سَبت العمارة

سَبت العمارة عندما يكون سَبت مشترك يسبب أزمات كثيره ... اللي يسحبه وينسى ينزله ... اللي يستخدمه وهو يعتقد انه سبت من الفولاذ مش مجرد خوص ... ممكن يتقطع ويتهربد كمان .... او إعتقاد الأولاد الدائم ان السبت المدلدل دي لعبه مجانيه اهاليهم جايبنها ... علشان كل واحد معدي يروح شايطه بالبوكس او بالرجل ..... فيلبس في اللي طالع وراه ياخد رأس او عين .... تزعق مهما تزعق وتحاول ان تشرح ان السَبت مش معمول للعب .... السَبت معمول لأغراض مهمه..... ولكن لا حياة لمن تنادي....... ونأتي لحارس العمارة... يعشق السبت زي ولادة .. أي حاجه تطلبها يبقى عاوز يحطها فيه ... تنفع او متنفعش ... ولكن بدل ما يطلع وينزل ... السَبت حمال آسيه....

طلعت السِبته ليها موضات واللوان .... اللي مزجرش وعليه ترتر من فوق .... وفي مغلف مهير مشعر ... وفي  جلد ...  اما الألوان رهيبة.... كلها الوان ناريه مسخسه ... تقولوش السِبته لا تباع الا للعرسان فقط ..... كل الألوان  المنتشرة الوان

 "عيب"...  ومن لايفهم او يتابع موضات السِبته ... "ياااااييييي" يشتري خوص غير ملون   ويسيبه من غير تغليف ..... ودا بقى سبت مش علي الموضة...

المشكلة تبدأ عندما  ينقطع السبت القديم  ... تخيل انه اصبح عمله نادرة ... لا يتوفر كثيرا ... كل يوم تترجي حارس العمارة لشراء واحد ... وكأنك تتهجم عليه... ويرد عليك " ما فيش سِبته ... مش لاقي" وكل ساكن في العمارة يبدأ في ان يوصي معارفة..." يا جماعة اللي يشوف الراجل بتاع الِسبته ....يسبته لاحسن العمارة مزنوقه في سَبت" ..... وفجأة وبدون أي مقدمات ترجع تلاقي سَبت في العمارة .... سَبت مدلدل من الحبل ...  له جراب احمر فاقع ... مهير مشعر.. مزغرف كمان .... ليه ياربي بس كدا ... اللي واصتهم مجبوش الأول ... سنضطر نستعمل السبت لغاية لما عمرة الافتراضي ينتهي.... والغريب ان غالبا اللي اشتراه لم يشعر ابدا بمدى الجرم اللي عمله في حق سكان العمارة....

ممكن نسيب الأولاد عليه ... هما ممكن يقضوا عليه اسرع .... ودي مشكلة السَبت الواحد .... لاكن لو كل واحد ليه سَبته الخاص .. كنا لمناه وداريناه وخلصنا ... بدل الفضائح ....

نصيحة : عند شرائك سبت العماره ... ياريت نراعي المعايير وشروط الجودة

الوقت معك يمر......

نضجنا سويا .... قضينا احلي أيام العمر ... منها الحلو   ومنها المتعب  ....تعلمت  من كل  الذي عايشته معك....  عشت معك كل التجارب الجديدة ... اعلم جيدا انك اضفت الي حياتي الكثير ... وانا متأكدة انني حفرت مكاني في قلبك بجهد كبير....

ذكرياتي معك كثيره ، مشوقه وممتعه..... وكل ما تمر الأيام والسنين اشعر بانني اصبت الاختيار.....  وبالتأكيد انت أيضا اصبت  ومش منهار!!!!

حلو قوي انك تعيش مع شخص فاهمك لدرجة انك تبان شفاف امامه....

 

معك كان إحساس اول كل شيء.... اول كلمة بحبك .... اول لمسه ... اول حضن دافئ تحلم به  أي بنت .... اول طبق ملوخيه ساقطه....   معك لن استطيع عد اول كل شيء لأنه كثير....

 
افتكرت ازاي احنا ابتدينا ومع كم المجهود ازاي  استمرينا ... ونظرت في اعين الأولاد وهم ينظروا اليك ...وانا  قلبي معهم ينط  من الفرحة... فرحة رؤية ثمرة مجهودنا بتكبر واحدة واحدة.....
 

 عندما اجلس بمفردي أتذكر الكثير ..... فكم تمنيت ان تمحي من ذاكرتي كل شيء  يبدو سيئ ... حتي أتذكر فقط  ما هو حلو وممتع...

نعم وجودك في حياتي أثر وغير فيها الكثير ... جعل مني شخصيه اكثر صلابه.... حتي أتحمل ما يبدو منك قوه وصلابه ولكن هو في اصله خوف وحنيه..... 
 

احلي العلاقات اللي تبدأ بكون الرجل هو الحبيب والصديق وأخيرا الزوج ....  وانجح العلاقات هي التي تصبح  فيها الست هي الحبيبة والصديقة  ....  وجدت فيك الحبيب الصديق ... واعلم اني حبيبتك واتمني ان تظل واظل هكذا مهما مر بنا الوقت  

 

عدى الكثير من الوقت كأنه ثواني .... واتمني ان يعدي اكثر من ذلك ونحن معا ...



 

 

 

 

 

 

 

 



واحشتني

كلمه ممكن تقولها مره مجامله  ومره وانت مش قاصدها لتسيير الأمور  ....  ولكن عندما تقرران  تقولها  ..... انظر مباشرة في عين من قررت ان  تقولها له ....  وبصوت خافت قول "وحشتني" .........  لا تخف لن ينتقص منك شيء لا من كرامتك بالعكس من امامك سيحيى  بسماعه للكلمة .......... وفي اغلب الأحيان عينك تقولها قبل صوتك ....  وتجد من يسمعك تصيبه حاله من البهجة مع لمعه في العين.... وفرحة شديدة .. وليس شرط ان تقول " وحشتني"  لشخص بعيد عنك .... يمكن ان تقولها لشخص عايش معك وتراه كل يوم.... ولكن شعورك بأنك تفتقده يختلف كثيرا ....  إحساس الاشتياق إحساس لا يوصف وطرق إشباعه أيضا لا توصف وانا تتحس 

ولكن ساعات كثيره عندما تشعر بها ويحين الوقت ..... تجد من امامك لا يشعر بها ولا يحسها .... وهنا الصدمة  ..... لأنك لن تأخذ رد الفعل الذي تتمناه ..... من الممكن  وجائز جدا ان يكون الاشتياق بنفس الدرج ... ولكن ايه المانع ان تقحم نفسك في الموود .... هتلاقي نفسك بتتفاعل .... بدل ما تصمت  ويصبح رد فعلك بارد او علي الأقل قدر تلك المشاعر ......... 

احلي لحظه في الدنيا هي لحظة الاشتياق لشخص انت تحبه .... لان لحظة الاشتياق تجلب كل اللحظات السعيدة التي مرت بكما مع ابتسامه خفيفة على الشفاه........ وتنتهي دائما بحضن دافئ ... تشعر انك تذوب بداخله ...... ما اجمل الاشتياق اليه!!!!

اعلم ان التخيل الزائد يصيب الشخص بالإحباط !!! ولكن دون التخيل ... تقتل الاحاسيس والمشاعر الحلوة .... يقضى علي الذكريات ..... دون التخيل لن تستطيع التغلب على ما هو قادم من توترات وقلق اكيد ستصادفه في حياتك

لذلك عندما تشتاق اليه .... اذهب بسرعه قبل ما تنطفي تلك الاحاسيس

ادلقها بسرعة  ....لو لقيته مستجيب فله كمل يا معلم وتبقي امك دعيا لك ..... مالقتوش مستجيب اجري اشغل نفسك بأي حاجة .... واعتبر ان دا عادي وبيحصل مع ناس كثير وبلاش تخدها علي نفسيتك علشان متكلكعش

 

ما اجمل لحظة الاشتياق!!!!!!!!!!!!!!!!!!!!

ان كان حبيبك عسل............

قد ايه من وقتك ممكن تقضيه لسماع ناس تحكي  عن نفسها لمجرد انها شافيه انك شخص ممكن تسمع او شخص موثوق فيه ...... 

من النادر جدا ان تجد شخص يسمع كلامك باهتمام ويتسع وقته لسماعك .....أيَ ان كان كلامه مهم او غير مهم .... يعنيك ام لا  ..... ولكن يكفي ان بسماعك له  يمكن ان تريحه كثيرا .... ويمكن بكلمه تقولها تريح قلبه .... ويخرج من حكاويه معاك مرتاح  وهادئ النفس ..... ويأخذ قرارا صائبا او ترجعه عن قرار خاطئ.....

ولكن كيف تجد هذا الشخص المناسب ولو وجدته ووثقت فيه ... كيف تتأكد انه الآن يمكن ان يسمعك  ....

الشخص الذي يتقن سماع الناس ..... يصعب عليه ان يجد شخص يسمعه بنفس الاهتمام ....

ودائما  سقف توقعاته عالي وبالتالي ويصدم بالواقع .... ولأنه يعاني من ان لا يوجد من يسمعه بنفس الاتقان .... فيصبح ماهر في السمع .... ولكن التمني يزيد ورغبته في ان يجد الشخص المناسب الذي يعوضه ......

والغريب انك عندما تجد الشخص الذي يسمعك باهتمام .... للأسف تستغله الي اقصي درجة دون النظر لاحتياجاته ومشاعرة او اهتماماته..... واختيارك لما تحكي له من مواضيع .....  يمكن تحكي له علي انك مفتقد الحبيب ...ولا تعرف انه هو الاخر يفتقده وفي امس الحاجه له.... او تقول له انك تعاني من آلام .... وهو جسده يشتكي ويأن.... او تحكي عن مدي تعبك من الأولاد وتعبهم .... وهو يفتقد الولد والبنت في حياته ويتمني ان يرزقه الله بنعمة الأولاد..... ولكنك لا تدري انك بكلامك ترييح نفسك ويمكن ان تتعبه....

