2020 علمتنا

2020 علمتنا وعلمت فينا ... السنه دي تعتبر أحد العلامات الفارقه في حياة كل واحد فينا .. سواء على الصعيد الشخصى أو غير 

هي تعتبر سنة حرب .. وحرب استنزاف ... لان لسه المعركه قائمه ... والبقاء للاقوى على رأي اختنا ياسمين صبري !!!!

ليه حرب وليه استنزاف ... حرب لان فعلا احنا كنا بنحارب على بقاءنا.... بنحارب على صمودنا ...كل واحد فينا بيستعمل كل الوسائل المتاحة ... للبقاء ... الصعب أن الحرب كانت ولازالت ضد شىء غير مفهوم ومحيير وصعب السيطره عليه .. لكن الكل بيحاول من مجاله ... ولاول مره ايضا  يخوض العالم أجمع دون استثناءات حرب ضد عدو واحد ....

 الحروب ضد العنصرية وقفت ... السياسيه تأجلت ... والكل أصبح منشغل بحرب ليست مفهومه ...حرب البقاء....

ليه بقى استنزاف ... لانها كانت بتستزفنا ولازالت  ... موارد ... بشر ... صحة ...مجهود .. ولسه مكمله 

ولكن !!!! 2020 خللتنا نعيش لحظات نادره ....عمرها ما عدت على بشر من قبل ... لحظة فراق دون عزاء..... لحظة جواز دون معازيم  .... مساجد دون صلوات ... الكعبه المشرفه ونحن ننظر اليها عبر وسائل الإعلام المختلفة وهي خاويه ... وغيرها من الظواهر الغير مفهومه ...دول العالم الثالث اجتمعت سنين لإقناع الدول المتقدمة لخفض نسبة التلوث....والجميع كان يعاند ... وفجأة الكل خضع لقوانين الطبيعه .....وقلت نسب التلوث بالغصب ... كأن الأرض فاض بها الكيل واستغاثت....فا استجاب الله لها!!!

ولكن أيضا خللتنا نكثر من الدعاء ... ونؤمن أكثر أن لايوجد شىء مسلم ... أو حتمي ... 

علمتنا نتعايش ... نتصرف ... نستحمل ..  نبدع ... نفتكس ... نحب بعض أكثر ... نسأل على بعض ...ندعي لبعض 

2020 شكرا واحب اقولك لو سمحت من فضلك ...كفايه كدا وعلى رأي السيد  عبد السلام النابلسي "ماتبسطهاش أكثر من كدا". 

كل عام جديد واحنا متهنيين متعاونين وعلى الكورونا صامدين .. وصابرين .... وهانكمل دعا لرب العالمين 

كشف ‏حساب

فكرة كشف الحساب في حد ذاتها  فكره جميله ... وإيجابية ... 

ظاهرها إيجابي .......وباطنها لو شاطر اثبت!!!!!

ولكن في واقع الأمر أصبح أطرافها يقدموها لبعض أو يطلبوها ... لإثبات تقصير الطرف الآخر .... أو إثبات وجهة النظر المختلفه .....

وهذا ينطبق على كل العلاقات اللي تنفع تقدم لها كشف حساب 

لو رصدنا الأطراف دي .. هتلاقي نفسك قاسم مشترك في كثير منها ...

يعني كشف حساب بينك وبين زوجتك .. حبيبتك ... اصحابك .. وغيرها من العلاقات الشخصية

وفي كشف حساب بينك وبين رؤسائك في العمل أو من تررؤسهم ... وهي تعتبر جدال والكل  عاوز يثبت وجهة نظره سواء إنجاز أو إخفاق  وتقصير  !!!! 

 في حالة ثبوت تقصيرك ...ليس لك الحق في أن تطلب إثابه أو مكافأة أو اي حاجة حلوه .... ابسطهم حضن وبوسه وكلمتين حلوين؟؟؟؟

صفات الطرفين !!!

ولا اللي بيقدم الكشف واعي ....ولا المتلقي مدرك 

مقدم الكشف عليه يعي أن الطرف الثاني (المتلقي) مش غبي ... عليه يعي أن الطرف الثاني لازم يكسب من ورا العلاقه دي ... لان كل العلاقات فيها هات وخد .....عليك بذل مجهود في توصيل كشف الحساب بصوره لاءقه ...لا للتزييف ... الحقائق لابد أن تكون  واضحة .. أو نظرنا لصفاته ها تجد أنه حريص على أنه يداري عيوبه واخفاقاته و أخطاءه ... ويجمل كشف الحساب على قدر استاطعته 

ام الطرف المتلقي ...هو انت اصلا في مصدر قوة ... بلاش بقى تزودها .. لانك بتبان مفتري ... وممكن يكون عندك حق .. تضيعه بغرورك وتمسكك بتفاهات أو فقط لأنك محتاج تنفذ سياسات .... انت اصلا  المهيمن والمسيطر ...مش لازم تطلع الغلط وتركز عليه  

الطرف المسيطر.... في ايده يسعدك وفي ايده يغمك وينكد عليك

لو جينا لامثله كشف الحساب 

في الحاجات بسيطه وحتميه ومافيهاش جدال تقدر عليها ...وفي اللي ممكن يقصر عليك وعلى حياتك سواء العاطفية أو العمليه أو الاجتماعية

قاعد في مكان طلبت خدمه ..تدفع مقابلها ...ولكن عليك مراجعة كشف الحساب كويس ..اصل بيضيفوا ازازة الميه وانت مش واخدها حقك ترجعها!!!!!

كشف حساب بين زوجين أو حبيبين ... اعرف ان عمر ما في حد منهم صح على طول ... حسب بقى هما بيقدموا كشف حساب ليه .....هل ؟  علشان المركب تمشي ....فا يزينوا كشف الحساب ويعدوا لبعض .....ولا خلاص قضيت ....فايخربوها ... ...

كشف حساب بين الأصحاب في ناس بتعتبره عتاب علشان يظبط العلاقه وفي ناس بتنهي بي العلاقه!!!!

كشف حساب بين المرؤوسين ... وهنا يختلف لو في القطاع الحكومي ... الكل لازم يظهر كشف الحساب مليئ بالإنجازات العديدة التي تمت  ...الكل راضي وفرحان ...الكل امتياز الا ما ندر ... علشان  هو انت كدا كدا مرتبك موجود ... مكافأة التمييز صغيره ... وعلشان كمان الميزانية السنوية متقلش ... لان اصلا هي بتبقى مش مكفيه ..

أما القطاع الخاص ... انسي انت كدا كدا مش عامل اللي عليك ..انت كدا كدا مقصر ... وفي كدا مصطلحات اساسيه ... هتلاقيها بتظهر ..وقت كشف الحساب ... الظروف الاقتصاديه ... دا حال البلد كلها ... احنا اضطرتنا الظروف ..... انتوا ما حققتوش التارجت ..... هتلاقي نفسك فاهم انك عامل اللي عليك .. تخرج من قاعدة كشف الحساب تشعر بأنك ...حرام عليك دا كويس انك بتاخد مرتبك ....

فلو انت متخيل أن ليك حق في ترقيه أو مكافأة هاتتكسف تطلبه  ..لانك اصلا مش محقق التارجت 

وتطلع وتقول لنفسك ... الحمد لله أن مرتبي زي ما هواو أنهم مستحملني !!!!! 

المشكلة هو أن الطرفين  فاهمين ...وكلها ما هي إلا محاولات للفوز بهديه كشف الحساب أو تجنب العقاب .

انواع هدايا وعقاب  كشف الحساب 

لو في العلاقات الحميميه ممكن تنتهي بحضن وبوسه وهديه دا لو كشف الحساب ثقيل ...العقاب ما فيش اجمد من البووز المتيين .. والرد اللي من تحت الضرس 

العلاقات العابرة يكفي ابتسامه وان شاء الله تتعوض المره الجايه... دا بقى بيحمل كل معاني ... انت مش بتبقى فاهم انت كدا اوك ...ولا مش اوك ....

في العمل عندك من اول جواب شكر إلى أن لو ربنا كرمك تصرف مكافأة ...وما بينهم كثيير واشكال مختلفه .... من الثواب ..انا العقاب بردوا يبدأ من لفت نظر لغاية شكرا احنا ساعدنا بك الفتره دي 

واخيرا سيبك بقى من كل دا راعي ضميرك لان انت ملزم في الاخر تقديم كشف حساب لربك ... 

وربنا عادل وكريم لا يتعامل بحسابات البشر  ...اللي ليك هاتخدوا واللي عليك هاتدفعوا

شكرا ‏للسيد ‏مورفي ‏

طول عمري كان عندي استفسارات وجودية .. كانت دائما محيراني ... ولكن مثل اغلب الناس .... الاستسلام لها هو الحل ... فقط لتجنب الجنان ... وعملا بالمقوله الشهيره للسيد محمد هنيدي (متركز علشان متهيسش)

وبعد أن شاهدت ما وراء الطبيعه وعرفت أن في حاجة اسمها قوانين مورفي ... وان ما يمكن أن نمر به في حياتنا من سوء حظ .. أو فشل  .؟ نرجعه إلى قوانين مورفي .. استناداً له ....

 اهو أي حاجة ممكن تبرر أو تلطف أو تهون عليك سوء حظ ...  ويمكن ترسم على وجهك بسمه !!!!!!

وفي الأيام الماضيه انتشرت بعض البوستات عن  بعض الموافق التى تندرج تحت مسمى  قوانين مورفي ... زي الطابور ودورك فيه  ....أو دلق القهوه .. أو خوفك تقابل حد ...فتقابلوا في موقف لا يمكن أن تتخيل انك تقابلوا فيه !!!!!... تقابل حبيبتك القديمه وانت اخر صوره لك في زهنها انك دنجوان!!!! أو تقابلي فتى احلامك ... وانتي نازله باللبس البيت توصلي عيالك !!!!

ولكن اكتشفت أن القوانين دي كثييييير جدا ومتكرره ..  ومتغيره حسب مخاوف كل واحد فينا 

فمثلا !!!!!!

