دب الكلام ...وادخل نام

اتعودت منه انها تسمع الكلام ...بشكله كده ..وعفويته ... وجعلصته

هي كمان بتعرف  "تدب الكلام" ... بتحدف طوب وظلط ... ولكن الاختلاف انه هو يدب يدب ويدخل ينام ... اما هي تدب وتسمع .... وتاكل في نفسها ....تجنن على العيال ... تدخل المطبخ تكسر لها طبقين ... اهو تهد نفسها في اي شئ.... ممكن تلاقيها مسحت الشقه في ساعة

دا اختلاف شخصيات وطباع بين الراجل والست !!!!!!!!

الراجل عندة القدره انه بعد ما يخلص الحوار  ويصدر القرار.... يعايش ويتعايش ..عادي جدا ...  بيبقى متضايق .. مخنوق .. بس عندة طرق للتخفيف عن نفسه .. نومه حلوه ....قاعدة مع الاصحاب يشتكوا من نكد الستات!!!

الست بعد ما تخلص الحوار وتسمع القرار ... تنكش بمنكاش على انها تفتح النقاش من ثاني ...بأي وسيله .... على امل انه يعتذر لها او يعترف انه غلطان ... وفي الاخر تنتهي القصة الحزينه بان هي اللي  تعتذر .... يادوب شويه  .... ترجع ريمه لعادتها القديمه ... هو يدب الكلام ويدخل ينام ... وهي تنكش بمنكاش لفتح النقاش!!!!

ولكن الراجل كلامه بيوجع ... بيدخل في الصميم ... لانه عقلاني

اما الست كلامها كله صعبنيات ... ودموع وشويه آهات ... حتى لو عندها وجهة نظر ... حقها بيضيع.... الا ما رحم ربي من الستات .... قليل منهم اللي يقدر  يزنق الراجل في خانة اليك ... و مش لوقت كبير يا دووب لدقائق تشعر بلذة الانتصار ... وفجأة يدبها كلمه ... تتقلب الترابيزه ... ومش بعيد تلاقيها هي اللي تعتذر !!! عن ما بدر منها من الفاظ جارحة ...يااااعينييي!!!!!

ولكن الحق لازم يتقال ... كلام الراجل وقت الحوارات والمناقشات يبدو منطقي ... منمق ..  مرتب ... لانه عقلاني

اما الست كلامها من بقها وليس من عقلها ... تلاقيها تدب كلام له علاقة بالرجوله  ...  كرامته تنقح عليه ....... وضيعتي  حقك .. لانه ها يسيب اصل المشكله ويمسك في اللي طلع من بقك .... وتضطري يا ولداة تعتذري عن ما تلفظتيه ... 
وهو دا الفرق بين الراجل في تحويل مسارالحوارات الزوجيه من شئ ضدة الى معه !!!!

تحاولي مهما تحاولي  ترجعي  لاصل المشكله ...تلاقي الموضوع   مقفول ... انتهى!!!

نتعلم بقى من اخطآنا ... 
استوعبي انه مش هايعتذر حتى لو هو غلطان ... ما تدقيش على طريقة العتذار .. مش لازم لفظي  ... ممكن بطريقة او اخرى تشعر الست منها ان الراجل بيقول "انا اسف" .. ولكن من غير ما يقول انا اسف !!!!
انسي الكلام بتاع " انت مباقتش تحبني ... وازاي طوعك قلبك تعمل كدا فيا " لان الكلام بعد فتره ما بيكلش معاهم وما بيجبش نتيجة ... ولا حتى دموعك .... يدخل من هنا ويخرج من ناحية الثانية !!!
نصيحة لاخويا الراجل ... وانت بتتناقش معاها اعتبرها ... اختك او بنتك .. اي حاجة غير زوجتك ... وياريت لو اعتبرتها  حلوه ينفع تصاحبها ... هاتلاقي الطريقة اختلفت ...كلامك بقى اهدى ... اهو منها تحاقظ على اعصابك ... ومن ناحيه ثانيه ترحم نفسك من النقاشات  الغير مثمرة ....
طبعا انسوا كل الكلام اللي ان قلتوا .. لان ولا هي هاتعرف تتغير .. ولا هو هايعرف يشوف مراته على انها صاحبته 

حيرة الشتاء

فصل الشتاء عندنا حيران .... اصله مش ثابت على مبدأ ...يأما برد جدا... يا  جو عادي فتخفف فتمرض!!!!

 فصل تلاقي في الاناقة بكل معانيها سواء في الستات او في الرجالة وبردو تلاقي في  الهرجلة والبهدلة والحاجات اللي ملاش علاقة ببعضها!!!! ... اللي تشوفه لابس بره شيك !! داهمة في بيته وانت تفاجئ بمهازل  ....

 ادخل كدا على ست في بيتها في هذا البرد القارص!!! تلاقيها محشيه هدوم غير متناسقة مش لايقة على بعضها ... واكيد هتلاقي جزء من هدوم جوزها اوبوها او اخوها عليها !!! اصلها بتسطو على دواليب الجيران..... تلاقى الشربات الصوف الطخينه ... والبيجامات الستين قطعة .... وايس كاب قديم  ... ولكاليك... ولكن الحق يقال بتصرف على الكاليك اشي ميكي او فيل بزلومه  ....صوف ولا كروشيه ... المهم علشان المنظر!!!!! وابتداينا نطور زي بلاد الخوجات ....سماعة التدفئه الخاصة بالودان ... ولكلوك المناخير ... وفوق كل ده البطانيه الخفيفة اللي موجودة في كل بيت  البطانية دي من اساسيات التجهيز الشتوي لها مقاسات  واماكن ثابته في البيت ...  مع وجود دفايات بحجم صغير مخصصة للرجلين .....

هو اكيد المنظر مش عاطفي على الاخر ويصد النفس عن التعامل  .... ولكن دا غصب ان عن كل سيدة ... ولازم الراجل يقدر تلك الظروف الصعيبه  .... 
التعامل الشتوي لابد له من ترتيبات !!!!! 

مش بس الست اللي بتعمل كدا .... الراجل بدأ في دخول تلك المنظومه... ولكن دائما يعاند  ...  شوفي الراجل وهو قاعد لوحدة من غير الهانم (علشان البرستيج طبعا) هتلاقي ضارب الشراب التمام ... والبناطيل الطخينه المبطنة ... الكلسون الصوف  ..... ويبدأ يدور في الدولاب على كل المستخبي الي جانب طبعا واساسي البطانية بتعته ... 
ولكن الراجل اقل من الست في  التصرف مع هذا البرد القارص لان لو نخ وبان عليه انه مش مسيطر ... ضاعت العيلة يا ولداه !!!!!

سبحان من غير الاحوال ..... نبص على نفس الست او الراجل وهما خارجين في الشتاء القارص .... اناقة ما بعدها اناقة !!! يا سبحان الله !!! كائنات اخرة تماما 

الستات تبدع في البلاطي والوانها..... والبوت والكعب العالي... وعلو الكعب على الفساتين القصيرة والشربات السودا ...  اخر شياكة .... مع ايس كاب او بيريه .... وشنطة كلاسيك  ... تحب تبص عليهم وتملى عينك  !!!! شوف بقى لون الروج مع قلم كحل محدد العنين .... واطلق لخيالك العنان!!!!

الراجل واناقته .... بلاطي السودا او كحلي مع الكوفيه وقميص عليه بلوفر ياقة 7  ... مع البرفان الرجالي اللي تتخيليه.... تبقي عاوزه تكليه.... ياختي عليه!!!!!

حتى في الاكل والشرب ... الشتا له رونقه  الغريب والمختلف ... ليها طعم وريحة نفاذة .... شربة العدس وبصل اخضر ... شربة الخضار  ... السحلب ... الحمص بالشطة ... الطواجن السخنة بتكثر ... 

واخيرا الكل ينتظر الشتاء للتباهي والتألق والاستمتاع بلسعة البرد على الجبين وحمار الخدين .... 

الكل ينتظر سقوط الامطار على الاشجار ... ولمعة اللون الاخضر ونقط المياة على  اورق الشجر ... وريحة الهوا المختلفة ... مع صوتها وهي تتمايل 

تحيى اناقة الشتاء

وجودك مهم

فاقت من نومها لم تجده بجانبها ...ترك رساله انه لا يستطيع الاستمرار ... 
 .. وقال لها!!!!!!!!!!! 

"انا وانتي لازلنا عاشقين ، ولكن اصبحت حياتنا تسيير في الاتجاه الخطء ، في شئ ناقص .. في شئ مختلف"

فكرت للحظه مع نفسها .. وقالت، فعلا في شئ غلط في العلاقة ..... حياتنا محتاجة تغيير!!!! 

اصبحنا جافيين.......ناشفين على بعض...اصبح فترات المشاحنات والمشدات اطول من الطبيعي ... كبرنا ...وخلقنا ضاق ...مسؤلياتنا الكثيره تضيق النفس ... دا غير ان اكيد وطبيعي اصبح الملل يقود العلاقة!! 

ومع كل غلطه صغيره او كبيره اصبحنا لا نغفر لبعض لان الغلطات متكرره فاصبح الاعتذار ليس له معنى ...وغير مقبول ...  والهروب هو الحل ... الاسهل ان لا نغفر بالعكس نتعنت اكثر !!!!!

 فكرت للحظه  في كل ما مضى من احداث جمعتهم سويا ... احداث تحمل معاني كثيره ...قويه ومؤثره ...."وقالت لنفسها"  

 ساعدني كثيرا على تعلم معنى الحياة ومعرفة ملذتها ... عرفت معه شكل جديد ومختلف للحياه ... احساسي بالامان اتولد مع بداية علاقتنا ... 