ولكن يمكن ان يجد نفسه مع سماع الاخريين .... يعوض ما يفتقده من الحياه

الحكاوي لا تنتهي .... ولكن نادر ان تجد الشخص الذي يسمع .... وان وجدته راعيه مثلما  هو يراعيك........  

 



ذكرياتك بحلوها ومرها

قاعدة بين الاصحاب والعائلة ممكن تعيد لك كم من الذكريات منها الحلو ومنها مر علقم ......

ذكريات تدمي قلبك واخره تثلج صدرك .... صوت ضحكاتك تعلو وترن  ... وممكن دموعك تبكي كل من حولك........ وكثير ما تتمني ان تعيش ذكريات من يحكوا لك ........... لأنك لم تعش تلك اللحظات .... وتمنيت لوهله ان تعيشها حتى تعيش التجربة بحلوها او مرها.........

 وساعات يقتحم  حياتك شخص يقلب لك ذكرياتك .... ويحولها من ذكريات عاديه الي ذكريات لها معنى او  كلها اثارة وتشويق ويمكن غيرك وهو يسمع ذكرياتك يشعر انه عاش من العمر ما يكفي يبحث عن هذا الشخص ولكن لم يجده..............

وجائز أيضا  ان هذا الشخص يكون السبب في ان تصبح تلك الذكريات ما هي الا آلام ووجع  ......

قاعدة الذكريات يمكن ان :

تعيدك الي زمن جميل  عشت به وتمتعت بكل ما فيه من احداث او اشخاص.... او تعيدك الي زمن تمنيت ان  يفوت بسرعة البرق لأنك تأذيت وتوجعت وتمنيت ان تنسي كل ما به من احداث او اشخاص 

تجمع الشمل وتزيد من الارتباط ويمكن ان تثنيك عن قرار خاطئ او تساعدك علي اتخاذ قرار مصيري صائب

تصلح بينك وبين من تشاركه الذكريات ..... 

 تكتشف انك لازم تفوق  وتبطل تعيش في الماضي لان الحاضر لازم يتعاش حتي يمكن ان تصنع ذكريات جديدة...

 

ذكرياتك..... حافظ عليها ..... ستفيدك وتساعدك وتشعرك انك كنت موجود ولازلت  ولابد انك تفضل موجود ............ 

 

 



الدوائر المتشابكه

 

انا اكتشفت ان احنا  كلنا عايشين في دوائر متشابكه.... كل واحد فينا يؤثر ويتأثر بمن حول من خلال تلك الدوائر

لدرجة ان لو حد شابك في دايرتك  وطالع "ترابنتينوا" يبقي بالضروري واكيد هيكب عليك كل هذا "الترابنتين" .... والعكس صحيح  لو حد مروق ومفرفش  .... هيروقك ويظبطك.....

الدوائر كثيرة ومتنوعة وكلها شابكه في بعضها .. كل واحد فينا يمثل نقطة التقاء لعدة دوائر والدوائر أنواع :  دائرة البيت - العمل - الاهل - الاصحاب - الأولاد - الي جانب دوائر فرعيه يختلقها كل فرد في تكوينها وتكون مختلفة عن الاخريين وذلك للتمييز .....

المشكلة تحدث عندما تتكاتف كل الدوائر الخاصة بيك ضدك .... حياتك بتظلم ... ومن اجل الخروج من الظلام .... تبحث عن احد الدوائر المهملة او المهمشة لتعطيك بريق من الامل .....  وتساعدك لتكملة اللف داخل سائر الدوائر....

ولكن للأسف كثير مننا ينساق داخل الدوائر المستعصية  التي ليس بالسهل ان يفلت منها احد ..... وتحتاج الي مجهود جبار .....ولكن من الممكن ان نفلت انفسنا كل فتره لأحد الدوائر التي تقلل من الإرهاق وتوتر الاعصاب ...."دايره علي مزاجك كدا تكون متأكد انك لو لفتلك لافتين فيها هتنبسط وتروق"

ويمكن ان تجبر لسنين بأن تتواجد داخل دوائر  ترهقك وتفقدك كثير من جهدك واعصابك ولو رجعنا لنقطة الالتقاء ستجد انك مشبوك  غصب وليس بإرادتك وفي الاغلب لن تستطيع ان تفلت منها ........ وفي هذه الأحوال يوجد دوائر  تأثرها بيك كبير وقوي  وبالتالي تؤثر عليهم بشكل مباشر ومن الممكن ان تقلب لهم حياتهم سواء بالنكد او بالفرح كدائرة اولادك او عائلتك الصغيرة ..........

 

انت وغيرك مجبر علي ان تتواجد بالدوائر المتشابكة ... ترووس متداخله .... الحكمة تكمن في كيفية تقليل التأثر بها وسرعة الخروج منها والمحاولة الدائمة في ان تؤثر انت الايجاب وليس بالسلب في من حولك

 

  

اسم الدلع

 

 

اسم الدلع ....اسم لازم يكون  ظريف لطيف خفيف واكيد مميز .... ولكن من اساسيات اسم الدلع ان يكون الشخص نفسه حابب اسم الدلع ... مش اجبار اننا نختار اسم ونلزقه فيه طول العمر  من غير ما نعرف هل هو مستلطف الاسم ام مستلطخه.... ومش معنى ان "محمد"  دلعه حماده ... يبقى كل محمد حماده....

ومش معنى ان واحنا صغريين كان بيتقال لنا "يا كوتي....بوتي" يبقى ممكن نقبل دا واحنا كبار ....  .... كل سن وليه دلعه ... اللي ينفع يتقال واحنا صغيرين ... مش شرط نقبله واحنا كبار ... وعلشان نتلافى الكعبله اللي بتحصل بسبب أسماء الدلع يا ريت واحنا بنختار اسم دلع لاولدنا نختاره لايق علي الشخص ونحاول ان يناسب مراحل السن المختلفة خصوصا لو ولد " بلاش فضايح "....

لازم نراعي ان اسم الدلع مينفعش في كل الأوقات ..... الراجل من دول يبقى قاعد في وسط الناس كُبارة في المقام  وبشنبات وتلاقي امه  بصوت عالي " يا حماااااده ... يا حماااااااادة "  الراجل من دول وشه راح لون وجاب لون ....او لو شاب لسه في ريعان شبابه و الشنب خط في وشه ... وتلاقي امه في وسط أصحابه ... هاي يا "كوكي" .... تلاقي الولد من دول عمل نفسه ميعرفهاش اصلاا... ولف وشه وجري ... اصلك يا "مامي"  متعرفيش ممكن أصحابه يعملوا فيه ايه ... ولا الكلام اللي ممكن يسمعه بسبب دلعك ليه.... 

وجهلنا باختيار اسم الدلع المناسب ... ممكن يعمل صدمه لصاحب الاسم ... والاعتراف باسم الدلع  حق وواجب .... "ساره "  ... متعارف عليه  "صرصار" يعني دا اسم ولا شتيمه  " ولما يحبوا يجملوا الاسم   يبقى  " صرصور"  آل يعني كدا  دارينا شنبات الصرصار ... ممكن نتعب شويه وندور علي اسم  لاطيف ومش مقرف مع كامل اعتذاري للصرصار.......

ونقابل اجمل افتكاسات في عالم أسماء الدلع ....البنت من دول يبقى اسمها " هبه" واسم دلعها "نانسي "  بالنسبه لصدمة المتعاملين مع الشخص ..."ملهاش أي اعتبار" ... يعني البنت طول عمرها بتتعامل علي انها "نانسي " والناس عارفينها "بنانسي" .... وفجأة تظهر الحقيقة المستخبيه انها "هبه " .... ازاي كدا .... ونبدئ في تبريرات وشرح ..... مش هتودي ولا هتجيب .... خلاص اللخبطة حصلت  .....  وصباح التوهان ... حبه يقولوا هبه وحبه نانسي ..... سؤال .. في أي علاقة بين هبه ونانسي ؟؟

ولو نظرنا في المشكله نلاقي اكثر الناس المظاليم هما اللي اسمهم صغير ... تلاقي اسم الدلع نطقه وكتابته اكبر من اسمهم .... "مي"  ميويه" ...

او اسم من كثرة ما هو متدلع .. مالوش دلع.... "هيا " .....

المهم ارجو من الجميع مراعاة شعور المدلعين

 

  

التليفون

محور حياة البنات والستات .... بيشكل أهميه كبيرة في حياة البنات .......... بما ان البنات معروف عنها الرغي  ...علي سبيل الدردشه طبعا ... يصبح التليفون من اهم الاشياء في حياة البنات ..... من صغرهم حتى يكبروا ويرعرعوا ........ 

وكل مرحله في استخدام التليفون تختلف كثيرا بإحتياجتها وتأثيرها علينا كستات...

وانتي لسه  صغنونه كل اللي يهمك ان تليفون البيت يرن وحد يقول لوسمحت نكلم "فلانه"... ودي تأثيرها عليكي قوي ... يزيد من ثقتك بنفسك ويعطيكي قوه وحيثيه... زيك زيهم

كبرتي شويه في مرحلة المراهقة .... بيبقى تليفونات اصحابك البنات والرغي المعهود في كل شئ... موضه ... اغاني ... خروجات ... ولد حلو عجبك.... والمرحله دي لو مبنيه من الاساس متين ... هتصبحي انتي نقطة اللتقاء لكل الاصحاب لانك  "الفوكل" ... الكل يصب عندك .... وفي نفس ذات الوقت ... تصبحي نقطة ازعاج للعيله ... وكل اللي رايح وجاي بيعك فيكي ... ولكن اتصبحي متقنه لدور "الهبله".........  ولو انتي عنصر غير فعال بدرجة كبيره  بين اصحابك .... لن تصبحي مزعجة ولكن معلوماتك بتبقى قليله ولا يعتمد عليكي وفي الحال دا تصبحي متلقيه فقط.....