وانت بتاكل السمك المشوي وايدك ملغوصه ... لازم ياما جرس الباب أو التليفون يرن ... ولازم اليوم اللي طلبت فيه السمك ...الصبح جامع القمامه يكون جة وخد كل مخلفات البيت وتلبس انت يومين في مخلفات السمك 

 اليوم اللي ظهرك ورجلك وعضمك مفشفش لازم توقع غطى ازازة الزيت الصغير ... فا يدحرج تحت البوتاجاز ... مش بس علشان توطي وتجيبه ...لاااا علشان تتشقلب وانت بتجيبه

مع اخر  مبلغ قيم في البيت تم صرفه ... فاتورة الكهرباء لازم  تيجي بعده  ...وانت بحسره تقول لنفسك ...ليه  كدا  

اليوم اللي تقرر تعزم في حد على الغدا ..و تكون مهتم  بوجوده ... لازم حاجة تحصل ...ياما الانبوبه تفضى .... أو الأكل يبوظ .... أو حد يتعب 

ولااااا كل مره وانت بتحاول تحط السكر في كنكة القهوه وتقول لنفسك مش هاوقع السكر في بره ...وطبعا يقع 

ولو قاعدنا نعد  مش ها نخلص ... ولكن ... لو ارجعنا ما يحدث لنا  إلى  مخاوفنا.     أو يمكن حرصنا وتركيزنا  الزائد من  اللي بيخوفنا أنه ما يحصلش  .....يمكن نقدر نسيطر شويه على الوضع ....

 احنا بتفكيرنا الزائد وحرصنا  نجعل م نخاف منه يتحقق!!!!! والله كأنه سحر ... ولو قاصدين أنه يحصل مش هايحصل؟؟؟

اصلنا لما نكون مركزين أننا ملنغلطش الغلطات الكبيره ... الصغير منها ها يكدرنا !!!!

سنكتشف أن احنا اللي بنقود انفسنا لمورفي..  عقلنا ...وخوفنا .... ...يؤدي بنا الى تكرار المواقف وعدم استيعاب تكرارها ... خوفك مسيطر عليك ....

 

صحيح احنا  استحاله نقدر نسيطر على كل مخاوفنا  ... لكن ممكن نروض عقلنا على تقبل بعض منها ووضعها في خانة العادي بدل خانة الا عادي !!!!!!

المدير ‏الناجح

البوست هذا ما هو إلا اعتراف وتقدير مني   لجميع رؤوساء بالعمل السابقين  ... لانه واجب عليه ... وهي شهادة منى فأنا حاليا على مسافه ...ولا تربطني بهم الا  كل احترام وتقدير ... 

انا بصراحة كنت محظوظه جدا  لان عدي علي رؤوساء اتعلمت منهم  الكثير
أثروا في ... وتركوا علامات في حياتي  .... كل واحد كان حريص أنه يعطيني ميزه  ويترك لي مساحة من الابداع ... وكان سبب في أن يدفعني إلى الامام ... كل رءيس كان لي فضل في المرحله اللي بعده... غير اني كنت محظوظه لأنهم  جميعهم علامات كبيره في مجالتهم

تسمحوا لي أن  ابدا بالسيد معالى وزير الإعلام الأستاذ Osama Heikal - أسامة هيكل.  الذي اكن له كل الاحترام والتقدير ... اتعلمت منه  الكثير جدا ... الصح الصح والغلط الغلط ... كان يسمع وينصح ويعرض أفكارنا بأسماء من قدم الافكار .... وكان يحرص على مساعدتنا على تنفيذها .... اول من ساعد وأكد أن فريق العمل منحقه أن يقدر معنويا وماديا ... حرصه كان على الصغار من فريق العمل .... قبل الكبار .... نزاهة في التعامل ... رقي ... شكرا معالى الوزير 

الاستاذ عمرو عبد الحميد رئيس إذاعة الشرق الأوسط سابقا اول مدير لي في حياتي  استلمني خام .... لسه قطه ... 21 سنه .....  علمني ازاي ابقى ناشفه  وجامده .. وماخفش اخد قرار ...على ايده اخدت اول قرار فصل في حياتي 🙈🙈

سيادة العميد Yehia Abdallah   علمني ان في اي مكان ممكن اترك بصمه ... ان  لازم يكون ليه وجهة نظر وأصر عليها ... ومع العميد يحي بصراحة فكرة انك سكرتير تنفيذي في وزاره حكوميه ... اتغيرت تماما ....

الدكتور Adel Abdelghafar  دكتور عظيم  وقدير .... اتعلمت منه حسن الإدارة ... الانضباط ... 

ا فؤاد مجاهد اتعلمت منه التنسيق في العرض ... والترتيب .. والعرض المتكامل 

السيده الفاضله الاخت والصديقة الاستاذه Amaal Taha
حدث ولا حرج ... الطيبه والجدعنه ... كانت واثقة فيه وفي قدراتي ... كانت شايفه داءما اني  اقدر اعمل حاجة ...  كنت تغلط وممكن اعك وهي تلحقني 🙈🙈☺️ وتكمل ثاني وتقولي كملي ... كانت تفرح لما تلاقي اسمي في تكليف ... كانت تقول دول بنات امال طه ... ولو هما نجحوا يبقى انا ناجحة

الاستاذه Nahla Fekry El Nakeb  لم يسعدني الحظ أن أعمل لفتره كبيره معها ولكن  كانت داعمة لي وتثق في وتؤمن اني شاطره ... واني كمان مجنونه 

اخيرا  تحيه منى لكافة رؤساءي في العمل 

واتمنى في يوم من الأيام أن يذكرني من عمل معي بكل تقدير وخير كل الشكر والتقدير والاحترام لحضراتكم جميعا 

عفوا !!!!! ‏نائب ‏دايرتي

سؤال بيدور في بالي منذ الصغر .... هو نائب مجلس الشعب دوره المباشر ايه مع اهل دائرته أو بالمعنى البسيط انا المفروض عاوز منك ايه ؟؟؟؟؟ 

بصراحة وانا صغيره عمري ما فكرت انزل أو انتخب... انا كبرت وخرجت   من  دائره العجوزة ... هي كانت عضو واحد ولم بتغيير لسنيين  .... 

ولكن جديا بعد ما نزلت مره واثنين  ومارست حقي في الإختيار ... عجبني ودخل مزاجي ... بس كمان لم اعتاد على الاختيار كدا والسلام... 

علشان كدا لازم الاول نعرف احنا بنحتاج ايه من نائب الدائرة ....  هل بيقتصر دوره على التشريعات ومراقبة الدوله للتأكد من تنفيذ الدور المنوط به ... ودا كلام كبير مش اول حاجة ها يفكر فيها المواطن العادي هي الاستراتيجيات أو السياسات .... ولا خدمة الطبقات المحتاجة قوي ... ولا عادي نكلمه عادي ونشتكي همنا .....وهو الراجل ناقص هموم  ... !!!!....

طيب !!!!!! وايه هي نوعية الهموم ... يعني شغلانه للواد .. ولا تعسف اداري.... ولا خلاف عائلي ... انت بس حط ادينا على اللي نطلبه منك واحنا كشعب مابنتوصاش؟؟؟؟

ايه معايير الاختيار ... السمعه الجيده ...ولا شهرة الاسم ... ولا يمكن الصيت .. جايز الخبرة .. السن ...ولا العلاقات .....ولا سياسة النفس الطويل ... فراغ وقته ..... ولا اختار واحد يكون أساسه من المنطقه وعايش فيها ..... ولا نجرب جديد .؟.

وهل النائب لابد أن يكون ناشط اجتماعي ويعلم عن كل حاجة حاجة ... ولا التخصص مطلوب ... بس اكيد التخصص مطلوب علشان اللجان التخصصية اللي بتنعقد في المجلس ..... ولكن على نطاق الدائره ..لازم يكون عارف ومطلع عن كل مشاكل الدائرة ..... ويعرف الاشخاص اللي في ايديها القدرة على التنفيذ ...  

للايضاح ليس بالشرط الدكتور الشاطر يجيد ادارة منظومه مثلا القصر العيني .....لازم يكون لديه من الخبرات الإدارية والعلاقات مش بس في الطب

لأن لو ليس لديك القدره اخرك ...هاتقدم طلب إحاطة ... وبردوا وانت وقوتك وعلاقاتك وصيتك ...وقوة  صوتك في المجلس .. وقدرتك على التوصيل اعتقد دي من صفات المهمه ....

عفوا سيدي النائب انت بقى تعلم لغاية فين قدرتك تقف ...  لان الكلام الحلو سهل .... ولكن الناس أصبح عندها وعي ..بجانب الشك في قدرتك ... لازم الناس تصدقك بجد وتؤمن بقدرتك   ... وارجو تضع في اعتبارك  الصياغة المناسبه التي تستخدمها في الوعود العامه والشعارات... أصبحت مكشوفة ..   النائب منذ زمن معروف أنه بيظهر في الانتخابات للم الأصوات وكان الله بسر عليم ... وبعدين الاختفاء ...الا ما ندر وتلاقي أهالي المنطقه عارفين ....

 

ولو حضرتك اعتبرناك همزة الوصل بين المواطنين والحكومه وتعتبر انت صوتهم .. يبقى لازم لما تدخل الدائرة ما تعتبرش جديد على اهلها .....لازم تكون مألوف... ولازم بردو تكون معجون مع الدولة بقطاعتها المختلفة ... علشان في الاخر ... لا يقتصر دورك على حملات نظافة وتشجير المدارس .... 

 لازم تقولي تفهمني توعيني..... ايه نوعية الطلبات اللي ينفع اطلبها منك 

لازم تقولي اخرك في متابعة تنفيذ هذا الاحتياجات 

لازم مقرك يبقى متنوع  لائق لاستقبال  لكل الطبقات... لا  المحتاج  يتكسف و يقلق لما يدخله من كثرة واجهته ... ولا الناس العاديه تحس أنه مش من حقها  تجيلك لانك فقط تقدم خدماتك للمحتاجين 

لازم نعرف بشفافية انت جي بعلاقاتك ولا لسه هاتبنيها معانا .... 

