المنبه يعد احد العناصر الهامه في حياة اي ست ... آه لو المنبه باظ او الموبايل قطع شحن ومعرفتيش فأكيد " المنبه مش هيرن" . الست والمنبه لا يفترقان .
الجديد بقي ان اغلبيتنا اصبح يعتمد علي الموبيلات علشان خاصية تظبيط اكثر من ميعاد (تكنولوجيا بقى).
تختلف تظبيطات المنبه حسب ست ( الست العامله "منبها" غير "منبه" الست الغير عامله ويختلف نهائيا عند البنت او الست الفاضيه)
اكيد الست الفاضيه منبها ( ميعاد النادي - ميعاد الكوافير - ميعاد الكافيه وغيره من الحاجات اللي تنقط)
نيجي للست العامله "الغلبانه" ( ميعاد صحيان الاولاد - ميعاد صحيان الزوج - وميعاد صحيان شغلكِ " دا غير الحبشتكنات علي فكره كل الحبشتكنات مواعيد هامه ولا يمكن الاستغناء عنها) والغريب انك لو هنجتي او فوتي ميعاد بيترتب عليه كوارث .....
يعني مثلا ميعاد الباص "لو فوتيه" ... هتضطري توصلي انتي لغاية المدرسه او الاولاد مش هيلحقوا المدرسه خالص.
ميعاد شغلك .. انتي ادري ممكن يحصل ايه ... انتي وضميرك يا إجازه ، اذن ، ممكن مأموريه دا لو مديريك لذيذ ويقدرك ... ولو مدير من اياهم هينزلك الشغل ويعملهالك إجازه بردوه. ( افتره .... كله بسبب المنبه)
اما ميعاد جوزك ... "انتي اللي جنيتي علي نفسك" هتسمعي ما لا يرضيكي وهتبقي انتي اللي ضربتيله اليوم ، بالرغم من ان لو الزوج هو من فوت المنبه سيلتمس لنفسه العذر ويعدي اليوم عادييييي ولا كأن حصل حاجة. ما هو اكيد مش هيطلع نفسه غلطان.
ولكن المشكله الدائمه التي تواجه الست "وطبعا غصباً عنها" انها تقفل المنبه وتقول هتقوم اهو ... وهنا تحدث الكارثه تلاقيها بتقوم علي الميعاد اللي بعده.
ولكن هي ليست معتاده علي عمل ذلك ولكن الزمن.
طول عمرها ظابطه حياتها علي المنبه وصوته ... لازم يجي وقت وتثور وتتمرد علي المنبه . واخرها في التمرد "تغيير الرنه"..
يمكن للست ان تعمل " منبه " تظبط هي الميعاد وهي خارج المنزل يرن المنبه وتبدأ هي في القيام بشغلانة المنبه .. تتصل مليون مره علي تليفون البيت او الموبايل وفي اغلب الاوقات الاثنين مع بعض ... الي جانب الاستعانه بصديق للترزيع علي الباب ... ممكن تنجح وممكن لاء وبردوه تولااام علي انها لم تنجح في شغلانة المنبه.
حتي في الصيف ومافيش مدارس تظبيطات المنبه بتختلف ولا بقي لو نسيتي تعدلي مواعيد المنبه التي تم تظبيطها من مواعيد الصيفي للمواعيد الشتوي ... فتلاقي الست من دول في الصيف المنبه يرن 6 علي ميعاد عربية الاولاد وتقوم الغلبانه مفزوعه من السرير وتكتشف ان دي مواعيد الشتاء.
ارجوك يا "منبه" رعينا مدام باقي الاطراف لا تراعينا............
ليست هناك تعليقات:
إرسال تعليق