نيجي لمرحلة "الحلوه كبرت وارتبطت" ..... هنا  تبدا مرحله جديدة من مراحل "البنات والتليفونات"  ... من خصائص المرحله ....خيالها بيوسع جدا وبتبقي مستنيه التليفون يرن علشان حبيبها هيحب فيها شويه.... زي ما كانت طول عمرها بتحلم ... في رجال بيلقطوا الموضوع وبيمشوا على هوا البنات وبيرغوا وبيتوسعوا لحد ما البنت تبقى عايشه في السما من العشق والهيام ..... ..وفي رجال ما بيخلش عليهم وبيفرمطوا البنت علي الطريقة العمليه في التليفون .... وهي مكالمه لا تتعدي الدقيقتين فيها الملخص المفيد ... تحاول مهما تحاول البنت ولكن ابداً .... 

طبعا الاهل في تلك الاحول "مبيغلسوش"  لانه مستقبل البنت يعني لازم نجوزها .....  ولا تقعد في اربيزنا ويقولوا احنا السبب ... قفلنا عليها لما بارت...

"آي كلام" يا ريت بيجي بفايدة

 نوعية التليفون في هذة المرحله مختلفة جدا ... مكالمة كلميني لما توصلي ... او مكالمة قبل النوم ..... او مكالمة الاطمئنان مع الوضع في الاعتبار والتأكيد علي ان نوعية هذة المكالمه بالذات بتنتهي تماما فور دخولكم "بيت الزوجيه" وهذة لاعتبارات كثيره منها....  الزوج يعتبر ان تلك المكالمه نوع من المراقبه او الملاحقة.... من ناحية الزوجه .. ما انتي معاه في البيت هتروحي منه فين واكيد لو في كارثه هتكلميه.........

بعد الجواز .... التليفونات بين الراجل والست ...تليفون ممنهج له قواعد واسس ويصبح تليفون لاعطاء معلومه او اخذ معلومه ........ ولا يجوز بتيتاً ان تزيد مدة المكالمه عن دقيقة ... لانها بتبوخ وبتقلب بنكد...... وربنا يخلي الشات ....اصلوا حل محل المكالمات ......

واصبحت مكالماتك  تنحصر في اصحابك اللي متبقيين او اللي منهم فاضيين ..... وطبعا تليفونات الاهل ... ودي نوعية التليفونات الوحيدة اللي لم ولن تنقع ابدا من صغرك حتي ينتهى بك العمر........

واكثر نوعية التليفونات اللي الكل  بيتستناها او يتمناها .... هو تليفون الدلع او اللي مالوش غرد .... هو تليفون الهدف منه انك موجود... أو...انا فاكرك خلال اليوم ... الاحلي هو رد الفعل في التليفون .......... لو رد الفعل غير مناسب  سنصاب بجمود وسنعتاد علي ان يعدي بنا اليوم دووون اي تليفون؟؟؟؟؟؟؟؟؟؟؟

بصل ...و... ثوم

وانا واقفة امبارح في المطبخ بقطع البصل ودموعي منهمره ... سألت نفسي سؤال ليه الراجل ميحاولش  يقشر ويقطع بصل وثوم ولو مره واحدة في الشهر  ..... ليس الا لخوض تلك التجربه المريره .... لان مهما كان لو ان الراجل جرب ان يساعد في البيت او اضطرته الظروف للعيش بمفرده فقليل منهم  تجده يتعامل مع البصل والثوم ......ممكن يشتري ثوم مفروم يبرشط علي امه او اخته او حته جيرانه واخر الحلول انه يجرب بمفرده...

البصل والثوم شئ اساسي يكسب للاكل طعم جميل ورائحة شهيه .... ولكن ...الراجل لا يدرك مدي المعاناة التي تعانيها الست في التعامل مع البصل والثوم .... بالرغم من كم التحايلات التي تفتكسها الست لحل تلك المشكله ...  مثلاً تكلف حد بتقشير الثوم وتحطه في الفريزر حتي يسهل الاستعمال... "البصل" تقشر كميه كبيره مره واحده تضربه في الكبه بشوية ملح وبردو في الفريزر .... ولكن تواجه مشكله اخره في  حفظه بطريقة سليمه لعدم تسرب الرائحة بالفريزر ... تلاقي الست من دول حطه البصل او الثوم  "علبه جوه علبه جوه كيس"  لتفادي الروائح واي تسريبات.... دا بقي في حالة ان الست بتحب التخزين .... اما الستات الفريش اللي غاويه التقشير والتقطيع اليومي دول معاهم ربنا .... اصل يا ريتها تيجي علي الدموع ... لكن المشكله في الريحة اللي بتلزق في الايد  والاظافر.... ولا بالطبل البلدي .... تحسي انك عاوزه تفكي ايديكي باظافرك  وتوديها المغسله ... ولا بقى ليمون نافع ولا ديتول .... دي رائحة فعاله تدوم وتدوم ... خصوصا لو استعمالك يومي ... ماتلحقيش تتخلصي منها....

كل اللي فات دا كوم وكل اللي جاي دا كوم ثاني خالص .... يجي جوزك يناديلك في وسط ظروتطة البصل والثوم  وتخشي عليه بايدك " طب  هتعملي ايه هتقطعيها قبل ما تخشيله"  فتلاقيه يقولك ايه الريحة دي ... مع الاخذ في الاعتبار في  التريقة الدائمه علي ان الست المصريه رحية الثوم والبصل .... يعني تعمل ايه الغلبانه ... ما هي لو بطلت تطبخ بيهم  طعم الاكل هيبقي "يععع" .. ولو استعملتهم ريحة اديها هتبقي "يععين" .......... ولو حتي لم يناديها ولكن قالها " وانتي واقفة في المطبخ اعمليلي شاي " ..... والست الغلبانه تعمل الشاي بنكهة البصل او الثوم.... ويعلق الراجل ... والست تاخد في قلبها وتزر... ما انت اللي طالب ... ما تقوم انت تعمل الشاي بدل البهدله دي... 

بعد الانتهاء من كل التعاملات الخاصة بالبصل والثوم في هذا اليوم ... تحاول مهما تحاول من اول غسيل المواعين للكريم .... وبردوا ريحة الثوم معششه في الاظافر ...  المشكله تظهر في انك لو قررتي تهزري بايدك مع جوزك او عيالك ... وتلاقي علامات السبعات والثمنيات ظهرت علي الوجه ... وتلاقي نفسك تبتدي تشمي في ايدك انتي كمان ... وتشعري بخيبة الامل والصدمه ...

واخيرا ما يفعل الثوم والبصل من تقلصات واصوات سواء خارجيه يسمعها الجميع أو أصوات داخليه يشعر بها صاحبها فقط ... مع رائحة فم لا تقارن ... 

وينتهي الحال علي ان لا مفر من استخدام الثوم والبصل ... ولا مفر من تعليقات جوزك وعيالك .... الي جانب السينفونيات....  الهادي منها العالي  .... ورائحة فم يا خرابي عليها...    

لكل ست نشفت دمغها وجف لسنها

الي كل ست نِشف دمغها .... وجف لسانها....

نِشفت دماغي  وجف لساني.... فقدت القدرة علي التعبير ........وحاليا استسهل توصيل ما أريده من مشاعر حب ان كانت او غضب  عن طريق الكتابه...... سكوتي يؤلمني بيوجعني   .....  كلامي اصبح ليس له معنى .....  إتقانه وترتيبه ليس بالساهل ..... فقدت قدرتي علي الإقناع .....  وايضاً فقدت قدرتي علي رسم ضحكات علي وجه من حولي .....  انا اتغيرت ..... انا أصبحت لا احب ان أتكلم ..... خافيه اصحي يوم الاقيني أصبت بداء الخرص الأبدي  ...... لا اعلم ....... هل يمكن علاجي ام هي أصبحت حاله ميؤوس منها مثل المرض يتفشى ولا يمكن علاجه......  الانسان منا يكبر وينضج  ويتأثر بكثير من حوله سواء أشخاص او ظروف يمر بها ...... ولكن حزني علي تغيري يؤلمني اصلِ بدأت افقد روح البهجة اللي كنت أتقنها ....... وكثير من حولي  كانوا بجانبي بسببها .....  ممكن  افوق  علي ان لا يوجد احد بجانبي .......  تغييري  اصبح من الداخل .... أصبحت أتقن التمثيل .... اضحك وانا حزينة.....أجامل وانا ناقمة..... أصبحت قادره علي ان أتجاهل من احب ........ أصبحت لا أسعى للصلح.....  كنت منذ زمن أخاف كثيرا علي زعل من حولي ...... ولكن للأسف اتغيرت أصبحت لا أبالي ..... او بمعني اخر قويت ونِشفت وقلبي جمد....... ياااااااه بجد اتغيرت وماكنتش احب ان اصل أبد لهذه المرحلة  ..... لانه اثر كثيرا علي روحي وبهجتي واحساسي بالفرحه......وقدرتي علي إمتاع من حولي ...... كنت اتمني ان لا تغيرني الأيام ......كنت افضل ان أظل بتلك الابتسامه وروح الدعابة التي كانت بداخلي....