لازم يبقى عندك مشروع كبيير يكون له تأثير الكل يشعر به ... مش مجرد حملات وشعارات كبيره عامه .... يعني حلو قوي تعمل دروس تقويه للطلبه المحتاجين..  ومعارض لبس ...... لكن مقابلها لازم يكون في مشروع  يشعر به المحتاج وغير المحتاج يكون أساس تطور للمنطقه ...حارة ونيس الفاضله اللي الكل بيحلم بيها

في النهايه عاوزه اقول لابني انت من حقك تطلب من نائب الدائرة ؟؟؟؟؟؟

عم ‏سيد ‏...عادي ‏...دا ‏مننا ‏وعلينا

ضحكوا علينا وفهمونا أن في حاجة اسمها ممكن انك توضب بيتك عادي وانت عايش فيه 

كذب المنجمون ولو صدقوا 

تجربه تستحق الدراسة انك تقرر توضب  بيتك وانت عايش فيه ....

 بلاش وافتكر اني قلت بلاش !!!!

ومن وحي الدراسة الميدانيه للوضع على أرض الواقع

طبعا الحق يقال عمالك كلهم مش زي بعضهم ... زي صوابعك كدا

الصفات الخاصه بالعمل

 العمال دول بختك يا ابو بخيت منهم اللي فاهم وحلنجي ومنهم اللي فاهم ومكسل ... واللي هايستنصح علشان يطلع بأي سبوبه  ... وفي اللي مش فاهم وعامل نفسه .... وفي البااااارد.... وطبعا في الشاطر المجتهد .......وغيرهم وانت وبختك 

الصفات على مستوى التعاملات 

في الكيوت .. الرغاي ....الصامت القامط ...  الفهلوي ... الطيب والخدوم .... اللي دايس في اي حاجة... سبع صنايع والبخت.....

في حاجات لا مفر منها !!!!! مجبر عليها 

وانت عايش في البيت ما فيش حاجة اسمها خصوصيه البيت بيتهم وانت ضيف ... يعني انت تستأذن قبل فتح الثلاجة ...  تفتح ثلاجة بيتك تلاقي حاجات مش بتعتك ... اوعى تفكر  انك تلمسها ... المطبخ دا أصبح ملكهم بكل ما فيه .... انت تمامك الاوضه اللي انت عايش فيها...... لما يسمحولك 

 

نيجي للحمام  ...أنسى أنك تستخدمه كدا وانت عادي ومرتاح  .... في عدة حلول  .....لو علاقتك حلوه مع جيرانك ......وهنا نفتكر المقوله الشهيره "الجيران لبعضيها" ......خبط على جيرانك .... باشا امسك فوطك وغيارك ... وبكل اناقة..... البيجاما والشبشب ...... وافتكر انك لازم تنسق مواعيد  ....لزووم الادب!!!!

لو عمارة أهل وطبعا دي لها فوائدها .... لان الموضوع لن يقتصر على  الحمام  ....  

انسي بقي ليفتك  وصبونك وجل شورك وشامبوهك .... .... انت كنت فاكر  أن دي  حاجتك ..... في لحظه تكتشف انها حاجة العمال .....  وكانوا شايلنها عندك امانه ....وبيستردوها

نيجي لفقرة الضيافة

الشاي والقهوة والسكر والنيسكافيه ... دا من الثوابت .... الغدا ....انت ومزاجك وقدرتك وسيطرتك ... ممكن تطبخ.....او تجيب من بره ......أو تديهم يجيبوا ...أو تطنش ... وكله له عواقبه .... وعليك تستحملها!!!

... ولكن الجديد انك توفر بيات ...  عادي اتفضل جامبنا على السرير .... يعني هي جت عليه 

 

مرحلة الخسائر 

الخسائر .... في الأول بتخض ......بعدين بتعتاد عليها .... البويلر اتفتت .....يالااا خد الشر وراح ..... مامييي في  كوبيات انكسرت ... في داهيه المهم نخلص ... السجاده الصغيره حاطوا الجبس عليها وبلوها في الحمام .... تولع .... كل صناديق الزباله الصغيره أصبحت اطباق تستخدم للمونه ..... عااااادي نجيب غيرهم .......لكن ليه اوكرة باب الحمام تنكسر .... هو للدرجه دي احنا اسره واحده مع بعضينا .... اصبح مرحاض عام ... كل  اللي يفوت يتفضل عادي ..... الحل؟  ازنق الباب بفوطه ....  أو نزيع ونزف خبر دخولنا أو دخول العامل الحمام ...... "عم على داخل الحمام ... سامعين"

الفلوس 

ليس لها قيمه ... انت بتطلع بالالفات... وفي  شوية ميات لزووم الحبشتكنات .... 

الغريب انك تقعد سنين عايش في نفس البيت ولو جيت تطلع الآلفات.... هتلاقي نفسك مزنوق ... وترفض  أو تأجل .... طلعوا إزاي ...ربك ستار ....

التعارف وتكوين علاقات 

شيء اساسي وملح علشان  تعرف تستفيد على قد ماتقدر .... اصلهم لو حبوك هايخدموك ... وبردوا لو عارفين انهم هايستفيدوا منك .... هايحرصوا علشان الاستفاده المتبادلة 

الخلاصه ....

 الاشخاص اللي عاشوا في بيت بيتوضب ومعاهم عمال أكثر الصفات اللي هايكتسبوها هي التناحه ... البرود ... التأقلم .... عادي البيت مطين ... مطرب ..مغبر .... الحمد والشكرانيه والاستغفار ....

مش كل حاجة هاتطلع سليمه بالظبط ... لازم يكون في عكوسات ... كهربا تضرب ... حاجات تشرخ ... المهم تحافظ على مكتسبات المرحلة 

الرجاء 

رجاء من مواطن إلى أخينا المواطن ورحمة امواتك افتكر أن في ناس عايشين في البيت ... انظر لنا بعين الرأفه ... وافتكر أن في اسره في البيت محتاجة تعيش طبيعي 

 

حلق ‏على العيال ‏

يا ابني اقعد .... يا ابني حرام عليك المدرسه بتنادي ... ... يادي الدوخة .. هدتني وراك في البيت كله ...صوتي اتنبح ...خللي عندك مسؤليه

دي مأساة كل  ام او اب  ولادهم هايدرسوا اون لاين سواء كبار أو اطفال ... الصغير لي مشاكله والكبار ليهم قرفهم

مما لا شك في أن  التجربة جميله وحلوه  واموره ولذيذه و..... ولكن بجد لازم يكون في تأهيل للمدرس وأولياء الأمور ...وطبعا للاطفال 

يعني قبل ما نعلمهم كل ماده ... نفهمهم ... ونشرح لهم أهمية التجربه ..من ناحية المسؤليه ...الضمير ... الاستفاده اللي هاتعود على كل طرف ... علشان كل طرف يبقى حابب اللي هايعمله ...ومش مجبور عليه

 مع تنفيذ هذا النظام لابد وضع برامج تدريبية لضبط أخلاق الام المصريه .... لان لو سبنا الموضوع كدا لانفعلاتها وقدرتها ... ممكن نلاقي نسب الانتحار أو الهستيريا العصبيه الى جانب نسب الطلاق والتشرد الاطفالي ...زايد جدا ... 

وايضا لو تركنا الموضوع للحلول العاديه ... ممكن تلاقي الولد مربوط بسوليتب في الكرسي...... أو متكهرب ...أو متمسمر .... ....  وطبعا مع الأخذ في الاعتبار أن الكهربا أو المسامير تكون متفقه مع المعايير الدولية لعدم إيذاء الطفل .. على الهادي كدا 

 الأم هتلجأ للحلول المبتكرة ....يمكن تربط الطفل بحبل طويل في البيت علشان لو قام تحس وتعرف فترجعه مكانه ... دا غير المهدأات ... أو رسائل متتاليه متسجله ...( يالا ...الزووم ... الجوجل بينادي ... المدرس بيرن ... ) وبعدين ممكن شبشب الأمهات ... أو أي حاجة متناوله تحت ايديها 

ولازم وضع طريقه مبتكره لو الام بره ...والولاد عندها اون لاين ..تضمن صحيانه مع استمرار الصحيان... وتبقى معجزه لو هاتضمن تركيزه .....

ودي بعض الحلول... موبايل مخصوص يرن بصوت صريخ طويل لا ينقطع ... ولا يفصل...  ومكانه يبقى بعيد علشان يضطر يقوم يدور عليه في البيت فيصحه ... وكل يوم في مكان .... الاتفاق مع حارس العماره يطلع يرزع على الباب .... نكهرب السرير مع المعايير الدولية للحفاظ على الطفل ...عند ساعه محددة .... يتم تشغيله عن بعض ... أو حاجة مثل البطانيه الحراريه ....

بالنسبه الصغيرين خدي اجازه اليوم دا ... 

