اه لو الست قررت ان تكيدك وتفرسك وتضغط علي اعصابك .. قول علي نفسك يا رحمان يا رحيم وانسي بقا اي حاجة تزحزحها عن نفكيرها السو - ما هو بردوه انت اللي جبتو لنفسك - الست جداليه وتعشق الرغي والنقاش والمحاوره والمشاكسه والمشكله انك عارف انها كدا بس ما فيش فايدة بردوه بتجيبوا لنفسك - سيدي انت لا تتعلم من اخطائك.
عليكي تفكير يا حلوه يهد جبال اه لو قررت ان تكيدك وانت مش واخد خوانه تلاقي حياتك متشقلبه ومافيش حاجة مظبوطه .
كيف تكتشف ان زوجتك نويالك علي نيا ؟
- المنبه مرنش الصبح "قصد طبعا" ............ معلش يا حبيبي معرفش ليه مرنش جايز المنبه باظ.
- ولو انت من الناس اللي بتصحا لوحدك تتعمد تصحا قبليك ...تلاقيها صحيا عامله الشاي لنفسها وتعدي من امامها وتتنحنح ولا هي هنا .. وطبعا ما فيش فطار اصل نسيت تجيب عيش.
- لو الزوجه مش كيادة قوي تعملك الشاي عكس رغبتك والفطار ساقع.
- تلف وتدور علي القميص اللي انت عاوزه متلقوش ..... لئيمه قررت تغسله آل ايه مش نظيف وانت اصلا ملبستوش.
- تغيير القميص وتدور علي الشراب اللي لايق ... تلاقي فجأة الشغاله بنت الأيه لمت الشربات كلها ونقعاها علشان رحتهم وحشه .... " طبعا هي موصياها"
- ترجع في معادك علي الغدا كل الاكل اللي انت مبتحبوش تلاقيه علي السفرة ... تتشملل قوي وتطلب اكل من بره علشان توجعلها ضميرها ..... فوق ! دا المقصد علشان تكع... واه لو عندك اولاد هتلاقيها مصلتاهم علشان تجبلهم اكل .. وتدفع انت يا جميل.
- والثقيل بقا تحاول تخلع منها وتخرج فجأه تلاقي واحدة في قمه الغلاسه بتقول - كويس انك نازل اصلي زهقانه وهنزل معاك- وهو في باله تنزلي فين دا انا هربان من غلاستك - ودي ابدا ... نطت معاه في العربيه ............. الغريب هي عارفه انه مش طايقها وهو عارف انها بتغلس عليه - دا ايه العيشه دي - .
- ولا السلاح الكبيير ... تصليط الاولاد ... بابا انا عاوز احلق - بابا انا عاوز اجيب قلم رصاص بيكتب خط منقط - زن التماريين ومتخلصش بقا من الطلبات اللي هي في الاصل لو انت ركزت هي اللي بتعملها معاهم.
علي فكره لو شعرت الست انها مقدرتش تغلس عليك ونجحت في مخططها تلاقيها تسأل اصحابها وتدور علي افكار جديدة. خلي بالك
ما ذكرته بعض النماذج وليس الكل - انا قصدي اوعيك ولكن متنساش اني ست مينفعش اكشف كروت الستات كلها.
ولكن عمرك سألت نفسك ليه هي بتعمل كدا ... ما لو فكرت اكيد انت عملت حاجة جبتها ارضاً لدرجة انك جعلتها تركز في ان تجعل حضرتك مفروس وتكركب يوم ولا اتنين.
ايتها السيدة الكيادة اللي بتعمليه دا مش من طبعك ... انتي ست رقيقه وجميله ومسليه بلاش الافكار الشيطانيه دي ... ارجعي لعقلك - بس بقولك ايه لو غلس قوي ما منهاش فايدة دوسي ولا يهمك!!!!!
يا سيدي يا ابويا يا اخويا متركز انت في تصرفاتك بدل بهدلتك دي... يا ضنايا يا ابني
اللهم بلغت ... اللهم فاشهد
جميله بس فيه حاجات اكتر قلبه السحنه كتر الكلام في التلفون مده طويله وتلقيح الكلام في التلفون واكتر حاجه تعكنن تلاقي كل حاجه في البيت عايزه تصليح وصيانه التلاجه صوتها عالي الغساله مابتعصرش التكييف غرق الدنيا فرصه تودي كل حاجه للتنظيف وهلم غلاسه.....بس بجد كتاباتك اصبحت اكثر نضوجا وواضح انك اصبحتي تهتمي بالكتابه واللغه بالتوفيق وحاولي تجمعيها في ابواب حسب الموضوعات
ردحذفميرسييييييي جدا انت استاذي يا حج عمر
ردحذف