الكيس البلاستيك

ايه حكاية الكيس البلاستيك دي ..... يا عني ايه راجل او ست واقفين شامخين معتزيين بانفسهم وماسكين كيس بلاستيك شفاف حاطين فيه كوبايه وسندويتش ونظارة الشمس وقلم او وأي حاجة هلي هواهم.... طب جر العلبه المربعة اللي في دولاب المطبخ وحط فيها حتي يبقى اسمك شايل Lunch box..... 
الواحد من دول تلاقيه واقف مستني اوتوبيس الشغل ... مالي هدومه ومركزه ... وماسك في ايده كيس بمبه مسخسخ بلاستيك شفاف "اللي لاقاه في درج الاكياس" ورايح جاي يمرجح فيه من الزهق ..... طب استلف شنطه صغيره من ابنك ... طب بلااش..... امسك كيس بس علي الاقل نقي ... ولفه كدا وحاول تداريه بدل ما انت بتمرجح فيه..... 

والاجمل بقى وانت قاعد في شغلك ... تلاقيه داخل عليك منشكح وفرحان بالكيس قوي تقلش كيس "ماركه مسجله" 

 والادهى ... يبقى مديره بعته  ممثل عنه او لحضور دوره .... فيحضر بنفسه وطبعا معاه الكيس " جزء من تركيبته" ... ولكن المحتوي بيزيد ممكن تلاقيه حط جواه إزازة ميه من البيت شكلها مهروس ومشروب منها "دشليون مره" .... طب برستيجك ... راعي طب المكان اللي بعتك.... والراجل اللي استأمنك علي مكانه... دا انت واجه ....ولكن من غير الكيس

ولكن السؤال فعلا اللي بيطرح نفسه .... بيرجع الكيس  البيت علشان يستعمله تاني يوم .... ولا نزيه قوي وبيرميه وبيجيب غيره .... اصله ممكن يكون بيتحاسب عليه ..... مصرح له باستخدام الاكياس ولكن  من غير ما تأثر علي الاستخدام المنزلي واحتياجات باقي الاسره من الاكياس.... 

ولكن نصيحة معلش تعالى علي نفسك وغير الكيس ... وبلاش تستعمله تاني ... اصل يومين كدا وهتلاقي ريحة "الجبنه" لازقه فيه  واستحاله تروح .... الاااا لو متعود تغسل الكيس وتنشره.....

محتوي الكيس بيختلف طبعا حسب الشخصيه واحتياجتها في اكياس بتحتوي على الفطار فقط .... وفي بتحتوي علي الفطار والقلم " لانه جرب يحط القلم في جيبه قبل كدا وضرب وبوظ القميص..... الي جانب نظارة الشمس ويمكن ولاعه او علبة كبريت لزوم السجاير.... ولو فييس قوي يبقى علبة سجاير.....مع التأكيد ان دايما المحفظه بتبقى في الجيب "منفوخه " 

دا  بالنسبه لاستخدام الكيس البلاستيك بره البيت .... اما الكيس استخدماته بتختلف كثيير جوه البيت ... ولكن جوه البيت مبلوع .... محدش شايف ... ولا شامم... 

نصيحه لكل من يشيل الكيس .... قررت تشيل الكيس ... دقق في اللون اللي انت شايله ... ومش لازم تمرجح الكيس وانت واقف ... واخيرا النظاره بنجبها علشان نلبسها مش علشان نحطها في الكيس

انااااااااا وهي

 

دخلت  وهي تبتسم ابتسامه خفيفة وعينيها مكسورة ... شعرت انها على غير عادتها ......  اعلم ان نظرتها هذه خلفها شيء ما والابتسامة الخفيفة تعني الكثير ..... حاولت ان اخفف عنها .....  ولكن دون جدوى....

وبدأت ان تحكي بمرار عن ما مرت به من الآم في الفترات السابقة وما تحملته من وجع لقلبها وكسرة نفسها ...... وقالت تحملت الخيانة......تحملت تخيلاتي وهو في احضانها وانا وحيده .. وهو يحتفل معها بعيد زواجهما ... تحملت الوحدة من اجل ان تستمر حياتنا مع بعض .... ولكن لغاية متي .... انا تعبت ... ولمعت عينيها وكادت ان تدمع.... وتماسكت وقالت انا "قويه" وأحاول ان اتعايش ولكن عندما  قررت ان اتعايش ... وجدت ان الايام  تعاندني ...كأنها قصداني..... حاولت ان انسي ما بينه وبينها وان اعيش حياتي معه دون ان اذكرها او حتي ان اتحدث عنها ..... ولكن تظهر لي في كل موقف لتذكرني بأني مقهورة ومجبره..... من الجائز ان تكون هي الاخره تعبانه والمشكله تكون فيه وفي انانيته... حابب ان يكون "هارون الرشيد ".... حواليه من يتنافسوا عليه...... اصبحت اتقن التمثيل وانا معه .... عندما يضمني اليه تدمع عيني واتذكر ايامي التي كنت اتخيل فيها انها هي التي معه وانا وحيده.... ولكن ملازي هو الصمت اصبحت لا استطيع ان اشكو احساسي لاحد .... لان من البداية قبلت ..... ونظرت لي وهي حزينه .... لم استطع ان ارد عليها..

وقالت وهي حزينه...... لا يوجد ابشع من ان تكوني مع حبيبك وزوجك وفي نفس الوقت هو قاهرك ومن يتقن تعذيبك.... ولكني صابره ... وضعيفة ولا استطيع ان اخذ قرار بالفرار...

وقالت و بالرغم من كل هذا ... أحاول وانا معه ان اكون انثي وحبيبه وصديقه وزوجه.... ولكن الدنيا مش رحماني ..... تخيلي وانا معه وأحاول ان اتغلب علي كل مشاعر الغضب واحاسيس القهر واستحضر مشاعر الحب والسكينة والهدوء .... تليفونه يرن ....اختلس النظر .... اجدها هي.... للحظه قلبي توقف ....  وبكيت كثيرا....ولكني لم اتحدث معه لأنني ليس عندي ما اقوله..... كيف أوصف مشاعر واحاسيس .... الحاجات دي لا توصف ولكن تتحس

وسألتها ماذل فعل ؟

وردت اي ما كان سيفعل او فعل تعتقدي سيعوض احساسي ووجع قلبي وقهرتي في اللحظة دي

انا موجوده ....وهي معاه .......... وهذا امر واقع

تغيير الواقع ليس في كل الاحول شيء سهل ...  والقدرة علي التغيير ايضا ليست بشيء سهل !!!!

 

علاقة المصيف بـــــ؟؟؟؟

المصيف كلمه مطاطه ...كل واحد بيفسرها حسب اهوائه وطموح وحسب خبراته وما يمر به من احداث حلوه او وحشه .....

البنات : مايوهات جديده ومبهجه والوان مفرقعه حسب الموضه من البيكيني للتنكيني ... مايىوه قطعه واحده ولا قطعتين  .... ولاااا الكاش مايوه واشكاله شيوفون ولا فستان .....اما لبس البحر يا جمالوا عليه  ... شنطة البحر المفرقعه .... نظارة الشمس الماركه مع الساعه  الجديده........ جراب الموبيل بينك وفوشيا وحسب المايوه... الخروج في المصيف له طبع مختلف بالنسبه للبنات ... الانتكه فيه لازم تكون لايقة علي شكل المصيف ......

الولاد: انتخه وبحر و بنااات كثير شكلها حلو حوليه يعرف يتعايق بيهم امام صحابه  .. احدث صيحات الشورتات .... شبشب واحد بصباع مريح وسهل..... سجاير ....شيشه ....رقص .... نوم الصبح وسهر طول الليل

الامهات :  بحر ورمل وشنط كبيره مليانه فوط وكريمات... حموم... وبالليل قاعده علي الرصيف مستنيه الاولاد يخلصوا عجل وموتسيكلات ....وبعدين نطاطه وعياط وصويط لانهم وقعوا واترزعوا ودم وتعاوير وبعدين حموم وعشا وبتادين بالرغم من كل دا ابتسامه منهم وضحكه تنسيكوا كل التعب والوحده علي الرصيف...

الابهات:   محفظه كبيره مليانه من خيرات ربنا لا يجوز لها ان تنضب او تجف .... وكلمه واحدة يرد بيها علي العيله ... حاضر .. طيب ... نعم.......... الانشطة اللي يمارسها الراجل تنحصر في حاجات خفيفه ..بحر ..نوم .. شيشه .. سجاير

العيال: عوامات شكلها غريب....ومستلزمات البحر من جرادل وشوك ومعالق ...ميوهات كثير للتغيير... رمل في فروة الرأس مبيطلعش غير بالضالين... فسح ثم فسح ..... نطاطات .. وتأجير عجل وموتيسكلات ..... مبيقلوش حاضر وميحبوش يسمعوا كلمة لاء...

الاكل:   المصيف بيحول بطونا الي كيس زباله اسود كبيييير ... بنرمي فيه من غير وعي ... كله علي بعضه من صباحية ربنا من اول فطار الفول والطعميه والجبن والعسل والحلاوه والمربه مع بعض "افتره بقي" ...نروح البحر يبقي شيبسي ووبيبسي ولب وسندويتشات وفريسكا..... والعشا فطيير كثيييييير وكل الانواع .... والحلو بعد كدا زلبيا وبلح الشام ورز باللبن ومهلبيا وكريب ... المشكله ان العلاقة بين الاكل والتصريف علاقه مش متوازنه بالمره ... ممكن الواحد ميلحقش يصرف .. يوم ورا يوم والتراكم بيزيد والكيس بيتملي... ونرحم ابداً ... نفضل نملي الكيس لغاية لما يبظ .....

الوزن: وبما ان اتكلمنا علي الاكل وعلاقته بالصرف وعلاقة الاثنين بالمصيف.... وانها علاقة غير سويه وغير متكافأه .........يبقي علاقة المصيف بالوزن علاقة ايضا غير متكافأه... كل ما المصيف بيطول كل ما ترجع مربع مكور اكثر ... 