دا غير اكيد لابد وضع برامج تدريبية واختبارات نفسيه للمدرس اللي مطلوب منه يقعد طفل ٥ سنين أمامه على الكورسي والطفل يقتنع أنه يقعد ... لا تقولي بقى كاريزما ..ولا أنه مدرس كيوت ... لازم اللعب على المحتوى وكل ما الولد يكبر كل ما المحتوى يتغير 

طبعا لابد صرف كورس مهدآت للمدرس ... يكون منوع 

دا غير أن أسلوب الثواب والعقاب لازم يختلف يعني مثلا وانت معاه على اللون لاين ... ما تقوليش للطفل لو مسمعتش الكلام هابعتك waiting area ... يا سلااام ... ما هو ها يتمنى ... لاء العقاب لازم يبقى مبتكر ... يتم الاتفاق بين المدرس وولي الأمر ... سحب الايباد ... منع من التمارين ....الاتفاق مع المدرب لف التراك ويزيد اللف مع زيادة الغلط ... هنا يتم توقيع اتفاق بين وزارة التربية والتعليم مع الشباب والرياضة ..لوضع شكل العقاب اما الثواب ... نبدع بقى ... جوائز للشطار للشطار ... ومع كل سن ننوع في  الهديه ... ودي تبقى تعاون بين وزارة التربية والتعليم والتضامن الاجتماعي 

نيجي بقى للمهن اللي هاتنشط في الفتره دي  مهندسين It ومستلزمات التكنولوجيا ... طبعا الانترنت والاتصالات وفواتير الموبايلات 

الدكترا النفسيين دول مكملين معانا من نص الكورونا ... المهم كل عيله تعمل اشتراك سنوي للعائله (اب وام وعيال)

الإتفاق مع مهندس كهرباء ومهندس معماري ... اظبط تيار الكهربا والمسامير ... للاستعمال اللذيذ 

السوبر ماركت والكشك مستلزمات الكشك والرمرمه 

محاوله للاتفاق مع مبدع أو مبتكر لوضع حلول للصحيان مع استمرار التركيز .... والثواب والعقاب

الاتفاق مع رجل دين  للعب على وجع الضمير 

وفي الاخر التربيط مع مأذون شغلته يهدي الطرفين وتأخير قرار الانفصال 

تحياتي من العالم الافتراضي 

صيف ‏كورونا

الصيف السنه دي مختلف  علشان ظروف الكورونا ... إحساسنا بي انكمش ...وتحضيرنا له يكاد يكون منعدم 

اللي يلحق يخطف ايام باي شكل وبأي منظر ....

الناس بقى اكبر طموحاتها تلمس رمل الشاطئ ... اقصى أمنيتها تقعد على البحر ...

ولا بقى فارق فورمة الساحل ولا برنداته....  من اول الكريمات لغاية الشبشب ابو صباع ... وفي النص عزومات السهر ... وشنطة البحر .. اللي لازم تبقى مختلفه عن كل صيف ... اي مايو ... قطعه قطعتين ... المهم انزل الميه ... بوركيني ...تنكيني ... بيكيني.... 

تخيلوا الناس من كثرة زهقها ...الترند دلوقتي... الطياره الورق بتاعة زمان هي اللي مكتسحة ... مش بس للولاد لاااااا دا للكبار كمان ... والكوميدي أصبح في كورسات ازاي تعمل طياره ورق .... 

وطبعا اكل الساحل اللي بنشتاق له  بأنواعه واختلافه ... فطير الساحل حادق وحلو .. سمك وجندوفلي على البحر ... الفريسكا ... موسيقا الصيف  المقبل المدلعه ... شكرا حسين الجسمي .. تحياتي لعمرو دياب .... والقهوه والمزاج  ... والجميل في كثير رجعوا للكتاب على البحر ... وكمان بيدوا النصيحة للباقي... والترند بقى I recommend. 

ما فيش حاجة توقفنا منعوا الشيشه ... محلات التبغ والشيش اشتغلت أكثر وبقى بردو دا الترند .... راحت على الكافيهات ... كل واحد يجيب شيشته وينقي حته حلو على البحر ويقعد يشيش ويشرب شايه وقهوته وعصيره .... ولا الحوجة للبياخد ضريبة الخدمه ..ويزود لك فحم ... قاعده حلوه مع الاصحاب تكلفك نص ثمن القاعدة على الكافيهات

تحسوا الناس رجعت لطبيعتها ...   او بأمر من  الكورونا اجبروا على أنهم يرجعوا لأيام زمان ... ايام الشمسية والكراسي وكيس الحلويات من السوبر ماركت .. الايام الحلوه البسيطه .... اللي لا بها تكلف وتباهي ولا منظره... اشي   بلبس  ثمنه بالافات ... ولا خروجات وعزايم في اماكن الحجز فيها   بالواسطه ....تعرف حد تدخل ما تعرفش ما تدخلش  .... ولازم يتوافق عليك " كشف هيئه "   انت تعرف فلان أو قريب علان  ... .  ..طالعه واحد من دول  تكلفك مش اقل من تيييييت !!!!!

على رأي الزعيم عادل امام ناس عندهم لحمه بيعزموا ناس ثانيه عندهم لحمة ..علشان يكلو لحمه ...

صحيح لسه في حابه بيحاولوا يستمتعوا  بالطريقة  القديمه ...لعدة اغراض أهمها  بيزنس  العائلات ... والترويج لها ... او منظره ... يمكن فشخره .... او تشبيك .... ابن فلان البنت علان  ...للمصلحة العامة .. أو يمكن علشان عدد لايكات أو كومنتات ... 

الكورونا والصيف ... بردوا الناس عرفت تبسط نفسها ... مش الكورونا اللي هاتهدها

تحيه لكل من عرف ينبسط  ويفرح نفسه وغيره .... فهم وعرف أن الحياه فيها متع بسيطه ... 

عرف أن متعة لمة العيله والاصحاب  هي الأهم مش مهم فين وبكام ... المهم اننا مع بعض ومفقدناش حد ... واسفه لكل واحد فقد عزيز وغالي وعدى عليه الصيف وهو بيدعي له بالرحمه والغفران 

فن ‏اختيار ‏الهديه

كيف تختار هديه ....

الهديه  بتمثلك ... تعبر عنك  ...

مش ضروري تكون غاليه ... ولكن لازم تكون معبرة ... فيها روحك ... تقديرك ... شغفك ...  باين فيها مجهودك 

الهدايا انواع حسب العلاقات ... 

في هدايا فورمال ودي لازم تكون بقيمة صاحبها ... يعني متبقاش رايح لواحد انت عارف  شغفه وحبه في   أنه بيجمع تحف ... وانت تعرف دا ... وتروح جايب  له قطه او كلب بالرغم من أنها اكيد هديه غاليه .. بس دا غباء في الإختيار 

وفي هدايا عاطفيه ... اللي هي كلها عصافير وتغريد ودي عامة مقبوله طوال الوقت ... ولكن السن هنا بيفرق ... يعني واحنا صغيرين واصحاب غير واحنا مخطوبين أو متجوزين ... ولازم نراعي واحنا داخلين على أهل  نصك الثاني .... لازم نكون بقيميتنا ... يعني لو متعودين نجيب دائما من الفرن اللي قلب بطبيعة التطور إلى محل حلويات شرقيه واجنبيه ... نيجي  على نفسنا ونشخشخ جيوبنا ... ونروح نجيب  من حته  معروفة للبشر مش معروفه للمنطقه اللي عايشين فيها 

هدايا في إطار العمل ... مثل المؤتمرات و هدايا رأس السنه الجديده ..أو اي مناسبه تختص بعملك ... لازم نراعي عدة جوانب ... الاسترخاص بيبان..... بلاش نسترخص ... دا غير أن فلوسك بتروح في الأرض ....  حاول تبقى مختلف ومفيد ونحط خط بقى تحت مفيد ..... يعني مش علشان انت فاتح  محل جديد بيبيع ادوات الركبي والفروسية ...تبعت للناس هديه عصاية راكبي ولا حدوة حصان ... فين الافاده ... هايعمل بيهم ايه ... مش نفكر ... لو كان حد متابع زمان يوميات ونيس ... ماكنش حد عمل العمله دي ابدا ...  دا غير النتيجة العكسيه بدل ما الناس هاتفتكر الهديه علشان مفيده ... هايفتكروا بس أنهم لبسوا حدوة الحصان  ...

اختيار وقت تقديم الهديه بردوا فن كبير ... يعني وقت العاطفي غير الرسمي غير اللي في إطار العمل

في العطافي افتكروا أن دي بتبقى من النوادر بلاش تضيعوها ... دي مناسبة قوميه .. كلفتكم فلوس... ومجهود ... واستعدادات ..وربنا يهديكم

في الرسمي  ...ما فيش احلى من يكون مترتب لها قبلها وصاحبها عنده خلفيه ... علشان مايبنش انك عاوز خدمه أو جايبها تحصيل حاصل مش تقدير 

في العمل بقى ما تبقاش جايب هديه  لامواخذه تييييت،!!!!!!!!! وتزل اللي خلفوهم أو تحسسهم أن ما فيش غيرك اللي فكر يهادي .... لازم أي أن كان اللي جايبه يبان أنه أقل من الطبيعي ... احنا بنبني سمعه ... وعلاقه سواء مع موظفين أو متعاملين أو حتى علشان الذكرى تبقى حلوة 

نيجي بقى للمتلقى ...  بردو دا لازم يتقسم ...اصل من حبيبك غير شغلك .... 

فلو من حبيبك اهم حاجة تفرح بيها .. وفرحه بضحكه حلوه...بوسه ...حضن  ... حاسسه  أنه عمل حاجة ... وأنه فرق معاك 

من حد رسمي خاليك متوازن ولكن مقدر ... الشكر والتقدير مهم لانه خصك وافتكرك ..عاملك بتميز 

في إطار العمل طبعا في شكر ... بس ما دام هي عامه وللكل ومش مخصوص لك  ...لا تتكابل عليها .. ممكن تتعفف مره .. تتقدم وتتأخر وانت بتاخدها .. ولو اخدتها ..فشكرا مع ابتسامه تكفي 

ولكن علينا أن نضع بعض النقاط البسيطة ...... 

معلش تعالى على نفسك ...وراعي أن اللي اودامك عمل اي مجهود حتى ولو صغير ... فكر ... حوش ... استقطع  من الميزانيه ... نزل ..... لف الهديه .... شالها ... وغيرها من الافعال .... 

فمعلش لو مش على زوقك ...افتكر أنه ممكن يكون ما يعرفش ذوقك أو فاكر أن ذوقه حلو  ... 

معلش لو رخيصه مش برنداتك ... افتكر أنه ممكن يكون هو دا اللي قدر يجيبه ..... 

معلش لو مكرره ....افتكر اخوانا اللي في الصومال  ......ونيس استايل ...اكيد ليها عوزه  .. 

الهديه عباره عن شيء جميل من المفترض أنه مفيد يترك اثر ايجابي على الشخص المتلقي ... 