 عندي القدرة على اخذ كل القرارات  بلا تعنت منه ... ولكن احساسي انه فقط متواجد ... يجعلني اقوى  

ثقته بي الزائدة تجعل منى شخص يعتمد عليه بالرغم من ان ساعات كثيره افتقد  سؤاله عن ماذا سأفعل اولماذا فعلت ...

حبي له ثابت ولكن الظروف التي نمر بها متغيره وتغيرها سريع، اصبحت تلك الظروف تشكل عبئ شديد على العلاقة .... وتؤثر على شكل حبنا لبعض بشكل سلبي
فاض به الكيل وبي ايضا ... "همست لنفسها"
الى متى يمكن ان نحتمل بعض سويا ... كلاً منا له طاقة استيعابيه للاحتمال ... وبعدها لحظة الانفجار... 
بالرغم من طول العلاقة واستمرارها ولكن يأتي اليوم الذي يجتمع عليه الطرفين في اتخاذ القرار يأما بالفراق او بالاستمرار....... وليس بالضروره يكون الحل مثالي للطرفين ... اكيد سيقع ضرر نفسي على كلاهما
الفراق ليس سهل خصوصا لو العلاقة بينهم طويله وبها الكثيير..... ولا حتى الاستمرار بدون  تغيير سهل لانه بيفيض الكيل ... ولكن في بعض الحلات يجبر الطرف على اخذ قرار للتعايش ويمكن يكون بشكل مؤقت ... حتى تجبر على اخذ القرار يأما بالفراق او بالاستمرار .... 
ولكن اصعب ما في الوضع هو قرار الفراق ولازال بينهم الحب !!!
لو قبلوا الاستمرار ... هايعيشوا كالمكن ...عايشين مجرد عيشه والسلام 
لو قبلوا الفراق  لابد ان يتقبلوا عواقبة ويتعايشوا معه!!!!!!!!!!

ولكنها  بعد كل هذا .. فهي ليست مستعدة ... لازالت تشعر بالضعف ...  تظهر دائما بصوره قويه ولكن بداخلها هش ... وجدت نفسها ليست مستعدة  لاخذ اي قرار   .... بالرغم من انها تشعر بالوجع .... وتشعر انه موجوع مثلها ...  لازالت تحبه... قلبها لازال ينبض عند سماع اسمه ... تشعر بدفئه...   تلتمس له الاعذار ... ضحكته ... لمست ايدة ... لازالوا مهمين وفارقين
اكيد هو كمان تعبان ... نفسه يقول انه محتاج حب زيادة اهتمام زيادة ... اكيد له احتياجات!!!!

وفجأه وصلت رساله منه  ....  انه هو كمان غير مستعد لقرار الفرار ...وبالرغم من كل ما يمروا به من صعوبات ولكن وجودها  مهم ولسه فارق .... 

ولكن  بينهم حالة ترقب هي خائفه وهو ينتظر التجديد المنتظر ... 
ولا يعلموا متى سيكون القرار...  بالفرار او بالاستمرار 

ماما .......قولي لبابا

في ظل هذا الغلاء المتوحش اللي بياكل من جتتنا رقات رقات .... 
اولدنا الحلوين ليسوا مدركين ابدا يعني ايه الحاجة غالية جدا ... واننا لازم نرتب اولويتنا والكلام الكبير اللي بيتقال في تلك المواقف الصعيبه!!!! 

والمشكله ان الوسيط في الطلبات بين الاولاد والاب هي الام .... هي دائما اللي يتلام عليها .... الولاد يلوموا عليها انها ما بلغتش بابا ....  وبابا يلوم عليها انها دائما بتخاتر الوقت الغلط ... حبيبتي دائما مظلومه .. مفعوصه ... ولكن في تحدي دائم لتنفيذ معظم الطلبات بأقل التكليف والخسائر الممكنة ....
ولكن الحرب ليست فقط داخل المنزل ...  يوجد حرب خارجية تشاركيه يدخل فيها اطراف كثيره الولاد طرف انك تقنعهم انهم يشتروا حاجتين بدل القايمة العريضه ...وطرف تقنعي الاب بامدادك بأموال تكفي تلك الطلبات وطرف اساسي هي المحلات اللي هاتواكب احتياجاتك ..... 
مع التأكيد اننا اصبحنا بندور في محلات الستوك .... مع شوية اللعب في دماغ العيال بأن البراندات اصبحت فلصوا بتبوظ بسرعه (دي كلها صيني) ... ومش شرط كل حاجة نجبها تبقى براند .....!!!!! 
وهل تعتقدوا انهم ها يقتنعوا !!! انا لا اعتقد .. 
في تلك الحالة بنقلص الاحتياجات لتصبح لكل طفل حاجة واحدة براند دا ان كفت فلوس "بابا"
والموقف كاالاتي..... اخدت ماما الفلوس من بابا ... وجررت الاولاد الحلوين .. برستيج بقى ونازلين بالعربيه ... وشكلهم يفرح يا حبايبي  ... وقالوا يدخلوا مول كبير في كل المحلات ... لتسهيل المأموريه .... وقد كانت ... 
دخلت الام ومعها الحيله الكبير ... شاف بانطلون عجبه ... خلاص هو دا .. قاس ... بكام ...ب 2000 جنيه ... الام جالها شلل نصفي وبقها هدل لتحت ... وسألت ببرائه 
"ليه" ... رد البائع بابتسامه بلهاء وكأن بيقول رقم عادي مش مستعيب ولا مكسوف ولا خجلان... " اصله ماركة" ... ومضمون وبعدين عارفة حضرتك الدولار غلي ... فردت الام ..تفتكر البانطلون دا ممكن يطلع من الدولاب يلبس الولد لواحدة ولا لازم الولد يقوم ويجيبه!!!!! واضافت الام بخيبة بس البانطلون مش من الحاجات الجديدة .... يعني مالوش في ارتفاع الدولار !!!!
اصيبوا بخيبة امل ... قالوا خلاص بلاش اللبس النهاردة ونجيب "الجزم" ... وقد كانت الصاعقة الكبرى ... تقريبا جزمتين شتوي "ماركة" .... بحوالي 4000 جنيه .... !!!!! 
الغريبه ان البائعين عليهم برود وسماجة ما تتوصفش .. انا عارفه ان دي شغلتهم ولازم يقابلوا الزبون بابتسامة بس مش كده.. راعوا ربنا ...  المفرض في الاحوال اللي زي دي البائع يقول الاسعار من وراء الستار وهو متخفي .. لان ضحكته اصبحت ثقيلة على نفوس الزباين .. دا غير اننا لازم نستنى العروض !!!! اشتري واحد وخد الثاني!!! مش لاسمح الله لانها ارخص ولكن علشان النفسية ترتاح شويه ... كلمة اوفر او تخفيضات بتريح النفسيه فقط!!!!

الولاد بحمد الله اقتنعوا انهم هايروحوا محلات الستوك  يجيبوا كل واحد حاجة واحدة ... واكله حلوه من اللي بيحبوها .... وكفايه اننا خرجنا واتفسحنا ...اتنقطنا .... وطلع ترابنتينا ... ورجعنا بخيبة املنا ... والحمد الله اننا لسه بصحتنا وعافيتنا

شكل الام وهي راجعة بأولدها ...  تحاول تلطف الجو على اولدها ... تتكلم معهم عن قد ايه الخروجة كانت حلوه ...  هما الولاد اكيد انبسطوا ... ولكن هي اللي موجوعه ...قلبها وجعها اصلها ماعرفتش تجيب اللي هما عاوزينه .... صعبان عليها .. كان نفسهم ونفسهم .. ضحكة عليهم ... ولكن الاهم انهم لسه بيضحكوا وحاسين ان في امل ان الخروجة الجايه هايجيبوا الباقي!!!!
دخلوا على بابا فرحانين وبيضحكوا ... استغرب بابا .. وقال  "مبروك" ونظر لها باستغراب ... هي بكسوف وعينيها مكسوره ..اصله كمان هو صعبان عليها ... خجلا لم يتطرقوا للموضوع ... سكتت هي وفهم هو!!!!!
وخلص اليوم على ان الاب والام بيحسبوا ... والولاد فرحانين بيضحكوا ... 
ولكن تقدر ماما تقول لبابا انها محتاجة شراب جديد ولا حتى توكة ... دا استحالة ... ولا حتى بابا يقدر يعرض على ماما انه محتاج بيجامة!!!!!






  

احنا وهما ...رياضة استايل

احنا وهما...... رياضة ستايل

علاقة ابديه متشابكة إلي ابعد الحدود بين العائلة ككل والمدربين ...

طبعا قبل أي طرح للقاضية او اختلافات في وجهات النظر ..احب ان اشكر كل مدرب أتقن عملة وشكل بطل من ابطالنا ... وحتى لو لم يصبح بطل يكفي انه شكل شخصيته.... وساعد في تجنبه كل ما هو سيء ... العلاقة السليمه بين المدرب واللاعبين تخلق روح سويه للاعب ...شخصية ...ثقة بالنفس ونصيحة مني انا ارجو من اولياء الامور عدم التدخل في هذه العلاقة ...لانكم بتدخلكم تسوء العلاقة .." بالبلدي كدا المدرب بيتخنق"

 سواء المدربين او الولاد او عائلتهم  ..... اخر مرمطه  .... كل حايتنا بنظبطها على مواعيد التمرين والمدربين .... 