المصيف وآه من المصيف ....شر لابد منه ... ومنقدرش نستغنى عنه

واحشتنا يا قمر الدين

قمر الدين السنه  دي عمله نادره .... كل تجمع ستاتي صغير تلاقيه بيتكلم عن لفف قمر الدين و سعرها وسمكها .... الستات بتصوت ومش لاقيه قمر الدين بسعر مناسب .... المهم حاسيت انهم مزودنها شويه لغاية لما اتصدمت وعرفت ان لفة  قمر الدين تساوي فرخه !!!! ما كنتش مصدقة نفسي... قمر الدين اللي كان بيبقي مرطرط وبتشتري منه براحتك وتنقي ما بين الانواع.... يجي عليك الوقت اللي تحسبها قبل ما تشتري قمر الدين.... 

معظم الستات عملوا قنصلتو علشان يقدروا يوفرا حتي ينعموا بأكبر قدر من اللفف ....بس علي مين التجار والمصانع انصح ...." عيني عليكي يا سوريا كنتي منغنغانا" .... بعد ما اضربت سوريا ... اضرب سوق قمر الدين في مصر ..... 

الكل بيسأل وعاوز يصتنصح ممكن نجيب من فين .... اللي يقول لاقينا بـــ 20 واللي يقول دا بيتراوح ما بين 30-40 جنيه ... صدمة الــ40 جنيه قويه علي اذن الستات ..... وعلي جيوب الرجاله..... اللهم اعنا يا رب ....

المهم احكلكوا بقي .....

نزلت السوبر ماركت اشتريت كل حاجة ووقفت امام قمر الدين ... عنيه هتطلع ... اشتري ما شتريش .... وبعدين قررت اشتري ولكن باصتنصاح ...

انا : لو سمحت بكان قمر الدين 

البائع:في حضرتك بــ22 وفي ب 30 وفي بـــ10 

انا : 10 ايه دة بجد قلت بس يبقي دا المصري اللي بيقولوا عليه ...نشجع صناعة بلدك .... اشتريت الغالي وبجانبه المصري قلت اجرب  يا عني اكيد مش هيبقي وحش قوي ..... واحتطياطي اجيب ازازة عصير قمر الدين جاهز ... ممكن اكمل بيها...

ويا ريتني ما جيبت ولا شجعت ولا هللت... وكنت وفرت  .... الغالي ثمنه فيه .... حتي يبقي بندعم سوريا بأي شئ ............

طلعت لفة قمر الدين المصري من الثلاجة قلت هسيبها شويه تهده وبعدين اعملها ... ودا في حد زاته قرار خاطئ..... 

فاكرين زمان قمر الدين كان عامل ازاي .... اللفه تشيلي السيلوفان من عليها ... تلاقي راق ونصف قمر الدين محترم ... ممكن تكلي منه  كده .... واللفة تعمل دورق عصير محترم لونه برتقالي ... شكل الكوبايه يفتح النفس.......... اما اللي حصل مالوش علاقة خالص بقمر الدين ولا بالمشمش 

نرجع لللفة المصري اللي سيبنها تفك.... دخلت علي اللفه وانا بسمي وباقنع نفسي ان المصري طول عمره معروف بجبروته دا احنا عملنا ثورتين مش هنعرف نعمل قمر الدين  ... واشد السيلوفان ملاقتش قمر الدين ... لاقيت راق خفيف لازق في السيلوفانه .... لونه باهت .... تشد مهما تشد مبيطلعش... قلت احطه زي ما هو في ميه مغليه ... اغلي مهما اغلي ... لازق في السيلوفانه ومتبت .... المهم ساح ربعها .... وشلت الباقي بحاله رميته في الباسكت بعد ما تيقنت انه مش نافع.... واضطريت اجيب اللفة الغاليه احطها عليه آل علشان أوازن الطعم .... وياريتني ..... طلع خليط مالوش طعم ولا ريحه .. باهت ... مسكر جدا ... بالرغم من اني لم اضع سكر نهائيا .... نظرت للدورق بنظرة حسره واشتياق ... لهفه على كوب قمر الدين من بتوع زمان ... الله يرحم ايام زمان 

قررت ان اشتري لفه من الغالي .... واعمل زي الستات المصريين ....كوب صغير... مش الزمبيق بتاع زمان ... علشان مينسوش طعم قمر الدين الاصل .... اصل لو شربوا اللي في الدورق يبقي غش علني....

الحق اظبط اللي ب30 قبل ما ادبس في 40

اشارة مرور !!!

لما تبقي مسافر في طياره لازم تبقى فرحان وسعيد لانك بتكون تخلصت من الزحام اللي علي الارض ... وهطير في الفضاء الواسع دون الوقوف في اشارات طويلة المدى  .... وبتبقى متأكد ان الطياره بطير مع العصافير ... ولا يعوقها شئ الا لقدر الله  شيئ خارج عن ارادة الطيار ... وبيبقى قدر ومكتوب...

لكن الغريب والممتع ان الاشارات وراك وراك ... حتي في الطائرات ... زمن غريب ... الزحام بقى حتي في المطارات!!!!

كان عندنا شغل  وانعم علينا العمل..... وقرر ان يسفر السيدات ومن رضي عنهم الكبار والكبار بالطائره.....
تجمعنا بالمطار وركبنا الاتوبيس ... ونزل واحد واحد ليركب الطائرة وبحكم عملي اني لازم اطمن علي كل من معي  حاولت اطلع اخر واحده - بالرغم من اني كنت خايفه من السفر "واقف" .... علي فكره حصلت اني طلعت طياره وكان في 13 نفر واقف.... ولكني قايست حفاظا علي الشكل العام ....ما هو استحاله اجري وازاحم واللي يلحق كرسي يا عني  ...واضرب بطرف عيني الشمال الاقي الطيار فارد الجرايد علي دركسيون الطياره وبيتصفح امور الدنيا...يا سيدي ... المنظر بالنسبالي كان غير معتاد....  كان ناقص اشوفه بسجاره وكوباية شاي علشان يصتبح..... ودخلت وقابلت اول ما قابلت المضيفه ... زي ما بيقول كتالوج السوبر جيت وليس كاتلوج مضيفات الطيران..... نسيت تسرح ... لما شعرها كحكه.... في ارايل  طالعه من الجنب .... مكشره جدا لانها لسه جايبنها من علي السرير حالا.. الحمد لله قعدنا ...قالت الكلمتين اللي حفظاهم مع تمثيل توضيحي هميوني ... الحمد لله بدأ الطيار  في التحرك .... لف لفتين ووقف وكانت بالنسبالي اللحظه الفارقه ... احنا وقفنا في اشاره مستنين طياره تانيه نازله.... والله ..... انا بصيت من الشباك لاقيت اننا واقفين علي اهبة الاستعداد .... قووم الطياره تنزل وتعدي من امامنا .... ويبدأ الطيار الخاص بنا في اللف والتحرك ويقلع بنا في سلام ... وعلي فكره الطلوع والنزول كانوا موفقين ... الحق يقال....  المهم انا ساعتها كنت مزهوله .... وفجأة عربية الشاي عديت ... طبعا اخر شياكه .. محكلكوش...لاجل التوفير ازايز كبيره وبيكبولك منها .... ما في حاجة اسمها علب بالشاليمو او ازازة ميه صغيره جيب لكم علي مين التوفير حتي اخر نفس .... وزعوا علي كل الناس ونسيوني .... علي اعتبار انهم مركبني شفقة ..... اسيب حقي ابدأ... نديت المضيفه.... وفكرتها .. ممكن لو في تعب اشرب ميه ... مش عاوزه ولا شاي ولا عصير ... الست بصراحة تكفير عن  الذنب جابتلي كوبيتين ميه ... بتراضيني....  .. وبدأنا للتجهيز للنزول في المطار .... ورفعت عيني فوق لاقيت ست المضيفه داخلة عليا مسرعة مكشره..... واضح انه كان عندها مواعين من الرحلة السابقه وملحقتش ... فشطبتهم ... وحطيت حته كريمه من اللي في العلبة الزرقا .... وطالعه جري تلحق تقعد وهي بتدعك كفيها الاتنين وريحة الكريمه مفحفحه...... يا عيني ..... 
وهبطط الطائره.... وبدأت توقف تدريجيا .... وفجأة لاقيت التكييف بينقط ميه عليا وطرطشه بقي..... انا كاساره ....  اتبليت ...... 
وبعد ما اندهشت حاولت اسأل دا طبيعي .... رديت حبيبة قلبي المضيفه مع ابتسامه خفيفة .... أه يا فندم ... دا اختلاف درجة الحرارة ما بين بره وجوه .... تؤمري بحاجه تانيه .... قلتلها شكراً
 حمد لله علي سلامتكم .... رحله سعيده معنا ....