تهادوا تحابوا

ثيرموستات ‏زعلنا ‏وفرحنا ‏باظت ‏... ‏خالص

ثيرموستات الزعل والانبساط باظت ...باظت خالص....

في حاجة اتغيرت .... لو حصل حاجة تستاهل انك تفرح ... تلاقي نفسك  مش عارف تفرح لغاية فين ... تفرح قوي ولا نص نص ....  

ليك الحق اصلا أن تفرح ولا علشان في زعل حوليك مش المفروض..... تفرح 🙄

ولو حصل وجع وآلم  ...زعلك بردو بقى غريب ومتغيير ....

 العياط اختلف ... الدموع بقيت بتنزل من العين لوحدها من غير صوت....  

مستوى الزعل اصبح غير مفهوم  بيعلى فجاءة ويوطى فجاءة ..... وللأسف بتبقى مهنج .... مش عارف تعمل ايه .....  تزعل قوي علشان هو المفروض كدا .... ولا تتماسك ... علشان الصح كدا 😞😞

ساعات من كثرة ما الواحد يتعرض لمواقف صعبه يستنى حاجة في قمة التفاهة ويضحك ويعلى صوته علشان يوهم الناس ونفسه أنه مبسوط وفرحان .... بالرغم من انه بيبقى  مفقوس جدا .... 

ولو ضاع منك شيء لا قيمة له ... لا يستحق زعلك .... يبقى صوت عياطك عالى وفي شحتفه .... كانك مستني اي حاجة تحصل علشان تخرج اللي جواك 😞😞😞

احنا علشان ثيرموستاتنا بايظه ممكن نشوف حد زعلان عادي ... فا نزعل أكثر منه ....  فائض زعل ... او زعل مكبوت ... 

او تلاقي حد فرحان فا تدخل تزاحم .... علشان نفسك تفرح .. نفسك تنبسط ... 

وكان اول مره نتعرض لموقف  مثل هذا  ... نبقى مش عارفين نزعل ولا نفرح ... هو يوم وفاة حمايه ... لان في نفس يوم  والدة ابني  ... 

في نفس اليوم زوجي يتلقى العزاء ... والمباركه

تليفون واحد في البقاء لله ... والف مبروك 😞😞😞

والدتي اليوم فقدت عزيز غالي ..تتلقى تليفون واحد.... كل سنه وانتي طيبه.... والبقاء لله  في عزيزك 

واخيرا  ارضى بما كتبه الله عليك ... ولا تبخل على نفسك باحتياجاتك  زعل كانت ام فرح

وجع ‏القلب ‏وكسرة ‏النفس ‏... ‏

وجع القلب💔 وكسرة النفس😞 ... حاجة كدا ما تتوصفش ... لكن تتحس  ....
وبما انهم احاسيس فهي متغيره وتحملها وقبولها متغير حسب قدرة كل واحد فينا
من وجهة نظري المتواضعة 🙈🙈
وجع القلب💔 ....في بدايته وجع تتخيل أنه لا يحتمل وأنك خلاص كدا انتهيت ...ولكن تكتشف في نهايته  انك قادر ...  وقوي وصلب  دا غير الدروس المستفاده..... انك اتولدت من جديد  ...
وجع القلب 💔 انت ممكن تداريه وتتغلب عليه .... تمثل يعني أنك قادر تعيش ومتعايش... واللي جوه ربنا ادرى به ....  ولكن محتاج شخصيه قويه ... تتعلم بسرعه ... ومتستسلمش ...
كسرة النفس ... هي آلام  يتغللها مشاعر عدم التصديق ... والاستغراب ... صدمه  ... خصوصا لو من حد قريب منك 🙈🙈
كسره النفس مفضوحه يا عيني ....  يبان عليك  انك مكسور 😞.. روحك مطفيه ... ضحكتك مكسوره 😞.. صوتك هادي ..عينك لمعتها مختفيه ....  وأعتقد أن الحاجات دي  مش بتتدارى ...
وعلى فكره مش لازم يتوجع قلبك أو تتكسر💔  بسبب حبيب خالص (ابسليوتلي) ... ممكن من صديق👭 ... من قريب⁦👨‍👩‍👧‍👧⁩....  ممكن تجيلك الضربه من  اقرب ما يمكن ان تتخيل ... ⁦👨‍👩‍👧‍👧⁩ 
ممكن تكون موجوع ومكسور💔 علشان مشتاق للفارقوك سواء احياء أو اموات  ... وممكن  علشان مصدوم  ومش مستوعب🤪 ...
المشكله لو كسره نفسك ووجع قلبك💔 ...هاجموك مع بعض ومن نفس الشخص ... تبقى مش عارف تبدء منين العلاج .. تداري اللي باين ... وتسيبك من اللي مستخبي ... ولا تداوي وجع قلبك ... وسيب اللي يبان يبان ... والايام يا ما بتداوي 😞🙈

ولكن من نعمة ربنا🤲 علينا التي لا تقل ويمكن تزيد في الاهميه عن نعم كثير هي النسيان ... علشان نعيش ... مع مساعدات بسيطه من عند الصيدليه⁦🧑‍🔬⁩ وهي المهدآت⁦☺️⁩🤭
وهنا النسيان ليس فقدان ذاكره اكيد ... علشان في ناس اكيد  ما يتنسوش  .... ولكن من مبدأ  التعايش ... 💃⁦
لازم نكمل حياتنا علشان في ناس حولنا معتمدين علينا ... احنا بالنسبه لهم حياه ...⁦👨‍👩‍👧‍👦⁩⁦👨‍👧‍👦⁩⁦👨‍👨‍👦⁩
بلاش نبقى سبب في وجع قلبهم ولا كسرة نفسهم 💔...
لو شربت من كاس كسره النفس ووجع القلب ... راعي أن اللي بتحبهم ... ياخروا شربهم...  أصله جاي جاي ... لا مفر ....

الراحة ‏الابديه

انك تكون مرتاح الجسد مش بالضروره تكون مرتاح البال والنفس  

ولكن اللي اكيد ومهم أن راحة البال والنفس تؤدي إلى راحة الجسد ...  بالبلدي كدا بتفك العضلات ... راحة البال هي المخدر والمهدئ الطبيعي لجسدك 

ممكن تسعى أن تغير حياتك وظروفك  علشان نفسك  ترتاح ...ولكن لن يحدث ذلك إلا  عند ادراكك  أن راحة بالك مهمه .... وان وجعك ها يزول لما تريح بالك 

 ومرحلة الإدراك تأتي بعد تعرضك لكم هائل من الاحداث  المختلفه ...سواء   شخصيه ...عمليه  ..او علاقات في حياتك يعقبها صدامات أو مشاحنات   .... فتأخذ القرار ... او تأخذ مسكنات ...  

ممكن تزهد الحياة وتستسلم علشان تعيش وهم البال المرتاح ودا كثييير بيعملوا ولكن بدرجات 

الراجل ممكن يريح باله مع مراته من باب قلة وجع الدماغ ... والست كذلك ... ولكن لغاية امتى وايه الحدود اللي بعدها ... دا ما ينفعش....

ممكن تريح بالك ومتدخلش في مشاحنات ولكن يؤدي بك الحال إلى انك تفقد حقوقك 

 صحيح  راحة بالك تساوي كنوز ... لا تقدر بمال ...

ولكن في فرق كبير بين انك تعمل الشئ وانت مقتنع بي علشان بالك ونفسك وروحك ترتاح ... وما بين انك مش عاوز وجع دماغ .....دي شعره ما بين ادراكك وقوتك ... وما بين زهدك وسلبيتك وساعات خوفك

راحة البال والنفس ...راحة من النوع  الروحاني ..  اللي يوصلها اكيد هيكون عمل مجهود وجهاد نفسي كبير

راحة الجسد ممكن تاخدلها مسكنات ودا اللي اغلب الناس بتعملوا ... ودي راحة مؤقته ....  

واخيرا 😌😌

في  الراحة الابديه  .... اللي ممكن يلجىء لها بعض الناس   بطرق مختلفه وعلشان يوصلها لازم يتخذ بعض السلوكيات منها   ...  الامبلاه ...  التكييف....المداديه .....   السلبيه .... الى  أن ربنا يفتكره 😌😌

ريح بالك ونفسك ولكن مش من باب قلة وجع الدماغ ... لانك بعد شويه ستفقد هويتك وتصبح جسد بدون روح

العادي ‏اصبح ‏وجهة ‏نظر

العادي عادي من وجهة نظر اللي بيمارس العادي أو متعود أن دا العادي بتاعه😊😊

أما متلقى العادي ممكن من وجهة نظره يكون مش عادي 🙃🙃

مين بقى اللي يحدد أن دا عادي ... او مش عادي 

العادي درجات ... العادي انواع .... 

العادي في أمور حياتك ممكن يكون مش عادي لحد ثاني او مش مناسب 

العادي في أمورك العمليه بنسب كبيره بتكون مش عادي لغيرك ..... لاختلاف الصفات وقدرات التحمل .... والاستيعاب.... حكومه ولا خاص ... تملك العمل ام تعمل عند أحد ..... لازم العادي يختلف 🤪🤪🤪

مفهوم العادي اختلف ما بين الأجيال وبعضها ... اللي فاكرينه احنا مش عادي .... هو بالنسبة له عادي ... وعادي جدا 

يعني احنا نفسنا بنتطور في عادينا وفقا للظروف أو ما نمر به من أمور حياتيه ... هما يعني مش هايخلقوا عاديهم اللي يبسطهم 😊😊

حتى في ردود أفعالك .... ممكن جدا يكون عاديك غير عادييه 

الخدعه  اللي كثير  بنعملها في غيرنا ... إن نعيشهم جو المغامره والشك ... انك اصلا ما تكونش عادي. .... وتقول انك عادي .... لإثارة مشاعر من حولك ... او استعطافه ... وهي اصلا الدنيا مش مستحمله .... 

لما حد يسألك شكلك مش عادي مالك في ايه ... رد على طول ... حتى لو مش عاوز تحكي ... بلاش تعيشنا جو التشويق والإثارة والمتعه ... هي اصلا مش ناقصه .... يعني عادي تقول انك مش عادي ... بس انا مش حابب احكي ....