ما فيش حاجة اسمها اجازات ولا اعياد ولا تجمعات...الكلام دا ننساه ونردم علية ..الكلام ده يمشي على الكل دون استثناءات 

 وبعد دراسة عميقه  لهذة العلاقة الغريبه بيننا وبين المدرب!!!!! وجدت الاتي :

•  انا كأم اطوع امور حياتي كلها من اول الغسالة والثلاجة وصولا للمحفظة على مواعيد التمارين والمدربين 
• معاملة "المدرب" لها اصول ما ينفعش كدا لو متنرفزه لقدر الله من امور حياتك الطبيعية ...تروحي  للمدرب وانتي مكشره .. ارسمي ضحكة بلهاء  ... واوعي تفتكري انك ممكن تلوميه او تعاتبيه ... لان دا غير وارد  اصل هو "المدرب" ...وانتي يادووب  امه !!!!
•  كل رياضة لها معدتها و لوازمها التي لابد ان تكون متوفرة .... ونصيحة بلاش اللعب الغريبه لان أشيائها اغرب منها  .... مع الوضع في الاعتبار ان اغلبها مش موجود....  ولازم تتبعتري علشان توفريها  من برة بطلب خاص دا غير الدفع بالعملة الصعبة ... ولو متوفرة في البلد.... اللي شغالين فيها  ملوك .... تخدي الميعاد منهم  قبلها بسنين ... ويا نجحتي في انك توفري احتياجاتك  .... يا لاء ....

 علشان اولادنا يبقوا ابطال ... لازم نمر بمراحل كثيره جدا ...اجتماعات ..مناقشات .. قلت في نفسي لازم اكو نام البطل!!!!!

القائمين على احدى الرياضات قرروا  ان يطوروا .... فطلبوا عقد "اجتماع" .... ودي الخلاصة... ترابيزه عليها وشوش سمحة متنشيه....... وبعد مقدمة كبيره  ...قال "المسؤل" ....لازم مدرب "اجنبي"  ندفعلوا بالعملة الصعبة .... الاول يثبتك  لمدة قصيرة وبعدين تفاجئي انك "لبستي" فترة من عمرك ... ودا تقريبا في كل الرياضات ....

والكلام عن الفلوس المطلوبه عادي جدا كأنهم طالبين عشرات الجنيهات مش آلافات .... ولو اعترضت تلاقي الرد بنفس الوش السمح .....والله اللي مش عاجبة ما يشتركش "ده مش اجبار دا اختيار"... 

 وتضطر العائلة الخضوع لقرارات مجلس إدارة اللعبة ...لان ما فيش حل غير اللجوء للمدرب الأجنبي للارتقاء بمستوى اللاعب .... علشان المنافسة الدوليه

طبعا في أمهات حلوات فلاحيس ........ يوافقوا على اي حاجة ...  زيادة بالآلفات ...ماشي ... دكتوره نفسيه وتغذيه ...مايضرش ...  الدفع باليورو .....ومالوا...... اصل الموضوع مش مقتصر على لعبة واحدة ولا عيل واحد  !!

بعد انتهاء الاجتماع طلبوا منا خطة  ترفيهيه للمدرب الأجنبي ..وطبعا لازم نعتبر الطلب هذا شئ عادي ومقبول ...

ولو جوزك سألك رايحة فين ... قولي انك نازله تفسحي المدرب علشان خاطر ابنك وبنتك مستواهم يعلى في اللعبة.....

واخيرا الامهات المنحنحة والنبي ورحمة جدي ترحمينا ... اصلك بتضرينا ... وعلى فكره نحنحتك مفقوسه !!! مش كل حاجة توافقى عليها ...

الغير معقول يؤدي بنا للمجهول ... 

اخيرا اكتشفت ان  التظبيطات عيني عينك ... الولد محتاج برايفت ... ومالو ... البنت أدائها مش قوي ....لازم تقوى شويه ....

يعني نلاحق على الدروس الخصوصيه العلميه ولا على الدروس الرياضيه ....

يا عيني عليهم وعليا

وليك وحشه يا مترو !!!!!!!!!!

كان بقالي فترة كبيره مركبتش مترو ... انا  من الناس اللي اقدر المترو جدا ...وذلك لعدة اسباب منها توفير الوقت ، يفقدك الوزن طبعا لانك على طول بتركبي وانتي مضغوطه وعرقانه وحرانه ، يوفر احتياجات كثيره صعب تجديها خارج المترو مثل دبابيس الطرحة المشبك او غطيان مراوح السقف والروج السحري  ... 

وطبعا حاجات ثانيه كثير ... دا غير انك ممكن تطلعي بوصفات طبيخ وخضار مقشر وساعات متقور!!!!!

وانا علشان عارفة فوائد المترو عند اول فرصه قلت لنفسي اعيد امجاد زمان !!!! جالي مشوار  للزمالك ....فقلت احسن حل اركن عربيتي عند المترو وانزل وسط البلد واكمل بتاكسي... ولكن مع اخذ بعض الاعتبارات ...لاني طبعا اتعلمت وواخدة خبرة مسبقة..... لبست بنطالون جينز ... لميت شعري علشان الشد والجذب ....جازمه كوتشي فلات... وكان مفروض شانطه كروس ودا علشان مع الفرهدة  !!!! غلطتي اني اخذت شنطة كبيره !!! 

وبدأت الرحلة من محطة حدائق المعادي.... اولها كان كم من الانبهار والانبساط.... عشت وشفت واستعملت المحطة  بعد التجديدات ....  نظيفة فله ...سلالم كهرباء ...كفاتريات نظيفه .... مكان للحمامات واضح "وان شاء الله يكون نظيف " ودي كانت الانبهارة الوحيدة .... والتغير الكبير الملاحظ ... اما كل اللي جاى هو هو بحزافيره!!! كأن مافتنيش حاجة

نزلت اركب ... وطبعا محطة حدائق المعادي تعتبر حشو للسنادويتش بين محطتين  الزهراء ودار السلام  ... لان اللي بيركب من حدائق المعادي بيدخل المترو طبعا بقوة الدفع الذاتي.... تفتح الزهراء من نفس الاتجاة يحشروك من وشك ...اما دار السلام تفتح  من الجهة العكسيه يطبقوكي من ظهرك ... تفضلي محشوره تقريبا لغاية محطة السيدة ذينب ودي تعتبر اول الانفراجات !!!!

طبعا انا طول ما انا واقفة رافعة ايدي لفوق وماسكة الشنطة ...لان الشنطة كبيرة ومالهاش مساحة ... فضلت متذنبه وواقفه من غير ما امسك في اي حاجة بقوة شفط الهواء .... ولكن المشكلة لما بنفضي ناس وبيركب ناس ... تلاقي نفسك بتترنحي ...ولكن لازم الثبات !!!!

ومع كل هذا الزحام الرهيب ...نيجي لفقرة بيع المنتاجات واصرار البائع على ان يعرض المنتجات في كل العربيه.... المضحك في الموضوع انه بيعدي بين الناس زي البريمه ... ولا يستسلم ابدا....وعليك ان تتقبل تعديته وصوته الجاهور وادائه المبهر لاقناعك بالشراء

 عدى علي "قلم الكحل" اللي ما بيطلعش بالمية ولازم تجربه امام عنيكي علشان طبعا تقتنعي .. تكتب بقلم الكحل على اديها وتصب شويه ميه على الكحل ولازم طبعا تساعديها.... فا تمسكك ازازة الميه وتقعد تدعك في اديها علشان الاثبات والبراهين ... طبعا مش مهم انتي  ظروفك ايه ... مزنوقه مخنوقه المهم تمسكي الازازه ومش بعيد يترطش عليكي ميه ...المهم انك تساعدي ....

خلصت ومشيت دخل وراها بتاع المنديل المبلله.. وبناطيل ليجنز ..وشربات ... واشياء اخرى كثير من اللي تهم البنات  !!! 

واخيرا وصلنا لمحطة النهاية ... وطبعا لازم تحضري نفسك لمحطة النزول قبلها بفتره علشان تعرفي تنزلي .... الا لو معملتيش كدا هاتفوت عليكي المحطة .... وطبعا من اداب النزول سيب نفسك خالص هاتنزلي بقوة الدفع ... الخروج من المحطة بقوة التكاتف والمساندة .... 

واخيرا وصلنا الى المراد ... طبعا شعرك منكوش حبتين لبسك طالع من بق كلب ... ولكن وصلتي في وقت قياسي ودا المهم!!!! 

وفي النهايه بعد كل تلك الاحداث المريره لا يسعني الا ان اشكر المترو على التوصيله 

انت تعبان .... على فكرة وانا كمان

كل واحد فينا عايش في مشكلته ومتخيل انها مأساة ومصيبه ... ولكن لو سمعنا من اللي حولنا هانكتشف ان مشكلتنا صغيرة ويمكن تافهة
صحيح من حقك تزعل وتضايق ... ولكن كمان واجب عليك تقدر وتدرك ان اللي بيستحملوك وبيسمعوك هما كمان تعبانين وقرافنين !!!! وعليهم ضغوط  السنين

زعل وقرف  وضغوط زمان غير مشاكل وقرف دلوقتي خالص.... الواحد مننا يبقى عندة كم من الكلكيع يكفي ويغطي ويفيض .... مشاكل في الشغل ، ضيقة ماليه ، او مشاكل زوجيه ، اكيد فقدان غالي او حبيب ، ويمكن مرض مزمن ... وغيره كثير
واغلب الناس عندهم تجميعه من القرف المزمن اللي لازق فيهم ... غير القرف اليومي اللي بيقابلك وبيخبط فيك .... وانت مطالب للتعامل معه وحل مشاكله وعواقبة ..... يمكن بشوية محايله او مداديه ... او الكلام الشهير من نوعية " انا اسف ... طب معلش... حقك عليا" فقط لإنهاء القرف اليومي!!! لأنك لسه محاط بالقرف المزمن !!!! وبتحاول بكل الطرق انك تقلل منه سواء بالدعاء  او  بالاداء وانت وشطارتك !!