مدام .... عفوا .... انسه

كلمة انسه كلمة" ذو حدين " اولها رشاقة وخفة ودلع واخرها بردو ذو حدين يا مسئوليه وزواج وعيال ... يا وجع قلب وكلام يسد النفس زي "شدي حيلك ... بطلي تتبطري .... " .. 
 المدام بعد ما تبقي مدام ... ترجع تتمني ان تسمع كلمة انسه  حتي تشعر بصغر سنها وبنضارة شكلها.... وترد وهي متفشخرة قوي "مدام علي فكرة" محدش عجبه حاله....
 ولكن لو حد  قال لانسه يا مدام بتبقي "ليله مطينه بطين" وترد بحده وعلامات القرف علي وجهاها "انسه لو سمحت"
ولا المدام عجبها حالها .... ولا اللي انسه راضيه ومتهنيه ...
كل واحدة  فيهم بيكتسب صفات وفقا للحال الذي يعايشوه ... في اللي بيتعلم الحدة والعصبيه وفي اللي بيحاول يدلع شويه ....
 حد عمره فكر يرحم "الست الانسه" من الكلام اللي زي السم .... حد فكر انها  في اغلب الاوقات  "موجوعه ... محرومه... قلبها مكسور"  تعرضت الي كثير من السخافات  سواء من ستات او رجال...  بالرغم من صلابتها وقوة احتمالها امام الناس في تحمل القنابل التي التي تقذف من فمهم او حتي تلميحات بايخه ليس لها معني ... والغريب ان اللي بيوجع قلب الانسات هم الاغلب المدامات ... طب لما انتي اللي تعملي كدا في صنفك سبتي ايه للرجاله يعملوه... آه صحيح الرجاله ليهم حراكات تانيه كثير زي اللعب بالمشاعر وتكسير القلوب والضغط علي الاعصاب وحاجات تانيه كثير .....  الست من دول ترمي كلام زي الرصاص تقصده وساعات متقصدوش .... في منهم  بيخاف زيادة علي الرجالة اللي حليتهم فتسمم بدنها علي قد ما تقدر وترسم بقي صورة سودا لحياتهم والخناقات والخلافات اليوميه وازاي رجلها  ميتعاشرش... آل يعني بتحوط عليه.... ولو دورت وراه هتلاقيه بيبصبص بره وعايش حياته ...  وفي منهم بيخاف علي عياله فأما يخبوهم او يعايوهم  .... وكل دا من منطلق ان الانسات بحكم انهم مش مدامات فأصبحوا منفسنات.....  طبعا كلامي هذا مش لكل الستات......
اما الراجل حكايته حكايه ....خبره في  اللعب بالمشاعر"للتلذذ فقط" ..... علشان يتعرف انه مدوبهم وفالنتينوا عصره ....يجيب دي ويسيب دي ويعلق واحده احتياطي وبعدين يغمض عينه ويرتبط بواحده تانيه خالص في الاغلب مش علي مزاج سيادته ولكن يكون داس علي كثير من الانسات.... وفي رجال  مرتبطون ويعشقوا اللعب بقلوب الانسات لانهم يعلموا علم اليقين انهم يحتاجون الي تلك المشاعر فيبدأوا بالسطوانات القديمة "اصلي مش مرتاح - اصلي ناوي اطلق - احنا عايشين اخوات - انا كدا كدا هتجوز تاني " في من الانسات يصدقوا ويقعوا علي بوزهم...... وفي اتلدعوا كثير والنتيجه تجربه جديدة....
من اشهر ما تسمعين !!!!!!!
عارفة يا حبيبتي  راح واحد يجي غيره ...... عدى عليكي قرف كثير ولكن اصبري .. يا ستي انتي كدا عايشه ملكه .... ولا في طلبات جوز ولاااا عيال ... بتخرجي براحتك وداخله براحتك ..... فلوسك ليكي محدش باصص فيها ..... يعني الرجالة بيعملوا ايه ...... بذمتك مش بتسمعي الكلام دا علي طول ....  والنبي دا كلام تقولوه .... ما هو يتتكلموا كلام مفيد ولي معني  يا تسكتوا وبلاش نصائح .... ياعني هي مش عارفه كل الكلام دا..... هي اصلا مستويه علي الاخر ومش ناقصه... 
بصي يا انسه !!!!
انا عارفه انك تحتاجي لكثير من المشاعر التي تفتقديها ....من اول الحب والحنيه والدلع والملاغيه.... لغاية الخناق وقرف الزوجيه .... 
ولكن  كل واحد فينا في الدنيا دي اللي مكتوب هيخده وهيشوفوا .... الدنيا لا تقف علي شخص او موقف .... الدنيا بتجري ولازم نجري معاها لانك لو وقفتي اللي وراكي هيدوسك ... استمتعي علي قد ما تقدري بكل المتاح من حولك....  استمتعي بأهلك ، بعملك ، باصحابك المقربين علي قد ما تقدري ، اعملي ما يفيد  دينك ودنيتك   

انا ودكتور الاسنان

دكتور الاسنان ... دكتور مظلوم جدا ، كل الناس بتخاف من سماع سيرته ،  اصل لو بنسمع الكلام وبنغسل اسنانا بالمعجون وما نكلش حلو علشان السوسا مش هيحصل كدا...... 
ولكن   الاسنان فيها المستخبي وممكن بعد كل الاحتياطات  يجيلك اللي ما تكنش عامل حسابه "ضروس العقل"..... تبقي ماشي زي الفل ... وفجأة تلاقي  الدكتور يقولك " الوجع دا هو وجع ضروس العقل ... ولازم يتشالوا ... وبعد ما سمعت ان خلاص قد ازف بك الوقت وكبرت وهتشيل العقل ... يبدأ تتوتر وتفقد شهيتك ويزداد رعبك ....
 وفي قاعدة صفى بيني وبين الدكتور سألت هي الحاله صعبه.... فتح فمي وبص واتفزع ... وقال دا كلهم مدفونين ... يا دي النيله .... وبدأ وقال "بصي يا حبيبتي "  الضروس انواع في اللي بارز حته ودا سهل نشيله .... وفي اللي مدفون تحت اللسه  ودا اخف ... وفي اللي مدفون تحت العضم ودا "انيلهم".... فبنشق اللسه حتيتين... وبعدين ننشر العضم  و نسلك وبنسحب الضرس  "وربنا يسهل" ... لاقيت نفسي  انكمشت في الكرسي  وشعري ابيض وكأني اتمسمرت في مكاني ..... 

وأخذت القرار ورحت للدكتور صباحا لعمل العمليه  لشيل 2 ضرس عقل .... وفضلت ان اذهب لوحدي  حتي لا اتصلبط زياده ... وما اجمل ان تري دكتور السنان يحضر لعمليه "اشي خيال ياا ناس"  شواكيش باشكال مختلفة ، كماشات وظرضيات باحجام واشكال مختلفة ، حقنة البنج "حقنه مجعلصه"... سنها طويل .... مسامير طويله وبوزها مبطط " للتسليك" .. قلت في عقل بالي كل دا لبقي ... "وانا بكلم نفسي" لاقيت الدكتور بيقول دي حاجات الضرس اللي تحت  نخش بقي علي اللي فوق ....  وقد حضرت اللحظه الفاصله... 

" اتفضلي علي الكرسي" وقد كانت البدايه .....  والحق يقال انا لم اشعر بوجع فظيع اثناء العمليه...... ولكن مع وصول الدكتور للضرس الثاني والاخير.. بعد الشق والنحت ...شعرت بأن فكي بيروح ويجي مع الدكتور ومالوش دعوه بيا.. كأنه مش بقي... وخلصت العمليه على غير ما توقعت من الام ولكن الصدمه  كانت بعد العمليه ..... وصارحني الدكتور وقال بما معناه " كل اللي فات دا حمادة واللي جاي حماده تاني خالص " ...... ستشعري بالام مبرحه فظيعه  مريعه ..... ولم اتخيل انها بالشكل  المهين دا ... دا طلع وجع السنان دا وجع كارسي بيلطش في الودان ومناخير وعنين وفم وصداع في كل حته... وكل ما كنت اتمناه ان افصل دماغي شويه وابقي ارجعها بعد ماكانت تخلص اللي هيا فيه..... 

قائمة الممنوعات اللي قال عليها الدكتور دي  كانت قائمه مخففه... ولكن حضرتك بطبيعة الحال مجبر علي  حاجات اخره كثير ما ينفعش تعملها ......ما فيش اكل ولاحركة ولا عارف تنام وبتشرب بالعافيه... وبقك لا يفتح الا في حدود مكرونايا ... ادويا وحقن وزرقان مطرح الحقن ... وجهك بيبقي شبه الصحن الدوار ولما الورم بيفش من وجهك بيسرح علي زورك بيسد المنافس خالص لدرجة انك لا تستطيع ان تبلع غير جزء من الريق والباقي ارميه بره لانك مش محتاجه...

 الحمد لله بدأت في مرحلة الفوقان ...ويأتي لك شعور خادع انك احسن تفاجئ بأنك بتخبط في انواع اخره من الوجع ... اشيي وجع سنه  جانب الضرس او نقح في الفك مع قرحه في الخد من جوه بجانب الغرز... علشان تبقي الغلاسه للاخر.... كل دا علي فكره مالوش علاقة بالدكتور ... الراجل عمل اللي عليه وزيادة  بنج علي قد ما قدر وريحك علي الاخر .....

ومع كل هذا  ما ذنب دكتور الاسنان .... كله من ضرس العقل 
و بعد فترة تتراوح ما بين 12- 14 يوم تبدأ في التحسن التدريجي  الا حاجات بسيطة ممكن تعديها  مقارنةً بما فات وعدي
الي كل سيده محتاسه ومس عارفه تعمل دايت ... انصحك بالذهاب لطبيب الاسنان 
واخيرا .... لا يسعني غير ان اقول  "شكرا  يا دكتور" 

الراجل العازب بسلامته

عايش بطول وبالعرض ... عجبه حيات العزوبيه .... يترقب لما بعد بخوف .... والنتيجة لا يعلمها غير  العازب بسلامته ....... 

انا  اتعودت.... اعيش حياتي بدون تحكمات ولا اوامر  ولا مسئوليه ... محدش يقولي رايح فين او جاي منين ....  اصاحب اللي علي مزاجي ... وابعد عن الوش والكلام من نوعية  " متعرفش ده لانه صايع ... او متكلمش ده لانه هيخرب علينا ....  او البنت دي بصتلك ..... شاورتلك ... شكلها بتحبك ومعجبه بيك".......... وليه وجع الدماغ .... ما انا كدا مرتاح ... ومبسوط.... كل ما اشوف اصحابي المتجوزين ... اقول انا في نعمه...

