السنه دي رمضان مختلف ... جدال رهيب ...
هو ازاي سميره سعيد شكلها كدا وايه الفستان دا وايه النطه دي ... دا احنا نص عمرها وبنلق .... الركب بتزيئ... والصحة جايبه جاز!!
ليلى علوي "والبارباتوظ الاسود" ... ايه دا ... فيش بطن .. فيش تيييييييت.... حتى اعلان الغارمات ... الست من كثرة اشراقها تشعر انك فنيت عمرك في المكان الغلط ... بص لنفسك في المرايا تحس انك عاوز تسرخ صرخة ناديه الجندي الشهيره!!!
كندة علوش وعمر يوسف ...جابو ثمن الفرحين وشهر العسل في اعلانين ... واحنا قاعدين بنلبس طاقيه دا لدا !!! وعلى فكره عمري ما سالت هما عرفوا بعض ازاي؟
ونيجي بقى للزغلول الكبير ظافر "سليم" "الحب الكبير " الستات فاهمة كويس انه مافيش كدا وبردو بتتفرج وبتشير كلامه "لامينه" ولا لحظة الصناديق والخاتم والاجواء الرومانسيه المفرطه ... البنات بقيت بترمي نفسها على الارض من الرومانسيه ... وكل واحدة بتتخيل انها ها يحصل معها كدا ... او اللي اتجوزت خلاص بتفتكر لحظة لما جوزها جه طلبها من ايد ابوها !!! مع اختلاف شاسع في الاجواء... وفجأه تصحى وتفوق على صوت من بعيد بيقول " ايه الهبل اللي بتتفرجي عليه دا" طبعا عندة حق ... يعني ولا ها يبقى في سليم في الحقيقه ... ولا في امينه كمان!!!
كما احب ان اتطرق وافرد مساحة للعلاقة الفريدة من نوعها اللي انا شخصيا اتمنى ان اصل لها بعد ان يمر بي الوقت وهي علاقة "مصطفى فهمى وانوشكا" ... العلاقة دي تعتبر من العلاقات القابله للتنفيذ من حيث المبدأ .... لان الراجل والست بعد ان بيمروا بتجارب كثيره منها الفاشل والناجح .. لذلك يسعوا ان يعيشوا كافة اللحظات الحلوه وكل حراكات الرومانسيه والدلع اللي فاتت عليهم وهما صغيريين ... من الممكن ان نطلق عليها "علاقة تعويض"
ولا هروب اياد نصار من المارون جلسيه لانه زهق ونفسه جزعت الى البلدي يوكل ... ولا لحظة انبهاره بانها بتقلعه الجزمه لانه سيد الرجال سيده وتاج راسها ....وفرحة الرجال بالتاتش البلدي ... وللعلم تحدث كثيرا في الحياة من حولنا !!! ولو دخلنا في سيكلوجية الراجل علشان نعرف ازاي كدا استحالة نعرف ...
يعني الست تسيب واحد وتروح للثاني علشان الدلع والهشتكة ... لكن الراجل يحب يضم المارون جلسيه البومبار !!! ولو يطول من كل بستان وردة
اما انا احب ان اشيد شخصيا مثل اخوانا الرجال بالفرس الاسود !!! تحيه مني لياسمين صبري... الرجالة بيحلموا بالفرس ... وحلوتها وطولها ... عندهم حق .. الها فرس اصيل
واخيرا اختتم حديثى معكم واقول بنيه صافيه .. بدون حقد او نق ...
ربنا يهني سعيد بسعيدة!!!!
