لابد ان ننظر جديا الي ان مهما طورنا في البلد دون ان نطور او نستثمر في البشر .. عمرنا ما هنحس بالتغير
وللاسف الاجيال اللي طالعه بتحس انها متلخبطه
شويه في انجازات زي مونيرال والقطار الكهربائي والطرق الجديده والكباري والمدن الذكيه صراحة هي حاجه ضروريه ومتحضره واساسيه وفجأة في صدام مع الحياه يلاقوا نفسهم في عصر الجاهليه ويكون لسه في مدام عفاف وشويه في غباء في التفكير
لسه في فوت علينا بكره او الورق مش مستوفي او خلاص احنا قفلنا
واليكم قصه قصيره
صدفه ان تعرض ابني وابن عمه الى تجربه التقديم للتنسيق الخاص بالشهادات المعادله
وبدأت المعناه اليوميه لاثنين من خيره شباب البلد… مصروف عليهم ومتكلفين ولكن احنا صممنا انهم يعيشوا التجربه ويكافحوا علشان محدش يقول ان ليهم واسطه او بيخدوا دور حد
بدأوا بتجميع الورق والشهادات من اول ما قال بابا وماما الى الحمد لله لما عرف انشتين اخترع ايه ودا لوحده يوم كارثي
وبعدها زياره الي المركز الثقافي البريطانى بمصرنا الحبيبه اللي مافرقش كثير صراحه ….اطبع بطبع الهدوء والتباطؤ
وبعدها توثيق الورق بالخارجية ودا صراحه اخد مشواير ياما
اولها السؤال ولم المعلومات وثانيها وصلوا للشباك وقفل عليهم بعد ثلاث ساعات طابور … ولكن الصراحه والحمد لله وعدوهم يبدأوا بيهم اليوم التالي
وفعلا بدأوا بيهم ولكن للاسف لم يوضحوا الموضوع للباقي ويحرام شايفين ان كل الكشف المؤجل هو واسطه …. يحاولوا يفهموهم انهم مؤجلين ….لا حياه لمن تنادي
واخيرا طلعوا على مكتب التنسيق ولاول مره في تاريخ البشريه حد يقف في الطابور مرتين من غير ما الشباك يقفل عليه ….. ودا طبعا نتيجه انهم نسيوا ورق بالبيت فقسموا بعض واحد وقف في الطابور والثاني رجع البيت يجيب الورق ….. وكانت النتيجة ان الولد وصل الشباك وطبعا الورق مش كامل ولف ورجع ثاني ووقف في اخر الطابور ورجع ابني يصارع الوقت يجري في الشوارع ويقفذ من فوق الصور الخازوقي علشان يوفر وقت وينادي على ابن عمه وعنيهم مغرغره من السعاده
لانهم لحقوا الشباك وتم تقديم الملف والموظف
ومع كل مشوار انا وابوه نصبره ونقوله انشف .. علشان تتعلم …
ولكن الصراحه دا كثير وضياع للوقت والمجهود
الموظفين محتاجين تغييير وتطويير كثييير قوي
الشعب المتعامل محتاج ان يتقبل التطوير ويتعلم حاجات كثيير قوي
الاجراءات محتاجه تكش وتتغير
الشبابيك المتعامله محتاجه تنكمش
الحياه ابسط من كدا
مش ممكن نكون بنحاول نطور و ندخل التكنولوجيا في كل حاجه …. واعلانات وبضغطة زرار وانت قاعد في مكانك
ولسه مش عارفين نعالج الحاجات دي
مبروك التوثيق وتقديم الملف