اصلي  خلاص اتعودت علي الحياة الفرداني ....  بحب اعمل كل حاجة بنفسي من غير ما اضطر  .... مبحبش حد يعملي حاجتي ...... هيلخبط النظام اللي اتعودت عليه "ده لو اصلا في نظام" نظام هو اللي عامله  ومتعود عليه  ومرتاح له.... كبييره ماما تحطله الاكل .... وفي الاغلب مقضيها بره مع اصحابه ودليفيري ... دا لو مستقلش وراح أجر شقة يقعد فيها لوحده ... وفي الاغلب الراجل العازب بعد فترة من العزوبيه يصبح لا يتحمل تحكمات احد ....وقرار زواجه بيقى خطوه ثقيلة جدا .... لا يقدم عليها الا لو إدب علي بوزه وحب بجد ... او أمه مثلت دور "امينه رزق" وقالت " قلبي ..قلبي  ... نفسي يا ابني اشوفلك حتة عيل قبل ما اموت"  يبدا  هو في التفكير لاجل عيون ست الحبايب.... ولكن اول ما يرجع لشقة العزوبيه ويبص يلاقي نفسه .....

عايش في بيت لوحده ... مستقل... اصحابه عندة مرمين علي الكنب .... دليفري في اي وقت .... بيسافر في اي وقت..... بيدخل ويخرج من حمام دون رقيب .... ودون ان يزعج سيادته احد ويسمعه " يالا بقي انا عاوز الحمام" ..... ولااااا "السرير" بتاعه لوحده .....مبرطع فيه يمين وشمال .....وضييف علي كل اللي فات انه ممكن يهلس من غير اتهامات بالخيانه والبصبصه والعين الزايغه ....  وكل اللي هيتقال عليه ده "صايع حبتين"  او كل فتره كبارات العيله يستلموا واحد واحد بتوصيه من ست الحبايب... ان العيشه دي غلط ومش هتدوم ومسيرك تحتاج حد جنبك.... ويفضلوا يدوسوا علي الوتر لغاية لما يعتقدوا انهم نجحوا في اقناعه وممكن هو نفسه يشعر بأنه مقتنع ويقول " خالاص والله هفكر في الموضوع "  .... ومع اول لقاء علي القهوه مع الاصدقاء المتزوجين ونوعية المشاكل اللي بيتعرضوا لها من خلافات او مسئوليات وطلبات واحتياجات .... يبدأ يفوق ويقول "لاااا  انا مالي بالقرف ده ما انا كدا عايش ومرتاح.... لا في طلبات بيت ولا سباك او نجارر ولاااا قسط المدرسه وقولي كلمة بحبك واحشتيني"
ولكن للاسف اعتقادك خاطئ وانت تتوهم ان هذه هي الحياه التي ليس لها مثيل ولن تشعر بذلك الا عندما يمر بك الوقت والزمن  ويذهب سن التألق والشباب ويأتي لك السن  الذي تحتاج فيه الي الالفه والموده والرحمه والونس ... من الممكن ان يظل اصدقائك حولك ولكن ونس المرأة الحبيبه "الزوجة" له طعم مختلف .... ونس الاولاد والاحفاد  يزيدك نضاره وتألق ..... انت من ستدفع الثمن وساعتها حيث لا ينفع الندم ... ومن الجائز ان تجبر علي ان تتزوج زوجة ليست علي هواك لمجرد انك تريد ان تشعر بالالفة او حتي تناولك الدواء والماء ..... ولماذا تفعل بنفسك هذا ... يمكن ان تختار من تعيش معه برضاك وليس بالجبر ستظلم نفسك وتظلمها معك.....
تيقن ان بكل ما يمكن ان تمر به من مساوء بالزواج من مسؤليات وطلبات  واحتياجات..... الا  فمميزاته لا تعوض خصوصا لو معك زوجه تحبك وتعشقك وتهبك حياتها وجزء من روحها وهي اولادك واولادها ويكبروا في وسطكم ويأتوا لك باحفاد تعيش معهم اجمل اللحظات والمسؤليات ......  
عيش حياة العزوبيه ولكن بتأني شويه ...... 
اختار صح .... تعيش صح

الست تتمنى ......

تسألت كثيرا عن امنيات المرأه  ووجدت ان  امنياتها تختلف وفقا ما مرت به من ظروف او ما تعيشه من حياه؟؟؟

احترت كثيرا عند سماعي لامانيهم.... وكم تمنيت ان يكون يبدي عصى سحريه لتنفيذ كل طلابتهم ... لان امانيها ستنعش القلب وتلمع الاعين ...

 تتمنى ان  تشعر بالامان وقالت انها خائفة من ان تستيقظ صباحا تجد نفسها وحيده

وردت اخره اتمني ان ترجع بي الايام واجلس مع والدتي .. تمسك بشعري وتمشطه بيديها... وتأخذني في حضنها .. حتي يزول آلامي

واخرى تتمني ان تقضي وقت اكثر مع والدها لانه لم تراه كثيرا ... عدي الوقت ولم تلعب او تخرج معه!!! ...... فاتها الكثير....  ولكن الحياه لا تعطي كل شئ.....

 تمنيت احدي السيدات ان يرجع بها الزمان لتثبت لابنائها انها كانت تحبهم وقسواتها هذة ما كانت الا خوف من الزمن عليهم... وترجمت الخوف الي تلك الافعال .. دمعت عينيها  .. وتذكرت انها فوتت احلي اللحظات

وتمنت اخرى ان تشعر بأهميتها  وليس فقط انها موجوده لحل مشاكل من حولها... 

قالت رداً عليها : اتمني ان اسافر الي بعيد مع من احب .. انعم بهدوء وراحة بال بعيد عن الضغوط .... اتمني ان يقول لي بحبكِ دون ان اطلب منه........ ان  يشتاق لي  كثيرا كما اشتاق انا اليه ........ وسكتت وتذكرت الماضي وضحكت ضحكه بسيطه كانها رجعت بجسدها الي الايام التي مضت......

وتجاوبت معها اخرى وقالت اتمني ان استيقظ صباحا اجد ان زوجي لم يخونني  وانني لم اعيش هذا الجرح قط ... لان قلبي  ينزف يوميا ولا احد يدري.......

تتمني ان ترجع الضحكة الصافية من القلب ... كما تتمني ان يلتف حولها كل من تحب .... تتمني ان تظل تحب وتتحب...... كما تتمني ان لا تفقد رونقها في اعين من تحبهم حتي لا يأتي اليوم الذي يتباعدوا عنها واحد تلو الاخر...........

واخيرا اتمني ان اكون لم اثقل عليكم بامانيكم  

نفسنة ستات

 سبنا بقي من العلاقة بين الراجل والست والحب والجواز والطلاق ونتكلم شويه بقي علي نفسنة الستات ......  
الستات سييد من ينفسنوا علي بعض ويتعمدوا في احراج بعض  ...   سواء في  الشغل .... او مع الصحاب   .... بالبلدي كدا الستات مع بعض مش طايقين بعض... تقارنهم بالرجالة  ... تلاقي الرجالة  ملائكه...... يشيلوا بعض.... الراجل ممكن يشيل الست من باب المجامله او الاعجاب او حتي التثبيت ... لكن الست تقرف ست زيها  من باب الغتاته وكسر العين

لو الست اصبحت مديره  ...  تلاقي كل العقد والكلاكيع ...يأما  تنفسن من الموظفات اللي معها... يأما هما ينكدوا ويتأمروا عليها لغاية ما يهدوها 

 لو اصغر واحلي تبقي مشكلة ... لو اكبر يعملوها مألته

ولو مديرتك بتحبك وشيفاكي بتشتغلي مش هتفلتي ابدا من نفسنة زوملاتك الستات وتبدأ حياتك تتملي بالزنابيئ .. من ساعة الصبحيه  لغاية ما توصلي بيتك وممكن تلاقي الزنبوق وصل قبلك البيت... خدي عندك بقي "اصلها عملت وسوت ... الشغل معها بقاولوا يومين ومعملتوش" ... واشربي بقي ... هترشقي اكيد في واحد فيهم وتبوظ علاقتك بمديرتك ...

قليل ما تلاقي البنات يداروا  علي بعض  او يظبطوا شغل لبعض ولا حتي عريس ... البنت من دول ممكن تظبط شغلانه لصحبتها لو هي متأكدة انها لن تستفيد ... ولو فوتت عريس يبقي اكيد  مخطوبه او متجوزه حتي تكون ضمنت لنفسها فرصة ... 

النفسنه او الغيرة النسائيه ممكن تلبس الستات في مشاكل بالعبيط سواء غصباً عنهم او برضاهم

 نيجي لبند المشتريات النسائيه " السر العظيم" .... لو واحده اشتريت لبس او اكسسوارات او حتي جزمه  لازم التباهي بانها من احسن حته وماركه ولو دورتي وراها ممكن تلاقيها  جيباها من تحت البيت " ومالوا مش عيب" .... طب "ما تقولي" لكن ازاي لاحسن واحدة صحبتها تلقط المكان وتروح تجيب..... 
ولازم سعر الحاجة يضرب في اربعه لتعجيز السائل او التباهي 
ليه النفسنه يا ستات ... دا احنا جنس واحد المفروض نحابي علي بعض مش نكدر بعض .... مع الوضع في الاعتبار التفريق  بين الاصدقاء المقربين وبين الزملاء ... لان النفسنه اللي بتكلم عليها دائما بتكون بين الزملاء الغير مقربين "قوي"... 
والله عيب تشمتوا الرجالة فينا ... يحابوا ويداروا علي بعض واحنا نتلزز في الغلاسه علي بعض
نصيحة لكِ : النهاردة لو ما خدتيش حاجة من وشها .... بكرة تحتاجي الي قفاها 
يا عني "نفسنه وكمان استغلال"

صدمة زوجين

زمان كلنا  كنا نحلم بالجواز والعيشه والخلفة والبيت والاستقرار (شويه المصطلحات دي اللي اهلينا بتربينا عليها ) 

ولكن  المشكله في ان اهلينا كانوا بيجملوا الصورة فقط .... ما فيش مره يصارحوا العيال قبل الجواز بالمشاكل اللي ممكن تواجهم .... لو ولد..... يصارحوه  ويفهموا .....ان البيت مسئوليه ومراته لازم تدلعها شويه وعياله لازم يعيشوا عيشه كريمه وهنيه....... اما لو بنت يفاجئوها بان جوزها هو ابنها الاول ... وبيتها مملكتها وعيالها مصدر لساعادتها وايضا هم مصدر قلقها وخوفها.....

