الشغل له معايير لابد ان نحافظ عليها ... شغالين في حكومه او خاص ... مش شغالين في بيتنا احنا !!
يعني ينفع امشي في الطرقات اصادف موظف مشمر البانطلون ولابس شبشب وكله ثقة بنفسه .. عادي وممكن يكلمك في ملف مهم ...يروح في رقاب بالشبشب عادي...
"كل ما يتزنق ..يقلع"
او تفتح مكتب ...علشان تعرض ملف هام ... تلاقي الموظف نايم ومسنتح وقالع الجزمة ومصدر الشراب .. طب وذنبنا ايه نشم احنا ريحة شراب مدفونه في الجزمه لساعات .... ويبقى حظك فل لو فتحت ولاقيت رجل مش مغسوله .. وبيلعب بصوابع رجله ... في تلك الأوقات العصيبة .. تلف وترجع مكانك....
او سيدة محترمه جايه الشغل "بجلابيه" ويا حرام فاكرة انها عباية .. والجديد "اسدال الصلاة" .. اصله منقرش وبترتر ... الناس مش هاتخد بالها انه اسدال ... يااااا حلاوه!!
بالنسبه لفقرة الوضوء تلاقي الرجالة مشمره البانطلون وشبشب بلاستيك ومتوجهه ناحية الحمام اللي في اخر الطرقة ... علشان يعدي ويلف على كل المكاتب ... يسلم على أصحابه الحلوين بشبشب الحمام ... فالكل يشاهد الوجاهة والاناقة ... واحدث صيحات الموضة !!!
اعلم تماما ان اللبس ازواق .. ولكن ما ذنبنا ان نشاهد تلك المصائب ... ونجبر على التعامل معها !!!!
العمل له احترامه ... لبس العمل له مواصفات ليس بالشرط ان تلبس احسن الماركات ولكن ارحم اهالينا من تلك الخزعبلات
ولا طرح السيدات اشي مترتر وبيبرق ... عشر طرح فوق بعضها مع عدم تناسق للألوان ... او طرحه واحدة مع فرنشه صفرا !!!
جزم الستات ... شيء مهم جدا ... لو كعب الجزمه مقشر .. غيريها .. ولو الجلدة وقعت ... كفاكي طرقعة في نفوخنا ... ورحمة امواتك تركبيها....
واحنا ايه ذنبنا ...كفايه اننا نواجه مشكلات حياتيه ... تطرحك ارضا ...
نصيحة حاول تقلد ابسط الناس في لبسها ... هتلاقي نفسك بتلبس حلو
ليست هناك تعليقات:
إرسال تعليق