الساحل الشمالي ... وما يتكبدوا المواطن .." اللي هو انا وغيري " من صعوبات في محاولة "تعديت الصيف" علي خير دون تحمل الكثير من الخسائر... هو كدا كدا .. في خسائر.. ولكن بنسب متفاوتة...
الساحل كله من اول الكيلو 21 لغاية "مراسي وهايسيندا" ..... يناقشوا عدة قضايا بالغة الأهمية ... ذو حيثيه .. ولها مردود اقتصادي يواكب للإحداث التي نعيشها جميعا ...
واولى اهم هذه القضايا .. انه لا يجوز للمحجبة ان تنزل "بمايوه" شرعي في بعض الشواطئ او في البسين ... او دوخل بعض المطاعم .... بالرغم من ان صديقتها وصحبتها اللي معها في نفس العربية لابسه مايوه... وعادي دخلت ... طب ما الاثنين أصحاب ... وهم ليسوا علي خلاف او مشاكل نفسيه مع بعض ... ولا يوجد بينهم عنصريه في التعامل ... ليه بقرارات غير حكيمه نخلق تلك التفاهات .... وليه نقوم الراجل على مراته ... او الولاد يبقوا يتحايلوا علي امهم انها تنزل معهم ... فتبص في عينهم وتقول .." مينفعش" مع موسيقى حزيني في الخلفيه
ليس من حق حد ان يمنع أحد من عمل شيء ... ما دام لم يتنافى مع الآداب العامة وملتزم بالقواعد العامة وليست الشاذة ... يعني يمنعوا الست اللي لابسه مايوه محتشم وميمنعوش الراجل اللي نازل ببوكسر وشكله مقزز ... تتآذى منه الاعين ويصيب المعدة بإعياء.... نمنع المحجبه من نزول البسين لكن نسيب الناس تعمل "بي بي" في البسين عادي " بسين بالبيبي ".. ..
قبل ان نصدر قرارات ونتسرع في تنفيذها ... لابد من دراستها ... مثلا تنزل البحر ...لا ليك ولا عليك وتغطس ... وفجأة تطلع من الميه تلاقي رأس كلب جنبك بيستحمى "عادي" ... البحر بحرهم واحنا اللي جنا جنبهم.... ولو أظهرت بعض الامتعاض .. تلاقي صاحب الكلب زعل قوي ومتضايق انك زعلان ... وتلاقيه يقول ... .. " دا كلب كيوتي خالص ومبيعملش حاجة" تلف تبص علي الكلب تلاقي سنانه بظه والرياله مدلدله من بقة ... الحوار ينتهي عند بصتك للكلب .....
ولكن نيجي بقى للجزء الخاص بالبنات الحلوات اللي معترضين علي سياسة بعض المطاعم التي تمنع دخول المحجبات .... متزودهاش قوي كدا ..... المطاعم علي قفى من يشيل... مع الوضع في الاعتبار ان هذه المطاعم من خصائصها الرقص ويجود بها الخمور ... فهي لن تناسبك ولا تناسب غيرك من الملتزمين الحلوين ... ومش هتنبسطي فيها ... واغلب البنات سواء محجبات او غير محجبه ما دام سلكوا المنهج الوسطي مش هيحبوا هذه الاماكن.... ومعلش بقي اللي عاوز يدخل... ليه سككه... بالمعارف والوسائط...
اصل الأماكن دي وسطه !!!!... والله شكلك في الاخر عاوزه تدخلي بدافع الفضول مش اكثر ... خلي اصحابك يحكوا لك علي اللي بيحصل جوه ...
الساحل من كثرة المطاعم والكافيهات اللي فيه بتوقف طريق الساحل الدولي كأنه صلاح سالم .....
ونأتي لثاني احد اهم القضايا الذي يتم مناقشتها بين رواد الساحل ومارينا وبالأخص ... ازاي نوصل من بوابه الي بوابه دون ان تفقد اعصابك... بوابات مارينا تفقدك المتعه والغريب انك تلاقي الناس مستنيه على البوابه بالساعات من اجل الاستمتاع بنصف ساعة دا لو لحقوا ... معهم الكابتشينوا والحاجات الحلوه وذلك أيضا بعد واقفة طويله علي كاشير "بنزينة بوابه 5" .... لزوم قعدة البحر.. ... من المفروض انك في الساحل للتصيف ..... مش علشان تتخانق وتسب وتشتم .... ويصبح الشغل الشاغل لمعظم سكان الساحل ازاي تستمتع من غير معاناة ذهنيه ... لان كفاية جدا المعاناة المادية....
وهذا ينقلنا الي القاضية الفيصلية في الموضوع وهي التكلفة المادية.... علبة "الفول" في مارينا تعمل "طبق صغير" 10 جنيه وهي هي نفس ذات العلبة ويقول لك ممكن تبقى 12 جنيه ..." ازاي معرفش".... ولا الخضار والفاكهة اضربوا أي سعر في 3 او 4 .... هي الناس دي فاكره ان اللي رايح يصيف "مكنز" علي قلبه فلوس ... ابدا هي مصادر التمويل واحدة .. ولكن الأماكن تتغير... ويزيد عليها متطلبات الأولاد وسبل ترفيهم ... اشي تأجير عجل وموتوسكلات ونطاطات ... والحسابة بتحسب....
وقبل ما اضع الفيناله ... شاطئ البحر "مش معمول" للحلل ولا للبطيخ ... ولا للبس الجلاليب والبيجمات ... وارحمونا من الفانيلات علي الشورتات ..." كلفت تحت شخشخ جيبك شويه وهات للفوق... ومحدش يقول فلوس ... ممكن تجيب المعقول اللي يليق ... وبالمرة وانت طالع من البحر ونويت تغير مش لازم تغير بره عند العربية على فكره الناس كلها شايفينك.... ومش لازم تعصر غيراتك اللي انت لابسها .... حطهم في أي كيس....
وأخيرا لازم تكون راجع بخسائر ..... المهم انها تكون طفيفه ومقدور عليها ... لو جت في الماديات ... تبقى بجملة الخسائر ....ولكن المهم متجيش في الصحة
تمنياتي لكم بصيف مبهج وساحل نظيف ... وصرف خفيف
ومالها بلطيم .... ولا راس محمد .... حاجة تعل والله
ردحذفصحيح .. دا احنا ماس تشل
ردحذف