انا مفهوم العادي ومش عادي دا ها يجنني .... 

وعلى فكره في شعره ما بين العادي ومش عادي ... و الصح واللي مايصحش .... 

لان هنا في مبادئ أو ثوابت .... ما ينفعش تتغير ... هي بكل الاحوال مش عادي ومش صح ..... 

على العموم ممكن نتفق اننا نقبل عادي بعضينا ... من غير ما نيجي على بعضينا باللي مش عادي 

توهتكوا صح .....عادي جدا 🙈🙈🙈😂

مصري ‏في ‏البطاقه

لفت نظري حاجة غريبه والصدفه هي اللى خلتني اركز  ....  انا لاحظت في تعملاتي أن في ناس بتتكسف تقول انها بتحب مصر .... ولو قالت لازم تبرر ... او تدلل ....  كأنها حاجة غريبه ..   وفي اللي بياخدوها بضحك ... ويقولوا طب احنا بنحبها علشان بلدنا ... الغريبه الناس الثانيه بتحبها ليه ... ويكمل وجهة نظره ... دي بأنه يعدد  عيوبها😠 😠😠. ...كأننا مش معاه ومش عارفين....ولكن الفرق ...بين اللي بحبها بجد واللي بيحبها علشان الجنسيه ... شعره .... ممكن يكون مش مدركها ولا حساسها ...  حب يصاحبه انتماء  هى أسمى الدراجات..... حب لانك مصري في البطاقه ...حب بردو 🙈😜

مصر مش محتاجة أن أي حد يعدد مزاياها ...لان  العالم عارف قد ايه هي بلد عظيمه ومهمه ... ومطمع للجميع  ... ومش هاقول علشان ذكرت في القرآن.... ولا حتى علشان الرحله المقدسه     ... .لكن هي على مر الزمن   وجهة الكثير  .... سواء اقتصاديا ... ترفيهيا ... دينياً. .... 

في اللي بيجلها علشان خيرها ...وفي غيرهم علشان موقعها .. وغيرهم علشان الاستمتاع بكل ما فيها وحشها قبل حلوها .... وما فيش بلد مافيهاش عيوب ... .اكيد مصر فيها عيوب ...لكن تاكد عيوبها ......نتاج سلوكياتنا

احنا اللي بنعمل كدا ....  فيها وفي نفسنا

مصر حلوه قوي ...فيها جمال مختلف  في كل مكان 

بحر   وصحرا ... جبال ... آثار...متاحف ...فن ... ثقافه .... وغيرها كثيير 

وعلى فكرة شعبها بردو بسلوكياته .....وحشه كانت او حلوه   شعب جميل ... 

رجالته جدعه 

ستاته بمييت راجل يعتمد عليها 

شعب دمه خفيف ... استحمل ومكمل .... 

المحن بيقلبها لكوميديا ساخره ... 

بلدك حلوه .... حلوه قوي ... وجميله وتستاهل أننا نحافظ عليها 

علموا ولادكوا يحبوها صح .... يحبوها بانتماء .... مش مجرد أنه مصري في البطاقه 

وان كان على الورق المزور  فا في منه كثير

‏مصائب قوما عند قوما فوائد

لكل حدث  يمر علينا سواء حدث مفرح أو هم وغم ...  له ناسوا اللي بيعرفوا يستفيدوا منه ... ويركبوا الموجه ...وفي الناس اللي وفقاً للكاتلوج كان لازم يقبوا لفوق ... ولكن  نرجع ونقول ما باليد حيلة!!!!!! اصل دي تعتبر "قدرات" على رأي هنيدي!!!!

مع الوضع فى الإعتبار أن في ناس مش مكتوب لها السعاده وركوب الموجة مثل الاخت نجلاء  ... ولا ليهم حبيب ولا قريب ولا غريب!!! ودائما حظهم بعيد!!

 الموضوع دا ليس مقتصر على الوضع اللي احنا فيه فقط ... دا شغال معنا طول الوقت  ...... الناصح واللي دماغه شغاله  يستفيد والقليل منهم فقط يستفيدوا ويفيدوا ....  

يعني مثلا   وقت البطولات وخصوصاً الكوره ... تلاقي بياعين الأعلام ومشتملات الصناعه مثل عصاية العلم...... قماش العلم ... الصمغ اللي بيلزء العلم  ...  شغالين فل ... ودا وقتهم لو لم يستفيدوا يبقوا !!! 

وقت الثوره !!!! اتذكر  مشروع نصبة الشاي في الميدان .... الناس دي عملت مليارات ...دا مش نق ... دا ممكن نعتبره انبهار من الناس اللي عندها قدرات ... 

وقت عيد الاضحى ... الخروف الفرو اللي في الاشاره ... ابهار ... كل عيد تلاقي تجديد 

ولكن اهم شئ هو عدم استغلال الموقف ويصبح الانتفاع ليس على حساب صحة الناس !!!

واخيرا ما يمر علينا حاليا "كورونا" .... ودي بقى وضعها مختلف تماما .. لان مستفيدنها عارفين أن اللعب على الصحة يضمن نجاح استفادتهم مليون في ١٠٠ .... والمستفيدين الان مش كلهم اصحاب ضمير عالي ... لذى تكتشف أن المتاجرة بالناس في وقت الازمات امر لا مفر منه ... وهو أكثر الاوقات اللى  يتعمل فيها ثروات .... والناس "عادي عادي عادى اهو" ..... المهم الصحة .... الناس لا تفاصل في صحتها ومستعدة تدفع !!!!!

كمامه قماش ...لاء طبيه ...لاء ورقيه ... ولا اقولك مترزه ... واخرها الشفاف علشان لون الروج ( يعني نزعل الحلوات القمرات) ..... والجميل نزلوا منها برندات ... 

ندخل  على الفيتامينات ... خد زينك  ... فوار فيتامين سي لا دي ... والناس تنزل تسحب كل اللي في الصيدليات  ...  واكثر تجربه الشعب كله حبها وكان راضي عليها هي "كلونيا 555"... احنا شعب حبوب وبنحب نقف مع  حبايبنا اللي عانوا كثير  .... وهنا نقول مصائب قوما عند قوما فوائد ....   

ولا اسلوب الحياه الصحيه مع المدرب الخصوصي"trainer" .... اتمرن اون لاين وحول الفلوس على الحساب ... وهنا العيال تشبط والاب ما يعرفش يلاحق على الفواتير ..المهم صحة العيال ونفسيتهم !!! 

هابعتلك نظام صحي اول أسبوع ببلاش ... وبعدين حول على الحساب ...  وهنا الست  تسبت جوزها انه كله في مصلحته ومصلحتها .... فلازم ندفع !!!!

اكيد  كلنا محتاجين دكتور نفساني  ... وهنا العيله كلها بتدفع !!!... الجلسه الواحده بمبلغ ... ولو نزلنا بالكفاءة .... هانروح إلى life coach .... ودا طبعا حسب شهرته ها ياخد فلوسه ... وبردوا على الحساب ... وجلساته على زووم ... تتمدد على شيزلونجك  ... وهو عليه راحتك 

وهنا علينا الاستعانه بجملة الاستاذ عادل امام " ان كل زفت مرحله ليها متطلابتها واحتياجتها" 

ولكن ارجو  من حبايبنا الاستفادة مع مراعاة اداب واخلاق الاستفادة ... واستفيد ولا تستبيح 

إعادة ‏نظر ‏

التجربه التى مررنا بها تجعلنا نعيد النظر  سواء أفراد أو حكومات علينا أن نحرص على أشياء كثيرة أغلبنا اعتقد انها مسلمه وغيرنا لم يكن على درايه بأهميتها ... "اصلها عادي!!!!" 

علينا تعلم تقييم الامور ووضعها في نصابها ... اصل اللي كنا فكرينه مهم هو اصلا مش مهم خالص ... واللي كنا واخدينه تحصيل حاصل طلع في غاية الاهميه 

-الاستثمار في التعليم والبحث العلمي شيء هام جدا  ونتيجة عدم اهتمامنا ...... الحلوين المبدعين  هجروا  من زمن وغيرنا بيستفيد منهم ... ومش باقي لنا  غير "الهبيده "

-الاعتناء والاستثمار وتسليط الاضواء على  شراءح  المجتمع المختلفه  غير لاعبي الكوره والفنانين  ... وهذا لا يعني أنهم غير هامين ... بس افتكروا الاوليه !!!!

-اعتبار الأطباء والمنظومة الصحيه بأكملها خط احمر  مثلها مثل الجيش والشرطه والقضاء ... هو دا خط الدفاع لا مساس به ... الامن والصحه 

الاستثمار في التعليم الفني ضروره ... والعمل والحرص على تغيير الصوره الذهنيه عن التعليم الفني   ... لابد من  اكتشاف المواهب الفنيه في كل مجال .. والحث أكثر على الابداع والاختراع

-الحياة  الاون لاين لا يجوز الاعتماد عليها  اعتماد كلي ...لابد التعامل معها على أنها شيء مكمل وجوده هام   ... احنا كدا هانتجنن وهايجلنا توحد ... الولاد اصحابهم بقوا افتراضيين ... والكبار  هاينسوا شكل بعض من أثر عوامل التعرية ...  لازم يكون في تعامل مع بشر  ...   كل حاجة مفيده ولكن لحد ... هي مش موضه  والسلام .... الكل بقى بيجري على الافتراضي ... وربنا يستر 

-اعادة النظر في فلوس التبرعات التي تجمع وقت الازمات ... لانها في الأغلب بيتم أستخدمها بسرعه لسد أزمة بعينها .... وغالبا مش بتروح  في الأماكن الصحيحة ... محتاجة تروي مع   تحديد اتجاهات صرفها وتكون على مشاريع قوميه حتى لو الاستفادة تكون على مدى بعيد ... ولو ممكن مانتعملش معها على أنها شو قوي ... نص نص 

 التربيه ... دي بقى خلال الازمه وجدنا أننا كلنا مقصرين ... سواء في حق انفسنا أو حق الغير !!!!!  لازم نعترف أن في صفات كانت تائه عنا ....  صفات كنا بننساها في تربية الأولاد أو حتى نكتسبها لأنفسنا  .... مثل الاعتماد على النفس ... المشاركه ...  الخوف على الغير ... الحرص واجب ... وغيرها 

نيجي لفقرة  دخول المطبخ  - ودي طبعا -  للولاد والرجاله بصفه عامه .... طلع مش عيب خالص ولا ينتقص من كرامتكم شيء  ...  دي كمان طلعت ممتعه ... وبقى ليكم معجبين

واخيرا وليس اخرا اكتشافنا لبيئتنا ...وأنها محتجانا زي اولادنا وعائلتنا ... صدقنا أنها بتعرف تشتكي ... صدقنا أنها قويه ولها رد فعل ... لما غضبت ... وزعلت ... وقفت حياتنا 

ارجو من الجميع إعادة النظر ... مش عيب لسه أمامنا وقت 

عيدك ‏...اون ‏لاين ‏

العيد 

كل عام كنت بكتب عن العيد بالطريقه العاديه..   صلاة العيد ....  احتفالات ...  خروج ...... تجمعات ....... الحاجات العاديه اللي كنا متعودين عليها....... ولم نتخيل ابدا أنها ممكن تتغير .... زي معتقدات كثير .... لكن الصراحة بعد الظروف التي مرت علينا ... مبقاش في حاجة غريبه ...  

