الاجازة: رحرحة صح جريفة صح

الاجازة يا اولاد......  ايه مفهوم الاجازة...... هل الاجازة رحرحه وانتخه.....  ولا المفروض ينسق لها ويتهندملها ......  ولا يوم كدا ويوم كدا. يعتمد علي الشخص المسؤل عن اعداد  الاجازة..... لو هو راجل هتبقي نوم وبحر واكل (والكلمة الشهيرة ابعدي عني اي مشاكل .. افصلي مبتعرفيش تفصلي) .... يعني هو مكتوب علي الست الارف. 
بالنسبة للاولاد جردل وبحر وفريسكا. بالنسبة للست حدث ولا حرج كل اللي عندة حاجة يحطها.

الغريب انك حتي لو حاطط خطط الدنيا للتنسيق  لما تفعلة في الاجازة - غير طبعا اللي عاوزة ربنا هيكون -  ولكن في عوامل انت مبتقدرش عليها, مثلا زي مرض الاولاد المفاجأ من غير سبب. سخنية عالية  وهددان في الجسم وقريفه وعياط فتلاقي مودك قلب وانتي وجوزك مستنين الغلطة لبعض  وتلاقي خطط اول يومين باظت _ بس مش مشكلة في لسة باقي ايام - فجأة تلاقي جالك تليفون نكد لمدة ساعة من طنط شوشو اتخنقت مع عمو حسني علشان العيش متسخنش ونوين يطلقوا. دا بردة علشان انتي في اجازة ولازم تتنكدي - ادي يوم كمان باظ - احلف انا بقا ان لازم  مضيعش بقيت الاجازة فأقرر اني ادي للعيال مخفض للحرارة واقفل التليفون  وانزل استمتع بالاجازة . خلينا نتفق ان الاجازة مع الاولاد مش اجازة قوي بس اهو اي حاجة والسلام ميبقاش انا مستنية سنة علشان الاجازة تبقي عيا وخناق. انزل علي البحر مع الاولاد ابقا عاملة زي الست المجنونة اجري ورا واحد واشخط في التاني وازعق في التالت وتلاقي بقي طلبات غريبة جدا علي البحر - ماما انا عاوز اعمل بيبي- طب اجيب حمام منين  - طب يا حبيبي استحمل شوية, علي مين يا معلم نشيل الحاجة ونلم بسرعة ونجري علي حمام بتنا - ومحدش يقول مكنتي صرفي في البحر - لان علشان الفقري فقري ده مبتصرفش في البحر والنعمة حد بصصلي في الاجازة اليتيمه اللي حيلتي. وعلشان الموضوع يكمل خالص بقا تلاقي كام اختلاف في وجهات النظر مع الزوج والاولاد والعائلة يؤدي بيكي الا خناق ومشدات. احاول اكرر - اللهم اخذيك يا شيطان- وبردة علشان انا مصمة انجح الاجازة اعمل عبيطة  وارسم ضحكة بلهاء علي الوجه.  
نيجي لبند المصاريف ماما انا عاوز فريسكا - ماما انا عاوز شيبسي وعصير - انا جعان وعاوز ماك دونالدز- عاوز اركب النطاطة وياويلك لو موافقتش . فتلاقي نفسك صارفة مبالغ هولامية. ربنا يبارك فيهم ويفرحهم يارب.
لذلك بعد دراسة عريضة لوضع الاجازات انا اكتشفت ان الاجازة مبتضفش كثير هي بتاخد منك اكثر ما بتضيف لك. ولكن طبعا هي لا مفر منها لانك لو قررتي متطلعيش الاجازة يأما هتجنني يأما هيتقال انك انتي اللي بتبوظي الاجازة (يا سلام  لاء هي كدا مابظتش ياعني).
اعذائي الكرام الي كل من يريد ان يقوم بأجازة:
ارسم ضحكة البلاهه علي وجهك الكريم 
لا تنظر الي ما يصرف من مبالغ   - اعتبرها زكاة اقارب
اقفل التليفون تفاديا الاشخاص مثل شوشو وعمو حسني 
خد معاك بروفين للعيال ودوا مغص للكبار احطياطي
اقول متحس ان هيبقي في خناق  استغفر ربنا قول دي وسوسة شيطان لان الاجازة من سمتها الفرحة والرحرحة 
اتمني لكم اجازة سعيدة مقدما .....
 

