كلمه حلوه وسهله وكلنا اتعودنا اننا نقولها لكل من حولنا لما بيعدي عليهم القطر
واحنا كمان بنسمعها من اللي حولنا علشان يصبرونا
او بنقولها لنفسنا
على فكره هو فعلا كله بيعدي بالصبر والايمان … هتعدي
صحيح ممكن تكون خسرت حاجات وهي بتعدي او فقدت حبايب
او غيرت مسار حياتك ولكن هاتعدي
ايامك بتعدي … علاقاتك بتعدي
المهم نستفيد ونتعظ
علشان لما تيجي ثاني تعدي تكون بشكل مختلف
يبقى في حراك ومتبقاش بتعدي كل مره زي اللي قبلها
أكسر مللها
وعدي ايامك باختلاف
تعامل معها بإبداع
ولكن احرص دائما وانت بتقول لحد انها هتعدي ..ياريت تختار الوقت والاحسن يكون معاك حل
بلاش هتعدي كدا وخلاص وهو في قمة نرفزته او عصبيته … هو مش في مرحلة المواعظ
تفتكر هو مش متاكد انها هتعدي …ماهو ياما عدى وهايعدي …
في وقت المأزق ….يأما عاوزين الاحتواء دون الافتاء
او الاحتواء بحل يساعد او ممكن تستعمل حيلة الإلهاء
وجه نظره الى شىء اخر .. صحيح هو مش حل جزري ولكن حل بيسرع الوقت علشان تعدي
واخيرا حب ايامك بحلاوتها وغباوتها
لانها كدا كدا ….هاتعدي بحلوها وبمرها
