الأربعاء، 6 سبتمبر 2023

بيت ماما …والتفاصيل

 كل مره  تروح فيها زياره لبيت الست الوالده تزهل بالتفاصيل … اللي ممكن تكون غايبه عنك ولما تلاقيها عندها تقول دي غايبه عندي فين 

او تقول ياااا هو انا ليه مفكرتش كدا … طب انا ليه مش بعمل كدا 

التفاصيل في بيت  ست الحبايب يحببك في الحاجه وتشعر ساعته انك لسه اودامك كثير على ما تتقن التفاصيل

او يمكن الحاجه بتكون احلى عندها ..شكلها اخلى …طعمها احلى …فيها حاجه كدا مختلفه

ترتيب الحاجات في المطبخ ..مستلزمات المطبخ …كل حاجة ليها حاجة 

ترتيب الحمام وتنظيمه 

المفارش اللي على الترابيزات بتحلى عندهم عندنا تحس كمالة عدد وشلها احسن

البيت تحسه مترتب 

الواحد مننا يدخل بيت ست الحبايب يحس ان ناقصه كثييير … احنا بعاااد  قوي يا لطيف

ويبتدي يفكر وياخد الطاقه الإجابية انه لما يرجع بيته اكيد لازم يهتم بالتفاصيل ..وتركب العربيه وتبدا مشوارك وتوصل البيت .. ومع  العوامل الطبيعية الحياتيه ولا كأنك قلت ولا  اي حاجه بتحصل ..لحد الزياره اللي بعدها 

وتخدك الحياه وتشغلك حتى عن ابسط التفاصيل 

التفاصيل بتفرق ..انك تهتم بالتفاصيل اكيد اللي معاك هاينبسطوا هايحسوا انك حاسس بيهم 

نعم وها انا اعترف …ينقصني الكثير من التفاصيل 


الاثنين، 7 أغسطس 2023

القرار … قيد …لا مفر منه

القرار ساعات يكون نعمه وغيره يكون نقمه ….من اصعب المواقف الحياتيه التي يمكن ان تمر عليك هو ان تلتزم بتنفيذ قرار وهو ليس بمسؤليتك  ..وتجبرك الظروف على ان تقبل القرار 

في اوقات   تاخد قرار وانت عارف ان تبعياته مش في صالحك ولا في صالح من حولك  

القرار يساوي مصير 

في قرارات في حياتك ممكن تاخدها وبيكون تاثيرها قوي ليس فقط عليك وانما لاجيال من بعدك 

في قرار فردي وهو مسؤليتك ولكنه يوثر على من حولك

في قرار فردي وانت الوحيد اللي هاتشيل تبعياته

وساعات تكون شاهد على اقرب الناس اليك وهم يأخذوا القرار وانت مش عارف تساعد  …وفي الظروف  دي ….ما عليك الا النصيحه

وفي قرارات الكل فيها بيلبس 

وفي قرارات تبنى على العاطفة والتضحية…ولكن عليك ان تكون قادر على التضحيه  حتى لا يصاحبها الندم ..وتعيش حياتك ناقم وتطلع عين اللي حوليك 

ركز جدا وانت بتاخد القرارات

ودي بعض الامثله اللي يحتار فيها العقل والقلب 

قرار الجواز  لا مفر منه ولكن  تذكر انه عليك ان تتأنى ولا تستعجل لان في كثير بيلبسوا !!!!

قرار الطلاق او جواز  .. احياه ابوك لما تطلق او تتجوز … فكر في ورقة القيد العائلي لحسن دي حوسه..

قرار يصاحبه حيره .. مثل  ترتيب رغبات الثانويه العامه .. قرار كله خوف وحيره  …..انت خايف تنصح يبان انك بتجبر .. ولو مانصحتش… يتقال انك مش بتساعد … وتلاقي نفسك في حيره اكثر من صاحب القرار

في ملايين وملاين من القرارات …ياأما تنجيك .. او  بسببها الدنيا تلطش فيك

فكر كويس قبل اي قرار   


الجمعة، 7 يوليو 2023

عاوز ولا مشتاق

انا عاوز غير انا مشتاق 

انا "عاوز"  تحمل فكرة الاصرار والتأكيد … دا لو انت عاوز بجد 

انا مشتاق   .. تحمل فكره  التمني او   مش  ضروري ..  اصلك ممكن تكون مشتاق لحد فارق .. او مشتاق لفعل بعينه … 