 

فاجئ الست تحبك .. وجايز تجنن

الستات في مصر لما تفاجئها بحاجه حباها او مش حباها تلاقي رد الفعل غريب جدا ومش متناسب مع المفجأة وجايز رد الفعل يكره اللي عمل المفجأة ويضرب نفسه ميييت........ انه عمل كدا. علي سبيل المثال
جوزك يفجأك بأنه هيعشيكي برة تلاقي جالك شلل رعاش وتفضلي بقا تقوليله ( بجد والله ..طب لية كدا , يعني في مشكلة اصلي مش عامله حسابي وانتي من امتي اصلا بتعملي حسابك  هو عشاكي كام مره فبل كدا ) وتبتدي تسألي 100 سؤال وهو مبيردش . اخلصي وقومي البسي وانزلي علي طول انتي لسة هتسألي ما جايز تبقي مرة في العمر تضيعيها بقا بسألتك الكثير.
او مثلا قرر يجبلك هدية من غير مناسبة ( اعراض الهبل والشك والغيرة تبتددي تظهر عليكي وقبل ما تقولي شكرا تبتدي بقا تحقيق مصغر ( انت عامل عامله .. طب اية المناسبة واصلوا مش عادتك) تاني ارجع اقولك خديها وخلاص انا عارفه ان المفجأة واقعها عليكي مريع بس فوقي بسرعة من الصدمه لان ممكن من رد الفعل المبالغ يقرر دي تبقي اخر مرة يجبلك هدايا اصله مش هيبقي عاوز وجع دماغ.

او الكبيرة بقا اتخرتي برة بالليل فلاقيتي التليفون بيرن وجوزك علي التليفون , اول حاجة تيجي لزهنك انه عاوزك تيجيبي حاجة وانتي جاية وفجأة تلاقيه بيطمن عليكي انتي اتخرتي ليه وعلشان انتي مش متعودة تبتدي تهرتلي في الكلام ( لا انا متخرتش , مش بعادتك تسأل... وتنكدي علي نفسك وعليه) دي تبقي اخر مرة يسال عليكي فيها بالتليفون 

نصيحتي ليكي لما تحسي ان المفجأة تقيلة عليكي ومش قادرة تستحمليها حولي تسيطري علي مشاعرك واحاسيسك بلاش اعراض الهرتلة واللجلجة في اللسان والارتعاش من ان المفجأة دي مش هتيجي تاني , انبسطي الاول وبعدين فكري في اللي جاي 

مترو رمضان

مترو رمضان يختلف كثيرا عن المترو في الايام العادية  الناس اكثر شراسة اكثر عصبية اكثر مهلبية .  

المفروض في رمضان نكون اكثر تسامح بس نبقا متسامحين ازاي وانت صايم  والجو حر ومحشور جو علبة سردين مفيهاش منفذ هواء ولو المروحة شغالة  الهواء مبيوصلش لان عدد الانفاس جوا العربة الواحدة لن يسمح لك بشم الهواء. فبناءً علي ذلك تلاقي الناس كرها بعض  واول حاجة بتخرج من بقهم الشتيمة ويصحبها ( استغفر الله العظيم ) دا بس علشان احنا فرمضان والاستغفار الكثير مطلوب بس المهم هتتشتمي هتتشتمي انتي ونصيبك  اللي تسمعيي تخديه وانتي ساكتة بدل ما هيقلب من مرحلة الشتيمة الي مرحلة استخدام الايدي وبرده استغفر الله العظيم الله ما اني صائم.

وتلاقي الواحدة من دول داخلة المترو شايله ابنها علي كتفها يا حرام ( مش هي دي المشكلة ) المشكلة علشان تلهيه تديله شيكولاتايا او مصاصة ويرممط اللي خلفونا بقا يا يمسح في هدومنا يا فشعرنا ونحاول نقنعها تأخد منديل علشان تمسحلوه ايده بدل النيلة اللي الواحد فيها بس علي مين ترد بكل برود ( معلش اصله عيل وفرحان بقا ) يعني هو يفرح  ويلعب واحنا نتلزق ونرجع .  