ولكن المشكله ان  نقطة غايبة عن اذهانهم ... ان من كثرة انواع المشاكل والقرف ... اصبحت بعض المشاكل اللي ممكن ان نقابلها تصنف تفاهه... او بتعدي كدا من غير ما تشعر انها ممكن تصبح مشكله ........ 
زي اتخانقت مع اختك ... او اتشاكلت مع جارك ... ولا اتخنقت مع مراتك على ان الملح زيادة .... خلاص المشاكل دي المفروض تنقرض .... لان الاذبل كثير .... في حاجات ثانىه اقوي واصعب نقدر نزعل عليها .... وتاخد وقت من اهتمامنا ....

تيجي واحدة تقول اصلي زعلانه علشان جوزي موداش العيال التمرين ... واتخنقنا ... وسبت البيت ... طب بالنسبة للحاجات الثانية الاهم مقصر بردوا ولا !!!!!!!! ....الاهي تتبطي يا وليه!!!
ولا يجي الراجل من دول يتخانق مع مراته على الملح .... بلا نيله طب راعي انها مطحونه!!!

او اتخنقنا لاني مغسلتش العنب كويس؟؟؟؟ يا لهوي بجد 

دا في بلاوي ثانيه كثير ....

الغريب ان الواحد من كثرة ما هو مشغول اصبح يستخسر يتخانق .... لان اصبح مافيش وقت ..... علشان كدا الراجل الذكي هو اللي يشغل مراته علشان يرحم نفسه من زنها ... والست العاقلة ما تنحش على الحاجات البسيطة اللي ممكن تعديها

وقالت لي احد الحكماء بأن الشخص منا بيتصدر في الهايفة ويزعق لانه مش قادر يتكلم في التقيل .... وواجهتني بالحقيقة المره وقالت " انتي بتعملي كدا  كمان" ... من كثرة القرف لسان الواحد  بيتقل وريقه بينشف... مش فالح غير انه يتخانق في التفاهه .... محدش ابدا ها يستوعب لان كل واحد في اللي مكفيه ... فالنتيجة انك بتطلع زرابينك في اتفه الأسباب... يمكن الكلام ده صح... كلنا بنعمل كدا  ... ولكن بنوصل لمرحلة صعبة جدا وهي عدم القدرة على الاستيعاب وذلك لعدة أسباب ( يمكن الكبر او الحِمل او الزهق او الملل )

 .... ولكن احذروا نقطة النهاية ... نهاية الاستحمال ... نهاية الاستيعاب او الادراك  .... وبعدها يأتي الانفجار .... وتتبعتر الاشلاء وما نعرفش نلمها!!!!! 
لا تترك نفسك تصل الى نقطة النهايه عليك ان تفصل حتى لا تفقد كل شئ 

ولا يسعنا في النهايه الا قول "الحمد لله على ما اصابنا "

اخيرا الثلاجة!!!!

حلو انك تعيش تجارب حياتيه كثيره بسيطة او حتى مكلكعة ...هاتعلمك ... وتعرفك كيفية التصرف ... وتعيش بالمقوله الشهيرة (الجيش بيقول لك اتصرف)

 ..يعني تعيش فتره من غير كالون حمام وتتأقلم وتخرج من التجربه انك غرزت فكرة الأستاذان قبل الدخول ... 

او من غير سخان وترجع لأيام تسخين الميه والكوز  .. 

او تعيش من غير ثلاجة وتقلبها دولاب خزين ... 

وعن تجربتي الأخيرة مع الثلاجة ... تجربه مفيدة ...علمتنا الكثير ... وعلمت ولادي حسن التصرف والتأقلم على العيش دون الثلاجة ... علمتنا شويه توفير ... 

القصة بدأت ان صحينا يوم وجدنا ان الثلاجة مش شغالة ... تحايلنا عليها ... عملنا ريستارت ... هزناها .....ولا الدموع اصبحت الثلاجة الجزء اللي تحت شغال دولاب خزين ... وجزء الفريزر شغال ثلاجة تبريد خفيف .... 

وحصل نقاشات على مستوي عائلي صغير وكبير وأخذنا جميع الآراء وعرضنا الثلاجة على "كونصولتو" ومتخصصين لعلاج الثلاجات ... واتفقوا جميعا على انها يا "حبيتي" لازم تغير "شبكة" ...  

واجتمعنا كعائلة وقررنا نشوف سعر الثلاجات - اذ ربما ينفع نجيب غيرها - ا طبعا وجدنا انها غالية جدا ... ويارتها موجودة .... هي غالية جدا ومش للبيع للفرجة فقط .... يعني أجيب الاكل  واحطه عندهم في المحل !!!!! ...  لغاية لما يقرروا يبيعوا الثلاجة!!!!!.... 

وبعد كل الهري .......... لازم  اقولكم كنا عايشين لمدة شهر من غير ثلاجة أزاي ....وخصوصا أنا كوني امرأه

والتأقلم على عدم وجود ثلاجة كان امر غريب .... لكني تأقلمت ولم اشعر بشيء ... يمكن نحست او سلمت امري لله .... اتعودت اطبخ قليل ... اشرب ميه سخنه من الحنفيه .... اصبحت اشتري بالربع كيلو وبالثمن جبنة.... 

شفت وسمعت نظرة الاستغراب في عين "عم محمد " صاحب السوبر ماركت ....استغراب من أدائي في عملية الشراء وقد ايه هي منخفضة!! وحفاظا على ماء وجهي قررت ان اعترف لعم محمد ان ثلاجتي بايظة!!!! 

شفت نظرة الاشتياق في عين ولادي للميه الساقعة... والشغف والتهافت ....قد ايه نفسهم في بق ميه ساقعه وممكن يقطعوا بعض على اخر بق ميه في الازازه ... 

بالرغم من انهم كانوا من ورايا يذهبوا ليلا لأخذ المياه الساقعة من ثلاجة جدتهم ... وأصبحت هي كمان تعاني مننا !!!! 

وأخيرا اخذنا قرار التصليح لان محلات الثلاجات مش ناويه تبيع غير لما يحطوا القيمة المضافة!!!! اللي طبعا ها تعلي ثمن الثلاجة ثلاثة اضعاف .... فأرسلنا للراجل المتمكن اللي قال انه ها يصلحها ويضمنها!!!

وجاء اليوم الحاسم في استلام الثلاجة .... غسلتها وبخرتها ... وشغلتها !!!! وأخيرا الثلاجة  طلعت سقوعيه .... العين لمعت مع فرحة في القلب.... مليت كل الازايز ورصدت أول بق ميه سأقعه وفرحة الولاد .... يااااالله الارتواء ... الحمد لله على كل نعمك !!!!

ولكن ادركت شئ مهم ان الاجهزة استعملها او الاستغناء عنها يمكن ان نربطه بفصول السنه .......مثلا انا أتوقع ان لو الثلاجة كانت باظت في شهر أغسطس اكيد كان أدائي مش ها يبقى بارد كدا ... السخان ما ينفعش يبوظ في الشتاء... المكنسه ما تنفعش تبوظ في الصيف علشان الفتافيت والنمل.... التكييف والصيف  ... وكل منا حسب استعماله وأهمية الجهاز بالنسبة له !!!!!!!!!!

واخيرا الحمد لله كل تجربه بتعدي علينا بتعلمنا الكثير حتى لو تجربه بسيطة بتعلمك ازاي تأقلم ظروفك ... ما تقفش اوي على كل حاجة... وكله بيعدي ... المهم اننا بصحه

وربنا انتي غتيته

اه معلش في ستات غتيته (سخيفة) ..... غتيته في رد فعلها ...في تعاملتها ... في تصرفتها مش بس مع راجلها ....مع اصحابها والجيران ... اصلها مش هاتفصل ..!!!

الست السخيفة ردود افعلها مش محسوبه!!!!

في نوعين من الغتاته ....نوع  عارفه انها غتته ومستلزه غتاتها (حاسه انه جزء من شخصيتها) .... ونوع مش مدركه انها غتيته  (ودي قابلة للتقويم) يجي منها يعني !!!

النوع اللي عارف!!!! تلاقيها تسأل اسأله غتيته جدا من نوعيه ...هو انتو بتقبضوا كام؟   جوزك بيقبض اكثر منك ؟؟  انتي بتحبي جوزك!!! "طب حتى لو ما بتحبوش ..بتبكتيها ليه!!!"  ابنك جايب كام في الامتحان ؟ او تلاقيها بتحشر مناخيرها في حاجات مش تبعها ... (غتييييته)

وياسلام بقى لو الغتيته دي تبقى "ام" ... وتضطرك الظروف للتعامل معها ...وتلاقي اسالتها مستفزه وفيها نوع من التباهي بالسخافة على للبشر ... وهي يا حرام حاسه انها "كيوت وحبوبه" ومهما تردي وتصدميها بانها غتيته في افعالها او مهما تحاولي تحرجيها تلاقيها مصمه بكل طاقتها على السخافة في الرد ... 

تلاقي الست الغتيته عيالها يتوارثوا الغتاته .. والعيل يبقى مكروه ومعروف انه غتيت وامه اغتت !!!! 

اما النوع اللي مش عارفه انها غتيته ولكن تصرفتها في بعض الاحيان توحي بذلك 

(ما تقصدش) ... دي امرها سهل بشوية تهزيق... وصدمه يمكن ان تتظبط في افعالها !!!!

