كلمه انت positive أو انت negative
ما بين تلك الكلمتين أيام.... حالتك النفسيه سيئه ...جسمك بيتكسر ..وجع .. وألم ... قلق ..
الكورونا غيرت حاجات كثير فينا ...كنت كتبت عنها قبل كدا ..عملت اللي عمر الواحد فينا ما كان يستوعبه..أو يتخيلوا ...
اكثر حاجة انك وانت في أشد التعب ..وفي الوقت اللي بتبقى محتاج حضن وطبطبه والأحاسيس الفياضه ....تلاقي نفسك بتشاور وتقول اللي حوليك ابعدوا ...وتقفل على نفسك ... واللي حوليك زيهم زييك نفسهم يعطوك اهتمام ..ولكن الخوف والفزع يبعدهم
ومن قسوتها ... أنك حتى مش قادر ترد على اللي بيكلموك لان صوتك مشرخ ومشقق ومع كل مجهود للرد تندم ..
كأنها بتقولك لما احبك تتكلم ..هاتتكلم بمزاجي ...لما اديك الاشاره... وكل اللي تقدر تعمله فقط هو الرد بالكتابة..دا لو فيك نفس ...طول الوقت نايم ...مهدود ..مشتت..محروم ... منهك ... نفسك مسدوده ..لو كلت معلقتين شوربه كأنك جريت في المارثون ..لو قمت دخلت لغاية الحمام ... كأنك شايل جبل فوق ظهرك وطالع الهرم ...
اوجاع زمان كانت ممكن تكون سبب في أن المتخاصمين يتصالحوا ....أو اللي مسافر ...يجيلك زياره ... أو على الأقل تبقى في وسط الناس ...لكن للاسف الكورونا عكست كل المقاييس ..تتعب ..تتوحد ..ممبوز ... ومش بمزاجك أو بمزاج من حولك ..هو جبر وفرض وعليك السمع والطاعة
البيت تلاقي متقسم .. الكل خايف يجي جانب الثاني ..... كله كلام بالاشارات .. ورسائل كتابيه .. سبحان الله البيت يبقى فيه ناس ..و لكن بالفرض والجبر الكل قافل على نفسه
غرف مقفوله على اصاحبها يتتكلموا من ورا ابوابها ....
فايروس لعين ... حرمنا من ناس كثير .. واصبحنا بسببه باردين .. أو متنحين ...نستقبل كل اللي بيحصل واحنا مستسلمين ... ولكن كل اللي علينا أننا ندعي لانفسنا وللناس اجمعين
ليست هناك تعليقات:
إرسال تعليق