هدايا عيد الحب

 في وقتنا هذا علينا التأني في شرا هدايا عيد الحب 

هو مش اي حاجه كدا والسلام 

طبعا لكل  مرحله عمرية لها نوع من الهدايا

ولكن الجميع عليه التفكير بعمليه ..فكره بقى الدباديب والبوكس اللي في شكولاتات وعزومه في مكان شيك .. دا عصر انتهى 

لو اصحاب … نتلكك بقى ونقول حرام ودي حاجه ماتنفعش  …ماما عرفت وبابا اتخانق…  واهو تبقى صحوه حقيقية علشان  ترجعوا لصوابكم … 

لو مخطوبين …لسه اودامكوا فرصه …لو عاوزين تكملوا قوي ..كفايه خناقه بسيطه …ياما مع بعض او مع الحموات …لانكوا مجبرين تحيبوا لبعض وللحموات…فالحل الاسرع خناقه 

لو متجوزين …خاليكوا بقى في الحلول العمليه …..فراخ بانيه ….لحمه …منظفات .. معطرات …فوط ..ملايات 

طب لو متجوزين ومخلفين …طبعا نشوف نواقص الولاد ونجيبها… … ودا حسب سن اولادكم … 

عاوزين كلنا نفتكر المقوله الشهيه "عاوزه ورد يا ابراهيم " وفي الاخر إبراهيم أدانا درس وجاب كيلو كباب مع الورد

دا مش معناه اننا نجيب كباب … الرساله تعني اننا محتاجين نفكر بعمليه حتى واحنا عاوزين رومانسيه

اخيرا 

كل عيد حب واحنا متهنين واحنا على الكنبه قاعدين …..مستنين و شايلين ومعابيين 

اللازم في حياتك؟؟!

 لازم تتوجع علشان تحس

لازم تضييق عليك علشان لما تفرج تشعر بالفرق وتحمد ربك

لازم تفقد الشىء علشان تعرف قيمته …والفقد هنا يتمثل في حاجات كثير .. حبيب او قريب او يمكن صديق او بيت كنت عايش فيه ولا شغلانه قديمه حتى لعبك القديمه

مع كل شي صغير او كبير فقدته هتلاقي نفسك بتفقد احساس  معين ويتولد احساس او مشاعر أخرى … منها الصح وفي منها الغلط … وكله بيأثر فيك ويسيب علامه 

كل ما اللازم يزيد …كل ما دروسك في الحياه وخبراتك بتزيد

وعلى فكره كل حد فينا بيمر بمختلف من اللوازم 

في لازم بتفرضها عليك الحياه… وفي غيرها انت   إللي تضع نفسك فيها

ولكن في لوازم لازم تتعلمها 

لازم تتعلم تعتذر لما تغلط

لازم تتعلم تحب صح 

لازم تتعلم ترضى

ومن الحاجات المهمه لازم تتعلم تغفر علشان تعرف تعيش

اوعى تندم على لازم عملتها او عشتها اعتبرها درس ليك

الكلام دا افلاطوني قوي

لان في الحياه هتلاقي لازم قويه بتهد فيك ولازم قاسيه 

اللازم فرض في اغلب الأوقات وليست اختيار 

لذى ما فرض عليك من اللوازم عليك ان تستغله وتكسب منه لصالحك

شراب فوال

 بقالي كثير ماحضرتش افراح ولحسن الحظ واخيرا بعد طول غياب  …كبروا الاحفاد وبدأنا في مرحله افراحهم 

الواحد كان متشوق لان بقالي كثير ملبستش السواريه وضربت الكعب العالي 

وكانت المفاجاة اني  اكتشفت اني كبرت  وبقيت ماما لعروسه هي كمان هاتضرب السواريه والكعب العالي 

احساس جميل ومفرح جدا لحد لما نزلنا نعمل التحضيرات العاديه …زي زياره الكوافير انا وهي "شعر ودقن وغسيل ومكواه" اكتشف  ان الاسعار فرقت كثير ….زمان  الواحد كان بيخلص بملاليم 

وبعدين الطالعه الكبرى ….طالعه الشرابات الفوال علشان الشياكه تكمل   اتذكر زمااان كنت بشتري بالثلاثه …ابغى هذا وهذا البيج والاسود ونجرب عادي 

دخلنا نشتري  …اذ بي اتفاجاء ان الشراب الكولون الواحد اصبح ١٦٠ جنيه … ياااااه …طب لو اتنتش  … طب اعمل ايه في ظوافري… اقصهم …اكسرهم …. اكيد مش هاجيب استبن 

وهنا نسكت قليلا …. وبدأت افكر في حلول …. طب اعمل ايه في بنتي … البسها جوانتي … اشيله في الدرج …. طب لو اتقطع … نستعبط ونعمل نفسنا مش شايفين 

المشكله ان علاقة الشراب الفوال بالظوافر علاقه مترابطه متلاصقه يعني لو عدينا من اول مرحله .. منين نضمن بقاءه

الحمد لله تمت بخير وتخطينا الصعاب ورحنا وانبسطنا وباركنا 

وكانت المفاجاة الغير متوقعه 

واللي ماكنتش عامله حسابه هو استقبال الكلبه "فيمي" وفرحتها بينا…. وبكل حب السعاده باين على ذيلها قررت تنط على الشراب الفوال … 

وانا وبنتي وبصوت شبه صوت الفنانه نادية الجندي وفي نفس واحد قلنا "لاءاااااااااااااااا"

وانتهت قصة الشراب الفوال