الجميل في الترابط والتلاحم  في المترو هو الاحساس بأنك عيلة واحدة كبيرة منفدة علي بعض الكل بيعرف الباقي هيفطر اية او هيفطر فين وأما بقا كل اللي فاتك من حلاقات في مسلسلات ،لا تقلق هتعرفها كلها وهيحكولك بقا حتي لو انت مش متابعه التمثيلية هتعرفي كل الاحداث حتي مش مهم تشوفيها في البيت

 "اللي هيفوتك من المسلسلات .......في المترو هتعوضى اللي فات". الي جانب النزول الاعظم من المترو في رمضان النزول منه والطلوع فيه يمكن ان يطلق عليها اسم" المعركة الكبري" تقولوش لو مركبوش مش هيلحقوا الفطار بالرغم من ان الساعة  لم تتجواز الوقت الخطر ولكن لازم  ان نخوض المعركة بكل شرف واستسلام للوضع الراهن  يعني بالبلدي النهاردة علشان انزل  اتحشرت في وسط مربع كبير مليان بالستات واستسلمت وسلمت امري لله فلقيت نفسي بأمشي مشية البجعة وهووووب بقيت برة المترو.

اللهم تقبل مني ومنكم صيامنا جميعا بس بجد المترو ورمضان لا يتفقان  لان الناس تجبرك علي القيام بسلوكيات قميئة او جبارك علي سماع وشوفان سلوكيات اغرب. 

الله هم اعنا علي مصائبنا.

ميدان التحرير

اية العظمة دي  ميدان التحرير  اصبح ميدان تاريخي مش علشان قامت منه الثورة علشان اصبح رمز للكعبلة الكبري.

عندما تقرر ان تنزل ميدان التحرير في الصباح الباكر لابد ان تضع في اعتبارك النزول قبل معادك بسعتين ثلاثة علي الاقل ( وبردة مش هتوصل) وتاخد معاك حاجة تتسلي فيها تكون بتحبها  وممكن غطي علشان لو هتقيل شوية. تخيلوا ان الميدان والشوارع كلها المتفرعه منه كلها اتجاه واحد وهو الصب داخل الصينية الحجرية محدش بيخرج من الميدان الا لو في حد حيجي ينتشلك من فوق بقدرة الاهية غريبة. الي جانب ان لا يوجد مكان للمشاة الميدان اصبح كتلة واحده ملتحمة التحام الشعب الواحد في ليله فجريه . ان اعتقد ان الميدان لو بينطق كان قام تف علينا وساب المكان وراح بلد تانية. اصبح الميدان مكان يمكن ان تنام فيه او تشرب فية او  تعمل في إي إي لامواخذة يعني. اصبح  الميدان جراج عمومي والسايس بيأخذ فردة علشان يركنك. 

انا  قررت من يومين انزل بالعربية ودخلت الميدان شفت منظر عمري ما تخيلته في حياتي  العربيات كلها في اتجاة واحد  ما فيش حد بيخرج من الميدان كله بيدخل فقط فضلت صابرة تقريبا ساعة وبيني وبين شغلي في الاوقات العادية اقل من 5 دقائق . فجأة اتخنقت وقررت امشي في طريقي صح وارجع كل العربيات اللي جاية في وشي هتقولو مجنونة لكن الصبر يعمل المعجزات وتخيلو نجحت ولكن بعد ما شتمت واتشتمت وعملت مجنونة  وصلت شغلي بعد ساعة نصف من الارهاق والتعب. اوعو تفتكروا ان القصة خلصت. روحت البيت الحمد لله دون خسائر وكان عندي ميعاد بردو في وسط البلد بالليل تخيلوا لاقيت اية ؟؟؟ المنظر هو هو  والكعبلة هي هي مع اختلاف ان الميدان  بتوع الشاي والمهلبية والكنافة  اشتغلوا بعد الفطار وبيخدموا علي العربيات اللي واقفة من الصبح.

مكنتش مصدقة نفسي ان الناس وصلت للعقلية دي  والمشكلة ان اللي عامل كدا هم الناس ذاتهم يعني لو بيحترموا ابسط القواعد العامة ومشيوا صح مكنش حصل كدا ولكن احنا شعب مبيجيش غير بالسك.

انهاردة  اتعظت وجيت بالمترو ونسيت وانزلت في السادات وقلت يا دي النيلة يعني هتزنق تاني. واتطلعت علي وش الارض لاقيت اية مش هتصدقوا؟؟؟  شرطة مرور في الميدان  كنت حاسة اني عاوزة اروح ابوسهم نفر نفر  ومكنتش مصدقة عيني بعد مرور عامين تقريبا  شرطة المرور نزلت الميدان.

اتمني انها تدوم ولو يوم علشان احس ان في حاجة اتغيرت  في البلد دي

اراكم في المغامرة الجايه