لكن يا حرام المشكله في صدمة المتعامل معها ..اول مره يصدم ويعرف انها غتيته... يعني الراجل يبقى صارف ومكلف ودي مش عادته وجايب هديه ويلاقي رد فعل غتيت من نوعية ايه دا بس انا ما بحبش الشكل دا ... مش كنت تسألني الاول ... احمدي ربك انه جاب وافتكرك ... اهو مش هايتنيها ثاني ابد بعد رد فعلك السخيف!!!!!!

او قاعدة مع صحبتك وشايفاها جايبه حاجات وقاصده انك متعرفيش.... بلاش غتاتة وفضول زائد ...بلاش جملة "ايه ده انتي جبتي حاجات جديدة ...واريني ... افرضي جايبة حاجات عيب " يا خراشي 

النوع اللي مش هايعترف ابدا انه سخيف .... نسبنا منه .....مافيش فيه امل ...مش هاينوبك غير حرقة الدم 

النوع اللي ياحرام مش واخد باله...... بشوية مجهود ربنا هايشفيها .. لو تهمنا ... نصبر عليها 

اسف حبيبتي

فوقت متأخر قوي ... فوقت بعد فوات الاوان ... يمكن اقدر الحق اعوضها ... كان ينظر اليها والدموع في عينيه ... اول مره اشعر اني افتقدها جدا .... اريد ان احتضنها وهي على علم ...تشعر بدفئ حضني ....تركتها وهي مريضه وذهبت للبيت لاجد امور البيت كله في انتظاري واولادي ينتظروني ليطمأنوا على حبيبتنا....!!!

دخلت لاقيت لبس الاولاد في كل حتة والمطبخ في مواعين.... الغسيل متلمش ... قلت اكلم "مرات حارس العقار" لتساعدني ... اكيد حبيبتي كانت بتعمل كدا كل يوم !!!! 

ناديت عليها لم تستجيب ... كلمتها على الموبايل ... كان مقفول .... يعني انا اللي هاعمل كل دة !!!! فكرت ثانيه ... هي كانت بتتصرف ازاي!!

دخلت غرفة الاولاد زعقت وقلت !!!! لازم كلنا نساعد ...اليومين دول "مامي" تعبانة ... احنا اللي هانشتغل في البيت.

سابهم في غرفتهم على اساس هايوضبوا الاوضه.... وطبعا هو اللي انعك فيها

لقى الغسيل كثير جدا ولازم يتغسل ... مابعرفش افتح الغسالة ... مش مشكله ......هاكلم "الدراي كلين" ... "يوووو" الساعة 3 والاكل متعملش ... الولاد عندهم تمرين ... خلاص هاطلب "دليفري"

بابا ... احنا جعانين .... بابا فين لبس التمارين .... مش لاقين الشرابات .... 

سامع الولاد بيتخانقوا مع بعض ...!!!

الاكل وصل .... تعالوا كلوا علشان نلحق التمارين .... وانا بحط الاكل ... سمعت صوت "دش" الاكل وقع على الارض ... زروطه في كل حته ... لميت وانا متنرفز جدا ... مش تخلي بالكوا ....

خلصنا اكل جري وانا بلبسي اخذت الاولاد ونزلت على التمارين .... عرفت ميعاد رجوعم ... روحت كملت مشوايري  من شراء مستلزمات البيت الناقصة .. ورجعت اخذتهم ... 

روحنا وابتدينا مرحلة الواجبات ... وبعديها تحضير العشاء ... مواعين الغذاء والعشاء المتبقية .... 

البيت هادي بعد نوم الاولاد ... عملت كوب من الشاي ... وفكرت للحظه ... فيها ... في حبيبتي .... في الوقت دا في الغالب ببقى بره خارج مع اصحابي ... وهي بتبقى قاعدة نفس القاعدة دي ... او يمكن نايمه من تعب اليوم!!!!

لبست جري ورحت المستشفى بالليل كنت محتاجها قوي ... محتاج اشكرها ... محتاج اقولها انها كل شئ ... انها مستحملانا كلنا بغبواتنا ونرفزتنا ... 

لم استطيع الدخول الا لدقائق معدودة ..... مش حاسة بيا ..

رجعت البيت ... حاولت انام ... الصبح عندي الكثير ...

صحيت ... مخضوض على صوت المنبه ... 

يالا يا ولاد الاتوبيس تحت ... مابيصحوش عادي ... يالااااااا ... يالااااا

دخلت حضرت الساندويتشات ولوازم المدرسه ...نزلوا الولاد ..

روحت الشغل ... مش مركز خالص ... بفكر هي ازاي بتعمل كل ده مع بعض 

استأذنت ورجعت البيت علشان استلم الولاد من "الاتوبيس " 

حضرت غذاء على قدر استطاعتي ... وتكرر كل ما سبق من تحضيرات ..حتى وصلت الى نهاية اليوم ...استمر بي الحال اكثر من يوم على هذا ... وحبيبتي لسه تعبانة ...

اشتقت لكي كثيرا .. الي ضحكتك وهزارك ... الى قوة احتمالك ... ارجعي لي ... انا في اشد الاحتياج لكي!!!!!

سمعت رنة التليفون ...المستشفى .... زوجتك ترغب في رؤيتك

لبست جري ونزلت ...

دخلت عليها ... مثل الطفل الصغير ... وكعادتها ابهرتني وبادرة هي وقالت 

وحشتني جدا.... عامل ايه ؟؟؟

والاولاد ... معلش تقلت عليك !!!

فجأة لاقيت نفسي باحتضنها جامد جدا وقلتلها " انا بحبك جدا" انا مشتاق ليكي جدا ...

السرير مش مريح من غيرك ... البيت هادي من غيرك ... مافهوش شقاوة الحياة ...

"انا اسف حبيبتي"

نظرت لي باستغراب شديد جدا .... وقالت... مالك يا حبيبي انت تعبان في حاجة ...

ليها حق مش مصدقاني ... هي تعلم اني احبها ولكن كانت لا تشعر بها 

هي تعلم انها مهمه ...لكن لا يصل لها احساسي !!!

انا مش تعبان ... انا مشتاق !!!!

خرجت حبيبتي من المستشفى ملئت حياتي من تاني ... استقام البيت من جديد لوجدها هي فيه 

والمدهش  ... انها هي اللي بردوا بدأت  ... وقفت امامي ... مسكت وجهي بكفيها ... وقالت: 

تعرف انا كنت خايفة ماشفاكش ثاني .... كنت خايفة على الولاد ... انا بحبك جدا لدرجة اني كنت قلقانة عليك ... هاتعمل ايه من غيري !!!!

فقال :

انا اللي عاوز اقولك انك انتي اهم حاجة في حياتي ... اصلك انتي اللي وزناها ... ميزان البيت ... تمتصينا جميعا ... 

بحبك جدا ... اخذتها في حضني ... ودي كانت اول ليله انام بعمق 

هو احنا امتى كبرنا

سؤال صعب جدا ، واجابته اصعب ... ازاي تعرف انك كبرت !!!

 تبص في المرايا وتجد ان السواد واكل عينك وان وجهك فقد النضارة والحلاوة بتاعة زمان.

تحضر مناسبه وتلاقي حد طويل عريض وبيقول لك يا طنط او يا اونكل ( الاهي يطنطاطوك على حبل عريض)

 تقعد في وسط عائلتك الكريمة وتجد صغار العيلة بيحبوا وبيتحبوا ... وليهم مغمارات 

تلاقي حد كنت انت بتديه البيبرونه زمان ... وفي قاعدة تلاقيه بيحضر لك الفطار 

لما تقابل صحاب زمان وتلاقي الشعر الابيض كاسيهم.... تلاقي نفسك باصص في مرايه... انك مش مصدق انك شبههم

تيجي تقوم من على الكرسي ....تقول اه يا ظهري ... اه يا ركبي 

لما جسمك يشد عليك من اقل مجهود تعمله .........تتاوب وتنام على الكنبه في اوقات غريبه!!!! 

 خلقك يضيق من اقل الاشياء..... 

كثرة التجارب السخيفه التي تمر بحياتك (جواز فاشل ... طلاق .... اصحاب اندال ... عائلة مفككة ... وحدة زايدة ) 

لما تفقد عزيز وغالي سند ليك ...... والد ... والدة ... حبيب او حبيبه

او ما  تعرفش تخدم نفسك .... 

الكبر احساس وليس بالسن .... انت من تضع نفسك في هذا الاحساس وتستسلم له ... لو استسلمت لاحساس انك كبرت ... عمرك ما ها تعرف تكمل ... ها تحس ان حياتك وقفت .... وانتهت ... 

احساس الكبر ... هايجبرك بطبيعة الحال النظر على كل شئ منتهي ... 

احساس الكبر هايفقدك الامل في بكره .... لا تستسلم ... 

امشي بمقولة ( الشباب شباب القلب)

يوم العرس

صحيت باكرا.... عينيها تلمع... متألقة ..... يملئ قلبها الأيمان... وتؤكد لنفسها ان القادم اكيد افضل واحسن ، 
يوجد حركة في البيت.... الجميع مشغول لانجاز مهامه .... 
قررت ان تذهب الى "الكوافير" لتتجمل ... وقالت له في صوت هادئ عندما قابلته .. أريد منك أن تصنع التغيير الكامل ... أريد أن اظهر اليوم في ابهى صوري ... أكون جميله ، زاهية،لامعة ،وقوية الملامح ... 

وبالفعل بعد ان انتهى ... نظرت في المرآه .. وأعجبت بنفسها كثيرا ... وهمست لنفسها وقالت ...             "انا جميله" 

واستجمعت باقي قوتها وذهبت للمنزل حتى تستكمل باقي التجهيزات لهذا اليوم ... وهي تتعمد  بأن تظهر في احسن صورها 

وأخيرا وصلنا الى اخر المطاف .... ارتديت ملابسها وهي في كامل اناقتها ... وعلقت أيديها بأيد والدها ... وقالت انا في أتم الاستعداد!!!!