عادي ... ومش غريب انك تصلي صلاة العيد في البيت  واخرك تلم رجالة العماره وتصلي بيهم 

عادي جدا أن البنات والستات تدخل على  العيد  بنفس تسريحة الشعر والحواجب سبعات ... مع شنب خفيف .... دا غير اللي جازفت وقررت تحلق لولادها  أو تقرر تخلص نفسها في البيت بشوية مساعدات ... وغالبا دول مش كثير .... 

حتى الولاد ... مالهومش صوت ... وشهم في وش ايبادهم وموبايلاتهم.... بس للحق ... لبسوا اكثر حاجة ما كنتش  بتتلبس ...وسموها لبس العيد ....  

الكحك والبيتيفور والبسكويت ...  دا لوحدهم حكايه  .... الستات  ابدعت ... كل يومين تطلع بافتكاسه جديده وطريقه جديده لعمايل الكحك والبيتيفور .... وكل مره بتجرب طريقة صديقه مختلفه وتعملها منشين وتشكرها .... ولكن حد يعرف الغلابه اللي في البيت اخبارهم ايه بعد كل هذة التجارب ... اصل التجارب لم تقتصر على العيد ... الموضوع بادي من اول 

رمضان......  البطن يا ناس اشتكت....

وفي نوع آخر قرر يجرب يشتري من عدة أماكن مختلفة ... وتبدأ فقرة التحليل ... اشي كحك بالعجوه بس مرمل ....ولا كحك بالملبن بس مسمن ...وغيرها من آراء ...  المهم ناكل ونربرب ... باظظ باظظ خالص!!!!

ومن الملاحظات  برامج الشات ...اشي زووم ...هاوس بارتي ... ماسنجر ... وغيرها   ..... الناس أصبحت في اشتياق ... بتجرب كل البرامج يمكن  واحد منهم يشعروا فيه أنهم  اقرب لبعض ... ... المعايدات ..أصبحت أكثر حميميه ... الناس شعرت بافتقدها لمعنى اللمه والحضن والبوس ...  وحشتنا التجمعات .... ولمة الاحباب ...  

ونيجي بقى لفقرة الذكريات ... ودي فقرة خاصة ... كلها مشاعر .... حب واشتياق .... مشتاقين لكل حبيب فارق  ... وذكرياتنا معاهم ..... مواقف مضحكه  جمعتنا مع بعض ... اصدقاء و أقارب .... المهم نفتكر وندعي او نترحم  ..

الاون لاين بقى اسلوب حياه..... رمضان وعيد  ...  شرا ... اجتماعيات ... شغل ...... حب ومشاعر ...  لدرجة الواحد خايف بعد كدا ما يعرفش ...يتعامل .... 

  عيد سعيد ... على الجميع ... 

الكورونا : ‏شغلك ‏من ‏بيتك

العمل من البيت "working from home"  مصطلح جديد علينا ولكن شكلنا كدا هانعتاد عليه ... ومش بعيد بعد فتره من الوقت يصبح شئ اساسي...  ويتخلق له فرص  واشكال من الاعمال اللي  تليق عليه ....  
العمل من البيت له احتياجات وموارد لابد ان تتوافر .....نت سريع وكثيير ... اجهزة كومبيوتر متظبطه .... تليفون مشحون وفاتورته مدفوعه ... مكان هادي منعزل "حبه" لتفادي المواقف المحرجة مثل حد معدي وراك وانت على زووم .... صوت الراجل بتاع الانابيب .... الطلبات اللي ممكن تطلب منك لان اللي حوليك مش مستوعب انك في شغل .... ما انت قاعد جامبه على الكنبه"... دا من حيث الترتيبات البيتيه ... 

اما اصحاب  العمل .... لابد ان يتحلوا بصفة الثقة والصبر والهدووووء ....يثقوا في من يعمل بالبيت لان على قدر مقدار الثقه على قدر انه هايشتغل وهو مطمئن مش قلقان ولا متوتر ولا متعصب ... "اصل لا مفر" ....لازم يصدقوا  انك قاعد بتشتغل ... مش بتعمل نفسك بتشتغل ....  صحيح الله يكون في عونهم .... اكيد الشك هايموتهم .... ودا طبعا ناتج عن سمعتنا اللي سبقانا ... معروف عنا كموظفين اننا يعني مش قوي....!!! ولكن في ناس بتتظلم ... ويختطلت الحابل بالنابل!!!!

ومع التطبيق العملي  طلع  العمل من المنزل  سلبياته اكثر بكثيير من ايجبياته .... العمل من البيت بيزيد من صفة الشك التوتر القلق العصبيه ... بتتعود على المهدآت .... مهما انت فاكر انك بتشتغل ... فا اكيد كل من حولك حاسس انك بتلعب ... 

شغلك من البيت :  الدنيا سداح مداح وكل شيء مباح ...  سواء من اللي حوليك في البيت او من اللي طالب من الشغل ... 

شغلك  من البيت : لابد ان يتوافر ليدك اضعاف اضعاف التركيز ... اصلك ممكن ترد على المكوجي وتقوله بعت الميل ولا لسه بدل ابعت المكواة .... او وانت بتكلم مديرك وتقوله حاضر هابعت الحاجة لطنط سوسو بدل من هابعت الحاجة للسيد محمد ... او اولادك الحلوين بتحلى طلباتهم كلها وانت مثلا في اجتماع ... اويعدوا وراك ويرموا السلام 

البيت يعني رحرحه ودا يتنافى مع فكرة العمل والالتزام بمواعيد وسلوك الانضباط ... لان بطبيعة الحال الواحد حر في بيته وبيمشي على القوانين اللي متماشيه معاه... ولكن في العمل انت لازم تمشي على سيايسة العمل ... وهنا المشكله ... تتداخل القوانين ... والاحتياجات ... والمتطلبات .... لتخلق جو من " العبط" انت مش فاهمة ....

شوية نصائح: 
ضع لنفسك مواعيد واثبت عليها 
بقدر الامكان افصل وقت الشغل للشغل ووقت البيت للبيت ... 
حاول لا تتوتر  للاسباب  التافهه لان وارد ان النت يفصل ... وارد ان الشحن يخلص 
عليك ان تكون صريح لتكسب ثقة اصحاب العمل ... وايضا عليك تصارح من حولك بالبيت بظروفك العمليه حتى يستوعبوا انك بتشتغل فعلا ... 
انسى بقى فكرة الله عليك ... ايه الجمال دا ... مش وقته لانك لو سمعتها من  مديرك ... ها تسمع عكسها في البيت ... "عادي بقى"

واخيرا انت وضميرك ... واعلم ان الضمير هو الميزان ... 

الكورونا خلت اللي ما ينفعش ينفع

ما كنش ينفع أبدا أن الرجاله تعدي يوم او اثنين ... من غير قهاوي ... اهو نفع وبقوا بيشيشوا مع مراتتهم .... انت لو كنت في يوم من الايام قلت لراجل انك هاتقعد في البيت وهاتشيش مع مراتك وتتفرج على افلام قديمه ... كان قال عليك مجنون .... ومن المستحيلات .. ولكن بيشيش وبيشوف فلم السهره على الكنبه ... يا حسرة قلبه !!!!

ماكنش ينفع يدخل المطبخ ... اهو نفع وبمزاجة وكمان بيبدع... وبيطلع اكله احلى علشان بمزاج ... فتبدأ نظرة الانتصار والشهوه ونبرة التريقه... كأن عمرها ما عملت حاجة .... والغلبانه اللي بتطبخ من سنين ... تأخد في قلبها وتسكت ...

ما كنش ينفع أن كل واحده مننا كا ست يعدي اسبوع من غير ما تجيب ... حد يساعد في تنظيف البيت او الطبخ ... اهو نفع ومش بس كدا ايدك اللي صرفتي عليها.... بقيت انشف من الليفه... ولا كريمات نافعه ولا مرطبات نظرا لطبيعة المرحله!! من كثرة استخدام الكحل والمطهرات .... يعني مش بس مواعين دا كمان تنظيف ومسح وغسل وكحل ... "يا شماتت أبله تاظا فينا "..

