل . الست دائما تبحث علي انها تتعزم اهي تريح من الافتكاسات ، اما الراجل اوجعيه واقوليله تعالى "سوق" قبل الفطار ياااااااااااااااا تبقي بتشديه من علي السرير بصعوبه ،،،، كل العيله لبست الا هو ،،،، كل العيله فرحانه الا هو،،،، ولازم ينزل من البيت والمغرب بيقول "الله اكبر" ومش بعيد يمارس عليكي ضغط نفسي ويعمل نفسه مش فاكر اصلا انك قلتيله انه معزوووم ويحاول يفلفص بس علي ميين الست حويطه اصله لو ماقامش ما فيش فطار.
اخر حاجة !!!! ليه نشتم ونقول الله اني صائم .... ليه مكشريين في رمضان .... ليه بنبطل نعتذر وبنكون اكثر عصبيه واكثر استفزاز.. اكثر شراسه..... نغلط ونرجع نقول اللهم اني صائم.
انت فاتح الكاتلوج غلط ... رمضان يعني نضحك اكثر ... نشكر الناس ... نكظم الغيظ
نصحتي: رمضان شهر يمتاز فقط بأنه يكثر فيه العبادات وليس المسلسلات.
كل عام وانتم بالف صحه وخير ورمضان كريم
ليست هناك تعليقات:
إرسال تعليق