ووصلوا الي المحطة الاخيره .... وجلست بكل ثقة وابتسامتها الهادئة لا تفارق وجهها وبكل ثبات قال لها الرجل الحكيم طيب الملامح الذي ينتصف المنضدة... 
انظري له حتي  يقول لكي  ما جاء من اجله .. ورفعت عينيها بكل ثبات ... وقالت اني انتظر يا شيخنا ....

لم يستطع هو ان يواجهها ... لم يستطع ان ينطق الكلمة بمفرده ... الكلمة ثقيلة على اللسان ... تجرح القلب القوي مهما كان!!!! 

وقال له الحكيم "قول يا ولدي" ...  رفع رأسه ونظر في عينيها ... بكسره ....  وفي سرعة فائقة ....وبصوت خافت قال "انتي طالق ".... قام وخرج مسرعا  من الغرفة... 

خرجت من الغرفة يدها في يد والدها مثل يوم العرس ... رجعت إلى منزلها ... ودخلت غرفتها  .... رسمه الضحكة على شفتيها ... وعينيها مبتسمه ...كعادتها

وبعد ان انفردت بنفسها .... اخيرا ... انهمرت دموعها بغزاره... كأن الدموع  كانت سجينه وحان الوقت لأطلاق سراحها  ...

تسال الله ...في خشوع .... لماذا ... فيما أذنبت.... ان ينكسر قلبى هكذا ... فيما أذنبت ... ان يتم جرحي بهذا الشكل... لقد تعبت ... ارحني ... انزل السكينة على نفسي وقلبي ... انت معيني .... لو هذا نصيبي وقدري فأعيينني على تقبله .... و احتماله ....

الكل يشيد بطيبة قلبي ... ولكنى لست ملاك ... من المؤكد لي هفوات ....

ياااا الله ... تعبت من كثرة الاحتمال ... أريد راحة البال ....

أخطأت لما اعتقدت أن مثلي مثل البنات أريد رجلا يحبني ويحنو على ... يحتمل عصبيتي عجرفتي احيانا  ... يدللني اذا عندت ... اعتقد اني أخطأت !!!!

تمنيت بيت لي وحدي .... بيت أملاه ضحكات ... صراعات ... نقاشات ....منطقيه ان كانت او لا منطقيه!!!!

ربي أنا لاعترض ... ولكن أرجوك وأتوسل اليك .. ان تمنحنى الصبر والسلوان ... ان تمنحني الصلابة والقدرة على الغفران ... ... ان تمنحني القدرة على تقبل الجديد أي أن كان !!!!

سمعت خبط على بابها ... فقالت بصوت هادئ .... حاضر ... فكانت "الام"  تريد ان تطمأن عليها ... فتحت لها الباب.... وأخذتها بالحضن !!!!

وقالت لامها انا بخير ... تحدثت الى ربى وهو قادر على ان يعينني... لا تخافي ... انا قويه بكم ... واعلم انه لن يتركني دون ان يقف بجانبي

وانطوت صفحة في حياتي .....لأبدئ غيرها ان شاء الله

سايق وجانبة الحكومه

سايق وجانبه "الحكومه " مكشر وبوزه شبرين....... الله يكون في عونه عليه مسؤليات وضغوط .... بيفكر في اللي وراه ....

مراته  قاعدة جانبه بتفكر في امور البيت والعيال والطلبات والمسؤليات.... 

الكبر باين عليها  ... جمالها اختفى وراء هومومها .... 

هو كمان شعرة الابيض على الجانبين ... حواجبة عاملة سابعتين

فجأءه بيبص جانبة لقى بنت حلوه لسه في بداية جمالها ... الحيويه بتنط منها ... بص  وقال في باله... يااااااه لو بس تبص لي ... لو هي اللي جانبي ... حلوه قوي ... 

زغدته الحكومه في كتفة ... وقالت له ... حلوه صح ... جميلة .. وصغيره... نفسك راحت لها .... حقك ... اصلها مش ام العيال ... اللي مش واخدة بالها من نفسها ... لبسها  صغير مش على قدي ... انا افصل منها اتنين

ام العيال كانت زمان حلوه ... ام العيال كانت في كامل رونقها ... اتبهدلت من كثرة المسؤليات ... وانت كمان يا ابو العيال ... كبرت وشعرك ابيض ... الحلوه اللي جانبك مش هاتبص لك .... لانك مليت وكرشت حبتين ... 

انا بس اللي شايفاك حلو في عيني اصلك حبيبي وابو عيالي ... 

انا بس اللي مقدرة عمرك اللي فات وانت مقضيه معانا وعمرك اللي جاي اللي ان شاء الله تكمله معايا... اصل ولادك مصيرهم لبيت ثاني ... اللي هايتبقى لك هو انا  ... 

انا اللي مش شايفة كرشك ... او بمعنى ادق متاغضيه عنه ... ولا ايه يا ابو العيال!!!!

عارف يا حبيبي لو عكسنا الاوضاع ممكن جدا تبقى هي اللي كانت قاعدة مطرحي هنا وانا اللي هناك... كنت هاتريق عليك في باللي واقول ايه الشايب العايب  اللي فاكر نفسه املة ...

بص ابو العيال عليها  وقال لها ... انتي غالية عالية جدا... انتي عمري اللي فات ... واللي جاي .. انتي حياة طويله عشتها بحلوها ومرها  ... وبصتي ليها مش معناها انك غلط ... بصتي ليها فيها تمني فقط ... 

الراجل مننا مهم كبر عامل زي الطفل عاوز الحنيه والمدادية ... انا كرشت وشعري ابيض... ولكن الست مهما كان عنوان للجمال ... مش معنى انك كبرتي .. انك تنسي نفسك ... شعرك .. لبسك ... لو عاملتي كدا ولادك هايطلعوا زايك .... صحيح الراجل مننا عينه يندب فيها رصاصة ... ولكن الراجل بطبعه عينه فارغه ... 

كلامك  جميل يا حبيبي ... كان فين الكلام دا من زمان...  تكملة لكلامك .. انا اقتنعت بكل كلمة بتقولها وقررت اعمل بيها ... انا عاوزه فلوس علشان اروح اعمل شعري بروتين .. علشان يفضل مفروود على طول مش كثير حوالى الف جنية ... الف كمان لبس جديد .... واخيرا انا نويت اعمل دايت ... علشان انا لازم اهتم بشكلى ونفسي مش بس علشانك ولكن علشان نفسي ... 

بص ابو العيال جانبه .. وقال ... وانتي مالك كدا انتي حلوه بكل اشكالك ... اللي حاولينا دول صناعي ... انتي الاصل ... والخير والبركة

مالهوم البنات

ومالهوم البنات

 

ساره احمد

اتربيت في بيت اغلبية خلفته بنات .... كنت أنا أكبرهم ... الكل طبعا كان بيقول دي البكرية الاموره ... وايه يعني انها  جت "بنت" ... مش مشكله ... بصراحه والحق يقال كنت بتعامل حلو قوي ... بس طول عمري كان جوايا إحساس انهم كانوا عاوزني "ولد"

" مالهوم البنات...حلوين"  

حفيد ورا حفيد ... البنات عددها بيكثر والولاد بالضالين.... فرحة الجدة والجد بالأحفاد الأولاد ما تتوصفش ..... ونزود على كد المربية بتاعتنا وكلمتها الشهيرة ..." ومالهوم البنات" كأنها مستحملانا بالعافية ... وبتتصعب علينا لاننا غلابه....متعرفش ان بعد مرور السنين انها ها تغير وجهة نظرها  ... وبعترفها

وتمر السنين والبنات بتكبر.... قاعدتهم بتحلو ... كثرتهم عزوه... ضحكتهم عسل... فرحتهم فرحة للبيت كلها .... البنات بهجة في البيت .... أكله جديدة ....  يدلعوا البابا والأخ... والجد والجدة ..... الكل بيعتمد عليهم 

كبروا البنات وبقوا شبات حلوات ... الكل يتمنى ضحكتهم ومساعدتهم..... الجدة أصبحت تعتمد عليهم ... والمربية بقيت بتزود على جملتها الشهيره " مالهوم البنات ... وتقول ... دول حلوين".... حسيت ببهجتهم في البيت ولمتهم وصوتهم العالي ودوشتهم ... اصل الولاد كبروا واشتغلوا وحبوا ... فضوا البيت ... راحو لبنات ثانين... ضحكتهم ماليه بيوتهم ....

خروجات البنات .... مسليه ومرحة ... كلها ضحكات ...  رقص وغناء ... حكاوي مسليه  ... قاعدتهم كلها مشاعر .. عواطف... ودموع .... 

الولاد يرتبوا خروجات بكل الأشكال ... ولكن نيجي على الخروجات اللي فيها شكل ولياقة ... لازم يبقى معاة بنت حلوه ترفع منه وتكمل شكله وبرستيجة ..... بجمالها ولباقتها وشياكتها وضحكتها الحلوه .... 

يخرج هو مهما يخرج ولكن لو اتعزم في مكان ودخل هو اعزل كدا من غير نصه الثاني .... يشعر انه غير مرغوب فيه ... الكل معاه اللي تبعه وهو وحيد شريد .... 

خروجات الصيف لازم البنات ... الأفراح من غير بنات وفساتينهم وكعبهم العالي وألوانهم .... متبقاش افراح .... 