ما كنش ينفع تطلبي من ولادك الحاجات البسيطه للمساعدة في البيت .. اهو نفع ومن زهقهم بيبدعوا في العمايل .... ساعت بتقلب بنكد ... بس كمان بترسم ضحكه حلوه وبتخلق روح في البيت ... اصل بتبقى زروطه

ما كنش ينفع ان الناس الكباره الحلوه تلاقيها على Tik Tok ... اهو نفع ... وبنشوف اللي عمرنا ماشفنا ... في منهم مواهب وضحك ... وفي سخافات ... ربنا ما يوريكم

ماكنش ينفع ناكل غير من ٢-٣ واجبه ومحافظين على الدايت ... وبنعد الكالوري ... ونظام صحي سليم ... .. اهو نفع وبنضرب بال ١٠ وجبات ومش بس كدا ... دا احنا حظنا الجميل !!! ان الكوارنتين لازق في رمضان ... يعني الاكل كله والابداع والتنوع في الاصناف .... اشي لبناني على سوري على اللي قلبك يحبه ... اللي عملتيه في سنين ... جت الكورونا وهدته في ايام

ماكنش ينفع ابدا رمضان من غير لمة الحبايب والاصحاب والضحك اهو للاسف !! نفع وشكلها هانقضيها على النت بردو ونقابلهم على Zoom

ماكنش ينفع ندخل على الصيف من غير فورمة الساحل ... والوان الشعر ... ولا حفلات الساحل اللي كان بيتحجز قبلها بشهور ... وبتدفع بالالفات في الترابيزه او ميات علشان تقف ... وغيرها من المستلزمات ... اهو نفع وها تدخل على الصيف كل حاجة فيك كبيره XX large ... وكبيرك تنقرش الجوانتي وتلون الماسك !!!!

ماكنش ينفع رمضان من غير تراويح او مساجد .. للاسف وبكل حزن اهو نفع ...

في اللي نقدر نستحمله وفي اللي هايوجعنا ويسيب فينا علامه ...

كأن كورونا جايه برسالة تحدي للبشريه ... وبتقول "انا وقفت حياتكوا وهنجتها ... ويا رب تستفيدوا ... وتعرفوا ان اللي عمره ما كان ينفع ... في الحقيقة هو ممكن ينفع"

اللي عمرك ما تخيلته .... فجأه تلاقيه اودامك حقيقة مطلقه

كورونا .... طلعتي الانسان اللي جوانا

لولا كورونا لاروحنا ولا جينا 

تحياتي لفيروس  كورونا العظيم .... كورونا احيا فينا احساسنا بالنظافه ... اللي كان اختفى واندثر على مر الاجيال  .... 

كورونا خلانا نتعرف عل بعضنا في البيت .... عادات اولادنا الجديدة والقديمه ... الجديد نستغربه والقديم نتأقلم عليه ... 

كورونا خلت الست  مننا يا تزود جرعة الدلع لجوزها ... او جرعة النكد حسب الموود  ... والراجل ليس امامه غيرها .... وحشه حلوه مافيش غيرها ... هانروح من بعض فين 

الولاد اصبحوا بيساعدوا في البيت ليس من باب المساعدة ولكن لايوجد غير   الاختراعات والافتكاسات والمساعادات 

كورونا هاتساعدك  تبطل فكرة "الكيف صد رد" والمشاركة في الشيشه وتخميسة السيجارة .... كل واحد خاليه في حاجته .... دا غير انه ممكن يساعدك على التبطيل 

الكورونا خالتنا ندرك معنى الحريه وحلوتها....  وانك تستعملها صح دون إذاء من حولك ... 

الكورونا خالتنا نكثر من الصلاه والدعاء ... كأن الله يذكركم بأن الدنيا وحلاوتها تلهيكم 

الكورونا  خالتنا نسلم من غير بوس ولا احضان ونراعي الخصوصيه... الناس كانوا بيقفوا على مكن سحب الفلوس جماعي ...مشاركه  ... دلوقتي بيطهروا انفسهم والمكن وغيرهم وبيقفوا على بعض امتار 

تدخل السوبر ماركت ناقص يعقموك وانت داخل ... وموظف الجبن لبس الكمامه وجوانتي ... 

الناس كلها ماشيه بالمعقم   .... هي للدرجة دي النظافة كانت محتاجة وباء عالمي لتدارك الموقف ... 

الكورونا قللت معدلات التلوث كأن الارض كانت بتشتكي من اللي كان البشر بيعملوه فيها فاستجاب الله وارسل كورونا ... ليقل تأثير الانسان على الارض والبيئه المحيطه بداية من وقف بعض الاعمال والالتزام بالبيوت والترشيد الاجباري نتيجة للسيول والامطار ... قطع المياه والكهرباء بالايام .... وقف الانتقالات بين البلاد ... 

العالم متوقف استجابة لشكوى الارض من اعمالنا وكأنها بتعتمل ريستارت وبتبدأ من الصفر

ولكن لازال في من حولنا لم يدرك الموقف .... وبجهله يؤثر على من حوله بتصرفاته وادئه

اصحوا وفوقوا حان الوقت اندرك اخطائنا ونصحهها قبل فوات الاوان 

راعي العيله

وانا برتب امور حياتي ومنشغلة بأولوياتي واحتيجاتي انا و العائله  ... ومع    احساسي الدائم بالملل من كم الروتين اليومي ومشاغل العمل ... 

خطر ببالي فكرة مجنونه ولكن !!!! ... حساها مفيدة وعمليه ... دا غير الثواب اللي هايعود بالنفع على الجميع  ... 

عند تنفيذ تلك الفكره التي تحمل في ظاهرها  طابع الجنون وباطنها التشارك والتعاون !!! الكل اكيد مستفيد 

راعي العيله !!!!

من هو راعي العيله؟ ... هو الشخص اللي ممكن يتولى العيله من خلال  مصاريفها او احتياجتها .. زي راعي المنتخب كدا ...

ممكن راعي شهري او سنوي  حسب الاتفاق والاحتياج ... لان في احتياجات طويلة الاجل واحتياجات اخرة قصيرة الاجل ... وعلى الراعي ان يختار ما يفضله والنفع الذي سيعود عليه ....

الراعي له حقوق سيتم الاتفاق عليها  من حيث الحقوق والواجبات

قبل عقد الاتفاق سيتم تنظيم عدة جلسات تفاهم يتم الاتفاق من خلالها ....هل النفع سيعود على العائله بأكملها ام فرد بعينه؟ .... وبناءا عليه سيتم  الاتفاق   ... 

" منها اللي ينفع ومنها اللي ما ينفعش"

يتم دراسة رغبات الراعي واحتياجات العيله ( من مصاريف حياتيه او علميه او ترفيهيه وغيره )

في راعي ممكن يكون مفتقد  الجو الاسري ... محتاج يشعر بلمة العيله وطلبات الاولاد 

اومحتاج حب ودفئ وحنان ...  جايز عاوز يستثمر في الاولاد وتعليمهم ... او سفر .. او .... او ... 

المهم!! الاتفاق ... والعقد شريعة المتعاقدين 

وعلى العيله وهي تختار راعيها تحديد الاولويات  وترتيبها .. "العيله قبل الفرد "

على العيله تلخيص كل الاحتياجات ونرتيبها مع التركيز على  مهارة التفاوض علشان نوصل في اخر عقدنا مع الراعي بأننا مستفدين مش خسرانين 

احتياجات العيله في منها الشهري مثل اللبس والعلاج والرياضة  وفي السنوي ممكن (التعليم والسفر وغيره  ... ) 

كل احتياج يتم توفيره اكيد هايعود بالنفع على الراعي بشكل او باخر... ولكن لازم نحط في اعتبرنا ان الخصوصيه هاتقل بشكل كبير.... لذى في اختيارنا لازم يبقى حد لذيذ وامور وحليوه  وخفيف ... سواء راعي راجل او ست 

اطلق لخيالك العنان ولا تحجر على تفكيرك  ... الفكرة الحلوه هايجلها يوم وتتنفذ ... المهم اللي يؤمن بيها 
اوعدنا يا رب !!!!

العمر بيجري ...

كل عام يمر عليك يزيدك نضج وخبره في التعامل 

عام بعد عام تجد نفسك ترفض اشخاص او تقبل اشخاص ،  تجد نفسك تكتسب صفات جديدة اوتتخلى عن صفات كانت تلازمك في ما سبق ... 

واياك ان  تستغرب من انك اصبحت  تقبل ماكنت ترفضه منذ زمن .... خبراتك ونضجك تعلمك وتترك اثرها على جسدك  .....  

مع كل تفصيله تمر عليك بحياتك تزيدك قدره على اتخاذ قرارات يمكن ان تكون صعبه بالماضي  ولكن اصبحت الان اكثر سهوله .... 

فاذا كان الوقت قادر على ان يترك علامته على جسدك  ...  فالمواقف التي تمر بك خلال تلك الايام قادره على ان تترك اثرها على حياتك بأكملها ... 

ولكن لا تظن انك قوي طوال الوقت ... فيأتي عليك لحظة انكسار ... انكسرت ... لانك ببساطه تعبت من انك متقن دور القوى الصلب  ... تجد نفسك منهك وتعب ...  فكل ما تحتاج اليه ان تجد سبيل للراحة ... سواء بحلول جزريه ... او حتى مسكنات وقتيه  .... 

ساعات تتمنى ان يمر الوقت من صعوبته  .... وساعات اخرى تدعوا ان الوقت يقف  لتستمتع به ... وفي كل الاحوال .... يترك أثرة عليك ... اجهاد... فرحة ... تعب... نشوه ... وجع ... وغيرها من الاحاسيس المختلفة 

واخيرا حقك ان تضعف ولكن اعلم انك لابد ان تتعلم من الزمن ... الزمن معلم قدير له وزنه وثقله ولابد ان يحترم ... واعلم انه قوي وقادر على تغييرك 

الزمن يساعدك على الاختيار والتدقيق ... بعد ان يكون اثر فيك 

اجمع صورك على مر الزمان ... فهي ذكرة لاوقات  مختلفه مع اشخاص واماكن  مرت بحياتك .... منها الحلو وفيها المر ولكن كلها وقت مر عليك لابد ان تتعلم منه وتأكد انه  .... سيساعدك في المستقبل على اتخاذ قرارات في الاختيار ... 

مع بداية عام جديد حافظ على ما لديك من نعم تمتعك ...  اصلها تهون الوقت وتساعدك على التغلب عليه