حكومة رطرطه

العمل الحكومي: الصفات السلبيه به اكثر بكثير من الصفات  الايجابيه  الي جانب ما تكتسبه من سلوك سئ يفوق السلوك الحسن.

الموظف يستلم العمل من هنا كله نشاط وحيويه ( دا علي افتراض ان الموظف اصلا عندة نيه للعمل) يوصل به الحال الي انه يفقد كل ما لديه من قدره علي العمل وكبيره يكتب خطاب او مذكرة للعرض ... يعدلها دشليون مره لان كل مدير له رؤيه خاصة .. مع الوضع في الاعتبار ان الخطاب بيمر تقريبا علي 6 مديرين اخرهم الرأس الكبيره  وكله عنده تعديلات وكله له رؤيه متضاربه مع الاخر   .... المتعارف عليه ان موظف الحكومه بيستلم العمل الحكومي علشان يأخذ اجازه ويشتغل بره.....

ظروف العمل الحكومي المحيطه تجبرك علي انك لو عبقري تصبح غبي ولو عندك طموح...  تفقده.. بسبب موظف اخر نفسيته مكعبله يحاربك بكل السبل الرخيص منها والغالي.

الموظفين الحكوميين انواع كثيرة ، ومصنفين طبعا علي حسب دراجتهم والاقدميه وليس علي الكفاءه. 

إن غلط أحد المديريين وقرر انصاف موظف كفء .... يقال عن المدير انه محابي للموظف ... ويقال عن الموظف  انه خيبه ومبيعملش حاجة وعنده وسطه.

موظف عامل نفسه فاهم ومبتكر واخره بيعطي اوامر مش فاهم ممكن تتنفذ ام لا ...

 في المتسلط ... مدير طيب جدا ولا يستطيع اخذ قرار ...وفي الموظف المدير ...من قدمه في المكان اصبح هو من يسيطر.. في موظف السفريات راشق في كل السفريات ولو حد فكر يأخذ مكانه تبقي حرب اهليه.

الموظفين الرجال... يشربوا سجاير ويلعبوا فيفا .... اما الستات الرغي مبينتهيش من اول العيال وابوهم لحد هنطبخ ايه النهاردة .

العمل اليومي لا يتعدي ساعة تقريبا  ( تعالو نحسبها ) ... يبدء اليوم بالافطار والاصطباحه  وفي النص الصلاه في الجامع بالساعات وبعدين شوية facebook وانترنت واخيرا حبه نووم  وبعدين حمام ونختم بالعمل اللي طبعا مش هيخلص لان اليوم  خلص   .... 

وتبقي واقعه مطينه لو الموظف تم تكليفه بعمل  تلاقي تعبيرات الوجه اتغيرت وعمل عبيط وكأنه مش فاهم حاجه ....  واول رد  انه " طب شويه اصلي مشغول" .... في ايه معرفش...

اكثر نوع متعارف في الحكومه , النوع اللي يقولك اصل دا مش شغلي يا سلااام ممكن تلف بالورقه علي كذا اداره وكل موظف يقابلك يقول ان دا مش شغله.. طب شغل ميين .... 

العمل الحكومي بطبعه محبط لان مطلوب منك دراسة موضوع لعرضه في ظل ما كومبيوتر بايظ وطابعه  مافهاش حبر  ، ما فيش ورق  ولا اقلام ولو اتصرفت ونجحت ... تلاقي اعترضات بالهبل ...ازاي اتأخرت في العرض وليه الورقه مش باينه ... غلطانين المفروض نلم من مرتبتنا ونجيب النواقص علشان اعرض شغل مش هيتنفذ او لو اتنفذ يبقي فيه مصلحه لناس.

متي يشعر بنا الكبار ,,, ومتي يعمل الصغار للنهوض بتلك المنظومه حتي ترتقي