حتى لو الراجل مظبط خروجة مش لايقة قوي على صديقتة الحلوه الجميله لاختلاف نوع الخروجه... يدور في دفاتره القديمة لغاية لما يلاقي البنت المناسبة اللي ينفع... اصل مش هايبوظ برستيجة وشكله .... يا كدا يا يلغي الخروجه

الحلاوه مش بالشكل ....فقط.... لكن طبعا الحلاوة مهمه لانها تضيف كثير ... ولكن الراجل الذكي ... يدور على البنت اللي شخصيتها جذابه مع الحلاوه  ... تبقى كملت

وفي  النهاية ... احب اقول لكل بنت اوعي تبهدلي نفسك ... اهتمي بها جدا ... نمي شخصيتك على قدر استطاعتك ... لبسك ... شعرك ... جسدك .... الكل يحتاجك اولهم انتي !!!!!

اعرفى قيمة نفسك .... الكل ها يقدرك ويحترمك .... تنسي نفسك .... تستحملى اللي هايحصل لك  

شكي في واخنقيه ... واوعي بقى تلومي عليه!!!!!!

ليه  بنستغرب!!!!! ونقول !!!! هو ليه عمل كدا ........هي ليه تعاملت كدا .... ولكن لم نفكر في ما  اجبره او اجبرها على فعل هذا السلوك او حتى التعبير الخاطئ  بالكلام بالطريقه دي!!!!!!!!!! هانصل .. الي ان لكل فعل رد فعل اثقل منه ... خصوصا اننا بنعامل نفس بشريه 

شكي فيه واخنقيه ...واوعي تلومي عليه ممكن يعمل ايه..... 

غير عليها زياده ....هاتخبي بعد كدا كل حاجة!!!!

بجد احنا اللي بنعمل في نفسنا كدا ..... بنغير سلوك من نتعامل معهم.... بالاسلوب الخاطئ في التعامل ... خصوصا لو استمرنا في هذا السلوك عن قصد او غير قصد ... 

وهذ ينطبق على كل من نتعامل معهم ...  حبيب ... حبيبة ... ابناء .. اصدقاء...

 صوابعك مش زي بعضيها ... احنا مش زي بعضينا ....

مش كل واحد يقدر يستحمل .... في قدرة على التحمل والاستيعاب  ...

 واحد متجوز واحدة منعها من الخروج او مقنن خروجها مع اصحبها  ... حاولت معه بالاقناع.... بالمحاوله .... لا حياة لمن تنادي ... هاتوصل الحال بيها الى.... ياما هاتخبي وتكدب.... ياما هاتستسلم خالص وتتحول الى شخص ليس له شخصيه .. مطرح ما تحطها تتحط ... ياما هاتمثل انها موافقه وبعدين تنفجر ....

واحدة متجوزه واحد ... خنقته اسأله ... انت رايح فين ... انت جاي منين ... انت شكلك .. بتعك ... انت شكلك خنتني .... ها يوصل بي الحال الى انه هايخون فعلا .. من الزهق ... او  يعمل كل اللي هو عاوزه من وراها ... مادام هي كدا كدا مش هاتبطل ابدا خنقه.. وشك

كل الممنوع مرغوب ... والمنع له درجات ... القدرة على الاحتمال لها درجات 

اوعي تخرجي الا باستاذان ... اوعى تسافر مع اصحابك !!!... الغضب الزائد .. النكد ... الشك .. الغيره ... بين الطرفين ...المقارنه بينك وبين بابا ... او بينيك وبين ماما ... في المعاملة او حتى في طريقة تقديم الاكله.....

 هانوصل لطريق مسدود ... لازم نعي لما نفعله ... وندرك ان بايدينا بنهد كل ما بنينا...

فكر حبه ... فكري هسه... مش المفرود انه نسخة من الوالد ... ولا هى كوبي من  الست الوالدة.... 

كل واحد له فكر وشخصيه ....علينا ندرك لغاية ايه ممكن نغير ... ولغاية امتى نكف .. التغيير علاقة بين اثنين ... الطرفين لازم يكون لديهم القدرة على تقبل هذا التغيير 

واخيرا !!!! ما فيش حد نسخة من حد ... 

ليس معنى انه هادي ومستسلم ... انه هايفضل كدا .... الجميع يتغير !!!!!!!! 

والله ما يصحش.... عيب كدا

في حاجات تتقال وحاجات عيب جدا الاشارة ليها ... لاعتبارت كثيره.... منها... اختلاف مستوى ... اختلاف اعمار ... اختلاف جندر .... اختلاف اي حاجة!!!

فكرة انك حابب تقول الحاجة "حماده"  وان مناسب انك تقولها "حمادة ثاني خالص"

الواحدة مننا تبقى واقفة في حالها ومكرشه حبتين نتيجة عوامل التعريه ...."الاهلاك والاستهلاك" ... تيجي واحدة من بعيد بصوت عالي ... فضحي حبتين ... مع عدم مرعاة للاخلاق والاداب العامة .... ايه يا حبيبتي انتي حامل ولا ايه .... لا يا حبيبتي انا كرشت وتخنط... خالاص بقى هاتعمل ايه ما هي اتفضحت واللي كان كان!!!!!!!!!!!!

واحدة ثانية  شعرها ناشف حبتين وربنا كرمها وعملت كرياتين ... بروطين ... زفت الطين .... تيجي واحدة غتيته... في وسط البشر وبصوت عالى ونبرة حقد... متعرفش ليه.... وتقول بصوت مهدهد !!!!! ايه يا حلوه انتي اكيد عاملة حاجة في شعرك مالوا نعم كدا واتفرد!!!!!!  دا كان ناشف جدا ..... وانتي مالك!!!!! 

واحدة جانبك انتي عارفة انها معندهاش عيال ... مش لازم  تحكي مشاكلك مع عيالك وانهم مطلعين عينك وقارفينك ... وهي يا حبيبتي ما بيدها حيله... "افتكري دايما في اللي يتقال وفي اللي ما يتقالش

لو صاحبتك ظروفها مكعبلة حبتين ... راعي كلامك وافعالك ....  في اللي يتقال وفي اللي ماصحش .... عيب قوي انها تفهم من تلميحاتك انك خايفة على جوزك منها ... او خايفة لاتحسدي اولادها ... ولو فكرتي ثانية ... يمكن انتي اللي تحسديها على روقان بالها ... دا لو هي مروقه اصلا... كل واحد في اللي مكافية ..... 

لو حد امه او ابوه متوفي ... مش لازم التباهي بمدي ما تفعلة امك وابوكي وازاي شايلينك ... براحة قول بس بهداوه 

عمرك ما هاتعرف ولا تشعر بمدى وجع الكلام الا لو سمعت كلام مماثل يوجعك ... ساعتها بس هاتفتكر وتحس

حتى الرجالة ساعات بيبقوا سخفه في تعليقاتهم مع بعض مش معنى انه راجل .... يعني جامد وناشف وبيستحمل ... هو كمان له قلب واحساس مرهف ... وبيتوجع ... بس كاتم لجوه!!!!!!!!!!

نراعي شويه الكلام اللي بنقوله .... هل يجوز اننا نقوله ولا لاء .... هل الوقت والمكان مناسب ولا لاء ..... هل الاشخاص اللي متواجدة مناسب انها تسمع الهري دا ولا لاء !!!!

كل واحد فينا له طاقة استيعابيه .... مش معنى انه سمع منك الكلام اللي زي الدبش .. فهو مجبر على تكملة السمع.... هو شخص عادي وحامول وصابور ومتعود انه يسمع ... لكن ...  في وقت ها ينفجر في خلقتك الكريمه ... 

لازم نعرف ان في مواضيع حيويه بالنسبة للشخص المتلقي ... اللي يقبلة "فلان" ممكن جدا يكون كارثي عن شخص اخر ... ولكن في حدود معروفه ومعلومه متفق عليها من الجميع ... اسمها اداب واخلاق عامة ...

لابد ان تربي اولادك من الصغر على مراعاة الاداب والاخلاق العامة!!!!
زي بالظبط لما بتربيه على انه لما ياكل ما يعملش صوت .... مهم ايضا تربيه يعرف يقول ايه ولمين وامتى وفين
الكلام لي يا جارة !!!!!!

مدير ... اول مرة يا قلبي

مدير اول يوم  ... اول اجتماع ... اول قرار... اول تحيه من اول جته معديه ... 
بتحس جدا مين اللي فرحان بجد ومين اللي بيقولها من تحت لتحت.... 
يعني ايه مدير ... يعني سلطة ومريسه ...  بلطجة واستقواء ... يعني اصلك و كلاكيعك تبان مع اول قرار ....

ولاااا!!!!!......  ... صحبيه ...  ودلع ... علاقة على البحري ... من غير قيود ...تريح للزبون ......

علاقة المدير بزملائه التابعين له في الادارة ... علاقة متشعبة ومجنونه .... جوانبها متعددة ... في اللي ها يبقى مستني انك تغلط ... وفي اللي ها يوقعك في الغلط .... وفي اللي شايف فيك امل انك تنقذه من الضياع اللي هو فيه .... او أخيرا هاتكتشف مواهبة ... او انك الفارس اللي ها يحقق احلامهم .... وفي الموظف المستكين اللي مش هايعمل حاجة خالص ... البركة بتاعنا ....

غير انك  بالتوازي بتاخد زنابييق  من الناس اللي حوليك ...  اللي شايفين انك لم تكن تستحق هذه الفرصة اللولبيه التي لا تعوض ابد ...أمله بقى.... بقيت مدير ....سواء تستحقها او لاء ... كفء او لاء .... هاتتظبط ... ها تتظبط !!!!!!