الاشتياق احساس  يمكن ان يعيشك في حاله حلوه او يبكتك على حال عايشه

العوزه بتخلق عندك الاصرار ولكن المهم انك تعوز بجد 

ولكن في رأي ان الاشتياق  ممكن يخليك عاوز … والعوزه تخليك حريص على انك تروح للي انت مشتاق اليه 

ولو احساس العوزه هو اللي مسيطر ….. في راي ينتفي شعورك بالاشتياق … افتكر انك عاوز … فا أصريت …فوصلت … فخلاص خلصت … هاتدور على حاجه ثانيه 

هو الانسان كده لما الحاجه تكون في ايديه ويشبع منها … ها يمل 

ها يبعد ها يشتاق … ها يقول ياريتني

ولو فكرت هتلاقي ان اشتياقك بيثير لهفتك ويخرج احلى ما عندك 

ولكن العوزه بتخللي احساس الاصرار مسيطر … فا  من الممكن ان تظهر ابشع ما عندك من اجل الوصول  إلى حاجاتك 

واخيرا … خالي دايما عندك ما تشتاق اليه

الاثنين، 3 يوليو 2023

مشتاق

 مشتاق لسه 

طب تعرف تقول انت مشتاق تعمل ايه او مشتاق لمين  

تعرف تعدد  الحاجات اللي لسه نقصاك …ونفسك تعملها … حتى لو كانت من احلام الطفوله …  اصلك اكيد  ملحقتش تعمل كل اللي تمنيته وانت طفل لان الايام اخدتك … وطموحك انك تكبر وتعمل الحاجات اللي بيعملها اللي اكبر منك..زغللت عينك  وشوقتك ونسيت ان كل مرحله لها حلاوتها وجملها … وتندم حيث لا ينفع الندم  … وللاسف مش ها تكتشف دا الا بعد   ما تخلص كل مرحله بحلاوتها او مرها 

وتفضل تفتح قوس وتقول انا لسه فاضل اعمل دا ودا … انا عاوز  اقولها اني بحبها … او اعتذر على كلمه بايخه قلتها .. او اكله نفسي فيها وأجلتها او تجميعه  حلوه لكل الناس اللي بحبها

وانت الايام سحلاك ..وكل اللي عليك تقول بكره .. وكل يوم يعدي تقول بكره .. 

فتلاقي قبل اعتذارك .. الوقت عدى والشخص اللي قعد مستني انك   تعتذر له….فارق ومشي  … ولا اللي ها تموت وتسمعك وقاعده مستنيه تسمع كلمة بحبك … حد سبقك وقالها

على فكره في حاجات كثير انت نفسك فيها ومشتاق لها ولكنك مش مدرك انها مهمه  

للاسف ولما تعدي المرحلة وترجع تعمل اللي فاتك من كل اللي فات  تلاقي اللي حوليك ياما يقولوا انك مش عايش سنك … او دا  اكيد اتجنن… 

ولكن ساعات ظروفك  مابتسمحش  بانك تعمل كل اللي نفسك فيه .. مش لازم نجلد بعض.. خلينا خفاف كدا 

اللي عاوز يمص مصاصه سيبه يمص.. يمكن كان نفسه زمان.. واتكسف 

اتاكد ان كل واحد حوليك  مشتاق لحاجات كثيره ملحقش يعملها

قول ماتخفش نفسك في ايه

واوعى تقول دي حاجات تافه … المهم انك نفسك فيها


اعرف انك كل ما تشتاق اكثر كل ما تعرف ان روحك لسه عايشه وانك بتعافر علشان تنعشها

الجمعة، 23 يونيو 2023

خاليك قدها

 جميل انك تصارح نفسك وتعترف 

تعترف انك تعبت … انك محتاج مساعده … انك في احتياج.. زهقت …. انا خايف ..متضايق …. وغيرها من الأحاسيس 

صارح نفسك … علشان تعرف تصارح غيرك

طول ما انت خايف وقلقان انك تقول اللي انت عاوزه .. عمرك ما هاتوصل لليريحك … دايما هتلاقي حته ناقصه …