علشان كدا الصدمه بتكون كبيره بعد الجوزا علي الطرفين ... والخلافات بتكون داميه بين الزوجين لعدم التفاهم المبدئي والاصتدام بالحياة الواقعيه ... مش الورديه. 
سنه اولي زواج ، علي الطرفين بتكون صعبة لانك بتتصدموا بحاجات لم تقابلوها في فترة الخطوبه او التعارف " وقت ما كانت العصافير بتزقزق" 
يعني تلاقي الراجل اتفاجئ بعادات غريبه تعتاد عليها الست  لم يكن يعلمها من قبل مثل اللبس الكثيف في الشتاء والطبقات الكثيره ،  والنوم وعداته -  يعني علشان يهزر معها الصبح  وهي لسه فايقة او بالليل بعد ما نامت .... لازم يبيت عليها من بدري او يستأذن لانه لو مخدش احتيطاته  في اغلب الاوقات بتقلب بنكد ... ويمكن بعد فترة من الزواج يصبح لا يجرء علي صحينها لانها بتتحول الي كائن غريب... ولاااااا عادات الاكل وطرق الطبخ... وطريقة النوم .... 
في اللي بينكش في السرير  ويأخذ تلتينه  وفي اللي بينام علي سيفه ما يتحركش...
وفي ستات ايضا بتفاجئ بعادات  لم تعتاد عليها ولم تتعامل معها من قبل....
يعني مثلا ممكن تلاقي الراجل يعتاد علي دخول الحمام فترة طويله ويأخذ كل وسائل الترفيه معه من اول السجاير لغاية I pad .... ولا الاكل واصنافه واوقاته ... في ست تفاجئ ان جوزها مايكلش غير الاكل التقليدي "المحمر والمشمر"  وفي راجل تاني خفافي بطاطس ومكرونه ... وفي رجاله بتحب تتعشي بالغدا ولا تعترف بالجبن ....... وكمان ممكن تلاقي الست اتصدمت بموضوع المكواة والغسيل  والقمصان والياقات..... 
 كل هذة الصدمات في اللي بيتجاوزها وفي اللي بيجبر علي تجاوزها وكل واحد حسب قوة احتماله....
مش معني ان سنه اولي عديت يبقي الحياة اصبحت ورديه ... لااا لسه التقيل جاي ورا ... هي سنه اولي دي تعتبر الاساس اللي بترموا عليه باقي العمدان ..... 

الراجل من دول الطلبات بتكتر فوق دماغه والصدمه تكبر وتكبر ... والست تصبح هي محور كل شئ ..... فتلاقي من الاخر الزوجين اصابتهم التناحة الزوجيه ... ودي بتبان في حاجات كثير ومواقف حياتيه بينهم ... وتسير الحياه بشكل روتيني لدرجة انهم بعد فتره بيفقدوا متعة كل شئ ممكن يجمعهم من كثرة ما يتعرضوا له من صدمات.....
 تبدأ الست  تقول انا كان مالي ومال الجواز والمسؤليه  ويرد عليها الراجل ....انا كمان كنت متهني وامي مدلعاني ومبغدداني 

وتتغير شكل الحياه اكثر عندما يصل الولاد......  تزداد المسئوليه وتتكعبل الحياة شويه ولكن يمزج معها احساس غريب  فيه خوف وقلق وحب .... وتزداد حيرتهم اكثر ويبداوا في اعادة ترتيب اولويات حياتهم من عادات او احتياجات حتي تتوائم مع الاولاد...
تلاقي الاب ... لو ابنه قال له "يا بابي شلني علي كتفك ولف بيا " الاب يعملها وهو فرحان ومبسوط.... بالرغم  من انه عمره ما فكر يشيل مراته الا يمكن ليلة الدخله.... 
وكذلك الست لو ابنها قرر يقعد علي رجلها علشان ينام او يتفرج علي التلفزيون او حتي ينكش بايده في ودنها او شعرها ... هتستسلم وتسيبه لمجرد انها تسكتوا ... بالرغم لو جه حبيبك وراجلك يهزر معاكي في وقت انتي مقريفة هتسمعيه ضرر "هو دا وقته -  عندي حاجات عاوزه اعملها " اي هبل .. تخليه يندم علي هزاره معاكي 
الخلاصة رساله الي كل اب وام قبل ما ولادكوا يتجوزا اتكلموا معاهم ، نصحوهم ، صارحوهم ... في حب وكمان في خناق وزعل .... في فسح وخروج وكمان في تقشف ومسؤليه ... في جمعيه للمدارس ويمكن في اقساط للاحتياجات ... 

الست بين المرمطه والبغدده

الست بين المرمطة  والبغددة!!!!!!!!

ايه الفرق بين الست  والست ...ومين يحدد ان الست دي تبقي مدلعه ومبتبغدده و ست اخره متمرمطه ومتهربده .....

انتِ من تحددي مرمطتك او بغددتك بيدك ... ياعني جوزك علي متعوديه وابنك علي متربيه ......

 وفي الحقيقة... لا يوجد معيار ثابت .... ممكن الست كانت  مدلعة في بيت ابوها  ... عندها اللي بيعملها ويوديها و يجبلها ... وتروح بيت جوزها "تنشف وتسترجل"  باسم الحب واثبات الذات ويعتاد كل من في البيت علي انكِ تقومي بعمل كل شيء....  وكل ما اكلته بط بط يطلع عليها وز وز ...............

ويمكن العكس انها كانت "البكرية"  في بيت ابوها....  فتتعظ ولما تروح بيت جوزها تعمل فيها المستهبله سنين .... اي حاجة تتطلب منها تقول "ما تعرفش"   ..... وتتعلم ببطء جدا لغاية لما تخلي الراجل يبوس ايده وش وظهر انها  عرفة تعمل رز او راضية تنزل تعمل مشوار بالعربية طبعا مش مواصلات..... ولكن لا يوجد معيار ثابت

مين اللي يحدد ؟؟؟؟  هل الخبرات السابقة في حياة الست ام  شخصية الراجل!!!!!

البنت طالعه من بيت : الام تعمل كل حاجة والاب علي طول الخط مشغول ... هي من تقرر في كل شيء الا ما ندر وفقا لأهمية القرار ...... الام تودي الدكتور والتمارين وتذاكر ... وتقوم بكافة المشاوير الخاصة بالراجل من دفع الفواتير الي متابعة السباك والنجار وصولا الي السوبر ماركت والشوبينج  ..... 

وعندما يحين الوقت لتصبح البنت  ست في اغلب الاوقات تعمل مثل امها الا في حالة ان راجلها حب يشارك في بعض الامور الطفيفة  التي علي هواه ... وطبعا هو اللي يحدد ممكن يعمل ايه  وميعملش ايه....

في اخريات طالعين من بيت : الاب بيعمل كل حاجه من منطلق ان الست ممكن تعك وهي اكيد مش زاي الست الوالدة حكيمه في قررتها وتقدر تدير بيت... اما الزوجه لسه كتوموتو وصغيرة – واتجوزتها ليه مستنتش تكبر شويه  وتصبح في حكمة الست الوالدة.......... اصله لو سبها تدير او تتخذ قرارات مش بعيد ينعك في مشاكل اكبر.... وفي هذا الحال .......... الراجل يحدد الادوار مين يعمل ايه

 وتصبح الست هنا مبتبغدده في عرف الست المتمرمطه ولكن طبعا بنسب

 ولو حصل ان الست المبتبغدده  قابلت الست المتمرمطه يبقي الحوار كله  احقاد وغل من ناحية واستنكار واندهاش من جه اخري.....

تلاقي الست من دول بتقول اصل انا مقدرش اروح  لغاية  كارفور لوحدي  اصلي متعودتش ... جوزي بيقلق عليا جدا .... ولو نظرت في وجه الأخرة تلاقي علامات الإزبهلال تنط من وشها.... وتلاقيها في بالها تقول "يا حسرة عليا "....... انا بعمل مشواير بعدد شعر راسي ولا حتي يسأل انا فين وبعمل ايه.....

او تلاقيها بتقول  انا محتاجة سباك جدا بقالي اسبوع  ومش عارفة اعمل ايه

 

فردت عليها وقالت  طب....... ماتجيبي سباك ..........ابعتلك نمرة واحد كويس

وردت عليها لاااااا........ ان اعرف سباك ولكن جوزي مش فاضي ... اصلي مقدرش  اجيب سباك في البيت من غير جوزي ما يكون موجود

وظهرت علامات الشيب علي وجه  الست المتمرمطه .... وتذكرت لما السباكه ضربت وحاولت ما بوسعها لتسليك الحوض بنفسها ويأست وارسلت للسباك وقضيت معه سهره كلها تسليك بلاليع ومجاري.....

 لازم نقدر الست الشقيانة ...اللي بتعمل كل حاجة بنفسها ...من اول اصغر شيء لغاية اكبر شئ ودا بجانب شغلها ...

نفسها   حد يقولها لاء بلاش المشوار دا ممكن تتعبي فيه .... او خليكي متنزليش دلوقتي لاحسن الجو متأخر عليكي .... او استحاله تسافري لواحدك الطريق خطر الايام دي .....

 ممكن تتنقطي اكثر لما تلاقي هو هو الراجل اللي بيتعامل معاكي انك بطل خارق تقدري تعملي كل حاجة ....يقول لك ان هو رايح يوصل اخته او بنت خالته او حتي خالته لانها كوتو مبتعرفش  ومش متعوده

طب انا كمان مبعرفش ومش متعوده .............