وتفاجئ انك بعد ما كنت ظريف ولطيف وكنت فاكر انك شخص حبوب  ... أصبحت انك واخدها  بالصحبية والشلاليه ... ويمكن تكون دافع علشان تنول الإدارة !!!!!!!!!!!!

قراراتك يأما يكون  فيها حزم مع الاخذ في الاعتبار العلاقات الانسانية... بس مش قوي..... لان في ناس بتفهمك غلط ... جايز يفهموا انك ضعيف ... او ممكن تتركب ... 
وساعات تاخد قرارات بكل اصرار وتحكم من غير اي اعتبارات ... هاتتفهم ان جاحد من غير قلب ... قوي مستبد .... ظالم ... مفتري ... المعادلة بجد صعبه

المهم لما تبقى مدير تعرف تعمل شكل المدير ...فورمة المدير... تنزل باللبس الفورمال  اللي طرب في الدولاب من قلة لبسه ... فورمة الشعر ملموم لفوق "خازوقي"  او مليط مسحلب لتحت... ننسى الضفاير والفيونكات ... واللبس الكاجوال ...جزمك المحترمة المقفولة ....عاليه هسه ... بلاش صنادل وشباشب مفتوحة  ... رجلك مغسولة ... ريحتك مقبوله انشالله صابونه ........ الكلام يبقى بحساب.... التعامل بحساب .... مدير بقى ... 

المهم تخرجي منها بأقل الخسائر الممكنة ... سواء صحيا او معنويا .... تلحقي نفسك ... اخسري قد ما تخسري المهم ما تخسريش نفسك!!!!!!!!!!!

وقفة رمضان

طبعا لازم نبدأ برمضان كريم ... والدعوات .. وكل الجمل الحلوه التى تبث فينا روح البهجة باستقبال شهر رمضان المبارك ... ومايمنعش اننا نسمع اغاني ...."اهلا رمضان"  ... وهل هلالك شهر مبارك ....

ولكن لازم نراعي ان الايام بتعدي والسنين بتجري ... وزمان غير دلوقتي .. والناس وسلوكيات  زمان غير دلوقتي ...

الناس زمان كانت ليها  مكان او اثنين يشتروا منه .. والاصناف  محدودة ... والمغريات ليست كثيرة ... تقريبا الكل يشتري نفس الحاجات ... وعدد الناس كان قليل ...ونأكد على قليل ... لان هذة مربط الفرس!!!!!....واخيرا الحاجة كانت بتكفي وبتزيد ونزود على كل دة ان الاسعار كانت مناسبه !!!!!!!!!!

اما الان المحلات بالزوفه والمغريات بالهبل ... والاماكن المتاحة سواء منافذ بيع الحكومه ولا الخاصة ... الصغير منها او الهايبر الكبير  ... المعروض بالعبيط .... طبعا عدد الناس في الليمون ... مع التأكيد على ان الاسعار مرتفعة ... وبردو الناس بتشتري في اخر زادها ... تقولش ان الحاجة هاتخلص .. ومش هايكلوا ... وكأن رمضان دا ... شهر الجوع... 

نيجي بقى للحتة اللي تهمني .. حضرتك عاوز تشتري براحتك .. عاوز تلم المحل كله .. بردو مش بتاعتي ... بس ليه يوم وقفة رمضان ... ما ايام ربنا كثير ... ليه الزنقة ... في ناس جانبك عاوزه تعيش ... .... في ناس عادي عايشه عادي .. رمضان او غير رمضان بتشتري حاجتها عادي ...   واللي يفرسك الناس طالعة تشجب وتندد غلو وارتفاع الاسعار ... سواء اللحمة او الفراخ ... وحتى الخضار ... وواقفين بالطوابير على الحاجة .. ولا قرفانين ولا طاهقانين .. من طول وحجم الطابور ... الذبادي بيتاخد بالكراتين ... ليه ... !!!!!!!!!!!! .. العيش بيشتروا من جانب بيتهم ويواصوا في الشغل حد يجيب لهم ... تقولش العيش هايخلص من المنطقة ... بردوا انتوا احرار ...لكن السؤال ليه الكل يكربس نفسه  قبل رمضان بيومين .. ويوم الوقفة .... والناس اللي بتعمل كدا هي اللي بتشتكي .... من الزحمة ... وترجع تشتم ... في سلوكيات المواطن اخوه ... اللي جانبة ... ما انت بتعمل زيه !!!!!

جرب كدا تهدا عى نفسك وتشتري عادي .... وكمان حاول تتقشف ... حاول تشعر بالجوع فعلا ... اولا الاستفادة مزدوجة.... هاتخس ان شاء الله ..... هاتوفر فلوس ... جرب مش هاتخسر ... بالعكس كلنا هانكسب ... كلنا هانوصل يوم الوقفة بيوتنا في ميعاد مناسب...

بعض النصائح المتجربه ....

• اشتري حاجات اول يومين من السوبر الماركت اللي جانبك ويستحسن بالتليفون .. وافر مكانك لعربية اسعاف ممكن تتزنق اليوم دا!!!!!

• العصائر يتم عملها قبل رمضان بيومين .... البلح يتنقع قبلها بيومين ...بلاش ياميش غالي ... 

• بلاش صنفين خضار ... والله ما بيتاكلوا ... وبيتبقوا وهاتتدبسوا فيهم ثاني يوم 
•  رمضان الصيف .. غير الشتا .. يحب الحاجات الخفيفة اللي ما تزودش الحرارة 
•  القطايف تتعمل على القد .... البايت ما بيتاكلش....
• العزايم ... اتجهو الى العزايم اللي من نوع "الديش بارتي" ... لان الواحد مننا مش وارث علشان كل يومين يعمل عزومه... على فكره المرتب في رمضان هو هو ... ما بيزدش.... لو عازم متكلف ... ولو معزوم لازم تخش بقيمتك....  واخيرا  لو اتبعنا قواعد رمضان المنصوص عليها في القرآن..... وقفة رمضان هاتعدي علينا كلنا من غير فكر او حسبان ... ولا هانشعر بوقفة رمضان!!!!!!!!!

انا نباتيه .. انا حيوانيه

الاتجاه العام حاليا للجميع ان يعيش حياة صحية  .... دون مرشوشات ولا مبيدات .....ولا ... ولا ... !!!!!!!

المشكلة ان من كثرة المناهج الغذائية المختلفة الذي تتبع اصبح الشخص مننا ...حيران ومتلخبط .... !!!!!!!!!!!
لو راح يمين ... يهاجموه ويطلعوا كل الدراسات التي تثبت ان اليمين هذا مضر بالصحة وانك ها تموت بجميع الامراض "المتنيله"

خلاص نروح شمال .... تطلع دراسات ان الشمال هذا  نظام ليس متفق عليه ... ودراسات اخره تؤيد الكلام ... وبردوا الخلاصة انك ها تموت مخنوق ... مشنوق او محروق !!!!

يبقى نمزج نوعين مع بعض .... يطلع حزب ... يقول لك كدا انت بتهد مكونات جسمك الصحية ... وبتقضي على كل العناصر الغذائيه ... اخصيى عليك واح..... عليه

والواحد مننا يتلخبط زيادة ويتكلكع زيادة ...

عندما تلقي نظره افقيه على تلك الأنظمة الغذائية المتعددة ..... تشعر انك اهبل وانت بتنفذها ... واغلب الوقت    تنفذها دون اقتناع  بهذا النظام ولكن من يأسك  ... وتخبطك واحساسك ان نفسك تتظبط ...وجسمك يتعدل .. وكرشك ينزل .. وبعلك يتهد ... تنفذ وخلاص....

اصبح لكل فرد دكتور أغذية ... وأصبحت صفحات الأنظمة الغذائيه المختلفة على مواقع التواصل الاجتماعي  اكثر من الهم على القلب ... وكلهم يبدئوا بالبداية السهلة .. اننا عاوزين مصلحتك ولا نريد ولا نهدف للربح ...
ولكن في الاخر تصدم بحاجات كثير انت مش قدها .... من بداية المكونات التعجيزية التي لابد ان تشتريها ... وكلها غاليه جدا .....
دا غير ان ممكن بعد كل التجارب التي تتعرض لها .... ولو  على اعتبار انك تتابع مع دكتور  ... يطلع دكتورك العظيم ويفاجئك ان في مناطق لازم لها جلسات نحت وكافيتيشن... واجهزه ... لان المناطق دي مش "هاتفش".... يااااراجل ..... وكل دا ويا صابت يا خابت ....
 الى جانب عروض صفحات  الجيم لتحفيزك .. بدل من كذا عملناها بكذا ... واصلا الاثنين كذا غاليين.... يعني يجيب لحمة للعيال ولا يدفع فلوس الجيم .... واكثر حاجة تفرسك هو تعليقات الناس الرايقة ...
طبعا احنا مدركين جدا ان الواحد منا لو عاوز يخس او حتى لو عاوز يظبط اكله من اجل صحة افضل  ... يحتاج مجهود وفلوس ... رهيب .... ولكن ارحمونا من اللخبطة والتخبط ... هي أصلا صحتنا مش ناقصة تجارب ...

ولا بقى كل واحد من دول واسلوبه في طرح قائمة الممنوعات... واصراره على صحتها .... النباتيين يقولوا حاجة والحيوانيين يقولوا حاجة .... وانا وانتم اللي ضائعين .....
كل نظام لي ناسه اللي بتدافع عنه ...
الموضوع وصل لدرجة  ان في ناس بتنصح بالكولا في النظام الغذائي ... والبرجر ... والشكولاته ..... وآخرين ينصحوا بالشوفان والعدس والترمس .... وكله بيدافع عن وجهة نظره ... والغلابه تايهين في النص

انت نباتي ام حيواني!!!! يا رب نخلص من الجزء التحتاني