وانا ماشية في الشارع او راكبة المترو او حتي عربيتي في حاجات بتحصل بتنحفر في دماغك ومتطلعش. منها الكويس والمضحك واللي بيكيك واللي يخليك تسرح في خيال واسع
- تلاقي موتوسيكل راكب عليه راجل والست بتاعتة واربع عيال احاول افهم هما راكبين ازاي استحالة مش ممكن هي كد متسألش. وتلاقي سايق عادي وبيعمل غرز كمان والست وراة لافحة العيل الرابع ومتمكنة من قعدتها.
- لو غلط وسألت واحد عن عنوان - يااا نهار - يا هيتوهك يا هيتوهك ملهاش حل اخر وتلاقي بيبتدي كلامة بركز معايا وبعدين يقولك الوصفة بسرعة جدا لدرجة انك استحالة تحفظ اللي بيقولة فتتنرفز مرتين مرة لانك تاية ومرة لانك بتسمع لواحد قاصد يتوهك لانك عارف انة بيفتي ( متقول معرفش هتخصر اية) وغصب ان عنك تحاول تسترجع اللي قالة وتمشي علي الوصفة لغاية لما تقابل واحد تاني يتوهك.
- بما ان مشاكلي كثير مع العربيات فلو عربيتك عطلت كل اللي يعدي عليك لازم يقف. يعرض عليك مساعدة أو يسألك انت عاوز حاجة وبجد الحق يتقال الناس في الموقف دة بتبقي اخر جدعنة بس ساعات الجدعنة بتزيد شويه فبتقرفك , واحد يقولك العربية خلاص مش هتمشي تاني والتاني يقولك لا دي اخرها ساعتين عند الميكانيكي وتخلص. واحد يديك امل والتاني يهبدك في الارض.
- وانت ماشي بعربيتك علي الكورنيش والجو حار نار وتلاقي اتنين قاعدين علي الكنبة وشهم لبعض واخر هيام - عرقنين صحيح- بس مش فارق معاهم الموضوع دا بشغلني جدا دائما اسأل نفسي ليه مبيختروش الوقت المناسب او المكان المناسب مش لازم يعني في عز النئحه وكمان لما اختار مكان في الكورنيش اختار مكان مناسب في واحد بتاع كازوزة وترمس وذرة مش حتة مقطوعة حتي النيل فيها راكد ورحتة وحشة ( دا النيلة السودا دي)
- الفرق بين واحد بيعدي بمراتة الشارع وواحد بيعدي بحببته. اللي بعدي بمراتة يجري هو ويسيب المدام بالعيال مش مشكلة وبعد ما يعدي تلاقي يلف ويزعق ويقلها (يلا بقا دا اية دا لكعيه من يومك). واللي بيعدي بحببته يا سلام طبعا هنا يستهبل ويحاول يمسك اديها او يحط ايده علي كتفها وتلاقي يقولها (خلي بالك يا حبيبتي) .
- في الاخر كل واحد فينا كل ما بيمشي في الدنيا ياما بيعدي علية منة اللي بيلزق بأوهو ومنه اللي بيطير بسبرتو