ساعات الخوف بيكون المحرك  الاساسي … والخوف هنا ما هو الا خوف نفسي 

خوف انك تفقد شيء .. او انك تزعل حد …او انه من وجهة نظرك ان الوقت مش مناسب انك تواجهه 

اكيد انت ادرى ولكن نصيحه الحق نفسك قبل فوات الاوان وصارح نفس 

اقف اودام مرايتك … وقول  ايه الغلط اللي فيك وايه إللي ناقصك … ايه الحلو .. عاوز ايه … حاى لو حاجه صغيره … الصغير  بيفرق 

فا لو غلطان اعتذر 

لو بتحب قول 

لو زعلان أصرخ 

المهم اعمل حاجه 


الثلاثاء، 9 مايو 2023

الثلاجه والامتحانات

 فتره الامتحانات وخصوصا السنوات الفاصله مثل  سنين التخرج من مرحله الي مرحله … علاقة الطالب بالثلاجه بتقوى جدا وبيرتبطوا ببعض ارتباط وثيق 

الثلاجه تعتبر للطالب هي الملاذ الامن ..مكان كله خيرات ساقع وفي ترطيب …تحس انك بدل ما تفتح الكتاب وتتغم … تروح جري تفتح الثلاجه …تلاقي الحلو كله … .. حتة فراخ بانيه ..شوكلاته..عصير ..فطير …اهو  كله ملي بطون

و كل مرحله بتختلف … يعني في السن الصغير  … تلاقي الواحد يروح يفتح الثلاجه كثير جدا ودون هدف … يعني تلاقي نفسك واقف اودام الثلاجه بتتفرج بس …بلا هدف.. انت اصلا مش عاوز حاجه… ودي اسمها  مرحلة التلاكيك

في مرحله اكبر شويه هي تسمى بمرحلة الترطيب ..انت رايح بهدف انك ترطب على نفسك …بقالك فتره مركز وعاوز تفصل … يجي هنا بقى دور الثلاجه … المساعد الاول 

في مرحلة النضج … ودي مرحله الشحن …هدفك من الثلاجه هو ان تشحن باور …لانك قاعد بقالك فتره … تركيز عالي ..فترات طويله … مش داري بالحياه … تلاقي فجأة الثلاجه بتناديك …فلازم تلبي ….

هنا بقى يجي دور اللي حوليك  لازم يكونوا داعمين … لتزم يتكاتفوا ان الثلاجه تكون منوعه …بها ما لز وطاب … جاذبه .. ويعرفوا ان فترات الامتحانات لازم تكون الثلاجه بها المختلف كله 

كل ما الثلاجه تختلف ..كل ما عقلك ينوع افكاره 

رساله شكر للثلاجه اللي مستحمله اجيال ورا اجيال 

ولكل طالب تمسك  بحقك في ثلاجتك 

الخميس، 4 مايو 2023

حوار مع الضمير

 حوار مع الضمير 

انا : هو انت لسه لم تفقد الامل

ضميري: لا طبعا انا لو نمت انتي هاتزعلي قوي وهاتحسي انك انتي مش انتي

انا: نام بس وأنا هاتصرف 

ضميري:مقدرش انتي ماربتنيش على كدا … كلامك معايا اني لازم افضل صاحي وفايق علشان  انا  الميزان لصفات كثيره جدا…عارفه لو الضمير مات …الكذب والنفاق واللوع هايزيدوا…دا غير حاجات ثانيه كثير

انا : طب ريح شويه … الصراحه انا زهقت وكمان الناس  اللي حولينا اصبحوا مابيفهموش موضوع الضمير الصاحي دا … وكثير بيفسروا غلط … في اللي بيفسروا انه غشامه او تهور او تدخل ….او…. او … والصراحه ساعات انت بتفوق زياده وانا مش بعرف اتحكم فيك 

ضميري : انتي ممكن تحجميني حسب المواقف اللي بتدخليني فيها …علشان  اكون متوازن…لكن انام او اريح استحاله…لما كل  واحد صاحب ضمير يفقد الامل … هانقى في غابه

انا: اصلي زعلانه قوي  

ضميري :ماتزعليش انتي وكل اللي زيك مهمين  …خالي بالك مني ودي وصيتي ليكي

انا: طب ممكن اطلب منك طلب …اوعى في يوم لو طلبت منك انك تنام تسمع كلامي … اعتبرني بفك معاك بكلمتين