الملح ..أحد أسرار الحياة

قررت أمنجه الاسره واعمل اكله  يحلفوا بيها ... وقلت بقى دا يوم اللحمة المفرومة .... صينية مكرونه بالبشاميل متحبشه ..مع صينية رقاق ... والباقي من اللحمه عملت بيها صينية مسقعه بالبطاطس ... 

وركزت زياده وحطيت التحابيش والتاتش بتاعي... إبداعات ام مصريه  .... 

وهنا تأتي بعض الدروس المستفاده بعد عملية التركيز والتدقيق....

التركيز الزياده والاهتمام ..ممكن يبوظ الطبخة... لاتدقق قوي ولا تفرط منك ... الوسطية مطلوبه ..علشان الحياه تمشي وتعدي ..

تقدر باللي عندك تعدد في الأصناف .... اوعى تقول هو انا حلتي حاجة ..لانك عندك الكثير ... المهم الإبداع والاختلاف...

اعمل  وانت مش متكدر ..علشان حتى لو باظت منك .. يبان مجهودك ... وهتلاقي المردود من اللي حواليك اكيد   ..اصلها مش بالساهل ...دا انت مكلف وصارف ... فكر وابداع وفلوس

وانت بتفن ...اجعل المود اللي حوليك حلو وفي بهجة ..علشان تشعر بالفرق ... اسمع موسيقى ... غني ...ارقص.... اصلها مش بتتكرر كثير ...انت مش كل مره بتقرر تفن....

الملح لو ماظبطش من الاول ... انسى بقى فكرة أرش ملح من فوق الوش ...رشة ملح خفيفة  ..ادوب حبه في ميه ... (أنسى) ..... الظبطه لازم تكون من اول مره ... وكل واحد وظبطة الملح الخاصه به ...  حياتك وانت ادرى بيها ... لو متعود عليها دلعه هاتفضل كدا ولو ملحتها هاتستغرب جدا ... 

فكرت شويه ولاقيت أن حياتنا دي شبه الطبخ ... يوم نفسك تفن .. وتتقن الفن ...ويوم قرفان وعاوز تقضيها ... ويوم عاوز اللي يعزمك ويرحمك ... 

وتعمقت أكثر لاقيت أن لو قررت تفن ومظبتتش .. اوعى ترش حبة الملح اللي في الاخر ..لانها هاتبوظ زياده ...سيبها كدا هو دا اخرها .... مش هايطلع احسن من كدا ...  

واخيرا اوعى تندم على طبخة باظت منك .. ركز وهاتعمل غيرها .. لان الزعل مش هايصلح( الحياه) ..اقصد الطبخة.....  اللي يبوظ ارميه ...واعمل غيره 

واخيرا وانت بتفن وبتبدع ..اختار من تساعده وتعطيه خلاصة مجهودك ...سر طبختك اديها لليستاهل ...مش لليعدي عليك .. وركز قوي وانت بتدي خلاصة مجهودك .. أختار اللي هايفتكر ويقول  انك علمته .. 

بقاء سيرتك في الحياة من بقاء من يتداولون سيرتك واسرار طبختك 

حب يساوي إهتمام

عيد الحب ..ما هو إلا يوم يذكرك انك لازلت تبحث عن ما هو  جديد في الحب .... تكنيك جديد .. كلام جديد ... أفعال جديده  تثيرك وتحفزك  لتجربة ما هو مختلف عن ما عايشت في الحب ...  ويذكر أيضا انا ما مر عليك من قبل ليس بحب إنما هو ...سهوكه .... خليك عقلاني .. حب بعقل ...على وتيرة خبط بالعقل ..... 

حب ومتتضعفش ... 

هاتجيب هدايا خليك عملي .. تفيد وتستفيد ... تذكر لا شيء يدوم ..وكله راااايح

هاتعزم  فكر في كل الجوانب .. اقتصادي واجتماعي .. بلاش العزومات اللي لا تمري وتتحسب عليك عزومه 

تذكر أن عيد الحب لا يقتصر على الحبيبه فقط ..أبدا حب نفسك في اليوم دا ..اديها اهتمام .. واسرتك ..اصحابك .. عائلتك .. 

حب باهتمام .. لان لو نركز كدا هاتلقينا ..كل الايام بنجري وحياتنا ماشيه بسرعه .. فا لو قدرت تبطي الوتيره وتهتم اليوم دا يبقى كثر خيرك ... بالرغم من انك لو فكرت شويه .. ممكن كل يوم تهتم فبالتالي حد يهتم بيك ..اصلها معادله

واخيرا وبجد لو كل يوم حاسس انك في حالة حب ..لا تبخل على من تحب .. 

كل عيد حب وانتم بخير

البحث عن النفس على طريقه علا

البحث عن النفس ... على طريقه علا 

بعد عرض مسلسل البحث عن علا ... استحضرني بعض الملاحظات ... ممكن نكون عايشنها  ولكن مش شايفنها على حقيقتها ..ومن وجهة نظر مختلفه .. وجهة نظر الست ولا البنت ويمكن الام أو الحمى ..ولا الراجل ..والولد ..الصديق وغيرها من العلاقات ..في اللي يبان أنه مشبوه وفي اللي مظلوم ... مقهور .. قوي ...

 وهنا في عدة تساؤلات ؟

ليه الست لا يأتي لها جراءة الاصرار والقوى والأرادة الا بعد الطلاق ..تصر على التغيير .. والقدرة على إثبات الذات ... 

ليه اغلب الرجال لايسلكو اسلوب هشام في التعامل .. من ناحية التزامه بمصاريف ولاده... حريص على أن يكون في تحضر في العلاقه  ..   

ليه يتقال للستات استحملوا ... والرجاله شوفلك واحده غيرها ..ودا بقى ثقافه على الأغلب .. بنتربى عليها ... 

ليه بنتربى على  ثقافة الصراع .. والحرب مين اللي هايكسب الولاد .... انا اللي عملت ..اللي ضحيت .. ولو فكرنا هو واجبنا نحو اولادنا .. ليس لهم ذنب في اختيارتنا 

ليه الأهل في أغلب الأحيان بيدخلوا في الصراع  من أجل البقاء الاقوى ... عادي ندفع علشان نهد ..ونقف أمام بعض في ساحات القضاء .. واستحالة نتفاهم ... ثقافة انا ابني أو بنتي ما يغلطوش 

لازم نعلم ولدنا ثقافة التقبل والاستمرار في حالة  الطلاق ..  "علا قالت لبنتها... هشام سابني انا ما سبكوش انتوا" ... كلمه مهمه جدا .. 

المشكله ان العلاقه بين اثنين لا تؤثر عليهم فقط وانما على كل من حولهم ...

 في اللي بيخسر أصدقاء أو يكسب أصدقاء جدد ..

في تحكمات من الأهل ..من الأقارب ..كان لهم الحق في تسيير حياتك .. 

نظره مؤلمه من مجتمع لا يهمه الا المظاهر .. كلام جارح ... يمس الكل 

التحضر في إنهاء العلاقات لابد أن يكون شئ اساسي يتعلمه الجميع   .. أن يتم  تعليموا للنشئ منذ الصغر .. 

ثقافة إنهاء العلاقات ..لابد أن يوضع لها منهج تربوي .. له أسس أخلاقية وضوابط